Jehovab ge nî hui da î da ǂkhîba hō

1-2. (a) Mâ ǃgomsinan ǂgui khoena nētsē ra hōǃâ? (b) Tae-e da nē ǁkhāǁkhāǃâs ǃnâ nî ǃhoaǃgao?

ǂGUI khoen ge nētse ǃkharagagu xūna ra dītsâ în ǂkhîba hō. Matikōsen ra dītsâ xawen ge ǂkhî tama. ǂGui khoen ge a ǂkhîoǃnâ xūn ǁîn ǀkha tātsē ǃgâi tide din ra tsâ amaga. Jehovaba ra ǃoaba khoen tsîn ge ti a tsâ ǁkhā. ǀUni tsēdi ǃnâ da ûi hâ amaga da ge ǃâubasen hâ, ‘kaise ǃgom ǁaegu nî hâsa.’—2Tim. 3:1.

² Nē ǁkhāǁkhāǃâs ǃnâ da ge nî ǃhoaǃgao tae-i ra ǂkhîoǃnâ kai dasa tsî tae-i nî hui dasa î da ǁnā ǂkhîba hō-oa. ǂGurose, hā re î da ǃhoaǃgao ham-i nî hui da sa î da nē ǂkhîba hō-oa.

JEHOVAB GE NÎ HUI DA Î DA AMA ǂKHÎBA ŪHÂ

3. Kurusa tae-e Jehovab xa ra ǁkhāǁkhā da? (Ai-īsiga mû re.)

³ Jehovab ge hoaǁae a ǂkhî. ǁîb ge ra ǂhâba î da sida tsîna ǂkhî. Jehovab ge ǁnā-amaga ǂgui xūn sida ra ǂkhî kaina ge kuru. Aiǁgause, ǂkhî da ge a ǃhūbaib îsa kurus, xamanin a ǂkhî ǀgaus tsî ǁkhoaxaba da a ǂûna da ga ǂû o. Jehovab ge ama ǀnam da tsî ra ǂhâba î da ǃgâiaǂgao.

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Jehovaba tae-i ǃaroma a ǂkhî khoen ǃgomsina ra hōǃâ xawe? (b) Tae-i ǀkhaebab ge Jehovaba mā da? (Psalmdi 16:11)

⁴ Jehovab ge ǁîb khoen ǃgomsiga ǂgaiǀkhā tama hâ. ǁÎb ge hōǃâ da ra ǃgomsinab ra mû o ra tsûaǂgao. Elobmîs ge ǁîba ‘ǂkhîb di Elob’ ase ra ǁguiǃā. (1Tim. 1:11) Tae-i ǃaromab Jehovaba ǂkhîse ra hâ ǀgara? ǀGui ǃaromas ge, ǀnaib ge a ǂan mâ tsēb tsûaǂgaob tsî ǃgomsina nî ǀam kaisa. ǁNā ǁaeb nî hās kōseb ge Jehovaba ra ǁnâuǃā tae-e da ra ǃkharuǃnâ sa tsî ra hui da ǂgao. ǁÎba mati ra hui da? ǀGui xū-i ge ǁîb ge ǃgâiaǂgaob di ǀkhaeba ge mā da. (Khomai re Psalmdi 16:11 sa.) Hā re î da kō Jehovaba ǂans ge mati Jesuba a ǂkhî kaisa.

5-6. Jesuba tae-i ǃaroma a ǂkhî?

⁵ Jehovab ge kuru khoen hoan ǃnâb ge Jesuba a ǂkhî. Tae-i ǃaroma? ǀGam ǃaroma ra ǃgaoǃgâ re. (1)ǁÎb ge ǁîb dadasab khami ī, ǁnā-amagab ge a ǂkhî “kurus di ǂguroǃnaesab ge a Elob mûheǁoasab di ī.”(Kol. 1:15) (2) Jesub ge ǃnāsa ǁaeba ǀguri dadasab ǀkha ge hâ i.

⁶ Jesub ge hoaǁae a ǂkhî ǁîb dadasab ra ǂgaoǀkhabi xū-eb ra dī amaga. (ǂKhm. 8:​30, 31; Jhn. 8:29) ǁNās ǃaromab ge Jehovaba ǁîb ǀkha a ǂkhîǂâixa.—Mat. 3:17.

7. Mati da ama ǂkhîba hō ǁkha?

⁷ Sida tsîn ge ama ǂkhîba nî hōǃâ aiǃgû tsî da ga Jehovaba ǂano. ǁAeba ǁamaǂui tsî da ga Jehovab ra tsâ tsî ǂâiǀgauba ǁkhāǁkhāseno, da ge ǁîba ǃgâise nî ǁgae. Sida tsîn ge ǂkhîba nî hō Jehovab ra ǂgaoǀkhā da xūna da ga dī tsî ǂano ǁîb ǁnās xa a ǃgâibahesa.a (Psa. 33:12) Xawe da ge ǀnîsi ǁaeba xu ǁaeb ǀkha ǂkhîb tsâsiba a ǂoaǃnâ ǁkhā. Nēsa ra ǂâibasen Jehovab sadu ǀkha ǂkhî tamasa? Hî-i. Jehovab ge ra ǁnâuǃā nē ǃhūbaib ǃnâ da ǀnî ǁaega ǂkhîoǃnâsa tsî tsûba ra hōǃâsa. (Psa. 103:14) Hā re î da ǃhoaǃgao tae-i a ǂkhîoǃnâ kai da ǁkhāsa tsî tae-e da a dī ǁkhāsa î da sida ǂkhîba hō-oa.

ǂKHÎOǃNÂ KAI DU NÎ XŪNA ǂANBASEN

8. Tae-e sida ǀkha nî ī ǃgomsina da ga hōǃâ o?

⁸ ǃGomsina da ga hōǃâ o. ǀNîsi du ge ǃgâi tamase ra hâ-ūhe Jehovab ǃoaba-ao du a amaga. Tsî du ge tsūkeǃgâb, ǀaeb tamas ka io ǀgâb, kairasis tsîna ra hōǃâ. Nē ǃgomsin ge ǂkhîoǃnâsiba a ǃaroma ǁkhā, ǃgōsase da ga mâsiba dawa tamas ka io ǁkhae ǁoa o. Elobmîs ge ra mî, “xawe tsûaǂgaob xas ge gagasa ra ǂkhū.” (ǂKhm. 15:13) Babis ti ǀon hâ ǀhaohâb ǃûi-aob ge ǁîb abutib tsî ǁgûra tsîna ǁob ǃnâ saogu ra kurigu ǃnâ ge ǂoaǃnâ. ǁÎb ge ra mî: “ǀGuri tsî huioǃnâse ta ge gere tsâ. ǁNî ǁaega ta ge kaise gere ǂâiǂhânsen ǁon nîs aiǃâ ta ge ǁîn ǀkha ǁkhoaxa ǁaeba ūhâ tama hâ i ǃkhais ǃgao.” ǁNās ǁkhās khamin ge sida ǃgomsina a ǃgomba da ǁkhā. Nēs ge tsaub tsî ǂkhabuǂâis tsîna ǃaroma ǁkhā.

9. Tae-e nî hui da î da Jehovaba ǂkhîb ǀkha ǃoaba? (Jer. 29:​4-7, 10)

⁹ Sida ǂkhîba hō-oas ǀkha i tae-e hui da ǁkhā? Dawa ǁoa da a xūn xa da ga ǂâiǂhansen ǀû, o da ge ǃgâiaǂgaob tsî ū da hâ xūna xu ǃgâiba a ǀama ǁkhā. Nē da ûiǃnâ hâ ǃhūbaib ge ra ǁgau ǃgomsioǃnâ ûiba da ga ūhâ, o ǀgui da nî ǃgâiaǂgaosa. Xawe nēs ge ama tama. Aiǁgause Jehovab ge ǁîb khoen hîna ge Babilonsa ǃoa a ī-ūhena ge mîba în ǁkhān ase dītsâ tsî ǃgâi ûiba ūhâ. (Khomai re Jeremiab 29:​4-7, 10 sa.) Tae-e da nēsa xu ra ǁkhāǁkhāsen? Dītsâ tsî sadu mâsiba ūǃoa tsî ûib ǃnâ du ūhâ xūna ǃgôaǃgâsiba ǁgau. ǂÂis ǃnâ ūhâ Jehovab ge ǁnāxuǃnâ du tide tsî nî hui du. (Psa. 63:7; 146:5) Effie ti ǀon hâ ǃgâsas tsūkeǃgâb khaoǃgâ ge ǃhoras ge ra mî: “Kai huiba ta ge khoena xu ge ǃkhōǃoa tsî ta ge Jehovab, ti omaris tsî ǀhaohâb xas tsîna ge ǂkhâǃnâhe. ǀÛsen ta ga, o ta nē huiba ǃgôaǃgâ tama khami ta ge gere tsâ. ǁÎn ge dība te xūn tsî noxoba ra dība te na ta ra ǃgôaǃgâ ǃkhaisa ta ge ra ǁgau ǂgao, ǁnās ǀkha ta ge aiǃgû tsî ǂkhîse ra hâ tsâ.”

10. ǃGomsina da ga ūhâ xawe da tae-i ǃaroma ǂkhîba a ūhâ ǁkhā?

¹⁰ ǃGomsina da ga ūhâ tamas kai on ga ǁgai xūna sida tamas ka io sida omaris ǁanina a tsâǀkhā xawes tsîna da ge noxopa ǂkhîba a ūhâ ǁkhā.b (Psa. 126:5) Tae-i ǃaroma? Ū da hâ ǂkhîb hâǃnâ da hâ mâsiba xu hā tama hâ amaga. ǁNaetisa aimâba-aos Marias ge ra mî: “ǃGomsina du ra hōǃnâ ǁaeb ai ǃgâiaǂgaos ge ǂâibasen tama tsâ du ra tsâsin ǀkha du ǁae tamasa. Xawe nēs ge ra ǁgau sadu Jehovab mîmâisa ǀuru tamasa. Sida ǁGûb ge nî hui da î da ǃgâiaǂgao ǃgomsina da ga hōǃâ xawe.” ǂÂis ǃnâ ūhâ, nēsin ga xūna ǁgaise mûsen xawen sida ǃgomsina ǁaerob dis ǀguisa īsa. ǀGūǁaeb ge Jehovaba ǃgomsin tsî tsûaǂgaob tsîna ra ǃaroma xūn hoana nî ūbe.

11. Apostel Paulub aiǁgausa mati sado ra ǂkhâǃnâ?

¹¹ ǀNî ǁaega da ge Jehovab ǁae ū da tama amaga da ǃgomsina ra hōǃâ khami a tsâ ǁkha. Nēti da ga tsâ o da ge ǂgomǂgomsa ǃoaba-aon Jehovab din ǃgom mâsiga gere hōǃân aiǁgaudi xa a ǂâiǃgâ ǁkhā. Apostel Paulub aiǁgausa ǃgaoǃgâ re. Jesub ge ǁîba ge ǁhûi îb “gao-aogu tsî ǁkhāti Israelǁîna” ǃgâiǂhôasa mîba. (ǃNǃkh. 9:15) Jesub ge Pauluba ǂhâǂhâsa sîsen-e ge mā. Xaweb ge Pauluba noxopa ǂgui ǃgomsina ge ūhâ i. (2Kor. 11:​23-27) Paulub ǃgomsin ǀam tamase gere mûsena gere ǁgau ǁîb ge Jehovab xa ūǃoahe tama hâ isa? Paulub ûib ge supu tama hâ xawe i ge ǃgāsase ra ǁgau Jehovab ge ǁîb ǀkha ǂkhîǂâixa isa. Amase Paulub ge ǁîb ǃgomsin ǃnâ gere mâǀgais ge ra ǁgau Jehovab ge ǁîba gere huisa. (Rom. 5:​3-5) Sadu hâǃnâ mâsib xa ǂâi re. Aiǃgû tsî du ge Jehovaba ǂgomǂgomsase ra ǃoaba ǃgomsina du ūhâ xawe. ǁNās ǀkha du ge ǂgomǃgâsiba a ūhâ ǁkhā Jehovab xa du ra ûǃoahesa.

12. Dīǀoaǀoahe tama hâ ǃâubasende mati sida ǂkhîba a tsâǀkha ǁkhā?

¹² Dīǀoaǀoahe tama ǃâubasendi. (ǂKhm. 13:12) Jehovaba da ge kaise a ǀnam tsî ǁîb ra dība dan hoana ra ǃgôaǃgâ. ǁNā-amaga da ge ǁîb ǃoabas ǃnâ da a dība bi ǁkhā xūn hoan xa ra ǂâi. Sida mâsib xa ǃaromahe hâse da ga dī ǂgao da ra xū-e dīhō tama io da ge a ǂkhabuǂâi ǁkhā. (ǂKhm. 17:22) Aimâba-aos Holly ti ǀon hâs ge ra mî: “Tita ge Gaosib aoǁnâ-aon skola gere hâǃnâ ǂgao, ǂhâsib hâba sī gere ǃoaba ǂgao tamas ka io Amerikab ǃnâ ǀasase ra omhe betels oms sîsengu ǃnâ gere ǁhao ǂgao. Xaweb ge ti mâsiba ge dawa tsî ta ge ǁnā mîǁguiga ge sīǃnâ hō ǁoa i. Kaise ta ge ge tsûaǂgao. Dī ǂgao ta gere xū-e ta ge dīhō ǁoa is ge kaise gere ǀara kai te.” ǂGui ǃoaba-aon Jehovab din tsîn ge ǁkhā tsâsiga ra hōǃâ, dī ǂgaon ra xūnan Jehovab ǃoabas ǃnâ dīhō tama amaga.

13. Mâ xūna da a dī ǁkhā ǃkharagagu mâsigu ǃnâ da ra hōsen khami?

¹³ Tae-e nî hui da î da ǁkhawa ǂoaǃnâ da ge ǂkhîba hō-oa? ǂÂis ǃnâ da ge nî ūhâ Jehovab ge ǃgariǂgaoxa tama tsî ǁkhā tama da hâs ǂam-ai ǂgaoǀkhā da tama. Jehovab ge ra ǀgapiǃgôa da naun ra dī xūna da ga dīhō tama i xawe. ǁÎb ge ra ǂhâba î da ǃgamǃgamsenxa tsî ǂgomǂgomsasib tsîna ǁgau. (Mix. 6:8; 1Kor. 4:2) Jehovab ge sida ǂgaogu ǃnâ i tae-e ra īs ǀkha ǁae hâ tsî dī da ran ǀkha ǁnātikōse ǁae tama hâ. ǁNā-amaga da ge Jehovab tae-e sida xu ra ǃâubasens xa tā ǃnāsase nî ǃâubasen. Jehovab ǃoabas ǃnâ du ǁîba a dība ǁoa xūn xa ǂâis xa ǁîba du a dība ǁkhā xūn xa ǂâi re. Aiǁgause du ge ǂkhamkhoe-e a ǁkhāǁkhā ǁkhā tamas ka io kaira ǃgâsana a ǂkhâǃnâ ǁkhā. ǀNîsi du ge a mîǁgui ǁkhā khoe-e sari tamas ka io bel tsî ǂkhâǃnâsa. Sadu a ǁkhā xū-e du ga dī, ob ge Jehovaba kaise ra ǃgâiaǂgao tsîb ge ǂkhîb ǀkha nî ǀkhae du. ǂÂis ǃnâ ūhâ hānîǁaeb ǃnâ da ge Jehovaba ǀoasase ǂgui ǀgaugu ǃnâ nî ǃoaba. Hollys ǃkharu go xoaǀgoras ǃnâ da go ǃhoaǃgaos ge ǀams ai ra mî: “Tsûaǂgao hâse ta ga tsâo, ta ge aibe mâ tsî ra ǂâi-oa ǀamosib kōse ta nî ûisa. Tsî ta dī ǂgao ta ra xūna Jehovaba nî dībasa ǀasa ǃhūbaib ǃnâ ǁîb huib ǀkha.”

14. Mâ ǀnî xū-e sida ǂkhîba a ūbe ǁkhā?

¹⁴ Mari-i tamas ka io ǀnî hâ xūn ai da ga ǂgomaiǂnûi o ǃgâiaǂgaos ǃaroma. Internets ǂhawegu ai da ge ǀnîsi a mû ǁkhā matin khoena ǁkhoaxa ǁaeba ūhâsa, ǃgâiaǂgaoban ra ǁgauǂûi amaga. ǀNîsi da ge a ǂgom tsoatsoa ǁkhā ǃgâiba da a xūna dī, ǁāma tsî da ga ǃkharagagu ǃkhaide ǃoa a sario, da ama ǃgâiaǂgaoba nî ūhâsa. Tsū tama i ge hâ ǁkhoaxaba da a xūna dīsa. Jehovab ge ǂhâba hâ î da ǁîb ge kuru xūna xu ǃgâiba ǀama. ǂGui khoen aitsama ǂkhîǂkhîsensa a dītsân ge ega ge mûǂan dīn, gere xūn ge ǃgâiaǂgaoba mâ nî tama hâ isa. Aimâba-aos Eva ti ǀon hâs ge ra mî: “ǃGâi ǁaeba ūhâs xa ǀguits ga ǂâi, ots ge hoaǁae ǃnāsa-i ǀgui-e ra ǂhâba.” Hoaǁae da ga ǂkhîǂkhîsen ǂgao, o da ge ǁaixa tsî nî tsûaǂgao.

15. Gao-aob Solomonni aiǁgausa xu da tae-e ra ǁkhāǁkhāsen?

¹⁵ Gao-aob Solomonni aiǁgausa xu da ge ra ǁkhāǁkhāsen, aitsama ǂkhîǂkhîsens ūhâ sîsenǂûiba. Gao-aob Solomonni ge ǃkharagagu xūna gere dī îb kō ǁîn ǃgâiaǂgaoba a mā bi ǁkhasa. Aiǁgauseb ge ǃkharagagu ǂûna ǂû, îxa ǀnōsa amde ǃgâ tsî ǂgui mari-e ra ǂgan xūna gere ǁama. Xawen ge nē xūna ǁîba ǃgâiaǂgaoba ge mā tama hâ i. ǁÎb ge ge mî: “Mûdi âda ge mûǂâu tide tsî ǂgaedi âda ǁnâuǂâu tide.” (Aoǁn. 1:8; 2:​1-11) ǀNî khoen ge ra ǂâi mari-e ūhâ tsîn ga ǂhâban ra xū-e dī, on nî ǃgâiaǂgao ti. Xawe ǁnāb ge a ǂhûmi, nē xūn ge tātsē ǃgâiaǂgaoba mā da tide.

16. Tae-i ǃaroma da nî ǃgâiaǂgao nauna da ga xūna dība o? (Ai-īsiga mû re.)

¹⁶ Tae-e nî hui da î da ǁkhawa ǃgâiaǂgao? Jesub ge ge ǁkhāǁkhā da: “Mās ge ǃkhōǃoas ǃgâ-ai ǀkhaesa.” (ǃNǃkh. 20:35) Alekos ti ǀon hâ ǀhaohâb ǃûi-aob ge ra mî: “Tita ge ra dītsâ ǂkhariro xurona nau khoena dībasa. ǁÎna ta ra hui o ta ge tita ra ǂhâba xūn xa ǂâi tama hâ tsîs ge nēsa ra ǃgâiaǂgao kai te.” Nauna du tae-e a dība ǁkhā? Khoe-i ǂâiǂhânsen ra-e du ga mûo, ǁî-e ǂkhâǃnâ re. Nē khoe-i ge ǀnîsi ǃgâise nî tsâ, ǁî-i ga ǃhoa ǁaeb ai da ga ǃgaoǃgâxase ǃgâ tsî ǁî-i ra tsâ ǀgauba da ra ǁnâuǃāsa ga ǁgauo. ǁÎ-e hōhōǃnâ re ī-i Jehovaba tsâ i ra ǀgauba mîba, ǁîb ǁî-i ǀkha ǁae hâ amaga. (Psa. 55:22; 68:19) ǁÎ-e ǂgomǃgâsiba ǁgau re Jehovab xa i ǁnāxūǃnâhe tidesa. (Psa. 37:28; Jes. 59:1) ǀNîsi du ge ǁî-e khoexaǃnâ xū-e a dība ǁkhā, aiǁgause ǂû-e sâiba tamas ka io ǁî-e ǂgan ǁkhā î ro ǃgû-mâ. ǁÎ-e du ge aoǁnâ sîsenne ǃoas tsîna a ǁkhau ǁkhā. Nau khoen ǀkha ǃgâiǂhôasa ǀgoragus hoaǁae ra ǃgâiaǂgao kai da amaga. Mâ-am re îb Jehovaba sîsenū du nauna ǂkhâǃnâs ǃnâ. Sida ǁaeba da ga sîsenū nauna huisa, o da ge kaise ra ǃgâiaǂgao.—ǂKhm. 11:25.

17. Tae-e da nî dī ama ǃgâiaǂgaoba da ga ǂhâbao? (Psa. 43:4)

¹⁷ Aiǃgû tsî da ga Jehovab xa ǃnāsase ǁkhāǁkhāsen tsî ǁîba a ǂkhîǂkhî, o da ge amase nî ǃgâiaǂgao. Elobmîs ge ǂgomǃgâsiba ra mā da, Jehovab “ǃnāǂamsa ǃgâiaǂgaoba” nî mā dasa. (Khomai re Psalmdi 43:4 sa.) Nēsi da ga ǃgomsina a ūhâ xawe i ge ǂhâbasa tama î da ǂâiǂhânsen tamas ka io ǃao. Jehovab ga sida ǀhōsa ob ge nî hui da î da ǀamosib kōse ǃgâiaǂgao.—Psa. 144:15.