Kuhitila Muli Yoano
15 “Yange muti ua vinyu ua vusunga, kaha Tata ikeye ndimi. 2 Muntango uose uli kuli yange ka uimi vusuka, a upamuna. Kaha muntango uose uze uima vusuka, a ulelesa, linga uime vusuka vuavuingi. 3 Enu mu na lele laza omo lia lizi li njina miambuluila. 4 Tualelenuho kulikata nange, kaha nange nji tualelaho kulikata nenu. Ngue omo muntango ka uhasa kuima vusuka ha likaliauo, kuvanga ukale ku muti ua vinyu, nenu naua ka muhasa kuima vusuka nga ka mu tualelaho kulikata nange. 5 Yange muti ua vinyu, yenu muapua mintango. Uose atualelaho kulikata nange kaha ange nji likata nendi, ikeye ema vusuka vuavuingi. Muomu ca kuhona yange, ka muhasa kulinga na vimo viahi. 6 Uose ka tualelaho kulikata nange, va mumbila kuti ngue muntango kaha oma. Mintango yaco va ikunguluila hamo na kuimbila mu tuhia kaha iuema. 7 Nga mu tualelaho kulikata nange kaha mezi ange akala muli yenu, muhasa ku vundila viose-ovio kaha vaka mi lingilavio. 8 Tata vaka mu hana vumpahu, nga mu tualelaho kuima vusuka vuavuingi na kumuesa ngecize mu vandongesi vange. 9 Ngue muze mua nji lema Tata, nange naua nja mi lema. Tualelenuho kukala mu cilemo cange. 10 Nga muononoka masiko ange, muka tualelaho kukala mu cilemo cange, ngue omo yange nje kuononoka masiko a Tata naku tualelaho kukala mu cilemo cendi.
11 “Nji na mileka evi viuma linga ndzolela yange ikale muli yenu, kaha ndzolela yenu ika livuezelela mua kama. 12 Eli likelio lisiko liange, lilemenu umo na mukuavo ngue mu njina mi leme yange. 13 Naumo uahi ali na cilemo ca kama, ku tuvakana ca uze ahana muono uendi omo lia vavusamba vendi. 14 Mupua vavusamba vange nga mu linga viuma vinji mileka. 15 Kanji mi tumbula naua vangamba,* muomu ngamba ka tantekeya viali na kulinga sukuluendi. Vunoni nji mi sana nguange vavusamba, muomu njina mi soluela viose vinji nevu kuli Tata. 16 Kati yenu mua nji hanguile, vunoni yange nja mi hanguile. Nja mi hanguile linga mu tualeleho kuima vusuka, vusuka vuze vu kalako ntsimbu yose, linga viose-ovio vimu pinga kuli Tata mu lizina liange, ami hanevio.
17 “Njili naku mi sika evi viuma linga mu lileme umo na mukuavo. 18 Nga vakua mavu va mi zinda, tantekeyenu nguenu va livangele kunji zinda yange, ntsimbu kanda va zinde yenu. 19 Nga muapuile vakua mavu, nga mavu ami lema, muomu mu vantu vavo. Vunoni mu kulinga kati mu vakua mavu, kaha nja mi hanguile ha mavu, ngeci mukemuo vakua mavu va mi zinda. 20 Vulukenu lizi linja mi lekele, nguange: Ngamba ka tuvakana sukuluendi. Nga ange va nanji luisa, nenu vene vaka mi luisa. Nga va nononoka mezi ange, va kononoka na mezi enu naua. 21 Vunoni vaka mi linga evi viose omo lizina liange, muomu ka va tantekeya Uze uanji tumine. 22 Nga ka njezile na kuhandeka navo, nga kavesi na vupi. Vunoni hano ka vahasa kulihola malambi kutuala ha vupi vuavo. 23 Uose uanji zinda, ua zinda na Tata. 24 Nga kanja lingile hakati kavo vipanga via kulinga naumo uahi naua uavi lingaho, nga ka vesi na vupi. Vunoni hano va nanji mono kaha va nanji zindi na kuzinda Tata. 25 Vunoni evi vi na lingika linga alipuisemo mezi ava soneka mu Masiko avo nguavo: ‘Vanji zindile ca kuhona mulonga.’ 26 Mua keza mukuasi unji ka mi tuma ku tundilila kuli Tata, ikeyo sipilitu ya vusunga vene, ize ya kutunda kuli Tata, ika hana vukaleho kutuala hali yange. 27 Kaha nenu naua muka hana vukaleho, muomu muna kala nange tunde ku vuputukilo.