Vuno Njambi kua Kala Ni?

Cikumbululo ci ya hana Mbimbiliya

Eyo, Mbimbiliya ya muesa vukaleho vua ku sula ngandza ngecize Njambi kua kala. Mbimbiliya ya tu kaniamesa tu pue na ku “eseka viuma viose” kaha na ku pangesa mangana, linga tu kulahele muli Njambi ca ku hona ku takania, kati mu ku tsiliela vi ve ku handeka vakua malombelo. (1 Tesalonika 5:21; 1 Yoano 5:20) Ngeci mukemuo, tu pangesenu evi viuma vi na hatako tu hilule vi ya longesa Mbimbiliya:

• Ku linoneka ca viuma muilu na ha mavu kaha na muono, ca muesa ngecize kua kala Sakatanga. Mbimbiliya nguayo: “Nkala ndzivo umosi na i tungu; vunoni mukua ku tunga viuma viose ikeye Njambi.” (VaHevelu 3:4) Vutuhu eyi nguli ya yasi ku ivuisisa, vunoni vakua ku lilongesa cikuma ve ku i komoka.a

• Etu vantu, tue ku semuka na cizango ca ku tonda ku tantekeya vutumbe vua muono, cizango caco ca pua ngue ndzala, vunoni kati ndzala ya via ku-lia. Muomu via ku-lia mpundu ka vie ku manusula ndzala yaco. Ngeci mukemuo Mbimbiliya ya handeka via imo ndzala ya mu “lutsilielo” ni nguetu cizango ca ku tonda ku tantekeya Njambi na ku mu lemesa. (Mateo 5:3; Ku-Solola 4:11) Eci cizango ca mu lutsilielo ci tua kala naco, ka ca puile lika vukaleho vu muesa ngecize Njambi kua kala, vunoni ca muesa naua ngecize Njambi ua pua Sakatanga ua cilemo uze ua tonda tu puisemo cizango caco.—Mateo 4:4.

• Mu Mbimbiliya, mua kala vupolofeto vua vuingi vu va sonekele miaka ya ingi te kanda vu soloke. Vunoni vua lipuisilemo mu vutuntu ngue muze vene mu va vu sonekele. Vusunga vua vupolofeto vuaco, vua hana vukaleho vua kama vu muesa ngecize ya tunda kuli umo ua hiana vantu vose.—2 Petulu 1:21.

• 

  Vakua ku soneka Mbimbiliya va tantekeyele viuma ku tuala ha siensia, vize ka va tantekeyele vakuavo, va yoyele ku ntsimbu yavo. Ca ku muenako, vantu ku laza va tsilielele ngecize mavu va a tumbika hali umo kasitu ngeci mua njamba, ngulu, ni ngombe. Vunoni Mbimbiliya ya handeka nguayo, Njambi ua “a sukika mavu na hamo hahi.” (Yombi 26:7) Kaha naua Mbimbiliya ya handeka nguayo, “mavu a pua muzingulule” ni nguetu livundungulu. (Isaya 40:22) Vantu vavengi va tsiliela ngecize vakua ku soneka Mbimbiliya, va hasele lika ku tantekeya eyi mizimbu na vukuasi vua Njambi.

• Mbimbiliya ya kumbulula vihula via vingi via vikalu, vihula via ku linga nga muntu ka tantekeya vikumbululo viaco, a hasa ku likela ku tsiliela muli Njambi. Ca ku muenako: Nga Njambi ua pua mukua cilemo kaha mukua ngolo yose, omo lia vika mavu a na sulu na lamba na vupi? Omo lia vika malombelo eku songangeya vantu ku linga via ku vihia kati ku via cili?—Tito 1:16.