Ku Vueza ku Vutongue Vuetu Vua ku Ambulula​—Ku Simutuila ci tu Lingisa ku Uana Vukovelelo vua ku Ambulula

Yesu ua hasele ku ambuluila mpuevo ua ku Samaliya muomu ua putukile ku simutuila neni mu cindambo. Vati tu hasa ku vueza ku vutongue vuetu vua ku putuka ku simutuila na vantu ka tu tantekeya?

• Puenu na ku handeka na ndzolela na vantu. Vutuhu Yesu ua honene, vunoni ua putukile ku simutuila mu cindambo mu ku vundila mema a ku nua. Nenu mu hasa ku lingamo mu ku meneka vuino kaha halumo mu hasa ku handeka via ntsimbu ni via umo muzimbu ua vuovuno. Vulukenu ngecize, ha katete vutumbe vuenu ku putuka ku simutuila lika, ngeci mukemuo handekenu via nkala cimpande ci hasa ku ya ku mutima ua muntu a mi halakana. Vunoni nga ka mi tavele, kati mu likele. Mu hasa ku simutuila na muntu ueka. Vundilenu Yehova a mi hane ku simpa.—Neh. 2:4; Vili. 4:29.

• Lingenu cose mu uane vukovelelo vua ku lekako vakuenu via muzimbu ua cili, vunoni kati mu lingemo mu vuasi-vuasi cikuma. Handekenu mu cindambo na civando. Kati mu kakateye muntu, muomu ci ka mu lingisa ku tenuka na ku likela ku handeka nenu. Kati mu ivue vusiua nga ka mua hasele ku ambulula. Kaha nga ce ku mi kaluuila ku uana vukovelelo vua ku ambulula nga mu simutuila, putukenu na ku simutuila na vantu ca ku hona ku kala na vutumbe vua ku va ambuluila. [Talenu video 1 na ku simutuilaho.]

• Setekenu ku uana vukovelelo vua ku handeka mezi a hasa ku ya ku mutima ua muntu ku tuala ha viuma vi mua tsiliela, vize vi hasa ku lingisa muntu ku mi linga vihula. Yesu ua handekele viuma via lingisile uze mpuevo ku linga vihula. Mua putukile ku handeka via muzimbu ua cili, ua kele vene na ku kumbulula vihula via uze mpuevo. [Talenu video 2 na ku simutuilaho, kaha talenu naua video 3 na ku simutuilaho.]