Yehova ua Muesele Lukakatela Kuli Yona

Mu mbonge ya Ninivayi ku Asilia, mua kele vantu va ku pihia cikuma. Ngeci Yehova ua tumine kapolofeto ueni Yona a ye ku Ninivayi mu ku mamuna vantu va alulule vilinga viavo. Vunoni Yona ua talekesele likosi kua mu tumine Yehova na ku tina. Ua ka londele mu Mbapolo ya kele na ku ya ku Talisi.

Omo mbapolo ya kele na ku ya, kua katukile luhundzi na mancimba a kama, ngeci vakua ku yendesa va vuile vuoma vua kama. Kaha va vundilile ku vanjambi vavo nguavo: ‘Omo lia vika evi vi li na ku tu solokela?’ Mu nima ya viose, Yona ua va lekele ngueni: ‘Evi viuma vi li na ku soloka omo liange. Muomu nji li na ku tina ku linga vimo via nji tumine Yehova. Nji mbilenu mu kalunga, kaha viose vi likela.’ Vakua ku endesa mbapolo ka va tondele ku mbila Yona mu kalunga, vunoni ua va kakateyele ku lingamo. Mu va mu mbilile mu kalunga, luhundzi na mancimba viose via likelele mpundu.

Yona ua muene ngecize a tsa. Ngeci omo ua kele na ku ya ha masima a kalunga, ua vundilile kuli Yehova. Kaha Yehova ua tumine umo intsi ua kama. Intsi uaco ua minisile Yona, vunoni Yona ka tsile. Mua kele muzimo lia intsi Yona ua vundilile ngueni: ‘Yehova, nja likuminia ngecize nji ka ku ononoka ntsimbu yose.’ Yehova ua niungile Yona muzimo lia intsi matangua atatu, mu nima yaco ua lingisile intsi ku ka sandzela Yona ha tunda.

Mu ku linga Yehova uovuele Yona, eci ca lomboloka ngecize ka tondekele naua kuya ku Ninivayi ni? Houe. Yehova ua lekele Yona a hilukileko. Yona ka tinine naua vunoni uononokele. Ua ileko na ku leka vaze vantu vakua vupi ngueni: ‘Mu matangua 40 Ninivayi va ka i nongesa.’ Vi va lingile vantu mu Ninivayi na umo uahi ua vi lavelelele—va halakanene ku cimamuna na ku alulula vilinga viavo. Muangana ua Ninivayi ua lekele vantu veni ngueni: ‘Vundilenu kuli Njambi, kaha alulukenu. Halumo a tu vuila ngozi, ka tu nongesa.’ Omo Yehova ua muene ngecize vantu va na aluluka, ka nongesele Ninivayi.

Vunoni Yona ua nienguele, muomu mbonge ka va i nongesele. Aci singaniekeho: Yehova ua muesele lukakatela na cikeketima kuli Yona, vunoni Yona ka vuile cikeketima ca vakua Ninivayi. Vunoni ua ka tumamene ku mbandza ya mbonge mu civule ca lumono oku na ndingunyuna milungu. Vunoni cize ciputa ca lumono comine, ngeci Yona ua nienguele naua. Kaha Yehova ua mu lekele ngueni: ‘Ove nkuma ua haka seho ya kama ku ciputa eci, ku tuvakana vakua Ninivayi. Nja va muesele cikeketima ngeci ka nja va nongesele.’ Vika tu lilongesa ha mezi aa? Vantu vakua Ninivayi va kele na seho ya kama ku hiana nkala ciputa.