Vika Ua Tangele Njambi?

Nga mu konka viuma via puisamo umo muntu na vati na vi puisamo ci ka mi kuasa ku mu tantekeya vuino. Na ku tantekeya Njambi vene mu ca fua. Muomu ua tu lingila viuma via vingi vie ku tu kuasa lelo lino kaha vie ku tu lingisa ku lavelela via ku lutue na ndzolela.

NJAMBI UA TANGELE VIUMA VIOSE VI TU KUASE

Yehova Njambi ua pua Sakatanga ua ku hiana, kaha “vifua vieni vize vintsa ka tu hasa ku mona, ngolo yeni ya miaka yose na vuNjambi vueni, tu vi mona mpundu ha viuma via ku tanga.” (Loma 1:20) “Na tange mavu ha ngolo yeni, na tumbika via-ku-tanga ha mangana eni, Na mana eni noleka melu.” (Yelemiya 10:12) Via ku tanga vie ku solola ngecize Njambi ua tu haka seho ya kama.

Aci singaniekenu vati Yehova ua tovalesa muono uetu mu ku tu tanga mu “ciseteko ceni.” (Njenisisi 1:27) Vutuhu vukama vueni vua hiana seho ya kama, vunoni ua tu tangele mu cifua ci tu kuasa ku solola vifua vieni mu vundende. Ua tu tangele na vutongue vua ku ivuisisa visinganieka vieni na vitume vieni. Mu tue ku lihakela kapandi ka ku niunga via tu leka, tue ku yoya muono ua ndzolela na vutumbe. Vunoni kati ovio lika, ua tu hana naua vukovelelo vua ku likuata vusamba neni.

Viuma via tangele Njambi ha mavu vie ku solola vati ue ku livua hali yetu. Mu mezi a sonekele kapostolo Paulu ngueni Njambi “ikeye ka likelele ngoco na vukaleho vuahi, muomu ua lingile ngozi, kaha ua mi hele mema a ku fuma muilu na miaka ya vimbuto, na sulisa mitima yenu na via-ku-lia na ndzolela.” (Vilinga 14:17) Njambi ke ku tu hana lika viuma vi tua tondeka linga tu yoye. Vunoni ua tu lundika vikuavo via ku liseza-seza linga tu ivue ku tovala mu muono. Vutuhu ngoco, evi kati vikevio lika via tondele Njambi.

Yehova ua tangele mavu linga vantu va yoyeho miaka yose. Mbimbiliya nguayo: “Mavu na a hie kuli vana va vantu,” kaha ka “a tangele cihuolohuohuo ua a vumbile linga va kaleho.” (Visamo 115:16; Isaya 45:18) Veya va pande ku kalaho kaha mu miaka i ngahi? “Vakua vuviuke va ka suana cifuti, kaha va ka kalamo ku miaka na miaka ya ya-ye.”​—Visamo 37:29.

Yehova ua tangele va yala na mpuevo va katete Andama na Eva, na ku va haka mu citungu ca ku viuka mu “ku liviukisa na ku liniunga.” (Njenisisi 2:​8, 15) Njambi ua va hele vipanga vivali via ndzolela ngueni: “Semenu, na ku lilanesa kaha sulisenu mavu naua, na ku a ononuesa.” (Njenisisi 1:28) Ngeci Andama na Eva tele ve ku yoyele muono ua ya ye ha mavu. Ca vusiua va hanguile ku alulukila Njambi kaha ngeci mukemuo va zimbalesele lulavelelo lua ku kala ha kati ka “vakua vuviuke” vaze ‘va ka suana mavu.’ Vuno lisino liavo lia lingisa Njambi ku alulula vutumbe vueni ni? Na limo litangua liahi. Vunoni tu ci talenu lika ha cuma cikuavo ca tu lingila Njambi.

NJAMBI UA TU HANA LIZI LIENI LIA KU SONEKA

Mbimbiliya ya tsimana mu ku pua Lizi lia Njambi. Omo lia vika Yehova ua tu hana Mbimbiliya? Ca katete ua tonda tu lilongese vieni. (Visimo 2:​1-5) Cili, Mbimbiliya ka i hasa kumbulula nkala cihula ci tu hasa ku kala naco ku tuala hali Njambi​—kaha ka kuesi livulu lieka li hasa ku lingamo. (Ekelesiaste 3:11) Vutuhu ngoco, mizimbu yose ya kala mu Mbimbiliya i hasa ku tu kuasa ku tantekeya Njambi. Tue ku mona vifua vieni ha vize vie ku lingila vantu, na viuma via lema na vize via zinda. (Visamo 15:​1-5) Ua solola visinganieka vieni ku tuala ha ku lemesa, yoyesi, na mua ku muenamo vupite. Kaha Mbimbiliya ya tu soluela vuntu vua Yehova mu mezi na vilinga via Muaneni, Yesu Kilistu.​—Yoano 14:9.

Vusunga vukuavo, vua lingisa Yehova ku tu hana Lizi lieni Mbimbiliya, vua pua linga tu tantekeya vati tu hasa ku yoya muono ua ndzolela. Mu Mbimbiliya yose, Yehova ue ku tu lekesa vati tu hasa ku yoya na ndzolela mu vusoko, na vati tu hasa ku pinda na ku uma mutima. Kaha ngue mu va na muesa mu mukanda uno, Mbimbiliya ya muesa vikumbululo via vihula via kama ngeci mua: Omo lia vika tuyando tua lana ngecize? Vika tua lavelela ku lutue? Ya lombolola naua vika Njambi a ka linga mu ku puisamo vutumbe vueni vua katete.

Kuli vusunga vukuavo vua muesa ngecize Mbimbiliya ya pua livulu lia ku lifuila. Va lisonekele mu miaka 1,600 kuli vamo vamala 40, vunoni ya tsindika ha cimpande cimo, muomu kuli Njambi ya tunda. (2 Timoteo 3:16) Mbimbiliya ka ya lifuile na mavulu akuavo a ku laza, va i niungiliya mu makulukazi a miaka ku hitila mu mazengununo. Kaha matangua ano, ve ku i tepela ku vantu vavengi. Ku kalako ca Mbimbiliya na ntsimbu ino ca pua vusunga vu muesa ngecize “lizi lia Njambi yetu li ka mana ku miaka yose ya ya-ye”​—Isaya 40:8.

NJAMBI UA LIKUMINIA KU PUISAMO VUTUMBE VUENI

Kuli vimo via lingile Njambi mu ku hana vusunga vu muesa ngecize a ka puisamo vutumbe vueni ha vantu. Ngue mu tua handeka laza, Njambi ua tondele ngueni vantu va yoye miaka yose ha mavu. Vunoni omo Andama ua hanguile ku sahula Njambi ua lingile vupi, kaha ka hasele naua ku yoya miaka yose, ikeye na vana veni ve ku semukile. “Hali yala umo lika, vupi vua kovelele hano ha mavu, na ku-tsa ha vupi; kaha ngecize vene ku-tsa ci na hete ku vantu vose muomu va na lingi vupi.” (Loma 5:12) Omo Andama ua muesele lisino ca monekele ngue vutumbe vua Njambi vua tanguka. Vati Yehova ue ku lingile?

Yehova ua lingile viuma via litombola na vuntu vueni. Mu vuoloke vueni Andama na Eva ua va hele cihiso ca vilinga viavo, vunoni ua viukisile viose ku tuala ha vana veni ku lutue. Mu mana eni ua hanguile vati a manusula citanga caco, kaha vuasi-vuasi ua zimbuile mua ka vi manusuilamo. (Njenisisi 3:15) Vupi na ku-tsa vue ku huile ku hitila muli Muana Njambi, Yesu Kilistu. Kaha evi via ambatesele kumo na vika?

Linga a patule vantu ku luvinda lueza omo lia lisino lia Andama, Yehova ua tumine Yesu ha mavu a ku longese vantu njila i tuala ku muono “na ku hana muono ueni ku kula va vengi.”a (Mateo 20:28; Yoano 14:6) Yesu ua hasele ku kula vantu muomu ua puile ua ku tantuluka ngue mua puile Andama ha katete. Vunoni ikeye ka lifuile na Andama, Yesu uononokele ku cizango na ha ku-tsa ceni. Mu ku linga Yesu ka fuilile ku-tsa, ngeci Yehova ua mu sanguile a ka yoyele muilu mua tundile. Kaha Yesu ua hasele ku linga via honene ku linga Andama​—Ku hana vukovelelo vua muono ua ya-ye ku vantu vakua ku ononoka. “Muomu ngue ha lisino lia muntu uze umo lika, vaze va vengi va na pu vakua vupi, ngecize naua ha ku ononoka ca uze ueka umo lika, vaze va vengi va ka pua vakua vuviuke.” (Loma 5:19) Ku hitila mu ku kula ca Yesu, Njambi a ka puisamo cikulaheso ceni linga vantu va ka yoye miaka yose ha mavu.

Tua lilongesa via vingi hali Yehova ku tuala ha cifua ca hanguile ku manusuilamo cimpande ca katukile omo lia lisino lia Andama. Tua mono nguetu na vimo viahi vi hasa ku tangula Yehova ku puisamo vize via likuminyine; lizi lieni “li ka vezika.” (Isaya 55:11) Tue ku mona naua vukama vua cilemo ceni kuli yetu. “Mukemuo cilemo ca Njambi ca solokele muli etu, omo Njambi na tumu Muaneni umo lika ha mavu linga tu yoye hali ikeye. Mukemuo mu li cilemo, kati omo etu tua lemene Njambi, vunoni omo ikeye ua tu lemene, kaha ua tumine Muaneni a pue nkombelo ya maninga ya ku vipi vietu.”​—1 Yoano 4:​9, 10.

Njambi “cipue muaneni ivene intsa ka tetelele, vunoni ua tu eceleleye yetu vose,” ngeci tuli na vusunga nguetu “a ka tu hia naua viuma viose” via tu kulahesa. (Loma 8:32) Viuma vika Njambi na kulahesa ku tu lingila? Tandenu vi na hatako.