Tambuluisenu Ntuima ya Yesu mu Kuambulula

1. Vika viatepesa vangamba va Yehova ku vantu veka?

VIUMA viatepesa vangamba va Yehova ku vantu veka, viapua ntuimaa ive kumuesa mu kuambulula. (Titu 2:14) Vunoni vintsimbu vimo, ci hasa kumi kaluuila kuivua ndzolela mu kuambulula. Kaha halumo muhasa kulivua ngeci mua umo muanetu uaku fuitangana, uapua mukuluntu mu cikungulukilo. Ivene nguendi: “Vintsimbu vimo ka nje kuivua cizango ca kuambulula.”

2. Vika vi hasa kutepulula ntuima yenu mukuambulula?

² Halumo tue kuivua ndzolela mu kulinga vipanga vieka viamu lukungulukilo ku hiana cipanga ca kuambulula. Omo lia vika? Muomu tue kuhasa ku limuena mu vuasi viuma viacili viekuizamo mu tue kukuasa kutunga vindzivo viaku lemesela, ku kuasa mu viyovo via mavu, ni ku kaniamesa vamuanetu na vandumbuetu. Kaha tue kuivua ciyulo naku limuena cilemo mu tueku panga hamo na vamuanetu na vandumbuetu, muomu tua tantekeya nguetu veku santsela ku viuma vitue ku va lingila. Vunoni ntuima yetu i hasa kutepuluka mukuambulula, muomu halumo laza tuasua kuambuluila ku cihela cimolika kaha vantu va vavendende lika veku halakana muzimbu uetu. Cikuavo naua, tua tantekeya nguetu kutu luisa cika livuezelela omo ku kotoka ca mavu ciya naku suena mu hiehi. (Mat. 10:22) Vika vitu kuasa kuvueza ku ntuima yetu mu kuambulula?

3. Vati Luka 13:​6-9 ya muesa nguayo Yesu uambuluile na ntuima?

³ Kuhilula lungano lua Yesu, cihasa kutu kuasa kuvueza ku ntuima yetu mu cipanga ca kuambulula. Yesu ka tepuluile ntuima yendi mu kuambulula, vunoni ua tualeleleho ku fuitangana. (Tandenu Luka 13:​6-9.) Ngeci mua mukua kupanga mu lihia lia vinyu, Yesu uambuluile miaka itatu ku vaYundeya, kaha cingi cavo kava tavele muzimbu ua cili. Mukua kupanga mu lihia lia vinyu ua vianene kuteka mukuyu. Yesu nendi na ntuima yose ua tualeleho kuambuluila vantu ca kuhona kutepulula ku ntuima yendi naku lihakela kapandi kaku heta vantu ku mitima.

4. Viuma vika viuana tu lilongesa ku lungano lua Yesu?

⁴ Mu cilongesa cino, tumona vati Yesu ua muesele ntuima mu kuambulula, cikumakuma mu vingonde vitano na imo. (Talenu cimpande “Depois disso” ha nota de estudo ya Luka 10:1.) Ku lilongesa via longesele Yesu naku tambuluisa vialingile vika tu kuasa kuvueza ku ntuima yetu. Tu hilulenu vitu lilongesa ku viuma viuana vialingile Yesu: (1) Uatualele mana ku cizango ca Yehova, (2) uatualele mana ku vupolofeto vuamu Mbimbiliya, (3) ua kulahelele mu vukuasi vua Yehova, kaha (4) uakele na vusunga nguendi vamo vantu veku mu halakanene.

UA TUALELE MANA KU CIZANGO CA YEHOVA

5. Vati Yesu ua tualele mana muku linga cizango ca Njambi?

⁵ Na ntuima yose, Yesu uambuluile “muzimbu ua cili ua Vuangana,” muomu ua tantekeyele nguendi vikevio vipanga via tondele Njambi linga avi puisemo. (Luka 4:43) Mua vusunga, Yesu tuamekele cipanga ca kuambulula mu muono uendi. Ngeci mukemuo, ambe kuntsongo ya kuambulula cendi, uendele “mbonge ku mbonge na limbo ku limbo” muku longesa vakuavo. (Luka 13:22) Kaha ua longesele naua vandongesi vakuavo linga va tualeleho cipanga caco.—Luka 10:1.

6. Vati cipanga ca kuambulula ca likuata na vipanga vikuavo vitue kulinga mu lukungulukilo? (Talenu naua cikupulo.)

⁶ Na lelo lino, kuambulula muzimbu uacili capua cipanga ca seho yakama, kaha Yehova na Yesu vatonda tu cipuisemo. (Mat. 24:14; 28:​19, 20) Cipanga ca kuambulula ca likuata cikuma na vipanga vikuavo viamu lukungulukilo. Caku muenako, tue kukuasa cipanga ca kutunga ni kupangela ha Mbetele muku kuasa cipanga ca kuambulula. Tueku kuasa vamuanetu na vandumbuetu veku hita mu viyovo via mavu, kati lika linga vakale vuino ku muvila, vunoni naua linga va putuke lueka vipanga viamu lutsilielo ngeci mua kuambulula. Nga tu nongonona seho ya cipanga ca kuambulula na kuvuluka nguetu Yehova a tonda tu cipuisemo, cika tukuasa kuambulula kusua kumo. Muanetu János uaku Hungria, uapua mukuluntu mu cikungulukilo, ua handekele nguendi: “Nje ku livuluisa nguange na cimo cipanga camu lukungulukilo cihasa kuhinga cipanga ca kuambulula, muomu capua cipanga ca seho citua pande kulinga.”

7. Omo lia vika Yehova a tonda tu tualeleleho kuambulula? (1 Timoteu 2:​3, 4)

⁷ Tuhasa kuvueza ku ntuima yetu ya kuambulula muku mona vantu ngue mueku vamuenamo Yehova. Kaha a tonda vantu vavengi vatave muzimbu uacili. (Tandenu 1 Timoteu 2:​3, 4.) Ngeci mukemuo, Yehova ueku tu longesa linga tuambulule na vutongue muzimbu ue kuovola miono. Caku muenako, mukanda Lemenu Vantu—Mu va Puise Vandongesi muakala vimamuna vieku tukuasa ku simutuila na vantu na vutumbe vuaku vapuisa vandongesi. Ambe nga mu ntsimbu ino vantu vaviana kutava muzimbu uetu, halumo vaka lingamo ntsimbu kanda lamba yakama ihue. Ngeci mukemuo, vitue kuvaleka mu ntsimbu ino, halumo vika valingisa kutava muzimbu uetu kulutue. Vunoni vika hasa lika kusoloka nga tu tualelelaho kuambulula na ntuima.

UA TUALELE MANA KU VUPOLOFETO VUAMU MBIMBILIYA

8. Vati ku tantekeya vupolofeto vuamu Mbimbiliya vua kuasele Yesu kupangesa vuino ntsimbu?

⁸ Yesu uevuisisile vati vupolofeto vuamu Mbimbiliya vueku lipuisilemo. Caku muenako, ua tantekeyele nguendi ue kuambuluile lika miaka itatu na vingonde vitanu na imo. (Ndan. 9:​26, 27) Kaha naua ua tantekeyele ntsimbu ika na vati ueku tsile. (Luka 18:​31-34) Ngeci mukemuo, Yesu ua tavesele via tantekeyele vikuate ku cifua ca pangeselemo ntsimbu yendi. Ngeci uambuluile na ntuima linga a puisemo cipanga civa mu kundikile.

9. Vati kuivuisisa vupolofeto vuamu Mbimbiliya citu kuasa kuambulula na ntuima?

⁹ Kuivuisisa vupolofeto vuamu Mbimbiliya cihasa kutu kuasa kuambulula na ntuima. Tua tantekeya nguetu kukotoka ca mavu cili mu hiehi. Cikuavo naua, tua nongonona nguetu viuma vili naku soloka, kaha na vilinga via vantu vili naku puisamo vupolofeto vuamu Mbimbiliya kutuala ha matangua aku kotokela. Tua tantekeya naua nguetu vutozi vuakala ha vuangana vua Anglo-America na Rússia hamolika na vakua kuikuasa veku puisamo vupolofeto. Kaha vupolofeto vuaco, vua handeka via muangana uaku sulu na muangana uaku nolote ku “ntsimbu ya ku kotokela.” (Ndan. 11:40) Cikuavo naua, tuevuisisa nguetu vuangana vua Anglo-America vuemanena viliato via kamponya uva tumbulula ku Ndaniele 2:​43-45. Kaha ngue muvua muesa vupolofeto vuaco, tuli na vusunga nguetu Vuangana vua Njambi vuovuno vuka nongesa mavuangana avantu. Vua muesa naua nguavuo, tuli naku yoyela ku matangua aku kotokela. Ngeci mukemuo, tua pande kupangesa vuino ntsimbu linga tuambulule muzimbu ua cili.

10. Vati naua vupolofeto vuamu Mbimbiliya vuhasa kuvueza ntuima yetu ya kuambulula?

¹⁰ Vupolofeto vuamu Mbimbiliya vueku tukuasa kukala na mizimbu ikuavo itue kulekako vakuetu muzimbu ua cili. Ndumbuetu Carrie uaku cifuti ca República Dominicana, nguendi: “Viatu kulahesa Yehova vieku njivuisa cizango caku lekako vakuetu vusunga.” Kaha ua vuezeleko nguendi: “Munje kumona visoti vive kupinda navio vantu, vieku nji kuasa kunongonona nguange navo vatondeka ku tantekeya vikulaheso via Yehova.” Vupolofeto vuamu Mbimbiliya vueku tukuasa kati tuhiluke mu nima, muomu tua tantekeya nguetu Yehova, ikeye ueku tukuasa mu cipanga ca kuambulula. Ndumbuetu Leila ua ku Hungria, nguendi: “Mukanda ua Isaya 11:​6-9 ueku nji vuisa cizango caku lekako vakuetu muzimbu uacili ambe nga vasoloka ngue kuva tava. Muomu nja tantekeya nguange muntu uose ahasa kualuluka na vukuasi vua Yehova.” Kaha muanetu Christopher uaku Zambia, nguendi: “Ngue mu ua muesa mukanda ua Mako 13:​10, nguao muzimbu ua cili vaka uambuluila mu mavu ose, kaha capua kuvezika cakama kuli yange kukuasa kupuisamo vupolofeto vuaco.” Vupolofeto vuka vuamu Mbimbiliya vueku mu kuasa ku tualelelaho kuambulula?

UA TSILIELELE NGUENDI YEHOVA AKA MUKUASA

11. Omo lia vika Yesu ua tondekele kutsiliela mu vukuasi vua Yehova a tualeleho kuambulula na ntuima? (Luka 12:​49, 53)

¹¹ Yesu uakele na vusunga nguendi Yehova ueku mu kuasele ku tualelelaho kuambulula na ntuima. Vutuhu Yesu uambuluile muzimbu uacili ua Vuangana na kasingimiko, ua tantekeyele nguendi vantu veku mu zindile naku mu luisa. (Tandenu Luka 12:​49, 53.) Omo lia kuambulula, vakuluntu va malombelo vatondele kumu tsiha. (Yoa. 8:59; 10:​31, 39) Vunoni Yesu ua tualeleho kuambulula muomu ua tantekeyele nguendi, Yehova uakele nendi. Ivene nguendi: ‘Kanjesi lika liange, muomu Tata uze ua nji tumine ali nange. . . . Ka nji sile lika liange; muomu ntsimbu yose njeku linga vize via lema.’—Yoa. 8:​16, 29.

12. Vati Yesu ua kuasele vandongesi vendi va tualeleho kuambulula ambe muvava luisile?

¹² Yesu ua vulusuile vandongesi vendi vakale na vusunga nguavo, Yehova ueku va kuasele. Uava hele vusunga kuhilukila na kuhilukila nguendi Yehova ueku vakuasele ha ntsimbu yaku valuisa. (Mat. 10:​18-20; Luka 12:​11, 12) Ngeci uava mamuine vapue vaku zangama. (Mat. 10:16; Luka 10:3) Kaha uava mamuine kati va kakateye vantu kutava muzimbu uacili. (Luka 10:​10, 11) Uava lekele naua nguendi nga vavaluisa va pandele kutina. (Mat. 10:23) Vutuhu Yesu uapuile mukua ntuima kaha ua tsiliele muli Yehova, vunoni kalihakele ngoco muvusonde.—Yoa. 11:​53, 54.

13. Vusunga vuka muli navuo nguenu Yehova aka mi kuasa?

¹³ Tua tondeka vukuasi vua Yehova linga tu tualeleleho kuambulula na ntuima nga vatu luisa. (Kuso. 12:17) Vusunga vuka muli navuo nguenu Yehova aka mi kuasa? Tu hilulenu civundilo ca Yesu civa tumbula ku Yoano kapitulu 17. Mu civundilo caco, uapingile Yehova a niunge vapostolo vendi, kaha Yehova ua kumbuluile civundilo cendi. Kaha livulu lia Vilinga lia muesa vati ua kuasele vapostolo va tualeleleho kuambulula na ntuima vutuhu vakele naku valuisa. Yesu ua vundilile naua Yehova a niunge vaze veku tsilielele mu muzimbu uvambuluile vapostolo, hamolika nenu. Yehova kalikelele ku kumbulula civundilo ca Yesu. Ngeci mukemuo, kalenu na vusunga nguenu, Yehova aka mi kuasa ngue mua kuasele vapostolo.—Yoa. 17:​11, 15, 20.

14. Vusunga vuka tuli navuo nguetu tuka tualelelaho kuambulula na ntuima? (Talenu naua cikupulo.)

¹⁴ Vutuhu cika kaluua cikuma kuambulula na ntuima omo kukotoka ciya naku suena muhiehi, vunoni tuka tambula vukuasi vuka tondeka. (Luka 21:​12-15) Ngeci mua Yesu na vandongesi vendi, katue ku kakatela vantu vatave muzimbu uetu linga kati tukatule hoyi-hoyi. Ambe ku vifuti kuva vindika cipanga ca kuambulula, vamuanetu na vandumbuetu veku tualelelaho kuambulula. Veku lingamo, muomu veku kulahela muli Yehova, kati mu ndzili yavo vavene. Ngue mua lingile ku sekulu yaku livanga, Yehova ueku tu hana ngolo linga tu “zimbule luhande na ku puisamo” kuliya na cizango cendi. (2 Tim. 4:17) Ngeci mukemuo, kalenu na vusunga nguenu nga mu kulahela muli Yehova, muka hasa ku tualeleleho kuambulula na ntuima.

UA MUENE VIUMA MUNJILA YACILI

15. Vika via muesa ngecize Yesu ua muene kuambulula munjila yacili?

¹⁵ Yesu ua muene cipanga ca kuambulula munjila yacili. Kulingamo camu kuasele kuambulula na ndzandzu. Caku muaneko, ku tsongo ya muaka 30 T.K.N., Yesu ua muene nguendi vantu vavengi vakele na cizango caku halakana muzimbu uendi. Ngeci uava setekesele ku lihia linahi mukutia. (Yoa. 4:35) Ngeci mu nima ya ntsimbu, Yesu ualekele vandongesi vendi nguendi: “Vimbuto vi na lana.” (Mat. 9:​37, 38) Kaha mu nima yaco ua handekele naua nguendi: “Vimbuto vi na lana . . . Vundilenu Vavenya vipanga linga atume vakua kupanga, va kutie vimbuto viendi.” (Luka 10:2) Yesu uakele na vusunga nguendi vantu va katava muzimbu ua cili, ngeci uavuile ndzolela yakama muva lingilemo.—Luka 10:21.

16. Vati vimueso via Yesu via muesa ngecize tua pande kumona cipanga ca kuambulula munjila yacili? (Luka 13:​18-21) (Talenu naua cikupulo.)

¹⁶ Yesu ua longesele vandongesi vendi vamone cipanga ca kuambulula munjila yacili linga vambulule na ntuima yose. Caku muenako, tu hilulenu ha vimueso vivali. (Tandenu Luka 13:​18-21.) Yesu ua pangesele cimueso ca musalata muku muesa nguendi muzimbu ua Vuangana ueku lisanduokele mu cifua caku komouesa. Kaha ua pangesele naua cimueso ca cimbaluila muku muesa nguendi, muzimbu uaco ueku kuasele vantu valuluke vutuhu vakuavo kave ku muene kualuluka caco. Kulingamo, Yesu ua kuasele vandongesi vendi kumona nguavo muzimbu uavo ueku kuasele vantu vavengi.

17. Vusunga vuka vueku tu lingisa kumona cipanga ca kuambulula munjila yacili?

¹⁷ Tueku tualelelaho kuambulula na ntuima, mu tueku hilula vati cipanga ca kuambulula cili naku kuasa vantu mu mavu ose. Caku muenako, muaka ku muaka, makulukazi a vantu veku kunguluka ku Mulalelo na kutava ku lilongesa Mbimbiliya netu. Cikuavo naua, makulukazi a vantu veku lipandakana netu mu kuambulula kaha veku vambatiza. Katu tantekeya vangahi vaka tava muzimbu uetu, vunoni tu tantekeya nguetu, Yehova ali naku kungulula hamo civunga cakama ci kovoka kulamba yakama. (Kuso. 7:​9, 14) Ivenya cipanga a tantekeya nguendi, kasi vantu vavengi vaka tava muzimbu uacili. Ngeci mukemuo, tua pande ku tualelelaho kuambulula.

18. Tutonda vantu va nongonone vika kutuala hali yetu?

¹⁸ Vandongesi va Yesu vava nongonuene omo lia ntuima yavo mu kuambulula. Vantu muva muene vapostolo va handeka naku simpa cose, “va nongonuene honi nguavo, vendele hamolika na Yesu.” (Vili. 4:13) Na vuno vene, tutonda kuambulula na ntuima linga vantu va nongonone nguavo, tueku tambuluisa lungano lua Yesu.