Omuo lia Vika Vantu ka ve ku Singimika Naua Vakuavo?

SEHO YA KALA HA KU SINGIMIKA VAKUETU

Ku singimika vakuetu ce ku tepulula matoto, kaha ce ku vatesa vimpande.

Cimo cisimo ca mu Mbimbiliya nguaco: “Ku-kuania civotsi ci tengesa vukalu, vunoni lizi lia ku vavalesa lisangumuna vutenu.” (Visimo 15:1) Ku muesa kasahuntu cipue mu mezi ni mu vilinga ce ku sambeya lika vutenu na ku koka visoti.
Yesu ua handekele nguendi: “Kanua ke ku handeka vize vi na sulu ku mutima.” (Mateu 12:34) Kasahuntu ke ku muesa lika cifua ci tue ku muenamo vantu vakua cisemua, muyati, cifuti ni cifua ceka.

Vamo vakua ku tondesesa vehuile vantu va ku pua 32 000 mu vifuti 28, kaha vantu vaco va handekele nguavo lelo lino kasahuntu ka na lana mua kama.

VI MU HASA KU LINGA

Kuose-oko ku muli, cipue ku vipanga ni ku sikola, singimikenu vantu, ambe vene nga ka mue ku litombola navo. Tondenu haka mu hasa ku litombuela navo. Ku linga evi, ci mi kuasa linga kati mu va paye ni ku va sembulula.

“Kati mu hise vakuenu, linga nenu kati va mi hise.”—Mateu 7:1.

Lingilenu vakuenu vize vi mua tonda ku mi lingila. Ngozi ye ku sema ngozi na ikuavo ni nguetu, nga mu kuasa vakuenu navo va kevua cizango ca ku mi kuasa.

“Cikuavo naua, muose mu mu tonda vakuenu va milinge, nenu va lingenumo.” —Luka 6:31.

Puenu vakua kuecela. Kulahelenu vuntu vua vakuenu. Kati mu tuntile ku singanieka nguenu ‘muntu uaco na lingila vene indzi.’

“Liano lia muntu li mu vandekesa ku vutenu, na vumpahu vueni vukevuo kuecela ku civulumuna.”—Visimo 19:11.

Mu ndzivo ya Vuangana ya Vakaleho va Yehova ciuano kanda ci putuke. Kaha vantu va miaka na miyati ya kuliseza-seza, va li na ku limeneka kaha ku simutuila na ndzolela yose.

Umo yala ali na kuliaula mu imo restaurante, kaha ali na ku tenukila mukua ku tepela viakulia. Vunoni vakuavo va na tumama mukulo uendi, ka vesi na kulivua vuino.

VI VE KU LINGA VAKALEHO VA YEHOVA

Vakaleho va Yehova ve ku sambeya kasingimiko mu membo a va yoyela na ku vipanga.

Tue ku longesa Mbimbiliya vuana ku vantu vunoni ka tue ku va kakateya ku tava viuma vi tua tsiliela. Vunoni tue kulihakela lika kapandi ka kuononoka Mbimbiliya mu ku va ambuluila ‘na ku konkama na kasingimiko.’—1 Petulu 3:15; 2 Timoteo 2:24.

Tua zinda kahangu kaha tue ku tava vantu va vifua viose kuiza ku viuano vietu na ku lilongesa vi-ya handeka Mbimbiliya. Tue kulihakela kapandi ka ku singimika viuma vi va tsiliela vakuetu na ku ‘singimika vantu vose.’—1 Petulu 2:17.

Tue ku singimika nguvulu (Loma 13:1) Tue kuononoka masiko a cifuti na ku fueta lisimu. Kaha vutuhu ka tue ku lihaka mu pulitika vunoni tue ku singimika vizango via vakuetu ku tuala ha ku hakuila pulitika ni kuahi.