Vusoko Vua Kama Vua Yakomba

ACI tale ovu vusoko vua kama vuli aha. Ava vakevo vana 12 va Yakomba. Kaha ua kele naua na vana va vampuevo. Ua tantekeya mazina avo ni? Tu ci li longese via vamo vana veni.

Lea ua semene Luvene, Simeone, Levi na Yunda. Omo Lakele ua muene ngueni ka kele na ku sema ua vuile vusiua vua kama. Ngeci ua hele ngamba yeni Mbileha kuli Yakomba kaha Mbileha ua semene vana vavali mazina avo Ndane na Nafatali. Kaha na Lea naua ua hele ngamba yeni Zilipa kuli Yakomba, kaha Zilipa ua semene Ngande na Asele. Lea ua semene naua vana vakuavo vavali, Isakale na Zembulone.

Amba vuose Lakele neni ua semene muana. Lizina lieni Yosefe. Amba tu ka lilongesa via vingi hali Yosefe, muomu ua puile yala ua seho ya kama. Ava vakevo vana 11 va semene Yakomba mua kele ku ndzivo ya Lambane ise ya Lakele.

Yakomba ua kele naua na vana vavampuevo, vunoni Mbimbiliya ya tumbula lika lizina lia umo. Ikeye Ndina.

Omo Yakomba ua fumine ku ndzivo ya Lambane mu ku hiluka ku Kanana. Ua kunguluile vusoko vueni na matanga eni a vampanga na vangombe, kaha ua katukile na kuya.

Mu vungendzi vua ku hiluka ku Kanana, Lakele ua semene muana mukuavo ua yala. Vunoni omo Lakele ua semene muana uaco, ua vuile ku vavala ca kama kaha ua tsile mu nima ya ku sulumuna. Vunoni kakeke uovolokele. Yakomba ua mu lukile Mbenjamini.

Tua pande ku vuluka mazina a vana 12 va Yakomba muomu hali vakevo hakeho ha fumine cifuti ca Isaleli. Mukemuo miyati 12 ya Isaleli, va i luka mazina a vana 10 va Isaleli na vavali va Yosefe. Isake ua yoyele miaka ya ingi, ngeci vose ava vanike va mu muene, citava Ikeye ua viukilile cikuma mu ku kala na vatekulu va vengi. Vunoni, tu tale vika via solokele kuli mutekulu ueni ua mpuevo Ndina..