Vati mu Hasa ku Yoya mu Ndzolela mu Vusoko?—Mutamba 1

Sandungi na ntsombolua ve ku lavelela ngecize ndzolela i ve ku ivua ha litangua lia vulo, ika tualeleleho ku miaka yose. Kaha citava i tualeleleho mu cifua oco. Vakua Kilistu va liambata laza, kaha ve ku lihakela kapandi ka ku kava vitume via mu Mbimbiliya va tantekeya nguavo citava.

1. Cimamuna cika ya hana Mbimbiliya kuli vamala va ambata?

Yehova ua hangula vamala va ambata ku pua mitue ya vindzivo. (Tandenu Efeso 5:23.) Kaha ua kundika citeli ca ku linga vihangula mu vusoko kuli mutue ua ndzivo. Mbimbiliya ya mamuna vamala va ambata nguayo: “Lemenu vampuevo venu.” (Efeso 5:25) Vika a lomboloka aa mezi? Yala na pande ku lingila mpueyeni viuma via cili, ku ndzivo na ku mbunga. Kaha na ku lihakela kapandi ka ku mu niunga ku vusonde, ku mu hana vize via mu kambela ku muvila na mu visinganieka. (1 Timoteo 5:8) Kaha ca seho ya kama, ue ku kuasa mpueyeni ku likuata vusamba na Yehova. (Mateo 4:4) Ca ku muenako, ue ku vundila na ku tanda Mbimbiliya hamo lika na mpueyeni. Yala ue ku niunga mpueyeni na cilemo, ue ku niunga vusamba vueni na Yehova.—Tandenu 1 Petulu 3:7.

2. Cimamuna cika ya hana Mbimbiliya ku vampuevo va ku somboka?

Lizi lia Njambi ngualio: “Mpuevo a singimike yalieni.” (Efeso 5:33) Vati a hasa ku lingamo? Mu ku hilula ha vifua via cili via kala navio yalieni na kapandi ke ku lihakela mu ku mu niunga hamo lika na vana. Kaha a hasa naua ku muesa kasingimiko mu ku linga cose linga vihangula via yalieni vi lipuisemo vuino mu ku handeka na kasingimiko na yalieni. Cikuavo naua, mu ku handeka via cili ku tuala hali ikeye ku vantu veka, cipue nga yalieni ke ku lemesa Yehova.

3. Vati vampuevo na yala va hasa ku kaniamesa vulo vuavo?

Mbimbiliya ya handeka ku tuala hali vaze va liambata nguayo: “Vavali va ka pua ntsitu imo lika.” (Mateo 19:5) Eci ca muesa ngecize vaze va liambata va pande ku linga cose mangana kati va litepe mu visinganieka. Va hasa ku lingamo mu ku uana-uana ntsimbu ya ku kalamo hamo lika ku sua kumo na ku pua vakua vusunga omo va simutuila umo na mukuavo, mu ku lileka cifua ce ku livuila nkala muntu. Ku tundisako Yehova ka ve ku tavesa viuma vieka na vimo viahi vi pue via seho ku hiana mukua ndzivo yavo. Kaha naua ve ku liniunga ku ku likuata vusamba vuze ka vua pandele na muntu ueka.

TANTEKEYENU VIKUAVO

4. Vamala—lemenu na ku niunga vuino vampuevo venu

VIDEO: Vamala, Lemenu Vampuevo Venu Ngue mu Mua Lilema enu Vavene (9:53)

• Mu vinjila vika yala a hasa ku muesa ngecize ua lema mpueyeni kaha ue ku mu haka seho?

Tandenu Kolose 3:12, kaha simutuilenu ha cihula eci:

• Vati yala ua ambata a hasa ku muesa evi vifua mu vulo vueni?

5. Vampuevo—lemenu na ku singimika vamala venu

Mbimbiliya ya kaniamesa mpuevo ua ku somboka ku singimika yalieni cipue nga ue ku pangela Yehova ni Kuahi. Tandenu 1 Petulu 3:1, 2, kaha simutuilenu ha vihula evi:

• Nga yalienu ke ku pangela Yehova, mua vusunga mua lavelela mua kama ngecize a putuke ku lingamo. Vika vi hasa ku mu kuata mua kama ku mutima—ku mu ambuluila ku sua kumo ni ku mu muesa vilinga via cili na ku mu singimika? Kaha omo lia vika?

Yala na mpuevo va liambata va hasa ku linga vihangula via cili nga va likuata kumo. Vunoni, vintsimbu vimo mpuevo a hasa ku mona viuma mu njila ka ya litombuele na yala. Nga mukemuo, citava a lombolole visinganieka vieni mu kasingimiko na ku konkama, oku a vuluka ngecize Yehova, ua hana kuli yalieni citeli ca ku linga vihangula mu vusoko. Na pande ku linga cose linga vihangula via yalieni vi lipuisemo. Mu ku lingamo, ue ku vuezelela ku ndzolela ya vusoko ha ndzivo. Tandenu 1 Petulu 3:3-5, kaha simutuilenu ha cihula eci:

• Vati ue ku livua Yehova ku mutima nga mpuevo a singimika yalieni?

6. Mu hasa ku vula vitanga via mu vulo vuenu

VIDEO: Kaniamesenu Vulo Vuenu (5:44)

• Mu video, vitantekeyeso vika via muesele ngecize vampuevo na yala va putukile ku lisondoloka mu visinganieka?

• Vinanga vika va puisilemo linga va kaniamese vulo vuavo?

Tandenu 1 Kolintu 10:24 na Kolose 3:13. Kaha mu nima ya ku tanda nkala cinimbu, simutuilenu ha cihula eci:

• Vati ku kava eci citume ci hasa ku kaniamesa vulo?

Mbimbiliya nguayo tua pande ku limuesa kavumbi kuli umo na mukuavo. Ku muesa kavumbi ca lomboloka ku muesa Ngozi na kasingimiko. Tandenu Loma 12:10, kaha simutuilenu ha vihula evi:

• Vuno yala ni mpuevo ua ku somboka na pande ku lavelela ngecize mukuavo a livange ku mu muesa kavumbi ni? Nga eyo, omo lia vika? Nga naua houe, omo lia vika?

VI MU NA LILONGESA

Yala na mpuevo va liambata va hasa ku yoya mu ndzolela nga va lilema umo na mukuavo, va lisingimika umo na mukuavo, kaha na ku kava vitume via mu Mbimbiliya.

Mpupulule

• Vati yala a hasa ku vueza ku ndzolela mu vulo?

• Vati mpuevo a hasa ku vueza ku ndzolela mu vulo?

• Nga mua ambata ni ku somboka, vitume vika via mu Mbimbiliya vi hasa ku mi kuasa ku kaniamesa vulo vuenu?

KONKENUHO

Vimamuna via cili vize vi kuasa ku yoya mu ndzolela mu vusoko.

Mu Hasa ku Yoya mu Ndzolela ha Ndzivo Yenu (mukanda)

Talenu video ya muaso ya muesa vivezikiso via ku kava vitume via Njambi mu vulo.

Cilemo ca Vusunga ca Tovala (4:26)

Hilulenu vi ca lomboloka ku liononuesa ku ku tuamenena ca yala.

“Mulheres, porque devem aceitar o arranjo da chefia?” (A Sentinela, 15 Maio, 2010)

Vati va yala na mpuevo va manusuile visoti viavo, hamo lika na kutsa ca vulo vuavo?

Na Vukuasi vua Njambi tua Kaniamesele Lueka Vulo Vuetu (5:14)