Kati mu Tavese Cilemo Cenu ci Tontole

1, 2. (a) Mezi a Yesu a ku Mateo 24:12, ha katete ua a tumbuilile veya? (b) Vati livulu lia Vilinga lia muesa ngecize Vakua Kilistu va ku livanga va tualeleleho ku kaniamesa cilemo cavo? (Talenu cikupulo ca ku vuputukilo.)

OMO Yesu ua kele ha mavu, ua lomboluele vati vantu va ka hasa ku nongonona “ku-kotoka ca mavu.” Ha kati ka viuma via vingi via tumbuile ua handekele ngueni “cilemo ca va vengi ci ka tontola.” (Mateo 24:3, 12) VaYundeya va ku sekulu ya ku livanga va litumbuile nguavo vantu va Njambi vunoni vecelele cilemo cavo kuli Njambi ci tontole.

² Vunoni, cingi ca Vakua Kilistu va muene viuma mu cifua ceka. Va kele na ku ambulula na ntuima ngecize Yesu “ikeye Kilistu,” na ku muesa cilemo kuli Njambi, kuli vakuavo mu lutsilielo, na kuli vaze kanda va tantekeye vusunga. Vaze Vakua Kilistu va tualeleleho ku kaniamesa lutsilielo luavo muli Njambi. (Vilinga 2:44-47; 5:42) Vunoni ce ku vuisa vusiua ku tantekeya ngecize vamo Vakua Kilistu va ku livanga vecelele cilemo cavo ci tontole. Vati tua tantekeyamo?

3. Vika halumo via tontuesele cilemo ca vamo Vakua Kilistu?

³ Yesu ua lekele Vakua Kilistu va ku livanga va kele mu Efeso ngueni: “U na seza cilemo cove ca ku livanga.” (Ku-Solola 2:4) Citava halumo Vakua Kilistu mu Efeso va tangukile mu ku kava cifua ca vantu va va tungile navo, vaze va lemene ku livuisa ndzolela vakevo vavene. (Efeso 2:2, 3) Efeso ya puile mbonge ya vupite kaha vantu va lemene muono ua cili ku hiana viose. Cingi ca vantu mu Efeso va lemene cikuma via masungu kaha ka va singimikile masiko a Njambi. Va lisosomuene cikuma na miono yavo vavene ku hiana ku muesa cilemo ca Njambi na ku lema vakuavo.

4. (a) Vati cilemo ci na tontola ku matangua ano? (b) Mu vifua vika vitatu tua pande ku tualelelaho ku kaniamesa cilemo cetu?

⁴ Mezi a Yesu ku tuala ha ku tontola ca cilemo kasi eku panga na lelo lino. Lelo lino cilemo ca vantu kuli Njambi cili na ku tepuluka cikumakuma. Cingi ca vantu ka ve ku tonda Njambi a manusule visoti ha mavu vunoni, ve ku lavelela ku vivunga via vantu. Cilemo cavo kasi ci li na ku tualelelaho ku tontola. Ambe cilemo ca vangamba va Yehova ci hasa ku tontola, ngue mu ca tontuele ca Vakua Kilistu mu Efeso. Ngeci mukemuo, tu lilongesenu vifua vitatu vi hasa ku tu kuasa ku kaniamesa cilemo cetu: (1) ku lema Yehova, (2) ku lema vusunga vua mu Mbimbiliya, kaha (3) ku lema vamuanetu.

KU LEMA YEHOVA

5. Omo lia vika tua pande ku lema Njambi?

⁵ Iya tua pande ku lema ku hiana vose? Yesu ngueni: “U ka lema muangana Njambi yove na mutima uove uose, na muono uove uose, na mana ove ose. Eli likelio lizi lia lisiko lia kama na likelio lia ku livanga.” (Mateo 22:37, 38) Ku lema Njambi ce ku tu kuasa ku ononoka masiko eni, ku muesa lukakatela, na ku zinda vupi. (Tandenu Visamo 97:10.) Vunoni Satana na mavu eni vie ku seteka ku zeyesa na ku zima cilemo cetu kuli Njambi.

6. Nga vantu va zimbalesa cilemo cavo kuli Njambi, vika vie ku izamo?

⁶ Vakua mavu ka va tantekeya vika va pande ku lema. Tele nga va pande ku lema Njambi, vunoni va pua “vakua ku lilema vavene.” (2 Timoteo 3:2) Ve ku tuala cikuma mana ku “lisungu lia ntsitu, na lisungu lia meso, na ku-lihalesa ca muono.” (1 Yoano 2:16) Kapostolo Paulu ua tu mamuine ku tuala ha vika vi hasa ku izamo nga ha katete tu tonda ku liya etu vavene ku mitima. Ngueni ku tuameka “cizango ca vusitu cikeco ku-tsa.” Omo lia vika? Muomu vose ve ku lingamo ve ku lipuisa vitozi va Njambi. (Loma 8:6, 7) Vantu ve ku pihisa miono yavo mu ku tonda vimbongo ni ku puisamo vizango via ku limona ku mivila ve ku lituva ku masiua eka na eka.​—1 Kolintu 6:18; 1 Timoteo 6:9, 10.

7. Visinganieka vika via vusonde vi hasa ku kuata Vakua Kilistu lelo lino?

⁷ Cingi ca vakua ku viana nguavo Njambi ka keleko, na vaze ka va kele na vusunga nga Njambi kua kala ni kuahi, kaha na vakua evulusao, ve ku sindiya vakuavo linga kati va leme Njambi ni va tave nguavo kua kala. Kuli vakevo, noho ciheve ni uze ka lilongesele ikeye a hasa ku tsiliela ngecize Sakatanga kua kala. Kaha vantu vavengi va singimika cikuma vakua siensia ku hiana Sakatanga. (Loma 1:25) Visinganieka via cifua eci vi hasa ku kuata na kuli Vakua Kilistu. Vi hasa ku zeyesa vusamba vuetu na Yehova na ku tontuesa cilemo cetu.​—VaHevelu 3:12.

8. (a) Viuma vika vi hasa ku vuisa vangamba va Yehova vusiua? (b) Ku lembezieka cika tu hasa ku uana ku Visamo 136?

⁸ Mu ku linga tu li na ku yoyela mu mavu a ku pihia a Satana, ku li via vingi vi hasa ku tu vuisa vusiua. (1 Yoano 5:19) Vunoni nga tu tavesa vusiua vu tu lanene, lutsilielo luetu lu hasa ku zeya kaha cilemo cetu kuli Njambi ci hasa ku tontola. Ca ku muenako, halumo tu hasa ku hita mu visoti vie ku iza omo lia vusinakazi, omo lia cihindu ca cindende ni omo lia visoti via vimbongo. Ni tu hasa ku ivua vusiua muomu ka tuesi naua na ndzili ya ku linga viuma mu cifua ci tua tonda. Tu hasa ku ivua vusiua nga vimo viuma mu muono ka viendele ngue mu tua tondele. Vunoni cipue tu hite mu visoti via ku kaluua vati, ka tua pandele ku ivua nguetu Yehova na tu mbila kuti. Aci singaniekenu hali aa mezi eku lembezieka a ku Visamo 136:23 nguayo: “Ua tu vulukile ku vundende vuetu; muomu ngozi yeni i kala ku miaka yose.” Tu kalenu na vusunga ngecize Yehova ue ku ‘ivua vivundilo vietu’ kaha a ka vi kumbulula.​—Visamo 116:1; 136:24-26.

9. Vika via hele kapostolo Paulu ngolo ya ku tualelelaho ku kala na cilemo ca ku kaniama kuli Yehova?

⁹ Kapostolo paulu ua puile Mukua Kilistu ua singaniekele cikuma ha vukuasi vua mu hanene Yehova, kaha eci ca mu kuasele ku tualelelaho ku kaniama. Ua sonekele ngueni Yehova “ikeye mukuasi uange; Ka nji kevua vuoma: Muntu a ka nji linga vikandzo?” (VaHevelu 13:6) Ku kulahela muli Yehova ca kuasele Paulu ku lua na visoti via mu muono. Mua hitile mu visoti, Paulu ka likelele ku kulahela muli Yehova. Cipue mua kele mu kamenga, ua kaniamesele vakuavo Vakua Kilistu mu ku tuma mikanda ku vikungulukilo. (Efeso 4:1; Filipu 1: 7; Filemone 1) Mu nkala visoti via hitile, Paulu ua tualeleleho ku kala na cilemo ca ku kaniama kuli Yehova. Ua kulahelele muli “Njambi ua ku-lembezieka cose” uze ue ku “tu lembezieka ku lamba yetu yose.” (2 Kolintu 1:3, 4) Vati tu hasa ku tambuluisa Paulu?

10. Vati tu hasa ku tualelelaho ku kala na cilemo ca ku kaniama kuli Yehova?

¹⁰ Paulu ua muesele limo lihungu li hasa ku tu kuasa ku tualelelaho ku kala na cilemo ca ku kaniama, mua sonekele ngueni: “Vundilenu na ku huima cahi.” Mu nima ya ntsimbu ua sonekele naua ngueni: “Kakatelenu mu ku vundila.” (1 Tesalonika 5:17; Loma 12:12) Omo lia vika civundilo ce ku tu suenesa ku hiehi na Njambi? Muomu nga tu vundila tuli na ku handeka na Yehova. Eci ce ku tu kuasa ku kala na vusamba vua cili neni. (Visamo 86:3) Mu tue ku leka Tatetu ua muilu visinganieka vietu, na viuma vili mu kati ka mitima yetu, tue ku suena kuli ikeye. (Visamo 65:2) Kaha cilemo cetu kuli Yehova ce ku kola omo tu mona a kumbulula vivundilo vietu. Tuli na vusunga nguetu “Yehova ali mu hiehi na vose vaze va mu tambakana.” (Visamo 145:18) Ku kulahela ngecize Yehova ua tu lema kaha ce ku tu kuasa, ci tu kuasa ku lua na nkala cisoti mu ntsimbu ino ni ku lutue.

KU LEMA VUSUNGA VUA MU MBIMBILIYA

11, 12. Vati tu hasa ku vueza cilemo cetu ku vusunga vua mu Mbimbiliya?

¹¹ Mu ku pua Vakua Kilistu, tua lema vusunga. Kaha vusunga vuaco vua kala mu Lizi lia Njambi. Yesu ua lekele Ise ngueni: “Lizi liove likelio vusunga.” (Yoano 17:17) Linga tu leme vusunga vua mu Mbimbiliya, tua pande ku tantekeya vika via kalamo. (Kolose 1:10) Vunoni kuli vikuavo via tondeka. Talenu vati mukua ku soneka Visamo 119 ua tu kuasa ku ivuisisa vika tua pande ku linga. (Tandenu Visamo 119, 97-100.) Litangua liose, tua pande ku hilula ni nguetu ku singanieka cikuma ha viuma vi tue ku tanda mu Mbimbiliya. Omo tu hilula ha vati tu hasa ku pangesa vusunga vua mu Mbimbiliya mu muono uetu, cilemo cetu ku vusunga ci ka tualelelaho ku kola.

¹² Mukua visamo ua handekele naua ngueni: “Mezi ove a na lembuluka mu ndakulo yange, houe vene! Cili, a na hiana vuci ku lembuluka mu kanua kange.” (Visamo 119:103) Mikanda ya handeka via Mbimbiliya i lue ku tuhula lukungulukilo lua Yehova ya pua ngue via-ku-lia via ku tovala. Mu tue ku lia via-ku-lia vi tua lema tue ku vi lia na civando linga vi tu tovale cikuma. Na vuno vene, tu puenu na ku lilongesa na civando. Kaha tu kevua ku tovala ca “mezi a cili” a vusunga. Cikuavo naua ci ka tu puila ca casi ku vuluka vi tue ku tanda na ku vipangesa mu ku kuasa vakuetu.​—Ekelesiaste 12:10.

13. Vika via kuasele Yelemiya ku lema mezi a Njambi? Kaha eci ca mu vuisile vati?

¹³ Kapolofeto Yelemiya ua lemene mezi a Njambi. Ua handekele ngueni: “Nja uanene mezi ove, kaha nja a lile; kaha mezi ove a puile ndzolela kuli yange na ku-viukilila ca mutima uange, muomu va na nji luku [tumbuila] lizina liove, A Yehova, Njambi ua vivunga.” (Yelemiya 15:16) Yelemiya ua singaniekele cikuma ha mezi a seho a Njambi, ngeci ua lemene cikuma. Ua hakele seho ku cipanga ca ku imanena Yehova na ku ambulula muzimbu ueni. Netu nga tu lema vusunga vua mu Mbimbiliya, tu ka nongonona vukama vua ku vezika ci tua kala naco, mu ku pua Vakaleho va Yehova na ku ambulula muzimbu ua Vuangana ku matangua ano a ku kotokela.

14. Vika vikuavo vi hasa ku tu kuasa linga tu vueze cilemo cetu ku vusunga vua mu Mbimbiliya?

¹⁴ Vika vikuavo vi hasa ku tu kuasa ku lema cikuma vusunga vua mu Mbimbiliya? Tua pande ku kunguluka ntsimbu yose, muomu ku viuano kukekuo kue ku tu longesela Yehova. Cilongesa ca Mbimbiliya ku hitila mu Vutala vua Kaniungi, ci tue ku kala naco vi simano viose ca pua imo ya vinjila via vingi vie ku tu longeselamo Yehova. Nga tu tonda ku uana vukuasi vua kama mu cilongesa caco, tua pande ku pua na ku liviukisila omo ku ci li ntsimbu. Tu hasa ku lingamo, mu ku tanda mikanda ya mu Mbimbiliya i va tumbulamo lika. Vavengi, ve ku tupulula Vutala muomu vue ku tuhuka mu malimi a engi mu saiti jw.org na aplikativu ya JW Library. Vutuhu vimo vifua via ku tupulula vie ku tu kuasa ku fukula vuasi mikanda ya mu Mbimbiliya ilimo, kasi tue ku hangula ku lilongesa nkala cilongesa mu ku tanda na civando mikanda ya mu Mbimbiliya na ku i hilula vuino. Ku lingamo ci ka vueza cilemo cetu ku vusunga.​—Tandenu Visamo 1:2.

KU LEMA VAMUANETU

15, 16. (a) Ku liya na Yoano 13:34, 35, lisiko lika ua tu hana Yesu? (b) Vati ku lema Njambi na Mbimbiliya via likuata na ku lema vamuanetu?

¹⁵ Ku vutsiki vua ku sulumuina vua kele ha mavu, Yesu ua lekele vandongisi veni ngueni: “Lizi lia lisiko lia liha li nji mi hia, linga mu lileme umo na mukuavo; ngue omo nji na mi leme enu, ngecize naua enu mu li leme umo na mukuavo. Hakeho vose va ka tantekeya ngecize mu vandongesi vange, nga mu lilema umo na mukuavo.”​—Yoano 13:34, 35.

¹⁶ Ku lema vamuanetu ca likuata na ku lema Yehova. Muomu nga ka tua lemene Njambi, ka tu hasa ku lema vamuanetu. Kaha nga ka tua lemene vamuanetu, ka tu hasa ku lema Njambi. Kapostolo Yoano ua sonekele ngueni: “Ou ka leme muanaye ya na mono, ka hasa ku lema Njambi uze intsa ka muene.” (1 Yoano 4:20) Ku lema vamuanetu na ku lema Yehova via likuata na ku lema Mbimbiliya. Omo lia vika? Muomu nga tu lema vi tue ku lilongesa mu Mbimbiliya, tu ka lihakela kapandi ka ku niunga masiko a kalamo ku tuala ha ku lema Njambi na vamuanetu.​—1 Petulu 1:22; 1 Yoano 4:21.

17. Mu vinjila vika tu hasa ku muesa cilemo?

¹⁷ Tandenu 1 Tesalonika 4:9, 10. Mu vinjila vika tu hasa ku muesa cilemo kuli vamuanetu? Umo muanetu ua kasinakazi halumo ua tondeka ku mu kuasa kuya mu ku kungulula. Ni umo muanetu ntuluue a hasa ku tonda muntu a mu kuasa ku viukisa ndzivo yeni. (Tiango 1:27) Nga vamuanetu vali mu vusiua, ni va lihita na vimo visoti vieka, ve ku tondeka tu va hake seho, ku va kaniamesa na ku va lembezieka. (Visimo 12:25; Kolose 4:11) Tue ku muesa nguetu tua lema “vaze va na pandama ku vusoko vua ku tsiliela” mu vihandeka na vilinga vietu.​—Ngalata 6:10.

18. Vika vi hasa ku tu kuasa ku manusula hoi-hoi na vamuanetu?

¹⁸ Mbimbiliya ya handekele laza nguayo ku ‘matangua a ku kotokela’ a mavu ano, cingi ca vantu va ka pua vakua litsita na vakua ku lilema vavene. (2 Timoteo 3:1, 2) Etu Vakua Kilistu tua pande ku fuitangana linga tu tualeleleho ku kolesa cilemo cetu kuli Yehova, ku Lizi lieni, na kuli umo na mukuavo. Mu ku linga ka tua tantulukile vintsimbu vimo tu hasa ku litala ku tunua na vamuanetu. Vunoni mu ku linga tua lilema umo na mukuavo, tu ka manusula vuasi mu cilemo nkala hoi-hoi i katuka ha kati ketu. (Efeso 4:32; Kolose 3:14) Tu puenu na ku linga cose linga cilemo cetu kati ci tontole. Vunoni tu tualelenuho ku lema cikuma Yehova, ku lema Lizi lieni na vamuanetu.