Yehova a Tuma Yelemiya mu ku Ambulula

Yehova ua hanguile Yelemiya a pue kapolofeto ku vantu vakua Yunda. Ua mu lekele a ambuluile vakua Yunda na ku va mamuna va likele ku linga vupi. Vunoni Yelemiya ua lekele Yehova ngueni: ‘Ange nji kanike ua mundende. Ka nji tantekeya ku handeka na vantu.’ Yehova ua mu kumbuluile ngueni: ‘Kati u ivue vuoma. Muomu nji ka ku leka vi ua pande ku handeka. Nji ka ku kuasa mpundu.’

Yehova ua lekele Yelemiya a kungulule vakuluntu va mbonge, na ku puzula njava ya vuma ku lutue luavo, kaha na ku va leka ngueni: ‘Yelusalema nayo va ka i puzula ngeci mueyi njava.’ Omo Yelemiya ua lingile via mu tumine Yehova, vakuluntu va nienguele cikuma. Ngeci umo sasendote ua lizina Pasehule ua tinguile Yelemiya na ku mu haka mu vinkuli via viti. Yelemiya ka hasele ku pinda, vutsiki vuose. Lia mukuavo cimene, Pasehule ua mu zituile, kaha Yelemiya ua handekele ngueni: ‘Ka nji hasa ku tualelelaho mu visoti via cifua eci. Nji likela ku ambulula.’ Vuno ua likelele mpundu ni? Houe. Mua hiluile vuino ha cimpande caco, ua handekele ngueni: ‘Muzimbu ua Yehova u na pu ngue tuhia mu kati kange. Ka citava ku likela ku ambulula.’ Ngeci Yelemiya ua tualeleleho ku mamuna vantu.

Mua hitile miaka ya ingi, kaha mu Yunda mua kele muangana ua muha. Vasasendote na vapolofeto va makuli va zindile muzimbu ua Yelemiya. Ngeci va lekele vamiata nguavo: ‘Ou yala na pande ku tsa.’ Kaha Yelemiya ua va lekele ngueni: ‘Nga mu nji tsiha, mu tsiha muntu kesi na mulonga. Muomu mezi a nji li na ku ambulula kati ange, a Yehova.’ Omo vamiata va vuile mezi eni, va handekele nguavo: ‘Ou yala ka pandele ku tsa.’

Yelemiya ua tualeleleho ku ambulula, eci ca lingisile vamiata ku niengua cikuma. Ngeci va vundilile muangana a tsihe Yelemiya. Muangana ua va lekele va linge Yelemiya muose omo mu va tondele. Mu va vuile ngoco, va kuatele Yelemiya na ku ka mu mbila mu cipuku ca lova, kaha ca mandova, linga a tsilemo. Yelemiya ua putukile ku sitama mu mandova.

Kaha umo muata ua ku ndzivo ya muangana ua lizina Evende-meleke, ua lekele muangana ngueni: ‘Muangana, vamiata va na mbila Yelemiya mu cipuku! Nga tu mu ecelela, a tsilamo.’ Kaha muangana ua tumine Evende-meleke ku ambata vamala 30 linga va ka tundise Yelemiya mu cipuku. Netu tua pande ku fua ngeci mua Yelemiya muomu ka likelele ku ambulula, ni vati?