Yona Na Intsi Ua Kama

TALA uze yala a li mu mema. Na kovela mu vukalu vua kama, ni vati? Uze intsi a tonda ku mu lehula! Ua tantekeya lizina lia ou yala ni? Ikeye Yona. Tu cimone vati na kovela omu mu vukalu vua kama ngecize.

Yona ua pua kapolofeto ka Yehova. Mua hitile lika ntsimbu ya indende fume ha ku tsa ca Elisa, Yehova ua tumine Yona ngueni: ‘Ya ku mbonge ya Ninive. Vupi vuavo vua lana cikuma, nji tonda linga uka va mamune’.

Vunoni Yona ka tondo ku yako. Kaha ngeci na londo mu vuato vu talekesa ku cifuti ca ku laako na Ninive. Yehova ka ca mu ile ku mutima ku mona Yona a tina kua mu tumine. Kaha ua neha cinkumba ca kama. Mancimba a katukile kaha vuato vua tondele ku vombela. Vakua ku zavula vuato vali na vuoma vua kama kaha va putuka ku tambakana ku vanjambi vavo linga va va kuase.

Kaha Yona ua va lekele ngueni: ‘Ange nje ku lemesa Yehova Njambi, uze ua tangele melu na mavu. Kaha nji li na ku tina ku vize via nji tumine.’ Kaha vakua ku zavula va mu hula nguavo: ‘Vati tu ku linga mangana cinkumba ci likele?’

Kaha Yona ngueni: ‘Nji mbilenu mu kalunga kaha mancimba a ka likela.’ Vakua ku zavula tele ka va tondele ku lingamo, vunoni omo mancimba a tualeleho va kuatele Yona na ku mu mbila mu kalunga. Kaha cinkumba ca manene na mancimba a likelele.

Omo Yona ua zivililile mu mema kaha intsi ua kama ua mu lehula. Vunoni ka tsile. Ua kele matangua atatu na matsiki atatu mu zimo lia uze Intsi. Yona ua liveyele cikuma omo lia ku muesa lisino kuli Yehova mu ku viana ku ya ku Ninive. Ua tantekeya vika ua lingile ni?

Yona ua vundilile vukuasi kuli Yehova. Ngeci Yehova ua lingisile intsi a sandzele Yona ha livu lia kuma. Kaha mu nima yovio Yona ua ile ku Ninive. Eci ci tu longesa ngecize tu na pande ku linga viose via tu tuma Yehova, ni vati?