Yelemiya ka Likelele ku Handeka via Yehova

Vintsimbu vimo vantu ve ku tu sahula ni ku tu vuila matoto, omo tu va ambuluila mezi a Yehova. Eci ci hasa ku tu lingisa ku likela ku handeka via Njambi. Uevuaho laza ngoco ni?— Mbimbiliya ya tu leka via umo mukuendze ua lemene Yehova, vunoni ue ku likelele ku ambulula. Lizina lieni Yelemiya. Tu ci tantekeye via vingi hali ikeye.

Tele Yelemiya a ci li kanike ua mukuendze, Yehova ua mu lekele ngueni a ka mamune vantu linga va likele ku linga vupi. Eci ca kaluuilile Yelemiya, muomu ua vuile vuoma. Kaha ua lekele Yehova ngueni: ‘Ka nji tantekeya via ku va leka. Muomu nji kanike ua mundende.’ Vunoni Yehova ua mu kumbuluile ngueni: ‘Kati u ivue vuoma. Nji ka ku kuasa.’

Ngeci Yelemiya ua putukile ku mamuna vantu ngueni va ka va hana kasitiku nga ka va aluluka. Mu ku mona cove, vantu va lingile via va lekele Yelemiya ni?— Houe. Va mu sahuile na ku mu vuila matoto. Vamo va tondele vene ku mu tsiha! Ua singanieka nguove Yelemiya ua vuile vati?— Ua vuile vuoma kaha ua handekele ngueni: ‘Ka nji ka handeka naua mezi a Yehova.’ Vuno ua likelele mpundu ni?— Houe, ka likelele. Ua lemene cikuma Yehova ngeci ka hasele ku likela ku handeka vieni. Kaha Yehova ua mu niungile muomu ka likelele ku ambulula.

Ca ku muenako, Tangua limo, vamo vamala vakua vupi va mbilile Yelemiya mu cina ca lova ca ku sula na vutompe. Ka kele na via-ku-lia cipue mema. Vaze vamala va tondele linga Yelemiya a tsilemo. Vunoni ua hasele ku ovoka na vukuasi vua Yehova!

Vika u hasa ku lilongesa ku lungano lua Yelemiya?— Vutuhu vintsimbu vimo ua vuile vuoma, kasi ka likelele ku handeka via Yehova. Omo u handeka via Yehova vantu va ka ku sahula na ku ku vuila matoto. U hasa ku ivua ntsoni ni vuoma. Vunoni kati u likele ku handeka via Yehova. A ka ku kuasa, ngue mua kuasele Yelemiya.