Tualelenuho ku Kola mu Cilemo

1. Vusunga vuka mua lilongesele mu mua putukile ku lilongesa Mbimbiliya?

VUNO MU vuluka ntsimbu i mua putukile ku lilongesa Mbimbiliya ni? Halumo, mua komokele mu ku nongonona ngecize Njambi ua kala na lizina. Ni mua vuile ku lembama ca kama, mu nima ya ku tantekeya ngecize Njambi ke ku uemeka vantu mu Ngehena. Kaha citava naua, mua vuile ndzolela ya kama mu ku tantekeya ngecize vavusoko na vavusamba vuenu va-tsa, tangua va ku sanguka na ku yoya hamo lika nenu, mu citungu ha mavu.

2. Mu ku vueza ku vusunga vu mua lilongesele mu Mbimbiliya, mua kolele naua ku vika? (Efeso 5:1, 2)

² Mu mua tualeleho ku lilongesa Lizi lia Njambi, cilemo cenu kuli Yehova naco ca livuezelele. Kaha ca mi vuisile cizango ca ku ononoka vi mua kele na ku lilongesa. Mua hasele ku linga vihangula via cili, via hitukila ha vitume via mu Mbimbiliya kaha mua sungamesele naua vifua vienu na vilinga vienu linga mu ye Njambi ku mutima. Cikuavo naua, ngeci mua kanike ue ku tambuluisa ise ya lema, nenu mua lihakelele kapandi ka ku tambuluisa Isuenu ua muilu.—Tandenu Efeso 5:1, 2.

3. Vihula vika tu hasa ku lilinga?

³ Tu hasa ku lihula etu vavene nguetu: ‘Vuno cilemo cange kuli Yehova kasi ca kaniama, ngue ha ntsimbu ize vene i nja lilongesele vusunga ni? Tunde ha mbatizimu yange, vuno cifua ci nje ku singaniekelamo na vilinga viange, vie ku litombola na via Yehova cikuma-kuma mu ku muesa cilemo kuli vamuanetu ni?’ Nga mu nima ya ku hilula hali evi, mu nongonona ngecize “cilemo” cenu ci na tontola, kati mu uile mu vusiua. Evi via solokelele na Vakua Kilistu va ku livanga, vutuhu ngoco Yesu ka va mbilile kuti kaha netu ka ka tumbila kuti. (Ku-So. 2: 4, 7) A tantekeya ngecize citava tu sambeye lueka naua cilemo cetu, ngue cize vene ci tua vuile mu tua lilongesele vusunga.

4. Vika tu simutuila mu cilongesa cino?

⁴ Mu cilongesa cino, tu simutuila ku tuala ha vati tu hasa ku kolesa cilemo cetu kuli Yehova na kuli vakuetu. Mu nima yaco, tu ka nongonona vimo vivezikiso vi tue ku uana hamo lika na vakuetu, nga tu kaniamesa cilemo cetu.

KOLESENU CILEMO CENU KULI YEHOVA

5-6. (a) Vitanga vika ua pindile navio kapostolo Paulu mu cipanga ceni ca ku ambulula? (b) Vunoni vika via mu vuisile cizango ca ku tualelelaho ku pangela Yehova?

⁵ Kapostolo Paulu ua livuisile ndzolela mu ku pangela Yehova. Vutuhu ngoco, ua hitile mu vitanga via vingi. Ca ku muenako, ua kele na kuenda mangendzi a laha cikuma kaha ku ntsimbu ize ka ca puile ca casi kuenda mangendzi. Mu mangendzi eni, Paulu ua hitile mu “vusonde ku va ndonga, na vusonde ku mihuza.” Kaha vintsimbu vimo, va kele vene na ku mu tingula kuli vakua ku luisa. (2 Kol. 11:23-27) Kaha vintsimbu via vingi, vakuavo Vakua Kilistu ka va kele na ku muesa ku santsela ku kapandi ka kele na ku lihakela.—2 Kol. 10:10; Filp. 4:15.

⁶ Vika via kuasele Paulu ku tualelelaho ku pangela Yehova? Ku lilongesa via vuntu vua Yehova ku hitila mu visoneka kaha na ku visoti vene via lihitile navio. Mu ku lingamo, Paulu ua hetele mu ku litavela ikeye ivene ngecize Yehova Njambi ua mu lema. (Loma 8:38, 39; Efe. 2:4, 5) Kaha neni ua lemene mua kama Yehova Njambi. Kaha Paulu, ua muesele cilemo ceni kuli Yehova mu ku kuasa “vakua ku lela,” na ku tualelelaho ku va kuasa.—VaHe. 6:10.

7. Tumbulenu imo njila i tu hasa ku koleselamo cilemo cetu kuli Yehova?

⁷ Tu hasa ku kolesa cilemo cetu kuli Njambi mu ku lilongesa Lizi lieni ku-sua kumo. Omo mu tanda Mbimbiliya, setekenu ku nongonona muzimbu uka uliho u mi kuasa ku tantekeya vuino Yehova. Lihulenu nguenu: ‘Vati ou muzimbu ua muesa ngecize Yehova ua nji lema? Kaha vusunga vuka nja monoho vu nji lingisa ku lema Yehova?’

8. Vati ku vundila ci hasa ku tu kuasa ku kolesa cilemo cetu kuli Njambi?

⁸ Njila ikuavo i tu hasa ku koleselamo cilemo cetu kuli Yehova, ya pua ku sokolola mutima uetu kuli Ikeye ku-sua kumo ku hitila mu vivundilo. (Visa. 25:4, 5) Kaha Yehova ue ku ivua na ku kumbulula vivundilo vietu. (1 Yoa. 3:21, 22) Khanh umo ndumbuetu ua ku Ásia ngueni: “Cilemo cange kuli Yehova ha katete ca hitukilile ha mizimbu lika i nja tantekeyele. Vunoni ca putukile ku livuezelela mu nja muene a kumbulula vivundilo viange. Eci ca nji lingisile nji lihakele kapandi ka ku muya ku mutima.”b

KOLESENU CILEMO CENU KU VAKUENU

9. Vati Timoteo ua muesele ngecize ua kele na ku kola mu ku muesa cilemo?

⁹ Mu nima ya imo miaka, tunde ha ku aluluka ceni, Paulu ua tantekeye umo mukuendze lizina lieni Timoteo. Timoteo ua lemene Yehova kaha naua ua lemene vantu. Ngeci Paulu ua lekele vakua Filipu ngueni: “Ka njesi na muntu ueka ua mutima umo nange, a kome mutima cili omo ku-kala cenu.” (Filp. 2:20) Ha mezi aa, Paulu ka kele na ku sangala Timoteo omo lia vutongue vueni vua ku noneka vuino viuma ni ku longesa ceni, houe. Vunoni omo lia cilemo ca kele na ku muesa kuli vamuanaye. Mua vusunga, mu vikungulukilo via hitile Timoteo, vamuanetu va kele na ku lavelela mua kama ku hiluka ceni naua.—1 Kol. 4:17.

10. Vati ndumbuetu Anna na yalieni va muesele cilemo kuli vamuanaye?

¹⁰ Netu tue ku tonda vinjila via ku mueselamo cilemo kuli vamuanetu. (VaHe. 13:16) Halakanenu muzimbu ua ndumbuetu Anna u tu na tumbuile mu cilongesa ci na hiti. Mu nima ya imo mpuendza ya kama, neni na yalieni va ile mu ku meneka vumo vusoko vua vamuanetu na ku nongonona ngecize ndzivo yavo i na siuka. Ngeci mukemuo vuzalo vua vusoko vuose vua pihile. Kaha ndumbuetu Anna ngueni: “Ngeci tua nonene vuzalo vuavo, ku va kusilavuo, ku vungomala kaha na ku va hiluisilavuo. Kuli yetu tua muene na via kama vi tu na lingi viahi. Vunoni kuli vakevo via va kuatele mua kama ku mutima. Ngeci tunde tangua lize, tua pua honi vavusamba va kama.” Cilemo ca muesele ndumbuetu Anna na yalieni ca vuisile cizango kuli vuze vusoko ca ku muesa cilemo ku vakuavo.—1 Yoa. 3:17, 18.

11. (a) Vati kapandi ka tue ku lihakela mu ku muesa cilemo ka hasa ku kuata ku vakuetu? (b) Kuliya na Visimo 19:17, vati ue ku linga Yehova nga a tu mona tu muesa cilemo?

¹¹ Nga tu muesa cilemo na ngozi ku vakuetu, navo ve ku mona kapandi ka tue ku lihakela mu ku tambuluisa visinganieka na vilinga via Yehova. Kaha vintsimbu via vingi, ve ku haka seho ya kama ku ngozi i tue ku va muesa ku hiana na muze mu tue ku singanieka. Ndumbuetu Khanh, u tu na tumbuile laza, ue ku vuluka na ndzolela vamuanetu va mu kuasele. Ivene ngueni: “Nje ku santsela mua kama kuli vandumbuetu vose va kele na ku tuhuka nange mu lihia. Va kele na ku nji izila ku ndzivo, ku nji lania nji ka hitiseko vimo mu kanua kaha na ku nji hiluisa naua ha ndzivo na likalu. Nja nongonuene ngecize va kele na ku lihakela kapandi ka kama mu ku lingamo. Kaha naua va kele na ku lingamo na cilemo.” Vutuhu kati vose va ka tu santsela nga tu na va lingila via cili, vunoni ndumbuetu Khanh ua handekele ngueni: “Nje ku ivua cizango ca ku hiluisa ngozi i va nji muesele vose vaze va nji kuasele. Vunoni ka nji tantekeya honi ku va ila. Vutuhu ngoco, Yehova a tantekeya kuose ku va kala kaha nja vundila ngecize a ka nji lunguisilavo.” Ndumbuetu Khanh ali na vusunga. Yehova ue ku mona cipue vene kacilinga ka ngozi ka tue ku lingila vakuetu, ue ku ka mona ku pua ngue cikombelo ca seho kaha naua ngue likongo lize lia ka fueta ikeye.—Tandenu Visimo 19:17.

12. Vati vamuanetu va hasa ku muesa cilemo cavo mu cikungulukilo? (Talenu naua vikupulo.)

¹² Nga mua pua muanetu, vati mu hasa ku muesa cilemo ku vakuenu na ku tonda vinjila via ku va kuaselamo? Umo muanetu ua mukuendze, lizina lieni Jordan, ua vundilile mukuluntu a mu leke vika a hasa ku linga mu ku kuasa cikungulukilo. Ngeci uze mukuluntu ua mu santselele na ku mu sangala ku kapandi ka lihakelele kaha ua mu mamuine ku tuala ha viuma via ku linga. Ca ku muenako, ua mu lekele ngueni, citava a pue na ku livanga ku heta ku Ndzivo ya Vuangana na ku meneka vamuanetu, ku kumbulula ku viuano. Kaha naua a pue na ku ambulula ku-sua kumo na civunga ceni ca ku tuhuka mu lihia na ku tonda vinjila via ku kuaselamo vakuavo. Omo muanetu Jordan ua kavangeyele eci cimamuna, ka lilongesele lika vutongue vua vuha vunoni cilemo ceni kuli vamuanaye ca livuezelele. Kaha ua lilongesele naua ngecize ha ntsimbu i ve ku hangula umo muanetu ku pua mukua ku kuasa vipanga, kati hakeho he ku putukila ku kuasa vakuavo. Vunoni ya pua lika vene ntsimbu ya ku vuezelelaho ku lingamo.—1 Tim. 3:8-10, 13.

13. Vati cilemo ca vuisile cizango muanetu Christian linga a lihakele kapandi ka ku pua naua mukuluntu mu cikungulukilo?

¹³ Vati co nga laza mua puile mukua ku kuasa vipanga ni mukuluntu mu cikungulukilo? Yehova ue ku vuluka viose vi mua lingile mu ntsimbu yaco kaha na cilemo ca mi lingisile ku vi linga. (1 Kol. 15:58) Kaha ue ku mona naua cilemo ci mue ku tualelelaho ku muesa. Umo muanetu ua lizina Christian, ua vuile vusiua mua zimbalesele citeli ca vukuluntu. Vunoni ngueni: “Nja lihakelele kapandi ka ku linga viose vi nji hasa mu ku tualelelaho ku pangela Yehova, muomu nja mu lema cipue nga nji kale na viteli ni viahi.” Mu nima ya ntsimbu, muanetu Christian va mu hanguile naua ku pua mukuluntu. Kaha ua litavelele ngueni: “Nja kele na cimo ku likanuuela ku tuala ha ku pua naua mukuluntu. Vunoni nja singaniekele nguange, nga Yehova ku cikeketima ceni a tonda ku nji tavesa ku pua naua mukuluntu kaha nji lingamo vene, muomu nja mu lema kaha naua nja lema vamuanetu.”

14. Vika mua lilongesa ku mezi a umo ndumbuetu ua ku Geórgia?

¹⁴ Vangamba va Yehova ve ku muesa naua cilemo ku vakuavo vantu. (Mat. 22:37-39) Ca ku muenako, Elena umo ndumbuetu ua ku Geórgia, ngueni: “Ha katete, cuma ca kele na ku nji vuisa cizango ca ku ambulula, ca puile lika ku lema Yehova. Vunoni omo cilemo cange kuli ikeye ca putukile ku livuezela na cilemo cange ku vantu naco ca livuezelele. Nja kele na ku seteka ku singanieka ku visoti vi va kele na ku lihita navio kaha na vimpande vika vi hasa ku va kuata ku mitima. Mu nja kele na ku lihakela kapandi ka ku singanieka hali vakevo mu cifua eci, cizango cange ca ku va kuasa naco ca kele na ku livuezela.”—Loma 10:13-15.

VIVEZIKISO VIE KUIZA MU KU MUESA CILEMO

15-16. Ngue mu vi na muesa vikupulo, vivezikiso vika vie ku iza mu ku muesa cilemo?

¹⁵ Mu tue ku muesa cilemo kuli vamuanetu, kati vakevo lika ve ku uana vukuasi. Mu ua putukile COVID-19, muanetu Paolo na mpueyeni, va kuasele vandumbuetu vavengi va ku kulupa va lilongese mua ku pangesela vitelefone na vikuavo mu ku ambulula. Umo ua vandumbuetu vaco, ha katete ca kele na ku mu kaluuila ku pangesa evi vikuata. Vunoni mu nima ya ntsimbu ua hasele. Kaha ua pangesele vikuata viaco mu ku lania vavusoko vueni veze ku Mulalelo. Omo liaco, vavusoko vueni va ku pua 60, va kungulukile ku Mulalelo ku hitila mu videoconferencia! Ndumbuetu uaco, hamo lika na vusoko vueni vuose va uanene vukuasi omo lia kapandi ka lihakelele muanetu Paolo na mpueyeni. Mu nima ya ntsimbu, ndumbuetu uaco ua sonekelele muanetu Paolo ngueni: “Tua santsela cikuma mu ku tu kuasa ku pangesa mua cili evi vikuata viaco, vutuhu tu vakulupe. Ka nji ka suvu na limo litangua liahi cilemo ce ku nji muesa Yehova na kapandi ka mue ku lihakela.”

¹⁶ Mizimbu ngeci mueyi, ye ku tu longesa viuma via seho. Muanetu Paolo ue ku vuluka ngecize ku muesa cilemo ca pua ca seho ku hiana mana ni nkala vutongue vueka. Kaha a vuluka ngueni: “Laza nja puile nji kaniungi ua ku zinguluka. Lelo lino, nje ku nongonona ngecize vutuhu vamuanetu vavengi va suva vimpande vi nja hanene, vunoni kasi ve ku vuluka vukuasi mpundu vu nja va hele.”

17. Iya naua ue ku uana vukuasi nga tu muesa cilemo?

¹⁷ Mu tue ku muesa cilemo, netu vavene tue ku uana vukuasi mu vinjila via ku liseza-seza. Muanetu Jonathan ua ku Nova Zelândia ua limuenenene vusunga vuaco. Tangua limo, lia Sapalalo kua kele mutana ua uingi kaha ua muene umo muanetu ua pua pioneiro ali na ku ambuluila mu tapalo. Kaha ngeci muanetu Jonathan, ua lihakelele kapandi ka ku panga-panga na muanetu uaco mu Visapalalo via hateleko ku cinguezi. Vutuhu ikeye ua tondele ku kuasa, vunoni ka nongonuene ngecize ku lingamo, neni ci ka mu nehela vivezikiso via vingi. Muanetu Jonathan ua litavelele ngueni: “Ha ntsimbu yaco ize, ka nja lemene ku ambulula. Vunoni mu nja putukile ku halakana ku cifua ca kele na ku longeselamo uze pioneiro na ku mona viuma vi cili via kele na ku-iza mu ku ambulula ceni, nja vuile cizango ca ku putuka ku lema vipanga viaco. Kaha neni naua ua puile kavusamba ua cili kuli yange ua nji kuasele ku kola mu lutsilielo, ku lema ku ambulula kaha na ku likuata vusamba na Yehova.”

18. Yehova ua tonda tu linge vika?

¹⁸ Yehova ua tonda tu vose tu kole mu cilemo ci tue ku mu muesa na cize ci tue ku muesa ku vakuetu. Kaha ngue mu tua lilongesa, tu hasa ku kaniamesa cilemo cetu muli Yehova mu ku tanda Lizi lieni, ku hilula vize vi tue ku tandamo kaha na ku simutuila neni ku-sua kumo ku hitila mu vivundilo. Tu hasa ku vueza ku cilemo cetu ku vamuanetu mu ku tonda vinjila via ku va kuaselamo. Kaha omo cilemo caco ci livuezelela, tu ka likata mua kama na Yehova kaha na vusoko vuetu vua mu lutsilielo. Ovu vusamba vuaco, vu ka tualelelaho ku miaka yose ya ya-ye!