Vamuanetu, Vuno Muli na ku Lihakela Kapandi mu pue Vakua ku Kuasa Vipanga Ni?

1. Vati kapostolo Paulu ua kele na ku muenamo vakua ku kuasa vipanga?

VAKUA KU KUASA vipanga ve ku kuasa cikuma vikungulukilo. Kapostolo Paulu ua hakele seho ya kama ku vamuanetu vaco. Vusunga vuaco tu vu uana mu mukanda ua sonekelele Vakua Kilistu ku Filipu. Mu mukanda uaco, Paulu ua menekele vakua ku kuasa vipanga hamo lika na vakuluntu mu cikungulukilo.—Filp. 1:1.

2. Vati muanetu Luis ue ku livua mu kupua mukua ku kuasa vipanga?

² Vamuanetu vavengi va ku mbatiza, ve kuivua ndzolela ya ku kuasa cikungulukilo mu kupua vakua ku kuasa vipanga. Ca ku muenako, muanetu Devan tele ali na miaka 18 mu va mu hanguile kupua mukua ku kuasa vipanga. Kaha muanetu Luis va mu hanguile kupua mukua ku kuasa vipanga tele ali na miaka kampe 50. Muanetu Luis nguendi: “Capua civesikiso ca kama kuli yange, ku kuasa cikungulukilo mu kupua mukua ku kuasa vipanga. Cikumakuma mu nje ku singanieka ha cilemo ci ve ku nji muesa vamuanetu!” Mua vusunga, mukemuo mu ve ku livua cingi ca vakua ku kuasa vipanga.

3. Vika tu simutuila mu cilongesa cino?

³ Nga va mi mbatiza laza kaha kanda mupue mukua ku kuasa vipanga, vuno citava mu lihakele cizango caco ni? Vika vi hasa ku mi kuasa ku puisamo cizango caco? Vika ya handeka Mbimbiliya ku tuala ha viuma vi mua pande ku puisamo linga mupue mukua ku kuasa vipanga? Mu cilongesa cino, tu kumbulula evi vihula. Vunoni ha katete, tu simutuila vika vakua ku kuasa vipanga ve ku linga.

VAKUA KU KUASA VIPANGA VE KU LINGA VIKA?

4. Vakua ku kuasa vipanga ve ku linga vika? (Talenu naua cikupulo.)

⁴ Vamo vakua ku kuasa vipanga ve ku tala via vihela via kuambuluila na ku tala via mikanda i tue ku pangesa mu kuambulula. Kaha vakuavo co, ve ku kuasa ku ku lelesa na ku vuahesa Ndzivo ya Vuangana. Cikuavo naua, ve kupua vakua kuinikila na ku pangela ku vintsambu ku viuano. Vakua ku kuasa vipanga ve ku fuitangana cikuma mu ku puisamo vipanga viavo. Vamuanetu vaco vapua va kuhia mu lutsilielo, va lema Yehova kaha ve ku yoya kuliya na vimamuna via Mbimbiliya. Cikuavo naua, va lema vamuanaye mu cikungulukilo. (Mat. 22:​37-39) Vika vamuanetu va ku mbatiza va hasa ku linga, vapue vakua ku kuasa vipanga?

5. Vika vi hasa ku mi kuasa kupua vakua ku kuasa vipanga?

⁵ Mbimbiliya ya muesa vimo vinanga via pande ku puisamo umo muanetu, linga va mu hangule kupua mukua ku kuasa vipanga. (1 Tim. 3:​8-10, 12, 13) Nga mu lilongesa via vinanga viaco na ku lihakela kapandi ka ku vi puisamo, ci ka mi kuasa kupua mukua ku kuasa vipanga. Vunoni ha katete, mua pande ku hilula omo lia vika mu tonda kupua mukua ku kuasa vipanga.

VIKA VIA PANDE KU MI LINGISA KUPUA MUKUA KU KUASA VIPANGA?

6. Vika via pande ku mi lingisa ku kuasa vakuenu? (Mateo 20:28; talenu naua ca helu.)

⁶ Tua pande ku tambuluisa lungano lua Yesu Kilistu, muomu ua kele na ku linga viuma viose omo lia ku lema Ise na vantu. Cilemo ca lingisile Yesu ku lihakela kapandi ka ku kuasa vakuavo na ku linga vipanga via solokele ngue ka via kele na seho. (Tandenu Mateo 20:28; Yoano 13:​5, 14, 15) Nga viose vi mu linga, mu vi lingila omo lia cilemo, Yehova a ka mi vezikisa na ku mi kuasa linga mu puisemo cizango cenu ca kupua mukua ku kuasa vipanga.—1 Kol. 16:14; 1 Pet. 5:5.

7. Omo lia vika muanetu a tonda kupua mukua ku kuasa vipanga ka pandele ku lingamo na vutumbe vua ku litsimanesa?

⁷ Mu mavu ano, vantu ve ku komoka cikuma vakua ku litsimanesa. Vunoni vangamba va Yehova ka va fuilemo. Muanetu ua lema vakuavo ngeci mua Yesu, ke ku tumina vakuavo ni ku limona kupua ua seho. Nga muanetu ue ku limona kupua ua seho va mu hangula kupua mukua ku kuasa vipanga, halumo a ka viana ku puisamo vipanga vie ku soloka ngue ka via kele na seho vunoni via tondeka mu ku niunga vampanga va Yehova. Cikuavo naua, a hasa ku mona ngueni vipanga viaco ka via mu fuilile. (Yoa. 10:12) Yehova ke ku vezikisa vantu ve ku limona kupua va seho ku hiana vakuavo.—1 Kol. 10:​24, 33; 13:​4, 5.

8. Cimamuna cika ua hele Yesu ku vapostolo 12?

⁸ Ambe vene vavusamba va Yesu va tondele ku puisamo viteli na vutumbe vua ku pihia. Ca ku muenako, vapostolo va Yesu, Tiango na Yoano va lombele Yesu a va hane citeli ca seho mu Vuangana vuendi. Yesu ka va sangalele omo lia ku tonda kupua va seho ku hiana vakuavo. Vunoni ua lekele vose vapostolo 12 nguendi: “Uose a hianga kupua ua kama ha kati kenu, a ka pua ngamba yenu; kaha uose a hianga kupua ua ku livanga ha kati kenu, a ka pua mukuamanda ua vose.” (Mako 10:​35-37, 43, 44) Muanetu a tonda kupua mukua ku kuasa vipanga na vutumbe vua ku kuasa vamuanaye, ue kupua civezikiso mu cikungulukilo.—1 Tes. 2:8.

VATI MU HASA KU VUEZA KU CIZANGO CA KU KUASA VAMUANOKO?

9. Vati mu hasa ku vueza ku cizango ca ku kuasa vamuanoko?

⁹ Mua vusunga, mu tonda ku kuasa vakuenu muomu mua lema Yehova. Vunoni, halumo ka mua kele na cizango ca kupua mukua ku kuasa vipanga muomu mua tantekeya nguenu mu ka linga vipanga via vingi. Vati mu hasa ku vueza ku cizango ca ku kuasa vamuanoko? Singaniekenu ha ndzolela i mu kevua mu ku kuasa vamuanetu na vandumbuetu. Yesu nguendi: “Ku-hana ca hiana ku-tambula mu ku vezika.” (Vili. 20:35) Yesu nendi ua lingilemo, ngeci ua vuile ndzolela ya vusunga mua kuasele vakuavo. Kaha nenu mu hasa kuivua ndzolela yaco.

10. Vati Yesu ua muesele ngecize ua vuile ndzolela mu ku kuasa vakuavo? (Mako 6:​31-34)

¹⁰ Ca ku muenako, tu talenu vati Yesu ua muesele ngecize ua vuile ndzolela mu ku kuasa vakuavo. (Tandenu Mako 6:​31-34.) Tangua limo, Yesu na vapostolo vendi va honene cikuma ngeci va ile ku cihela ca ku holoka linga va ka huime. Vunoni civunga ca livangele ku heta ku cihela caco, mu ku vandamena Yesu linga a va longese. Mu ku linga ua honene, nga ua vianene ku va longesa. Muomu Mbimbiliya nguayo: “Ka va muene ntsimbu cipue ya ku lia.” Cikuavo naua, Yesu nga ua va longesele via vindende lika na ku va hiluisa. Vunoni omo lia ku lema vantu “ua sangumukile ku va longesa viuma via vingi.” Kaha ua tualeleleho ku va longesa noho ‘litangua lia tokele cikuma.’ (Mako 6:35) Yesu ka lingilemo omo lia ntsindiye, vunoni muomu ua vuililile vantu “cikeketima.” Ua tondele ku va longesa muomu ua va lemene cikuma. Ku kuasa vakuavo ca mu vuisile ndzolela ya kama.

11. Vika naua ua lingile Yesu mu ku kuasa mbunga? (Talenu naua cikupulo.)

¹¹ Yesu ka longesele lika vantu, vunoni ua va kuasele naua mu njila yeka. Ca ku muenako, ua va hanene viakulia. Mu ntsimbu yaco, Yesu ua lingile cikomoueso na vantsi vavali na vimbolo vitanu kaha ua hele vandongesi vendi linga va tepele mbunga. (Mako 6:41) Ku lingamo, Yesu ua longesele vandongesi vendi va kuase vakuavo. Cikuavo naua, ua va kuasele ku mona seho ya ku kuasa vakuavo. Vikevio vi va pande ku linga vakua ku kuasa vipanga. Aci singaniekenu ha ndzolela i va vuile vapostolo va Yesu mu ku kuasa ku tepela mbunga viakulia, noho “vose va lile, va kutile”! (Mako 6:42) Yesu ka tuamekele lika vizango via vakuavo mu ntsimbu yaco, vunoni mu muono uendi uose hano ha mavu ua kuasele vakuavo. (Mat. 4:23; 8:16) Yesu ua vuile ndzolela ya ku longesa vakuavo na ku va kuasa na viuma via tondekele. Mua vusunga, mu kevua ndzolela ya kama nga mu tuameka vizango via vakuenu na ku lihakela kapandi ka kupua mukua ku kuasa vipanga.

12. Omo lia vika ka tua pandele ku singanieka nguetu ka tua kele na seho mu cikungulukilo?

¹² Nga mu mona nguenu ka mua kele na vutongue, kati mu hilukile munima. Mua vusunga, mua kala na vifua vi hasa ku kuasa mu cikungulukilo. Hilulenu ha mezi a sonekele Paulu ku 1 Kolintu 12:​12-30, kaha vundilenu Yehova a mi kuase ku mona vati mezi aco a likuata nenu. Mezi a Paulu a muesa ngecize, tu vose tua kala na mutamba ua seho mu cikungulukilo. Kaha nga mu mona nguenu kanda mu puisemo vitondeka mu pue mukua ku kuasa vipanga, kati mu hilukile munima. Vunoni, lingenu vi mu hasa mu ku pangela Yehova, na ku kuasa vamuanoko. Kaha kalenu na vusunga nguenu, vakuluntu mu cikungulukilo va ka mi tuala mana na ku mi hana vipanga vi mu hasa ku puisamo.—Loma 12:​4-8.

13. Vuno vifua via tondeka ku vakua ku kuasa vipanga vakevo lika va pande ku kala navio ni?

¹³ Talenu naua viuma vikuavo via pande ku mi lingisa ku lihakela kapandi ka kupua mukua ku kuasa: Cingi ca vifua vie ku tondeka mukua ku kuasa vipanga, vikevio naua va pande ku kala navio Vakua Kilistu vose. Ca ku muenako, Vakua Kilistu vose va pande ku likuata vusamba vua cili na Yehova, ku kala na vukatuisi vua ku kuasa vakuavo na ndzolela kaha na ku muesa lungano lua cili ku vakuavo. Vunoni, vika naua va pande ku linga vapue vakua ku kuasa vipanga?

VIKA MUA PANDE KU LINGA MUPUE VAKUA KU KUASA VIPANGA?

14. Vika ca lomboloka kupua “vakua kasingimiko”? (1 Timoteo 3:​8-10, 12)

¹⁴ Tu ci hilulenu vi ya handeka Mbimbiliya ku 1 Timoteo 3:​8-10, 12. (Tandenu.) Vakua ku kuasa vipanga va pande kupua “vakua kasingimiko.” Aa mezi citava naua ku a handeka nguetu “uze u va hasa ku singimika ku vakuavo,” ni “uze ue ku linga viuma vi va hasa ku singimika vantu.” Eci ka ca lombolokele ngecize, ka mua pandele ku zola-zola ni kueha. (Ekel. 3:​1, 4) Vunoni mua pande ku fuitangana mu ku puisamo viteli vi va mi kundika. Nga va mi tantekeya kupua vantu va va hasa ku kulahela, cikungulukilo cose ci ka mi singimika.

15. Vika a lomboloka mezi “kati vakua malimi avali” na “kati vakua cipululu ku nganio ya ngoco”?

¹⁵ “Kati vakua malimi avali.” Aa mezi a lomboloka ngecize, mua pande kupua vakua vusunga na kupua muntu u va hasa ku kulahela. Cikuavo naua, mua pande ku puisamo vi mue ku kulahesa kaha ka mua pandele ku kuisa vakuenu. (Visi. 3:32) Kaha mezi “Kati vakua cipululu ku nganio ya ngoco” a lomboloka ngecize, mua pande kupua vakua vusunga ku mingoso na cifua ci mue ku pangeselamo vimbongo. Kaha ka mua pandele ku zangamena vavusamba venu mu cikungulukilo.

16. (a) Vika a lomboloka mezi “kati vakua ku nua viniu via vingi”? (b) Vika a lomboloka mezi “mutima ua ku lela”?

¹⁶ Mezi “Kati vakua ku nua viniu via vingi” a lomboloka ngecize ka mua pandele kunua cikuma ni ku tsimana kupua vakua kupenda. Kaha ku kala na “mutima ua ku lela” ca lomboloka mua pande ku yoya kuliya na masiko a Yehova. Vutuhu ka mua tantulukile, vunoni mue kuivua ciyulo omo lia ku likuata vusamba vua cili na Njambi.

17. Vika a lomboloka mezi “va veseke”? (1 Timoteo 3:10; talenu naua cikupulo.)

¹⁷ Mezi “va veseke” a lomboloka ngecize, vakuluntu mu cikungulukilo va hasa ku mi kulahela nguavo mu puisamo viteli vi va mi kundika. Ngeci mukemuo, nga vakuluntu mu cikungulukilo va mi hana cimo cipanga, lihakelenu kapandi ka ku kava vimamuna via lukungulukilo. Cikuavo naua, ntsimbu kanda mu linge cipanga caco, tantekeyenu vi mua pande ku linga na ntsimbu i mua pande ku vipuisamo. Kaha omo mu puisamo vuino vipanga vienu, vamuanoko mu cikungulukilo va ka mona kapandi kenu ka kuhia mu lutsilielo. Vakuluntu mu cikungulukilo, tualenu mana ku ku longesa vamuanetu va ku mbatiza. (Tandenu 1 Timoteo 3:10.) Vuno mu cikungulukilo cenu mua kala vakuendze va ku mbatiza ni? Vuno vapua lungano lua cili ku tuala ha ku liviukisila viuano na ku lilongesa mu vulika ni? Vuno ve ku kumbulula ku viuano na kuambulula kusua kumo ni? Nga mukemuo, va hanenu vipanga vi va hasa ku puisamo kuliya na citso cavo. Ku lingamo, mu ka mona nga vakuendze va napuho mu ku tambula citeli ca kupua vakua ku kuasa vipanga. Kaha mu va ka puisamo miaka 17 ni 18, halumo va ka va hangula kupua vakua ku kuasa vipanga.

18. Vika a lomboloka mezi “kavesi na aha ha ku payela”?

¹⁸ Mezi “kavesi na aha ha ku payela” a lomboloka ngecize, na umo uahi ali na vusunga vua ku mi vangeya viuma via ku pihia. Ku handeka vusunga, vantu va hasa ku mi vangeya. Na Yesu nendi va mu vangeyele, kaha ua handekele nguendi vandongesi vendi navo ve ku hitilemo. (Yoa. 15:20) Vunoni nga mu kala na vilinga via cili ngeci mua Yesu, mu ka kala na lutsimo lua cili ku vamuanetu.—Mateo 11:19.

19. Vika ca lomboloka kupua “vamala va mpuevo umo lika”?

¹⁹ “Vamala va mpuevo umo lika.” Aa mezi a lomboloka ngecize, nga muambata mua pande ku mona vulo ngue mue ku vu muenamo Yehova. Ni nguetu, vulo vua pande kupua vua yala umo lika na mpuevo umo lika. (Mat. 19:​3-9) Yala Mukua Kilistu ka pandele ku linga vupangala. (VaHe. 13:4) Cikuavo naua, mua pande kupua vakua vusunga kuli mpueyeni na ku hona ku lisakalala na mpuevo ueka.—Yombi 31:1.

20. Vati yala ue ku tuamenena “vuino” vusoko vuendi?

²⁰ “Vakua ku sika vana vavo na zindzivo ziavo vuino.” Nga mua pua mutue ua ndzivo, mua pande ku puisamo vuino viteli vienu mu vusoko. Puenu na kuendesa ku lemesa ca mu vusoko kusua kumo. Puenu na kuambulula na mukua ndzivo yenu hamo lika na vana venu. Cikuavo naua, kuasenu vana venu va likuate vusamba na Yehova. (Efe. 6:4) Yala ue ku tuamenena vuino vusoko vuendi, ue ku muesa ngecize a hasa ku tuamenena vuino cikungulukilo.—Setekesenu na 1 Timoteo 3:5.

21. Vika mua pande ku linga nga kanda mupue vakua ku kuasa vipanga?

²¹ Nga kanda mupue vakua ku kuasa vipanga, sukulukambu, lilongesenu cino cilongesa na civando na ku vundila ku tuala ha cimpande caco. Lilongesenu naua vi mua pande ku linga mupue vakua ku kuasa vipanga, na ku lihakela kapandi ka ku vi puisamo. Cikuavo naua, hilulenu ha cilemo cenu kuli Yehova na ku vamuanoko mu cikungulukilo. Ku lingamo ci ka vueza ku cizango cenu ca ku va kuasa. (1 Pet. 4:​8, 10) Omo mu kapua mukua ku kuasa vipanga, mu kevua ndzolela omo lia ku pangela vamuanoko mu cikungulukilo. Kaha kalenu na vusunga nguenu, Yehova a ka vezikisa kapandi kenu ka ku puisamo vitondeka linga mupue vakua ku kuasa vipanga.—Filp. 2:13.