Mukanda u Fuma ku Civunga ca Vantuamena

Kuli Enu mua Lema Yehova Njambi na Lizi lieni, Mbimbiliya:

Yesu ua handekele ngueni: “Mu ka tantekeya vusunga na vusunga vu ka mi patula.” (Yoano 8:32) Aci singaniekenu vati mua livuile ha litangua lia katete li mua uanene vusunga vua mu Mbimbiliya! Ce ku tu vuisa ndzolela ku tantekeya ngecize vutuhu tuli mu mavu a sula na makuli, kasi tu hasa ku lilongesa vusunga.​—2 Timoteo 3:1.

Yehova a tonda tu tantekeye vusunga. Kaha etu naua, mu ku linga tua lema vakuetu vantu, netu tua tonda ku va lekako via vusunga vuaco. Vunoni ku pangela Njambi ka ca lengelele hali evi lika. Tua pande ku linga cose tu yoye ngue Vakua Kilistu muomu tua singimika cikuma-kuma vitume via Yehova. Yesu ua tu lekele njila ya seho i tu hasa ku mueselamo Njambi ngecize tua mu lema. Ngueni: “Nga mu niunga mezi a lisiko ange, mu ka kala-kala mu cilemo cange; ngue omo nji na niunga mezi a lisiko a Tata, kaha nji kala-kala mu cilemo ceni.”​—Yoano 15:10.

Yesu ua lema Ise cikuma-kuma, ngeci ue ku linga viose vie ku mu tuma. Nga tu tambuluisa Yesu mu muono uetu, Yehova a ka tu lema kaha tu ka kala na ndzolela ya vusunga. Ngue mua handekele Yesu, “Nga mu tantekeya viuma evi, mu vezika nga mu vi linga.”​—Yoano 13:17.

Tua lavelela ngecize lino livulu lika mi kuasa ku lilongesa ku yoya muaya vusunga vua mu Mbimbiliya na ku pua kavusamba ka Njambi. Tua vundila nguetu cilemo cenu kuli Njambi ci kole kaha mu tualeleleho ku kala mu “cilemo ca Njambi na ku lavelela . . . muono ka ue ku hua.”​—Yunda 21.