Kuhitila Muli Yoano
21 Mu nima yevi, Yesu ua lisoluele naua ku vandongesi vendi, ku cisali ca Timbeliase. Ua lisoluele muze: 2 Simone Petulu, Tomasi (iva sanene naua nguavo Mpasa), Natanele uamu Kana ya ku Ngalileya, vana va Sembendeu kaha na vandongesi vendi vakuavo vavali. 3 Simone Petulu uava lekele nguendi: “Njiya mu kuta vantsi.” Vamu kumbuluile nguavo: “Netu tuya nove.” Ngeci vaile, va londele mu vuato, vunoni vuze vutsiki ka va tsihile intsi naumo uahi.
4 Mu kuaile na kuca, Yesu uemanene ha ntunda, vunoni vandongesi vendi ka va nongonuene nguavo ikeye. 5 Ngeci Yesu ua vehuile nguendi: “Vana vange, muliko na vimo viakulia oko?” Vamu kumbuluile nguavo: “Viahi!” 6 Uava lekele nguendi: “Telenu vuanda ku cilio ca vuato kaha mu uanako vamo.” Ngeci va tele vuanda vuavo, vunoni ka va hasele ku vu koka omo lia kulana ca vantsi. 7 Ngeci uze ndongesi ya lemene Yesu ua lekele Petulu nguendi: “Muangana uze!” Kaha Simone Petulu muavuile nguendi Muangana, ua zalele* cikovelo cendi ca helu, muomu uakele vuntselentsele,* kaha ua liumbilile mu cisali. 8 Vunoni vandongesi vakuavo, vezile na vuato vua vundende oku va kokangeya vuanda vua kusula na vantsi, muomu ka vakele ku lahako na ntunda. Ntunda ya keleho, yapuile lika kampe 90 metru.
9 Mu va hetele ha ntunda, va muene tuhia na vantsi vali ha manungu kaha na mbolo. 10 Yesu uava lekele nguendi: “Nehenuko vamo vantsi va muna tsihi vuovuno.” 11 Ngeci Simone Petulu ua kovelele mu vuato na kukokela ha ntunda vuze vuanda vua sulile na vantsi va kama, va kupua 153. Vutuhu va lanene mua kama, vunoni vuanda ka vua tavukile. 12 Kaha Yesu uava lekele nguendi: “Tuayenu mua ku liaule.” Vunoni naumo uahi ua vandongesi vendi ua simpile mu ku muihula nguendi: “Yove iya?” muomu va tantekeyele nguavo ikeye Muangana. 13 Yesu ua nonele mbolo, uava haneneyo, kaha ua lingilemo naua naku vantsi. 14 Olu luapuile lua mu citatu lua solokele Yesu ku vandongesi vendi mu nima ya kumu sangula ku vatsi.
15 Mu va manusuile kuliaula, Yesu uehuile Simone Petulu nguendi: “Simone muana Yoano, uanji lema kuhiana ava ni?” Uamu kumbuluile nguendi: “Eyo Muangana, utantekeya nguove nja kulema cikuma.” Ngeci Yesu uamu lekele nguendi: “Lisa vana va vampanga vange.” 16 Ua muihuile naua lua mu civali nguendi: “Simone muana Yoano, uanji lema ni?” Uamu kumbuluile nguendi: “Eyo Muangana, utantekeya nguove nja kulema cikuma.” Yesu uamu lekele nguendi: “Niunga tuvampanga tuange.” 17 Yesu ua muihuile naua lua mu citatu nguendi: “Simone muana Yoano, uanji lema cikuma ni?” Petulu uavuile vusiua, muomu Yesu ua muihuile lua mu citatu nguendi: “Uanji lema cikuma ni?” Ngeci uamu kumbuluile nguendi: “Muangana, ove utantekeya viuma viose. Utantekeya nguove nja kulema cikuma.” Yesu uamu lekele nguendi: “Lisa tuvampanga tuange. 18 Mua vusunga nji kuleka nguange, mu uapuile mukuendze, uakele na kulizika yove vavenya na kuya kuose-oko ku ua zangele. Vunoni mu uka kulupa, ukolola mavoko ove kaha muntu ueka aka kuzika, naku kutuala kuntsa ka ua zangele.” 19 Ua handekelemo mu kumuesa cifua ce ku tsilililemo Petulu cize ce ku hele Njambi vumpahu. Mu nima ya kuhandeka ngoco, uamu lekele nguendi: “Tualelaho kunji kava.”
20 Petulu mua tengulukile, ua muene uze ndongesi ya lemene Yesu ali naku va kava, ou ndongesi ikeye vene uze ua tumamene ku mukulo ua Yesu ku kulia ca cinguezi, uze ua muihuile nguendi: “Muangana, iya akuenda vungungu?” 21 Kaha Petulu mua muene uze ndongesi, uehuile Yesu nguendi: “Muangana, amba ou co?” 22 Yesu uamu kumbuluile nguendi: “Nga nja zange nguange atualeleho kuyoya noho hanji kezila, haka via likuatela nove? Ove tualelaho lika kunji kava.” 23 Ou muzimbu, ua lisanduokele hakati ka vamuanetu, nguavo uze ndongesi ka katsi. Vunoni Yesu ka handekele nguendi ka katsi, ua handekele nguendi: “Nga nja zange nguange atualeleho kuyoya noho hanji kezila, haka via likuatela nove?”
24 Ou ndongesi uaco, ikeye ali na kuhana vukaleho vuevi viuma, ikeye naua ua visonekele, kaha tu tantekeya nguetu vukaleho vuendi vua vusunga.
25 Kuhandeka vusunga, kuli naua viuma vikuavo viavingi via lingile Yesu, nga vavi sonekele viose cimo ku cimo, nji mona nguange mavu ose, nga ka apuilemo mu ku tulikilaho mazengununo a kusoneka.