Kuhitila Muli Yoano
2 Ha litangua lia mu citatu, kuakele cilika ca vulo ku Kana ya mu Ngalileya kaha naye ya Yesu nendi kuakele. 2 Yesu na vandongesi vendi, navo vava lanyene ku cilika caco.
3 Vunoni vinyu mu via huile, naye ya Yesu uamu lekele nguendi: “Kavesi na vinyu.” 4 Yesu uamu kumbuluile nguendi: “Ovio haka via likuatela netu?* Ola yange kanda ici hete.” 5 Kaha naye ua lekele vaze vakele na kupanga nguendi: “Lingenu viose via mileka.” 6 Ku cihela caco kuakele vinjava 6 via kupanga ha mavue, viva hakele mema aku lilelesa kuliya na lisiko lia vaYundeya. Kaha njava ku njava, ya hasele kukovela viseteko* vivali ni vitatu via mema. 7 Yesu uava lekele nguendi: “Sulisenu vinjava na mema.” Ngeci vavi sulisile naha milungu. 8 Kaha uava lekele nguendi: “Kupulenumo mu tuale kuli ntuamena ua cilika.” Ngeci va tualele. 9 Omo ntuamena ua cilika ua makelele aze mema ahimpukile vinyu, vutuhu ka tantekeyele kuiko ya tundile (vunoni vakua kupanga va tekuile mema va tantekeyele), ngeci ntuamena ua cilika ua sanene sandungi 10 naku muleka nguendi: “Vantu vose ve kulivanga kupangela vinyu via cili, kaha nga vantu va na pende ava hana via kusamuka. Vunoni ove una tulika vinyu via cili na ola ino.” 11 Eci citantekeyeso ca kakete, Yesu ua cilingilile ku Kana ya mu Ngalileya kaha ua soluele vumpahu vuendi, ngeci vandongesi vendi vamu tsilielele.
12 Mu nima yevi, nendi na naye na vantsongo vendi, kaha na vandongesi vendi va sikulukile ku Kapenama, vunoni ka vaka keleko matangua a engi.
13 Paskua ya vaYundeya yakele mu hiehi kaha Yesu ua kandukile ku Yelusalema. 14 Mua kovelele mu tembele, ua uanene vakua kulandesa vangombe, vampanga, mavembe na vakua ku landakana* vimbongo va na tumama ha vituamo viavo. 15 Mu nima ya kupanga likote lia mikole, ua sekuile vose vakele na vampanga na vangombe mu tembele. Kaha ua lundumuine vimbongo via vakua ku landakana naku fulumika* vimesa viavo. 16 Ua lekele vose vaze vakele na kulandesa mavembe nguendi: “Tundisenu evi viuma muno! Kati mu pangese ndzivo ya Tata kupua ndzivo ya mingoso!”* 17 Vandongesi vendi va vulukile mezi ava soneka nguavo: “Ntuima injili nayo kutuala ha ndzivo yove injilia.”
18 Omo liaco, vaYundeya va muihuile nguavo: “Citantekeyeso cika utu muesa linga tukale na vusunga nguetu, uli na mpoko ya kulinga evi viuma? 19 Yesu uava kumbuluile nguendi: “Puzulenu eyi tembele kaha nji itungulula mu matangua atatu.” 20 Ngeci vaYundeya va handekele nguavo: “Eyi tembele iva tungile mu miaka 46, yove nguove u itungulula mu matangua atatu?” 21 Vunoni uakele na kuhandeka via tembele ya muvila uendi. 22 Mua sangukile ku vatsi, vandongesi vendi va vulukile nguavo, uavi handekele. Ngeci va tsilielele Visoneka na viuma via handekele Yesu.
23 Vunoni omo uakele mu Yelusalema ku cilika ca Paskua, vantu vavengi mu va muene vitantekeyeso viakele na kulinga, va tsilielele mu lizina liendi. 24 Vunoni Yesu ka va kulahelele mu vutuntu muomu uava tantekeyele vose. 25 Cikuavo naua, ka tondekele vamu lumbunuine cifua ca vantu muomu ua tantekeyele viakele mu mitima yavo.