Kuhitila Muli Yoano

1 Ha katete kuakele Lizi, Lizi uakele hamo na Njambi, kaha Lizi uapuile umo njambi. 2 Ou uakele na Njambi ku vuputukilo. 3 Viuma viose va vi tangele kuhitila muli ikeye, kaha kakuesi cuma na cimo cahi ci va tangele ca kuhona ikeye.

Viuma vize viva tangele 4 kuhitila muli ikeye, viapuile muono kaha muono uapuile ceke ca vantu. 5 Kaha ceke cituila mu milima vunoni milima ka ya hasele kuvula cize ceke.

6 Kaha kuezile umo yala uva tumine mu kuimanenako Njambi, lizina liendi Yoano. 7 Yala uaco uezile ngue mukaleho mu kuhana vukaleho vua ceke, linga kuhitila muli ikeye, vantu va miyati yose va tsiliele. 8 Kati ikeye uapuile ceke, vunoni uezile mu kuhana vukaleho vua ceke caco.

9 Ceke ca vusunga cize cituila vantu va miyati yose, cakele ha hiehi na kuiza ha mavu. 10 Ikeye uakele ha mavu na mavu va atangele kuhitila muli ikeye, vunoni vakua mavu ka vamu tantekeyele.* 11 Uezile ku vantu vendi vunoni vakevo ka vamu tavele. 12 Vunoni vose vaze vamu tambuile, uava hanene mpoko ya kupua vana va Njambi muomu va tsilielele mu lizina liendi. 13 Vakevo ka va semukile ku maninga ni ku cizango ca ntsitu cipue ca yala,* vunoni ku cizango ca Njambi.

14 Ngeci uze Lizi, uaku puile ntsitu kaha uezile mu kukala hamo netu. Tua muene vumpahu vuendi, ngue vumpahu vua muana umolika ua ise. Cikuavo naua, ua sulile na ngozi ya kama ya Njambi* na vusunga. 15 Yoano uahele vukaleho kutuala hali ikeye, eyo, ua tambekele nguendi: “Ou ikeye injambele nguange, ‘Uze eza mu nima yange nanji hiana, muomu uakeleko laza, nange tele nji uahi.’” 16 Kaha omo lia kulana ca ngozi yendi ya kama na vusunga, tuvose tua tualeleho kutambula ngozi ya kama-kama. 17 Muomu Masiko, va ahanene kuhitila muli Mosesa, vunoni ngozi ya kama na vusunga, viezile kuhitila muli Yesu Kilistu. 18 Naumo muntu uahi ua monaho laza Njambi, kuvanga muana umolika uze uapua ngue njambi, ali ku mukulo ua Ise, ikeye namu solola.

19 Ovu vukevuo vukaleho vuahele Yoano omo vaYundeya va tumine vasasendote na vaLevi va ku Yelusalema linga vaka muihule nguavo: “Yove iya?” 20 Ka vianene ku va kumbulula, vunoni ua litavelele nguendi: “Kati yange Kilistu.” 21 Kaha va muihuile nguavo: “Amba yove iya? Yove Eliya?” Ua kumbuluile nguendi: “Kati yange.” Va muihuile naua nguavo: “Vuno u Kapolofeto ni?” Uava kumbuluile nguendi: “Houe!” 22 Kaha va muihuile nguavo: “Amba yove iya honi? Tu leke linga tu ka kumbulule vaze va na tu tumu. Ulitumbula nguove yove iya?” 23 Uava lekele nguendi: “Yange lizi lia uze atambeka mu likango nguendi, ‘Sungamesenu njila ya Yehova,’* ngue mua handekele kapolofeto Isaya.” 24 VaFaliseu vakevo va tumine vaze tunganda. 25 Ngeci va muihuile naua nguavo: “Vika honi umbatizila vantu nga yove kati u Kilistu, kati u Eliya ni cipue Kapolofeto?” 26 Yoano uava kumbuluile nguendi: “Yange nji mbatiza mu mema, vunoni hakati kenu, hali umo ka mu tantekeya, 27 ouo eza mu nima yange, ambe mikole ya vinkaku viendi kanja fuililile ku izitula.” 28 Evi via solokelele ku Mbetaniya mu sinia lia Yondau, kuze kuakele na kumbatizila Yoano.

29 Lia mukuavo, Yoano ua muene Yesu eza kuli ikeye, ngeci ua handekele nguendi: “Talenu Muana Mpanga ua Njambi uze atundisa vupi vua vakua mavu! 30 Ou ikeye injambele nguange: ‘Uze eza mu nima yange nanji hiana, muomu uakeleko laza nange tele nji uahi.’ 31 Nange kanja mu tantekeyele, vunoni njezile mu kumbatiza mu mema, linga Isaleli imu tantekeye.” 32 Yoano ua zimbuile naua vukaleho nguendi: “Nja muene sipilitu itunda muilu ngue livembe, kaha yakele hali ikeye. 33 Ambe yange kanja mu tantekeyele, vunoni uze uanji tumine kumbatiza mu mema, uanji lekele nguendi: “Uose yuka mona sipilitu isikuluka na kukala hali ikeye, ikeye aka mbatiza na sipilitu santu.’ 34 Kaha njina limuenavio, ngeci nji hana vukaleho nguange ou ikeye Muana Njambi.”

35 Lia mukuavo naua, Yoano uemanene na vandongesi vendi vavali, 36 Kaha mua muene Yesu ahita, ua handekele nguendi: “Talenu Muana Mpanga ua Njambi!” 37 Ngeci vaze vandongesi vendi vavali mu va vivuile, va kavele Yesu. 38 Yesu mua tengulukile, uava muene vali naku mu kava, ngeci ua vehuile nguendi: “Vika mu tonda?” Vamu kumbuluile nguavo: “Lambi (kulumbunuka, “Mulongisi”), kuiko uakala?” 39 Uava kumbuluile nguendi: “Tuayenu mua ku mone.” Ngeci vaile nendi kuze kuakele, vaka kele nendi litangua liaco. Tele yapuile 16 ola.* 40 Anduleu, muanaye ya Simone Petulu, uapuile umo ua vaze vandongesi vavali vavuile via handekele Yoano na kukava Yesu. 41 Ha katete, ua uanene muanaye Simone ngeci uamu lekele nguendi: “Tua uana Mesiya” (kulumbunuka, “Kilistu”), 42 Kaha uamu tualele kuli Yesu. Ngeci Yesu mua mu talele, uamu lekele nguendi: “Yove Simone muana Yoano. Vaka kusana honi nguavo Kefasi” (kulumbunuka, “Petulu”).

43 Lia mukuavo, Yesu ua tondele kuya ku Ngalileya. Kaha ua uanene Filipu, ngeci uamu lekele nguendi: “Nji kave.” 44 Filipu uapuile mukua Mbetesainda, mbonge ya Anduleu na Petulu. 45 Filipu mua uanene Natanele, uamu lekele nguendi: “Tua uana uze ya sonekele Mosesa mu Masiko, na uze iva sonekele Vapolofeto: Yesu muana Yosefe ua ku Nazaleta.” 46 Vunoni Natanele ua muihuile nguendi: “Nkuma ku Nazaleta kuhasa kutunda cuma ca cili?” Filipu uamu kumbuluile nguendi: “Tuaya uaku mone.” 47 Yesu mua muene Natanele ali na kuiza, ua handekele kutuala hali ikeye nguendi: “Talenu kaIsaleli ua vusunga, kakele na civembulu.” 48 Natanele ua muihuile nguendi: “Vati uanji tantekeya?” Yesu uamu kumbuluile nguendi: “Ntsimbu Filipu kanda aku sane, nji naku muene laza muintsi lia mukuyu.” 49 Natanele uamu kumbuluile nguendi: “Lambi, yove Muana Njambi, yove Muangana ua Isaleli.” 50 Yesu ua muihuile nguendi: “Una tava muomu nja kuleka nguange njina ku muene muintsi lia mukuyu ni? Uka mona viuma via kama ku tuvakana evi.” 51 Ngeci Yesu uamu lekele nguendi: “Nji mileka vusunga nguange: “Muka mona lilu lia sokoloka, na tungelo va Njambi va londa naku sikuluka kuli Muana muntu.”