Kuhitila Muli Mako
7 Kaha vamo vaFaliseu na vakua kusoneka va tundile ku Yelusalema vali kunguluile kuli Yesu. 2 Ngeci vamuene vamo vandongesi vendi valia na mavoko a mazilo, ku lumbunuka ca kuhona kutana ku mavoko.* 3 Muomu vaFaliseu na vaYundeya vose, kave kulia ca kuhona kutana ku mavoko namu vinkokuela omo lia ku likuatelela ku cisemua ca va kukuluila vavo 4 kaha mu ve kutunda ha citanda, kave kulia ca kuhona kutana ku mavoko. Cikuavo naua, vakala na visemua viavingi viva tambula naku likuatelela, ngeci mua kumbuitika mu mema vingandza, vinjava na vitenga via vunengu. 5 Ngeci vaze vaFaliseu na vakua kusoneka, va muihuile nguavo: “Omo lia vika vandongesi vove kave kukavela cisemua ca vakukuluila vetu? Muomu ve kulia na mavoko a mazilo.” 6 Uava kumbuluile nguendi: “Isaya ua polofetele vuino kutuala hali yenu vakua civembulu mua handekele nguendi, ‘Ava vantu vali naku nji singimika lika na kanua, vunoni mitima yavo ili kulahako nange. 7 Kulemesa cavo cinapu ca ngoco, muomu vali na kulongesa masiko a vantu ngue a Njambi.’ 8 Enu mua seza masiko a Njambi naku kakatela ku cisemua ca vantu.”
9 Yesu uava lekele naua nguendi: “Mu tantekeya vuino ku sembulula masiko a Njambi linga mu niunge cisemua cenu. 10 Ca ku muenako, Mosesa ua handekele nguendi, ‘Singimika iso na noko’ kaha naua nguendi, ‘Uose a sahula* ise na naye vapande kumu tsiha.’ 11 Vunoni enu mue kuhandeka nguenu, ‘Uose aleka ise ni naye nguendi: “Viose vinjili navio tele nga vi na pandele kumi kuasa, vikevio nkolombane (ni nguetu via kuhana kuli Njambi)”’ 12 Kaha ka mue kueca muntu uaco alingile ise ni naye cuma na cimo cahi 13 Ngeci mua lingisa lizi lia Njambi lihonoue seho omo lia cisemua cenu ci mue kulongesa, kaha mue kulinga naua viuma vikuavo viavingi via kulifua nevi.” 14 Ngeci Yesu ua sanene naua mbunga isuene kuli ikeye, naku valeka nguendi: “Nji halakanenu mu vose muivuisise vulumbunuiso vua ano mezi. 15 Kakuesi cuma ci kovela mu kanua ka muntu cihasa kumu zualesa, vunoni vize vitunda mu kanua kendi vikevio vi mu zualesa.” 16——
17 Omo uasile ize mbunga ua kovelele mu ndzivo kaha vandongesi vendi vaputukile ku muihula vulumbunuiso vua cize cisimo. 18 Ngeci ua vehuile nguendi: “Nkuma nenu ka muevuisisile ngeci muavo? Nkuma kamu tantekeya nguenu viose vie kukovela mu kanua ka muntu ka vihasa kuzualesa, 19 muomu ka vie kuya ku mutima uendi, vunoni vie kuya muzimo kaha vika tuvakanena ku musenge ni? Yesu mua handekele omo, ua muesele nguendi, via kulia viose viapua via kulela 20 Cikuavo naua uava lekele nguendi: “Vize vie kutunda mu muntu vikevio vie kumu zualesa 21 Muomu ku mutima kukekuo kue kutunda visinganieka via kuvihia, vupangala,* vuizi, kutsiha, 22 vilinga via vukoyi, lizangamena, vilinga via kuvihia, makuli, vilinga via kasahuntu, cipululu, kusahula Njambi, ku lihalesa na vuheve. 23 Evi viuma viose via kuvihia vie kutunda mu ntima ya muntu naku mu zualesa.”
24 Ngeci Yesu ua katukile uaile ku mutamba ua Tile na Sindone. Mua ka hetele, ua kovelele mu imo ndzivo, muomu ka tondele vantu vavi tantekeye vutuhu ngoco vamu nongonuene. 25 Haze vene, umo mpuevo uakele na kana kendi ka mpuevo kakele na sipilitu ua kuzuala, uavuile via Yesu ngeci uezile ku mikono yendi naku mu tsikamena. 26 Mpuevo uaco uapuile kaNgelengu uaku semukila kumbonge ya Silofenisia, kaha ua tualeleho ku lambelela Yesu atundise ndemone kuli munendi. 27 Vunoni Yesu uamu kumbuluile nguendi: “Ha katete ecela vana vekute, muomu kati cacili kuhana viakulia via vanike ku vana va tutali.” 28 Vunoni uze mpuevo uamu kumbuluile nguendi: “Mukemuo Muangana, vunoni ambe vana va tutali ve kukala muintsi lia mesa, ve kulia vulalumuina vuve kuuisa vanike.” 29 Yesu muavuile ngoco, ua lekele uze mpuevo nguendi: “Mu kulinga una kumbulula ngoco, hamoye, ndemone na tundu muli munove.” 30 Ngeci ua hilukile ku ndzivo yendi, kaha ua uanene muana na kosa ha muhela kaha ndemone namu tundu laza.
31 Omo Yesu ua tundile mu mbonge ya Tile, ua hitile mu Sindone naku mutamba ua Ndekapoli* kaha uaile ku cisali ca Ngalileya. 32 Ngeci vantu vamu nehelele umo yala ua kasinda matuitui uakele na kalaka, kaha vamu lambelelele linga amu saleke livoko. 33 Yesu uamu tundisile ha mbunga na kuya nendi kua likaliavo. Ngeci ua hakele minye yendi mu matuitui a uze yala kaha mu nima ya kuzekula mate uamu kuatele ha lilimi. 34 Ngeci Yesu ua talele muilu, ua tutumuisile na kuhandeka nguendi: “Efata”, ku lumbunuka “Zikuka.” 35 Haze vene, matuitui endi azikukile na lilimi liakele na kalaka lia zitukile, ngeci ua putukile kuhandeka vuino. 36 Kaha Yesu uava vindikile nguendi, kati va lekeko muntu naumo uahi. Vunoni mua tualeleho ku va vindika, vakevo va hianeselemo kusanduola muzimbu uaco. 37 Mua vusunga, vantu va likomokelele mua kama kaha nguavo: “Ue kulinga vuino viuma viose. Alingisa tusinda matuitui vevue na tuveveve va handeke.”