Tambuluisenu Vapolofeto—Havakuke
1. Omo lia vika netu tu hasa ku ivua ngue mua vuile kapolofeto Havakuke?
1 Omo vupi vu tualelelaho ku livuezelela mu mavu ano, tu hasa ku ivua ngue mua vuile Havakuke, kaha ua hulile Yehova ngueni: “Vika u nji muesa vupi, na ku tala vupuye?” (Hav. 1:3; 2 Tim. 3:1, 13) Ku hilula muzimbu ua Havakuke na lutsilielo lueni, ci hasa ku tu kolesa omo tu lavelela litangua lia vusompelo lia Yehova.—2 Pet. 3:7.
2. Vati tu hasa ku muesa ngecize tua yoya na lutsilielo?
2 Yoyenu na Lutsilielo: Havakuke ka hilukilile mu nima omo lia visoti vieni, vunoni ua tualeleleho ku vingila lutsilielo lueni na ku panga. (Hav. 2:1) Yehova ua mu kulahesele ngueni mezi Eni a ka lipuisamo ha ntsimbu yao mpundu kaha “mukua vuviuke a ka yoya ha ku-tsiliela ceni.” (Hav. 2:2-4) Vika a lomboloka aa mezi kuli etu Vakua Kilistu tuli na ku yoya ku matangua ano a ku kotokela? Ca seho kati ku tantekeya tangua lika ku kotoka ci keza, vunoni ku kala na vusunga nguetu ci keza mpundu. Lutsilielo lue ku tu kuasa ku tona na ku tuameka ku lutue cipanga ca ku ambulula.—VaHe. 10:38, 39.
3. Omo lia vika tua pande ku tualelelaho ku kala na ndzolela mu ku pangela Yehova?
3 Viukililenu Muli Yehova: Omo Ngonge ya Mangonge a ka luisa vantu va Njambi, tu ka hita mu vieseko via mu lutsilielo. (Ezek. 38:2, 10-12) Ndzita ye ku kokela vantu visoti, ambe vaze ve ku vula ndzita yaco navo ve ku yanda. Kue ku kala ndzala, vantu ve ku zimbalesa vikuata viavo, kaha muono ue ku kaluua cikumakuma. Mu vi keza visoti tu ka linga vati? Havakuke ua tantekeyele ngueni visoti vi keza, ngeci ua lihakelele kapandi ka ku tualelelaho ku pangela Yehova na ndzolela. (Hav. 3:16-19) Kaha “ndzolela ya Yehova” i ka tu kuasa ku kolesa mu visoti via ku lutue.—Neh. 8:10; VaHe. 12:2.
4. Ndzolela ika tu hasa ku kala nayo vuovuno na ku lutue?
4 Vaze va kovoka ku litangua lia vusompelo lia Yehova, va ka tualelelaho ku lilongesa ku yoya mu njila ya ya Yehova ku mutima. (Hav. 2:14) Vaze va ka sanguka navo va ka lilongesa via Yehova. Ambe vuovuno, tu hasa ku pangesa nkala vukovelelo vu tu uana, mu ku ambulula via Yehova na vipanga vieni via ku komouesa!—Visa. 34:1; 71:17.