Yakomba Aya Ku Halane

UA TANTEKEYA ava vamala vali na ku handeka navo Yakomba ni? Mu nima ya matangua a engi a vungendzi, Yakomba na li uana navo ha lisima. Va kele na ku lisa vampanga vavo. Kaha Yakomba ua va hulile ngueni: ‘Mua fumu kulihi?’

Kaha nguavo: ‘Ku Halane.’

Yakomba ua va hulile naua ngueni: ‘Lambane mu mu tantekeya ni?’

Va kumbuluile nguavo: ‘Eyo.’ ‘Tala, muaneni Lakele a li na ku iza mu nima na vutanga vueni.’ U na mono Lakele uze a li na ku iza kuze ni?

Omo Yakomba ua muene Lakele na vampanga va inentu, ua ka langumuine livue ha lisima linga vampanga va hase ku nua. Kaha Yakomba ua tsuembele Lakele na ku mu leka lizina lieni kaha na kuli ua fumine. Kaha Lakele ua viukilile cikuma ngeci ua ile kuimbo na ku ka lekako ise Lambane.

Lambane ua viukilile ku mona Yakomba. Omo Yakomba ua lombele ngueni a tonda ku ambata Lakele, kaha Lambane ca mu ile ku mutima. Vunoni Lambane ua lekele Yakomba ngueni a pange mu lihia lieni miaka itanu na ivali mu ku pua vionda via Lakele. Yakomba ua tavele, muomu ua lemene cikuma Lakele. Vunoni vika via solokele mu ya hetele ntsimbu ya vulo?

Tele nga ua mu hele Lakele, vunoni Lambane ua mu hele muaneni ua mukuluntu Lea. Ngeci Yakomba ua tavele naua ku mu pangela miaka itanu na ivali, amba vuose Lambane ua mu hele honi Lakele a pue mpueyeni. Ku ntsimbu ize Njambi ua tavesele yala ku haleka. Vunoni matangua ano, ngue mu ya muesa Mbimbiliya, yala na pande ku ambata lika mpuevo umo.