Kuhitila Muli Yoano
17 Yesu mua manusuile kuhandeka evi viuma, uanduile meso endi muilu na kuhandeka nguendi: “Tata, ola inapuho. Hana muanove vumpahu linga nendi aku hane vumpahu, 2 ngue muze mu uamu hana mpoko ha vantu vose, linga ahane muono ka ue kuhua ku vose vaze va uamu hana. 3 Kuuana muono ka ue kuhua ca tondeka evi: ku ku tantekeya ove Njambi umolika ua vusunga, kaha na uze iua tumine, ikeye Yesu Kilistu vene. 4 Njina kuhana vumpahu ha mavu, mu ku manusula cipanga ci uanji hele linga nji cilinge. 5 Ngeci hano honi Tata, nji hane vumpahu ku hiehi nove vuze vunja kele navuo tele njili nove ntsimbu mavu tele kanda akaleko.
6 “Njina tantekeyesa* lizina liove ku vantu va uanji hanene ha mavu. Vapuile vove, vunoni una nji hanavo kaha va na niungu* lizi liove. 7 Hano honi va na tantekeya nguavo, viuma viose vi uanji hanene via tunda kuli yove. 8 Muomu njina vambuluila mezi a uanji hele, kaha va na atava naku tantekeya nguavo njezile mu ku kuimanenako, kaha va na tsiliela nguavo yove uanji tumine. 9 Njili naku va vundilila; kanji vundilila mavu, houe, vunoni nji vundilila vaze va uanji hele muomu vapua vove. 10 Viuma viange viose viapua viove, viove viapua viange kaha njina tambula vumpahu hakati kavo.
11 “Yange kanjesi naua ha mavu, vunoni vakevo vali ha mavu kaha njili na kuiza kuli yove. Tata ua Kulela, vaniunge omo lia lizina liove lize li uanji hana, linga vapue umo* ngue omo yetu tunapu umo.* 12 Mu njakele hamo navo, nja va niungile omo lia lizina liove li uanji hanene. Kaha njina va niungu, ngeci naumo uahi na nongo, ku tundisako lika muana ua kunonga, linga visoneka vi lipuisemo. 13 Hano honi njili na kuiza kuli yove, kaha njili na kuhandeka evi viuma ha mavu, linga va viukilile mua kama ngue mu njina viukilila yange. 14 Njina vahana lizi liove, vunoni vakua mavu va nava zindi, muomu vakevo kati vakua mavu, ngue omo yange kati nji mukua mavu.
15 “Kanji vundila linga uva tundise ha mavu, vunoni linga uva niunge omo lia mukua vupi. 16 Vakevo kati vakua mavu, ngue omo yange kati nji mukua mavu. 17 Va lelese* na vusunga, lizi liove likelio vusunga. 18 Ngue muze vene mu uanji tumine ha mavu, nange naua njina va tumu ha mavu. 19 Kaha njili naku lilelesa omo liavo, linga navo valele kuhitila mu vusunga.
20 “Kanji vundilila lika vakevo, vunoni nji vundilila na vaze vanji tsiliela kuhitila mu mezi avo, 21 linga vose vapue umo, ngue omo yove Tata ua likata nange, kaha nange nja likata nove, navo naua va likate netu, linga vakua mavu va tsiliele nguavo, yove uanji tumine. 22 Njina vahana vumpahu vuze vu uanji hele, linga navo vapue umo, ngue muze mu tuapua yetu, umo. 23 Yange nja likata navo kaha yove ua likata nange, ngeci navo va likuate kumo,* linga vakua mavu va tantekeye nguavo yove uanji tumine kaha uava lema ngue muze mu uanji lema ange. 24 Tata, njitonda vaze va uanji hana va kakale nange kuze kunji kakala, linga vaka mone vumpahu vuange vu uanji hana, muomu uanji lemene tele na mavu kanda uci atange. 25 Ove Tata mukua vuviuke, vakua mavu kava ku tantekeya, vunoni ange nji ku tantekeya, kaha nava va na tantekeya nguavo yove uanji tumine. 26 Njina va tantekeyesa lizina liove kaha njika tualelaho ku lingamo, linga valeme vakuavo ngue mu uanji lema ange, kaha yange njika likata navo.”