Kuhitila Muli Mako

9 Kaha uava lekele naua nguendi: “Nji mileka vusunga nguange, kuli vamo va nemana hano kava katsi kuvanga va na mono Vuangana vua Njambi vuneza mu ngolo.” 2 Mu nima ya matangua 6, Yesu ua sanene Petulu, Tiango na Yoano na kuya navo ku umo muncinda ua laha kua likaliavo. Kaha ha meso avo vene, Yesu ualulukile.* 3 Vuzalo vuendi vua viakuile mua kama, kaha vua tokele cikuma mu cifua ca kulinga ambe mukua kukusa ua vutongue hano ha mavu, kahasa ku vu tokesa ngoco. 4 Kaha va muene naua Eliya na Mosesa va simutuila na Yesu. 5 Ngeci Petulu ua lekele Yesu nguendi: “Lambi, cacili nga tu kala kuno vene. Citava tutunge vimbalaka vitatu, imo yove, imo ya Mosesa ikuavo co ya Eliya.” 6 Petulu ka tantekeyele via kuhandeka, muomu uavuile liova lia kama. 7 Kaha kuezile liselua lia va fuikile, mu liselua liaco mua tundile lizi ngualio: “Ou ikeye Muanange, inja lema. Mu halakanenu.” 8 Haze vene, va talele noku-noku, vunoni ka va muene naumo uahi kuvanga Yesu lika.

9 Omo vakele naku sikumuka ha muncinda, Yesu uava vindikile nguendi kati va lekeko naumo uahi viuma viva na mono, noho Muana muntu na sanguka ku vatsi. 10 Va niungile mezi aco mu mitima yavo, vunoni vakele naku simutuila hakati kavo kutuala ha vika ca lumbunuka kusanguka ku vatsi. 11 Ngeci va putukile ku muihula nguavo: “Omo lia vika vakua kusoneka ve kuhandeka nguavo Eliya na pande kulivanga kuiza?” 12 Yesu uava kumbuluile nguendi: “Mukemuo vene, Eliya alivanga kuiza kaha a kuhiluisa viuma viose ngue mu viafuile ha katete. Vunoni, omo lia vika va sonekele kutuala hali Muana muntu nguavo na pande kuhita mu tuyando tua tuingi naku mu sahula? 13 Vunoni nji mileka nguange, Eliya neza laza vunoni ka vamu tantekeyele kaha vamu lingile viuma viose-ovio viva zangele ngue mu va soneka kutuala hali ikeye.”

14 Mu va hetele kuze kuakele vandongesi vakuavo, va muene mbunga ya kama yava zengeleka. Kaha vakua kusoneka vakele na kulinga navo vimpata. 15 Vunoni mbunga muya mu muene, ya likomokelele mua kama ngeci ya mu tuntilile naku mu sambelela. 16 Ngeci ua vehuile nguendi: “Omo lia vika muli na kulinga navo vimpata?” 17 Kaha umo yala uakele mu mbunga uamu kumbuluile nguendi: “Mulongisi, nji naku nehelele muanange ua yala muomu ali na sipilitu ueku mu honouesa kuhandeka. 18 Hose he kumu kuatela, ueku mu uisila ha mavu na kututumuka lifulu ku kanua kaha aka lisumu ku mazo, na ndzili ye ku muhua. Ngeci njina pingile vandongesi vove va tundise sipilitu uaco, vunoni kava hasele.” 19 Yesu ua kumbuluile nguendi: “Enu vakua muyati ua kuhona lutsilielo, ntsimbu ingahi njika tualelaho kukala nenu? Ntsimbu ingahi njika mi yandela? Mu nehenu kuno.” 20 Ngeci vamu neheleleye, vunoni uze sipilitu mua muene Yesu, ua shinyisile mua kama uze kanike. Kaha mua uile ha mavu, ua putukile kulialanga naku tutumuna lifulu ku kanua. 21 Kaha Yesu uehuile ise ya kanike nguendi: “Muaka uka ou musongo uamu putuka?” Ua kumbuluile nguendi: “Tunde vene ku vunike vuendi, 22 vintsimbu viavingi ueku mu uisila mu tuhia namu mema linga amu tsihe. Vunoni nga uhasa kulingako mumo, tuvuileko ngozi naku tu kuasa.” 23 Yesu uamu lekele nguendi: “Omo lia vika ua handekela nguove, ‘Nga nji hasa’? Kuli uose ali na lutsilielo, viuma viose vihasa kulingiua.” 24 Haze vene, ise ya uze kanike ua tambakanene nguendi: “Njili na lutsilielo! Nji kuase haze ha njina hono lutsilielo!”

25 Yesu ua muene mbunga ili na kuiza vuasi kuli ikeye, ua tenukilile uze sipilitu ua kuzuala nguendi: “Ove sipilitu ua vuveveve na vusinda matuitui, nji kuleka nguange, tunda muli ikeye kaha kati uhilukilemo naua!” 26 Kaha mu nima ya ku litetela na kulitunya mua kama, uze sipilitu uamu tundile ngeci kanike ua solokele ngue natsi, kaha vantu vavengi va handekele nguavo: “Natsi!” 27 Ngeci Yesu uamu kuatele ku livoko, uamu hinduile ngeci uemanene. 28 Kaha omo Yesu ua kovelele mu ndzivo, vandongesi vendi va muihuile kua likaliavo nguavo: “Omo lia vika yetu ka tua hasele kumu tundisa?” 29 Uava kumbuluile nguendi: “Sipilitu ua cifua eci, ue kutunda lika na civundilo.”

30 Ngeci va tundile kuze va hitile mu Ngalileya, vunoni ka tondele vantu vavi tantekeye. 31 Muomu uakele na kulongesa vandongesi vendi naku va leka nguendi: “Muana muntu vaka muenda vungungu naku mu hana mu mavoko a vantu kaha vaka mu tsiha. Vutuhu vaka mu tsiha, vunoni ha litangua lia mu citatu aka sanguka.” 32 Vunoni ka vevuisisile via handekele kaha vakele na liova lia ku muihula.

33 Va kovelele mu Kapenama. Kaha omo vakele mu ndzivo, Yesu ua vehuile nguendi: “Vika mu na kala na kulihoya mu njila?” 34 Va holokele kulu, muomu mu njila vakele na kulihoya kutuala hali iya ua kama hakati kavo. 35 Ngeci ua tumamene na kusana vaze 12 naku va leka nguendi: “Uose atonda kupua uaku livanga, na pande kupua uaku manusuila ku vose, cikuavo naua na pande kupua ngamba ya vose.” 36 Kaha uambatele kanike ua mundende naku muimika hakati kavo. Ngeci uamu kuatele naku va leka nguendi: 37 “Uose atambula ou kanike mu lizina liange, nange nanji tambula. Kaha uose anji tambula, ka tambula lika yange, vunoni na Uze uanji tumine.”

38 Kaha Yoano uamu lekele nguendi: “Mulongisi, tua muene umo apangesa lizina liove mu kutundisa vandemone, ngeci tuesekele kumu vindika muomu kapuile umo uetu.” 39 Vunoni Yesu ua handekele nguendi: “Kati mu mu vindike, muomu naumo uahi alinga cikomoueso mu lizina liange kaha mu nima yaco, anji handeka naua mua kuvihia. 40 Muomu uose kesi naku tu luisa ali ku mutamba uetu. 41 Uose ami hana ambe ngandza ya mema a kunua omo lia kupua Vakua Kilistu, mua vusunga nji mileka nguange, muntu uaco aka tambula fueto yendi. 42 Vunoni uose asuntsuisa umo uava vavandende vanji tsiliela, cili kulutue kumu kutiya mu ntsingo livue lia kama lia kutuisa vunga lize lie kuzenga cimulu, naku mu mbila mu kalunga ndonga.

43 “Nga livoko liove li kusuntsuisa, livatule. Muomu cili kulutue uka tambule muono oku uli na vumo vulema, kuhiana kuya mu Ngehena* mu tuhia ka ve kuzima oku uli na mavoko avali. 44—— 45 Kaha nga mukono uove u kusuntsuisa, uvatule. Muomu cili kulutue uka tambule muono oku una tenguka kuhiana va kumbile mu Ngehena* oku uli na mikono ivali. 46—— 47 Kaha nga liso liove liku suntsuisa, liumbile kuti. Muomu ci li kulutue uka kovele mu Vuangana vua Njambi oku uli na liso limolika kuhiana va kumbile mu Ngehena* oku uli na meso avali, 48 muze mavuno kave kutsa na tuhia ka ve kuzima.

49 “Muomu muntu uose va pande kumu tova muongua ua tuhia. 50 Eyo, muongua uapua ua cili vunoni nga usamuka, ndzili yauo ihasa kuhiluka vati? Kalenu na muongua muli enu vavenya kaha kalenu na ciyulo kuli umo na mukuavo.”