Dezembro

Vuno Yehova ua kala na ngolo ya ku sangula vatsi ni? Eyo. Ikeye ua pua mukua “Ngolo Yose.” (Ku-So. 1:8) Ngeci mukemuo, ua kala naua na ngolo ya ku vula nkala citozi uose-ouo, cipue vene ku-tsa. (1 Kol. 15:26) Cuma cikuavo ca tu lingisa ku kala na vusunga ngecize Njambi a hasa ku sangula vatsi, ca pua ku tantekeya ngecize Ikeye ke ku suva na vimo viahi. Ua luka vintangantanga mazina. (Isaya 40:26) Kaha ue ku vuluka naua vose va-tsa. (Yombi 14:13; Luka 20:38) Kuli Ikeye, kati ca cikalu ku vuluka cipue tumizimbu tua tundende tua vaze va-tsa, ngeci mua cifua cavo, vuntu vuavo, viuma vi va lihitile navio mu muono kaha na viuma vi va tantekeyele. Ngue mu tua mono, tu hasa ku kulahela mu cikulaheso ca cisangukilo ca linga Yehova, muomu tu tantekeya ngecize ka kele lika na cizango, vunoni ua kala naua na ngolo ya ku lingamo. Tu hilulenu naua vusunga vukuavo vua pande ku tu lingisa ku tsiliela muli eci cikulaheso ca Njambi. Yehova ua sangulaho laza vatsi. Ku ntsimbu i va sonekele Mbimbiliya, Yehova ua hele ngolo kuli vamo vamala va lutsilielo hamo lika na Yesu, ya ku sangula vatsi. w23.04 9-10 ¶7-9

Nga tu handeka na kasingimiko na ku konkama, vantu ci ka va puila ca casi ku tu halakana na ku tualelaho ku simutuila. Vunoni nga muntu a tonda lika ku katula vimpata ni ku lituala ha matunta, ka tua pandele ku ivua ntsindiye ya ku tualelelaho ku simutuila neni. Citava tu likele. (Visi. 26:4) Vunoni vavandende lika ve ku lingamo, cingi ca vantu ve ku tu halakana. Mua vusunga, tua limuena ha toma seho ya ku pua va ku konkama. Ngeci vundilenu kuli Yehova, linga a mi hane ngolo i mue ku tondeka mu ku kumbulula vantu na ku konkama ambe nga va mi paya ni ku mi tsopa. Kaha vulukenu ngecize ku kumbulula na civuovuo ce ku kuasa linga kati ha katuke hoi-hoi. Ngeci mukemuo, ku konkama na ku kumbulula na kasingimiko ci hasa ku kuasa vantu ku alulula cifua ci ve ku singaniekelamo ku tuala ha vusunga vua mu Mbimbiliya. “Liviukisenu ntsimbu yose mu ku kuania muntu uose a mi hula lizi lia ku lavelela cize ci muli naco” kaha lingenumo ‘na ku konkama na kasingimiko.’ (1 Pet. 3:15) Tavesenu ku konkama ci pue ngolo yenu. w23.09 19 ¶18-19

Tu hilula ha vinjila viuana ku tuala ha vati tu hasa ku muesa ntsintsa. Ya ku livanga, mukua ntsintsa ue ku livandeka ku vutenu. (Ezu. 34:6) Ya mu civali, ue ku simpa mutima nga a lavelela vimo. Nga vimo vili na ku simbula mua kama, mukua ntsintsa ue ku simpa mutima kaha ke ku kala na matoto. (Mat. 18:​26, 27) Ya mu citatu, mukua ntsintsa ue ku livandeka. Mukua ntsintsa ue ku huima mbunge ntsimbu kanda a ci putuke. Kaha naua nga na ci putuka ue ku ci linga na civando. Vunoni ue ku lihakela kapandi ka ku hilula vuino, ku tuala ha vati a linga cipanga caco. Mu nima yaco ue ku ci linga kuliya na ntsimbu i ca tondeka mpundu. Ya mu ciuana, mukua ntsintsa ue ku lihakela kapandi ka kolesa mu visoti ca ku hona ku linienga. (Kolo. 1:11) Etu vakua Kilistu, tua tondeka ku muesa ntsintsa mu vinjila evi viuana. w23.08 20-21 ¶3-6

Vusunga vua kama vua pande ku tu lingisa ku niunga mutima uetu ua cimueso, vua pua muomu Yehova ue ku hilula mitima. Eci ca lomboloka ngecize ikeye ke ku tu tala lika ha mbandza ngue mu ve ku tu mona vakuetu, vunoni ue ku tala vuntu vuetu vua muntima. Yehova a ka tu lema nga tu sulisa mutima uetu na mana eni. (Yoa. 4:14) Muomu nga tu sulisa visinganieka vietu na mana eni, ka mu ka sala cihela ci vu ka hasa ku kovela vusungu vua mu lutsilielo vue ku sambeya Satana na mavu eni. (1 Yoa. 5:​18, 19) Kaha omo tu ka suena mu hiehi na Yehova, cilemo na kasingimiko ketu kuli ikeye, vi ka livuezelela. Mu ku linga ka tu tondo ku vavalesa mutima ua Tatetu ua muilu, tu ka zinda ambe vene visinganieka via ku vihia via ku linga vupi. Marta umo ndumbuetu ua ku Croacia, ua hitile mu ceseko a ku linga vupangala. Kaha ua sonekele ngueni: “Ca nji kaluuilile ku singanieka vuino kaha na ku vatesa cizango ca ku livuisa ndzolela ya vupi mu ntsimbu ya indende. Vunoni ku vuila Yehova liova, ca nji niungile.” Vati liova liaco lia mu niungile? Ndumbuetu Marta ua muesele ngecize ua hiluile ha luvinda lue kuizile ha ku linga ci hangula ca ku vihia. Netu tu hasa ku lingamo. w23.06 20-21 ¶3-4

Yesu ua tantekeyele ngueni vutumbe vua Yehova vua puile ku lelesa lizina Lieni omo lia makuli ose a va mu vangeyele. Ngeci mukemuo, Muangana uetu ua longesele vandongesi veni va vundile nguavo: “Tatetu u li muilu, va [lelese] lizina liove.” (Mat. 6:9) Yesu ua tantekeyele ngueni, eci ca pua citanga ca kama ci ve kulua naco vantu. Na umo uahi mu kaye kose ua linga via vingi mu ku lelesa lizina lia Yehova ku hiana Yesu. Vunoni mu va mu kuatele, vitozi veni va mu vangeyele nguavo ua muesele kasahuntu ku lizina lia Ise. Mua vusunga, Yesu ua tantekeyele ngueni ku sahula lizina lia Ise ca puile vupi vua kama. Ngeci mukemuo, ca mu vavalele cikuma ku mutima omo lia ku mu vangeya. Halumo omo lia mulonga u va mu vangeyele, ngeci Yesu ua vuile ku vavala “ku mutima” ntsimbu kanda va mu kuate.—Luka 22:​41-44. w24.02 11 ¶11

Mu ku tunta cetu ca ku muono, tua pande ku lema Yehova na Yesu ku hiana vavusoko vuetu. (Mat. 10:37) Eci ka ca lombolokele ngecize tua pande ku sembulula viteli vietu via mu vusoko, ngue vikevio vie ku tu vindika ku kuya Njambi na Kilistu ku mutima, houe. Muomu linga tuye Njambi na Kilistu ku mutima, tua pande ku puisamo viteli vietu via mu vusoko. (1 Tim. 5:​4, 8) Mu tue ku lingamo, tue ku yoya mu ndzolela. Yehova ua tangele masoko a yoye mu ndzolela. Ca kama lika nga yala na mpuevo va limuesa cilemo na kasingimiko, nga visemi va lema na ku longesa vana vavo, kaha nga vana vononoka visemi vavo. (Efe. 5:33; 6:​1, 4) Cose-oco citeli ci mua kala naco mu vusoko, kavenu vitume via mu Mbimbiliya mu ku ci puisamo, ku hiana ku kulahela mu visinganieka vienu, cisemua, ni vihandeka via vantu. Pangesenu vuino mikanda yetu. Muomu mua kala mizimbu i hasa ku mi kuasa ku pangesa vitume via mu Mbimbiliya. w23.08 28 ¶6-7

Mukua Kilistu ua mpuevo ua tondeka ku kala na vumo vutongue. Ca ku muenako, vumo vutongue vua lilongesele ku vunike vu hasa ku mu kuasa mu muono ueni uose. Ca ku muenako, lilongesenu ku tanda na ku soneka vuino. Ku visemua vimo, ku tanda na ku soneka vuino ka va ci puisile ca seho ku vampuevo. Vunoni ca pua ca seho ya kama ku Vakua Kilistu vose. (1 Tim. 4:13) Ngeci mukemuo, kati mu tavese na vimo viahi vi mi vindike ku lilongesa ku tanda na ku soneka vuino. Omo lia vika? Muomu evi vi ka mi kuasa ku uana ha ku liyoyesela. Mu ka hasa ku lilongesa vuino Lizi lia Njambi na ku longesa naua vuino vakuenu. Kaha ca seho ya kama, mu ka kaniamesa vusamba vuenu na Yehova muomu mu ka hasa ku hilula vuino ha viuma vi mua lilongesa.—1 Tim. 4:15. w23.12 20 ¶10-11

Vundilenu vukuasi vua Yehova mu ku vula vieseko. Mu ku linga ka tua tantulukile, ntsimbu yose tue ku-lua na vieseko via ku linga vupi. Kaha Satana ali na ku linga cose linga a kaluuise kapandi ka tue ku lihakela. Imo njila ye ku puisilamo ovu vutumbe, ya pua mu ku pikula visinganieka vietu na vueho vua ku vihia. Vuana vuaco vu hasa ku tu sulisa na visinganieka via ku vihia, vize vie ku vihisa vuntu vuetu kaha vi hasa ku tu lingisa ku vulumuna. (Mako 7:​21-23; Tia. 1:​14, 15) Tua tondeka vukuasi vua Yehova linga tu hase ku vula vieseko via ku linga vupi. Mu civundilo ca longesele vandongesi veni, Yesu ua vuezelemo aa mezi: “Kati u tu tuamenene ku vieseko, vunoni tu ohiele ku vipi.” (Mat. 6:13) Yehova ua tonda ku tu kuasa, vunoni tua pande ku mu vundila vukuasi vuaco. Kaha tua pande naua ku linga viuma via litombola na vivundilo vietu. w23.05 6-7 ¶15-17

Nga vaze va liambata, va haka seho ya kama ku vusamba vuavo na Isiavo ua muilu kaha va ka kala na vukatuisi vua ku kava vimamuna vieni. Eci ci ka va kuasa ku liniunga ku visoti kaha na ku vula vitanga vize vi hasa ku tontuesa cilemo cavo. Vaze va lema via mu lutsilielo, ve ku lihakela naua kapandi ka ku tambuluisa Yehova na vifua vieni ngeci mua ngozi, lukakatela na ku ecela. (Efe. 4:32–5:1) Nga vaze va liambata va lihakela kapandi ka ku muesa vifua ngeci mua evi kaha cilemo cavo ci ka kola. Umo ndumbuetu ua lizina Lena, ua kala mu vulo mu miaka i tuvakana 25 ngueni: “Ca pua ca casi ku lema na ku singimika muntu ua ku kaniama mu lutsilielo.” Tu hilulenu umo muzimbu ua mu Mbimbiliya. Mu ya heteleho ntsimbu ya ku tuma Mesiya ha mavu, Yehova ua hanguile Yosefe na Maliya ha kati ka vantu vavengi va ku cikota ca Ndaviti linga va ku pue visemi veni. Omo lia vika? Muomu vose vavali va kele na vusamba vua ku kaniama na Yehova kaha ikeye ua tantekeyele ngecize va ka mu tuameka ku lutue mu vulo vuavo. w23.05 21 ¶3-4

Vutuhu ntuamena uetu Yesu ua pua ua ku tantuluka, vunoni ue ku pangesa vantu va ku hona ku tantuluka linga a tuamenene vantu veni hano ha mavu. Ngeci mukemuo, vintsimbu vimo ce ku tu kaluuila ku vononoka, cikumakuma nga va tu lomba ku linga vimo ka tua tondele. Petulu ntsimbu imo neni ca mu kaluuilile ku ononoka. Ca ku muenako, ua tambuile cimo citume kuli umo kangelo, ca ku lia tusitu va puile va ku zuala kuliya na Masiko a Mosesa. Vunoni Petulu ua vianene kati lumo lika, vunoni lutatu luose! (Vili. 10:​9-16) Omo lia vika? Muomu kuli ikeye citume caco ca solokele ngue ka ca sungamene. Kapostolo Paulu uo ononokele naua omo vakuluntu va mu Yelusalema va mu lekele aye na vamala vauana ku tembele a ka va lelese na ku lilelesa ikeye kuliya na Masiko a Mosesa. Paulu ue ku muesele ngecize ue ku ononoka Masiko a Mosesa. Vutuhu ikeye ua tantekeyele ngecize Vakua Kilistu ka vesi naua muintsi lia Masiko a Mosesa kaha ka vulumuine na vimo viahi, uononokele ca ku hona vimpata. Ngeci ua ile na “vamala vaze kaha halakaca ua lilelesele hamo navo.” (Vili. 21: 23, 24, 26) Mua vusunga, eci ku ononoka ca Paulu ca kuasele vamuanaye ku likuata kumo.—Loma 14:​19, 21. w23.10 10 ¶15-16

Vunoni citava liova ka mu litumbula ha mukana uaco. Vutuhu ngoco, vaze va tonda ku likuata vusamba vua kama na Yehova, va pande ku mu “zuzukila” Ambe nga laza tua sua ku pangela Yehova, tu vose tua pande ku tualelelaho ku mu vuila liova. Vuno ku vuila Njambi liova ca lomboloka vika? Ku vuila Njambi liova lia cili, ca lomboloka ku mu lema na ku mu singimika mu cifua ca ku linga, ka tu tondo ku linga na vimo viahi vi hasa ku vihisa vusamba vuetu Neni. Yesu ua kele na ‘liova’ liaco. (VaHe. 5:7) Ka mu vuilile liova lia ku hianesamo. (Isa. 11:​2, 3) Vunoni ua mu lemene cikuma Yehova kaha ua tondele ku mu ononoka. (Yoa. 14:​21, 31) Ngeci mua Yesu, netu tue ku vuila Yehova liova lia cili, muomu ikeye cilemo, mukua mana, mukua vuoloke na ngolo. Tu tantekeya naua ngecize Yehova ua tu lema ngeci vilinga vietu vie ku mu kuata. Nga tu mu ononoka ue ku ivua ndzolela vunoni nga tu muesa lisino ue ku ivua vusiua.—Visa. 78:41; Visi. 27:11. w23.06 14 ¶1-2; 15 ¶5

Muangana Uziya mua hetele ku vukama, ua likelele ku kulahela ngecize Yehova ikeye ua mu hele vukama vuaco na vupite. Vika tu lilongesaho? Ka tua pandele ku suva ngecize vivezikiso na viteli viose vi tua kala navio vie ku tunda kuli Yehova. Ngeci mukemuo, mu cihela ca ku lihalesa omo lia viuma vi tue ku puisamo, tua pande ku hana vumpahu vuose kuli Yehova. (1 Kol. 4:7) Tua pande ku nongonona ngecize ka tua tantulukile kaha tua tondeka ku tu sungamesa. Umo muanetu endela ku miaka 60 ua sonekele ngueni: “Nja lilongesa ngecize ka nja pandele ku niengua ni ku ivua vusiua ngoco nga vakuetu va mona visevuka viange. Mu ve ku nji sungamesa omo lia vimo visevuka vi nje ku linga, nje ku lihakela kapandi ka ku pangelaho na ku tualelelaho.” Ku handeka vusunga, mu tue ku vuila Yehova liova na ku likehesa, muono uetu ue kuenda vuino.—Visi. 22:4. w23.09 10 ¶10-11

Vakua Kilistu va ku livanga va tondekele ku kolesa. Vutuhu va kele na ku hita mu visoti ngue vi va kele na ku lihita navio mbunga yose, vunoni kua kele visoti vikuavo vi va kele na ku lihita navio vakevo lika. Cingi cavo, va kele na ku va luisa kati lika ku vakuluntu vakua malombelo a vaYundeya na vakua nguvulu ya Loma, vunoni na ku vavusoko vavo mpundu. (Mat. 10:21) Kaha vintsimbu vimo, na mu cikungulukilo vene va kele na ku pinda na visoti via vakua ku alulukila vusunga na vilongesa viavo via kele na ku koka matepeso. (Vili. 20:​29, 30) Vunoni vaze Vakua Kilistu va kolesele. (Ku-So. 2:3) Mu njila ika? Va singaniekele ha malungano a mu Mbimbiliya a ku kolesa, ngeci mua Yombi. (Tia. 5:​10, 11) Kaha va vundilile naua ndzili kuli Njambi. (Vili. 4:​29-31) Mu nima yaco va tualele mana ku viuma via cili vie kuiza omo lia ku kolesa.(Vili. 5:41) Netu tu hasa ku kolesa nga ku-sua kumo, tu pua na ku lilongesa malungano a mu Mbimbiliya na a mu mikanda yetu ku tuala ha ku kolesa. w23.07 3 ¶5-6

Yehova na Yesu na limo litangua liahi va ka tu seza. Kapostolo Petulu mu nima ya ku viana Yesu, ua pandele ku linga cimo cihangula ca seho mu muono ueni. Vuno a likela ku pua ndongesi ya Kilistu ni a tualelaho ku kolesa? Yesu ua lambelele kuli Yehova linga lutsilielo lua Petulu kati lu tontole. Kaha ua lekele naua Petulu via civundilo caco, na ku mu leka ngueni na kulahela ngecize Petulu a ka hasa ku kaniamesa vamuanaye. (Luka 22:​31, 32) Mua vusunga, mua kele na ku vuluka mezi a Yesu, Petulu ua livuile ku kaniama! Netu naua, nga tu tonda ku linga vihangula via seho mu muono, Yehova a ka tu kuasa ku kolesa. (Efe. 4:​8, 11) Ngue omo Yehova ua kuasele Petulu na vapostolo vakuavo, netu naua nga tu tuameka Vuangana vua Njambi ku lutue, Yehova a ka tu hana via tu kambela mu mu muono. w23.09 24-25 ¶14-15

Yehova ue ku mona cipue vene kacilinga ka ngozi ka tue ku lingila vakuetu, ue ku ka mona ku pua ngue cikombelo ca seho kaha naua ngue likongo lize lia ka fueta ikeye. Nga laza mua puile mukua ku kuasa vipanga ni mukuluntu mu cikungulukilo, Yehova ue ku vuluka viose vi mua lingile mu ntsimbu yaco kaha na cilemo ca mi lingisile ku vi linga. (1 Kol. 15:58) Kaha ue ku mona naua cilemo ci mue ku tualelelaho ku muesa. Yehova ua tonda tu vose tu kole mu cilemo ci tue ku mu muesa na cize ci tue ku muesa ku vakuetu. Tu hasa ku kaniamesa cilemo cetu muli Yehova mu ku tanda Lizi lieni, ku hilula vize vi tue ku tandamo kaha na ku simutuila neni ku-sua kumo ku hitila mu vivundilo. Tu hasa ku vueza ku cilemo cetu ku vamuanetu mu ku tonda vinjila via ku va kuaselamo. Kaha omo cilemo caco ci livuezelela, tu ka likata mua kama na Yehova kaha na vusoko vuetu vua mu lutsilielo. Ovu vusamba vuaco, vu ka tualelelaho ku miaka yose ya ya-ye! w23.07 10 ¶11; 11 ¶13; 13 ¶18

Nkala Mukua Kilistu na pande ku lihanguila vati a niunga cihindu ceni. Kaha Mbimbiliya ya hana masiko a andende lika ku tuala ha viuma via na pande ku kava Mukua Kilistu mu ku hangula ku mu saka. (Vili. 15:20; Ngal. 5:​19, 20) Ngeci mua ku zila ku maninga na ku mahamba. Oku kuose ni nkala muntu na pande ku lihanguila. Vunoni ambe nga tua lema mua kama imo sakesi ni tua i zinda, tua pande ku singimika mpoko ya vamuanetu na vandumbuetu ya ku lihanguila cifua ci va va sakelamo. Ku tuala ha cimpande eci, ka tua pandele ku suva evi: (1) Vuangana vua Njambi lika vukevuo vu ka hasa ku tu saka mu vutantuluke. (Isaya 33:24) (2) Nkala Mukua Kilistu na pande ku “mutima ueni ivene” ni nguetu ku lihanguila vize via cili kuli ikeye.—Loma 14:​15, 19, 20. w23.07 24 ¶15

Vuno mua haka seho ya kama ku vusamba vuenu na Yehova ni? Tuli na vusunga nguetu eyo! Vantu vavengi navo ve ku lihakela kapandi ngeci mueni. (Visa. 104:​33, 34) Ve ku linga cose va pangele Yehova, na mutima uose. Kaha aka kakeko kapandi ka va kele na ku lihakela vaIsaleli va puile vaNazileu ni nguetu, vantu va va hanguileLizi liaco, lia lombolola vuino ntuima i va kele na ku muesa vaIsaleli, vaze va kele na ku lihana kuli Yehova mu ku mu pangela mu njila ya ku lifuila. Kaha Masiko a Mosesa a muesele ngecize, yala ni mpuevo ua pandele ku linga imo nkuminio kuli Yehova mu ku hangula ku yoya muono ua vuNazileu mu imo ntsimbu. (Num. 6:​1, 2) Kaha kaIsaleli ue ku lingile nkuminio yaco, ikeye lika ua pande ku kava vimamuna viaco. Omo lia vika honi vamo vaIsaleli va hanguile ku pua vaNazileu? Cuma ca kele na ku va lingisamo, ca puile cilemo cavo kuli Yehova na ku muesa ku santsela ku viose via kele na ku Va lingila.—Ndeu. 6:5; 16:17. w24.02 14 ¶1-2

Mu Mbimbiliya lizi ku “tantuluka” mu ciHevelu, lia lomboloka lukakatela ni nguetu cilemo ca ya-ye, kaha ve ku li pangesa mu ku tumbula cilemo ce ku muesa Yehova ku vangamba veni. Lizi liaco va li pangesa naua mu ku lombolola cilemo ci ve ku limuesa vangamba va Yehova umo na mukuavo. (2 Sam. 9:​6, 7) Kaha cilemo cetu ca ya-ye ni nguetu lukakatela luetu lu hasa ku kola mu ku hita ca ntsimbu. Tu hilulenu honi vati muzimbu ua Ndaniele ua muesa vusunga vuaco. Lukakatela lua Ndaniele kuli Yehova va lu esekele mu muono ueni uose. Vunoni cimo ca vieseko via kama via lihitile navio ca mu solokelele tele endela ku miaka 90. Vakua ku pangela ku nganda ya muangana ka va lemene Ndaniele cipue ku singimika Njambi yeni. Ngeci va lingile vumo vutumbe vua ku tsiha Ndaniele mu ku tumbika limo lisiko lie ku lingisile Ndaniele a hangule nga a kakatela kuli Njambi ni kuli muangana. Via tondekele kuli Ndaniele via puile lika ku likela ku vundila kuli Yehova mu matangua 30. Vunoni Ndaniele ua vianene. Ngeci va mu mbilile mu cipuku ca vandumba. Vunoni Yehova ua lunguisile lukakatela lueni, ua mu ohiele ku tunua tua vandumba.—Ndan. 6:​12-15, 20-22. w23.08 5 ¶10-12

Yehova a tonda tu tualeleho ku lema vamuanetu. Nga vamuanetu va tu linga via ku vihia, ka tua pandele ku singanieka nguetu va na lingimo ku cizango. Vunoni, tu vulukenu nguetu, vamuanetu ve ku lihakela kapandi ka ku muesa vifua via tonda Yehova. (Visi. 12:18) Yehova ua lema vangamba veni vakua kuononoka, vutuhu ve ku sevuka. Mu tue ku sevuka, ke ku tu mbila kuti, vunoni ue ku tualelelaho ku pua kavusamba ketu. (Visa. 103:9) Mua vusunga, ca pua ca seho ya kama ku tambuluisa Tatetu mukua kuecela! (Efe. 4:32–5:1) Tu vulukenu ngecize, mu ku linga ku kotoka ca mavu ci li mu hiehi, tua pande ku tualelelaho ku likata na vamuanetu. Halumo va ka tu luisa cikuma na ku tu soka mu tumenga omo lia lutsilielo luetu. Nga mukemuo, tu ka tondeka cikuma vamuanetu.—Visi. 17:17. w24.03 15-16 ¶6-7

Mu Mbimbiliya mua sula mizimbu ya vakuendze va likuatele vusamba na Yehova, va mu ile ku mutima kaha muono uavo uendele vuino. Ndaviti ua puile umo uavo. Ku vunike, ua hanguile mutamba ua Njambi, kaha mu nima ya ntsimbu ua puile muangana ua lukakatela. (1 Vam. 3:6; 9:​4, 5; 14:8) Nga mu lilongesa muzimbu ua Ndaviti, lungano lueni lu ka mi kaniamesa ku pangela Yehova na lukakatela. Ni mu hasa ku lilongesa via Mako na Timoteo. Mu ka mona ngecize va pangelele Yehova tunde ku vunike, kaha va tualeleleho ku lingamo mu muono uavo uose. Cihangula cavo ca vuisile Yehova ndzolela. Cifua ci mu pangeselamo muono uenu mu ntsimbu ino, cikeco ci ka kuata ku muono uenu ua ku lutue. Nga mu kulahela muli Yehova kati mu mana enu vavene, kaha ikeye a ka mi tuamenena. Mu hasa ku kala na muono ua ndzolela. Vulukenu ngecize Yehova ua haka seho ku viuma vi mue ku mu lingila. Ka kuesi cifua ceka ca ku pangeselamo muono uenu, ca hiana ku pangela Isuenu ua muilu! w23.09 13 ¶18-19

Kapostolo Paulu ua tantekeyele ngueni vamuanaye ka va puile va ku tantuluka. Ca ku muenako, vamo mu cikungulukilo ca mu Yelusalema ka va tsilielele nguavo nendi ua puile ndongesi. (Vili. 9:26) Kaha mu nima ya ntsimbu, vamo va mu handekele mua ku pihia linga vantu vakuavo va likele ku mu kulahela. (2 Kol. 10:10) Paulu ua muene umo mukuluntu mu cikungulukilo ua lingile cihangula ca ku pihia, ce ku suntsuisile vamuanaye. (Ngal. 2:​11, 12) Kaha kavusamba kendi Mako, ua lingile cimo cihangula ca mu vavalele cikuma ku mutima. (Vili. 15:​37, 38) Vutuhu vitanga viaco nga via lingisile Paulu ku likela ku kala na vamuanaye vaco. Vunoni ua tualeleho ku va mona mu njila ya cili kaha na ku tualelelaho ku pangela Yehova. Paulu ua lemene vamuanaye, cilemo caco ca mu kuasele ku hona ku tuala mana ku visevuka viavo, vunoni ku vifua viavo via cili. Cikuavo naua, cilemo ca kuasele Paulu ku linga vi ua handeka mukanda ua lelo. w24.03 15 ¶4-5

Mu Mbimbiliya mua kala mizimbu ya muesa ngecize ku konkama ca pua cimo cifua ca seho. Tu talenu muzimbu ua Isake. Mua ka yoyele ku Ngelale, cifuti ca vaFilisteo, vakua cipululu va sikilile masima ose a va mu hindilile vangamba va Ise. Mu cihela ca ku lituala navo ha matunta linga ohiele masima eni, ua hanguile ku nunguluka na ku ka hinda masiko akuavo. (Njen. 26:​12-18) Vunoni vaFilisteo kasi va mu kavele nguavo mema aco nao a puile avo. Vutuhu ngoco Isake ua tualeleho ku tuameka ciyulo. (Njen. 26:​19-25) Vika via mu kuasele ku muesa ku konkama? Ua lilongesele kuli ise Avilahama ua muesele ciyulo mu vinjila via ku liseza-seza kaha na lungano lua naye Sala ua muesele “cimbembesi ca ku konkama na ku holoka.”—1 Pet. 3: 4-6; Njen. 21:​22-34. w23.09 15 ¶4

Yehova ku cilemo ceni ua tumine muaneni ha mavu linga a ku longese vantu ku tuala ha Vuangana vua Njambi na ku hana muono ueni ku pua nkombelo ya ku tu patula ku vupi na ku-tsa. Mu nima yaco, Yesu ua sangukile na ku hiluka muilu kaha ua pua honi Muangana ua Vuangana vua Njambi. Muzimbu ua kama ua mu Mbimbiliya ua pua ku lela ca lizina lia Yehova, omo a ka puisamo vutumbe vueni ku tuala ha mavu ku hitila mu Vuangana vueni vua ali na ku sika Kilistu muilu. Ovu vutumbe vua Yehova ka citava ku vu alulula. Muomu ua linga cose linga vutumbe vuaco vu ka lipuisemo mu vutuntu. Na vimo viahi vi hasa ku vui imika. (Isa. 46:10; VaHe. 6:​17, 18) Mu nima ya ntsimbu ano mavu va ka alulula ku pua citungu ca ku tantuluka, muze mu ka kala vakua vuviuke va ku mbuto vua Andama na Eva, linga va ka yoyelemo “ku miaka na miaka ya ya-ye.” (Visa. 22:26) Vunoni kati ovio lika, vutumbe vua Yehova vua ambatesela kumo na vikuavo. Vutumbe vueni vua kama vua pua, ku pandakana vantu na tungelo muilu na ha mavu na ku va puisa vusoko vumo lika vue ku mu lemesa. Kaha vose va ka kala na muono ku ntsimbu oyo va ka lemesa lika ikeye mu ku pua Mukua ku Hiana Viose. (Efe. 1:​8-11) Vuno ka ce ku mi komouesa ku mona njila ye ku puisilamo Yehova vutumbe vueni ni? w23.10 20 ¶7-8

VaYundeya va tundile ku Mbambilone mu va hilukile ku Yelusalema,va putukile ku pinda na visoti via ku hona via ku-lia kaha na ku va luisa ku vanguvulu. Omo liaco, cingi cavo va putukile ku likela ku tuala mana ku ku tungulula tembele ya Yehova. Ngeci mukemuo, Yehova ua tumine vapolofeto vavali Hangai na Zakaliya, va ka kaniamese vangamba veni linga kati va hilukile mu nima, ku kaniamesa caco ca vuezele ku ntuima yavo. (Hangai 1:1; Zak. 1:1) Mu nima ya miaka 50, vaze vaYundeya, va tondekele naua ku va kanimesa. Ngeci Ezela, mukua ku soneka vuino Lisiko, ua tundile ku Mbambilone na kuya ku Yelusalema a ka va kaniamese linga va tuameke ku lemesa ca Yehova. (Ezela 7:​1, 6) Ku laza, Yehova ua pangesele vapolofeto Hangai na Zakaliya mu ku kuasa vangamba veni va tualeleho ku mu kulahela mu ntsimbu ya visoti. Na lelo, lino Yehova ue ku tu kaniamesa ku tualelelaho ku kolesa mu ntsimbu ya visoti.—Visi. 22:19. w23.11 14-15 ¶2-3

Vati tue ku muesa cilemo ku vamuanetu? Imo njila ya pua ku va lembezieka. Kaha tue ku hasa ‘ku lilembezieka umo na mukuavo’ nga tuli na cikeketima. (1 Tes. 4:18) Vati tu hasa ku kaniamesa cilemo cetu kuli umo na mukuavo? Mu ku lihakela kapandi ka ku ecela visevuka via vakuetu. Vika ca puila ca seho ku limuesa cilemo umo na mukuavo cikuma-kuma lelo lino? Talenu vusunga vua muesele Petulu ngueni: “Ku-kotoka ca viuma viose ci li mu hiehi. Ngoco vene, . . . lilemienu cikumakuma ha kati kenu.” (1 Pet. 4:​7, 8) Omo ku kotoka ca ano mavu ci ya na ku suena, vika tua pande ku lavelela? Yesu ua handekele ngueni: “Miyati yose va ka mi zinda muomu lizina liange.” (Mat. 24:9) Linga tu hase ku kolesa mu vizindo viaco, tua tondeka ku likuata kumo. Omo tu lingamo, Satana a ka honoua ku koka matepeso a kati ketu, muomu cilemo.—Filp. 2:​1, 2. w23.11 13 ¶18-19

Vusunga vua mu Lizi lia Njambi vua kala na ngolo ya kama. Mu tue ku longesa vusunga ku tuala hali Yehova, mue kuiza viuma via cili. Viuma vika? Satana ke ku hasa naua kuonga vantu, kaha ve ku putuka ku limuena vifua via cili via Yehova. Ngeci ve ku komoka vukama vua ngolo yeni. (Isa. 40:26) Kaha ve ku mu kulahela omo lia vuviuke vueni. (Ndeu. 32:4) Cikuavo naua, ve ku lilongesa via vingi ku mana a Yehova. (Isa. 55:9; Loma 11:33) Kaha ve kuivua ndzolela ku tantekeya nguavo Njambi ua pua cilemo. (1 Yoa. 4:8) Mu ve ku likuata vusamba na Yehova, ve ku kala na lulavelelo lua ku ka yoya miaka yose. Tua kala na civezikiso ca kama ca ku kuasa vantu va likuate vusamba na Yehova. Mu tue ku lingamo, Yehova ue ku tu mona ku pua “vakua ku panga hamo neni.”—1 Kol. 3:​5, NWT. w24.02 12 ¶15

Nga mua pua ndongesi ua Mbimbiliya ni visemi vendi va pua Vakeleho ni? Vuno mu tonda ku mi mbatiza ni? Nga mukemuo, ovuo vutumbe vua cili! Vunoni ntsimbu kanda va mi mbatize, ha katete mua pande ku lihana kuli Yehova. Vati mu hasa ku lihana kuli Yehova? Mu hasa ku lingamo mu ku mu kulahesa ku hitila mu civundilo nguenu, mu ka pangela lika Ikeye na ku mu tuameka mu muono. Mua vusunga, mue ku kulahesa ngecize mu ka lema Yehova ‘na mutima uenu uose, na muono uenu uose, na mana enu ose, na ngolo yenu yose.’ (Mako 12:30) Muntu ue ku lihana kua lika lueni,. vunoni ve ku mu mbatizila ha mbunga, kaha ce ku muesa ku vantu ngecize na lihana kuli Yehova. Ku lihana ya pua nkuminio ya seho ya kama, Yehova a tonda mu i puisemo. Kaha kakeko kapandi ka mua pande ku lihakela.—Ekel. 5:4. w24.03 2 ¶2; 3 ¶5

Malo ose eku hita mu visoti. Kaha Mbimbiliya nguayo vose va liambata va ka hita mu “lamba ya ku vusitu.” (1 Kol. 7:28) Omo lia vika? Muomu yala na mpuevo ka va tantulukile. Va kala na vifua via ku liseza, kaha ka va lemene viuma vimo lika. Cikuavo naua, visemua viavo via liseza. Vintsimbo vimo, ve ku muesa vifua ka va muesele ntsimbu kanda va liambate. Evi viaco, vi hasa ku koka visoti mu vulo. Kaha mu cihela ca ku litavela nguavo vose vavali ve ku sevuka na ku pangela hamo lika mu ku vitanga viaco, ve ku lituika mulonga umo na mukuavo. Cikuavo naua, va hasa vene ku singanieka nguavo ci li ku lutue va litepe ni ku tsiha vulo. Vuno nga va litepa ni va tsiha vulo, va ka manusula vitanga viavo ni? Houe. Yehova ua tonda ngecize, vaze va liambata va tualeleho ku yoya hamo lika ambe nga ca cikalu ku yoya na umo uavo. w24.03 16 ¶8; 17 ¶11

Mu nima ya ku mi mbatiza, lulavelelo luenu lua ku ka yoya miaka yose mu citungu lua tualeleleho ku kola, mu mua tualeleleho ku lilongesa via Yehova na ku-hia mu lutsilielo. (VaHe. 5:13–6:1) Kaha halumo mua setekaho laza ku linga vi va tumbula ku Loma 5:​2-4. Halumo mua hitile mu vieseko via vingi, vunoni omo lia ku kolesa cenu, mua muene ngecize Yehova na viukilila nenu. Ku kala na vusunga vuaco, ca vuezelela lukulahelo luenu mu vikulaheso vieni. Lukulahelo luaco lua livuezelela cikuma ku tuvakana na mu mua vuile lua katete cikulaheso caco. Lu na pu honi lua vusunga mpundu kuli yenu. Kaha evi vi na kuata ku viose mu muono uenu na ku mi kuasa mua ku yoyela na vusoko vuenu, ku linga vihangula via cili na mua ku pangesela ntsimbu yenu. Kapostolo Paulu ua vuezeleko naua lulavelelo lua cifua cika tu hasa ku kala naluo nga tuli na kuya Njambi ku mutima. Ua tu hana vusunga ngueni lulavelelo luetu lu ka lipuisamo mpundu.—Loma 15:13. w23.12 12-13 ¶16-19

Viuma vie ku tu kaluuila. Mu tue ku hita mu visoti via ku linga na ha meso vui, ce ku tu kaluuila ku singanieka ni ku linga vuino viuma. Tue ku ivua vene ngue muilu mu lahako ha mavu ha kola. Vati honi Yehova ue ku tu kuasa nga visinganieka via cifua eci via tu uana? Ua tu hana vusunga vue ku tu kolesa. Ca ku muenako, nga mancimba a na katuka mu kalunga ndonga, mbapolo ye ku ndengandenga cikuma na ku hungumuka. Linga va hase ku kolesa mbapolo yaco, ve ku mbila imo mikole mu ndonga ya kala na vimo vikungu vie ku kuata mbapolo. Evi vikungu vie ku kuasa vuato ku hona ku pinda cikuma. Kaha vakua kuendelamo ve kuivua ku lembama. Vunoni evi vikungu vie ku panga vuino nga mbambolo ya sungama. Na vuno vene, Yehova a ka tu kolesa lika, nga tu tualelelaho ku kakatela kuli Ikeye mu vintsimbu via vikalu. w24.01 22 ¶7-8

Ha ntsimbu i mue ku ivua liova, puenu na ku lihula nguenu: ‘Vika Yehova ua puisamo laza? Singaniekenu ha viuma via ku tanga. Ca ku muenako, mu tue ku tala cifua ce ku niungilamo Yehova tuzila na vintemo vize ka tangele mu cifua ceni kaha naua ka vie ku mu lemesa, lukulahelo luetu muli Ikeye lue ku livuezelela. (Mat. 6:​25-32) Singaniekenu naua ha viuma via lingila Yehova vangamba veni. Mu hasa ku lilongesa via umo muntu i va tumbula mu Mbimbiliya, ua muesele lutsilielo lua ku komouesa ni ku tanda muzimbu ua umo muanetu ua ku matangua ano. Cikuavo naua singaniekenu ha viuma via mi lingila Yehova na vati ua mi nehele mu vusunga. (Yoa. 6:44) Vati ua kumbulula vivundilo vienu. (1 Yoa. 5:14) Vati nkombelo ya Muaneni ya lema ye ku mi kuasa tangua na tangua.—Efe. 1:7; VaHe. 4:​14-16. w24.01 4 ¶6; 7 ¶17