Ku Hitila Muli Mateu
19 Yesu mua manusuile ku handeka evi viuma, ua tundile ku Ngalileya na kuya ku hiehi* na Yundeya mu sinia lia Yondau. 2 Mbunga ya kama ya mu kavele, ngeci ua kanguisile vose va kele na ku vavala.
3 Kaha vaFaliseu vezile kuli Yesu linga va mueseke. Va muihuile nguavo: “Citava yala ku kondola mpueyendi omo lia mulonga uoseouo ni?” 4 Yesu ua va kumbuluile nguendi: “Nkuma ka mua tandele ngecize uze ua va tangele tunde ku vuputukilo, ua va tangele yala na mpuevo ni? 5 Ka mua tandele naua ngecize: ‘Ua va lekele nguendi, ngoco vene yala aka seza ise na naye aka lipandakana na mpueyendi, kaha ava vavali va kapua ntsitu imolika ni?’ 6 Ngeci mukemuo, kati naua vavali vunoni ntsitu imolika. Kaha cose ca na pandakana Njambi, muntu kati aci hangunune.” 7 Va muihuile naua nguavo: “Amba omo lia vika Mosesa ua tumbuile nguendi, yala citava a sonekele mpueyendi mukanda ua kukondola linga a tsihe vulo?” 8 Yesu ua va kumbuluile nguendi: “Omo lia ku kaluua ca mitima yenu, ngeci Mosesa ua mi tavesele kukondola vampuevo venu. Vunoni kati mukemuo mu via fuile ha katete. 9 Vunoni yange nji mi leka nguange, uose a kondola mpueyendi nga kati omo lia mulonga ua vupangala kaha ambata mpuevo ueka, a linga vukoyi.”
10 Vandongesi vendi va mu kumbuluile nguavo: “Nga mukemuo mu ca pande kufua hakati ka yala na mpuevo kaha ci li kulutue ku honoua kuambata.” 11 Yesu ua va kumbuluile nguendi: “Kati vamala vose va hasa ku lingamo kuvanga vaze lika vali na vuana vuaco. 12 Kuli vamo vamala ka va hasa kuambata, muomu mukemuo mu va semukilile. Kuli vakuavo ka va hasa kuambata, muomu vantu va va lingamo, kaha vakuavoco ka va tondo kuambata omo lia Vuangana vua muilu. Vunoni uose a hasa ku lingamo, a lingemo.”
13 Kaha vantu va mu nehelele vanike va vandende, nguavo ava saleke mavoko na ku va vundilila vunoni vandongesi vendi va va vindikile. 14 Yesu ua va lekele nguendi: “Ecelenu vanike veze kuli yange, kati mu va vindike, muomu Vuangana vua muilu vunapu vua vaze vafua ngeci muavo.” 15 Ngeci ua va salekele mavoko, na ku tunda kuze.
16 Kaha umo muntu uezile kuli Yesu na ku muihula nguendi: “Mulongisi, viuma vika via cili nja pande kulinga nji ka uane muono ka ue kuhua?” 17 Yesu ua mu kumbuluile nguendi: “Vika uli na ku nji huila ku tuala ha viuma via cili? Kuli lika umo ikeye ua cili. Ngeci mukemuo, nga u tonda ku ka tambula muono, tualelelaho kuononoka masiko.” 18 Ngeci ikeye uehuile Yesu nguendi: “Masiko aka?” Yesu ua mu kumbuluile nguendi: “Kati u tsihe muntu, kati u linge vukoyi,* kati u punde, kati uhane vukaleho vua visaki, 19 singimika iso na noko, kaha una pande ku lema mukuenu ngue mu ua lilema yove vavenia.” 20 Uze mukuendze ua mu kumbuluile nguendi: “Aa masiko ose nje kuononoka; amba viuma vika vikuavo nja pande ku linga?” 21 Ngeci Yesu ua mu lekele nguendi: “Nga u tonda kupua ua ku tantuluka,* yakalandese viuma viove viose na ku hana vimbongo viaco ku vihutu, kaha uka kala na vupite muilu. Mu nima yaco, tuaya ua ku nji kave.” 22 Uze mukuendze mua vuile ngoco, ua ile na vusiua, muomu ua kele na vupite vua vuingi. 23 Ngeci Yesu ua lekele vandongisi vendi nguendi: “Nji mi leka vusunga nguange, ci kapua ca cikalu kuli mpite ku kovela mu Vuangana vua muilu. 24 Nji mi leka naua nguange, ca casi kuli kamelu kuhita mu liso lia nguya, ku hiana mpite akovele mu Vuangana vua Njambi.”
25 Vandongesi mu va vuile ngoco va likomokelele mua kama, ngeci va handekele nguavo: “Nga ngoconi, iya aka hasa kuovoka?” 26 Yesu ua va talele ntoma! Kaha ua va lekele nguendi: “Ku vantu ca cikalu, vunoni kuli Njambi viuma viose via pua via viasi.”
27 Petulu ua mu kumbuluile nguendi: “Tala! Yetu tu na seza viuma viose na ku ku kava; amba vika tu ka uanaho?” 28 Yesu ua va lekele nguendi: “Nji mi leka vusunga nguange, ha ntsimbu ize i vaka puisa viuma viose via viha, omo Muana muntu aka tumama ha cituamo cendi ca Vuangana vua vumpahu, enu mue ku njikava mu ka tumama ha vituamo 12, mu ku sompela miyati 12 ya Isaleli. 29 Kaha uose na seza vindzivo, cipue vamuanaye va vampuevo ni vamuanaye va vamala, cipue ise ni naye, cipue vana, cipue mehia omo lia lizina liange, aka tambula viuma via vingi cikuma kaha ku hiana viose, aka suana muono ka ue kuhua.
30 “Vunoni vavengi vaze va livanga va kapua va ku manusuila, kaha va ku manusuila va kapua va ku livanga.