Likehesenu Nguenu Kamu Tantekeya Viose

1. Vuhasi vuka ua tutangele navuo Yehova kaha omolia vika?

YEHOVA ua tutangele na vuhasi vuaku singanieka, kulilongesa viuma kaha naku muesa mana. Omolia vika uatu tangelelemo? Muomu uatonda tumu tantekeye vuino, nakumu pangela na mutima uetu uose.—Visi. 2:​1-5; Loma 12:1.

2. (a) Vinginga vika tuakala navio? (Yombi 37:​23, 24) (Talenu naua cikupulo.) (b) Vukuasi vuka tuuana mu kulitavela nguetu katu tantekeya viose?

² Vutuhu tuakala na vuhasi vuaku lilongesa viuma, vunoni kuivuisisa cetu cakala na vinginga. (Tandenu Yombi 37:​23, 24.) Tuci hilulenu ha muzimbu ua Yombi. Ntsimbu imo, Yehova uamu lingile vihula viavingi viamu kuasele kumona nguendi kuakele viuma ka tantekeyele. Vihula viaco viamu kuasele naua kulikehesa na kualulula cifua cakele naku singaniekelamo. (Yombi 42:​3-6) Netu vene, tue kuuanaho vukuasi mutueku litavela naku konkama cose nguetu, katu tantekeya viose. Eci kukonkama cekutu vuisa cizango caku tualelaho kutsiliela muli Yehova nguetu aka tusoluela vitua pande kutantekeya mpundu, linga tulinge vihangula viacili.—Visi. 2:6.

3. Vika tuhilula mu cilongesa cino?

³ Mu cilongesa cino tuhilula vimo viuma katu tantekeya na visoti vihasa kuizamo. Kaha tuhilula naua omolia vika cakala naseho kuhona kutantekeya vimo viuma. Kuhilula evi vintsina viaseho, vika kaniamesa lutsilielo luetu ngecize “Yehova uaku tantuluka ku mana,” ikeye lika ahasa kutuleka vituapande kutantekeya.—Yombi 37:16.

KATU TANTEKEYA LITANGUA KU KOTOKA CA MAVU CIKEZA

4. Kuliya na Mateu 24:​36, vika katu tantekeya?

⁴ Tandenu Mateu 24:36. Katu tantekeya litangua ku kotoka ca mavu cikeza. Ambe Yesu muakele hano ha mavu ka tantekeyele “litangua, na ola.”a Mukuhita ca ntsimbu, Yesu ualekele vapostolo vendi nguendi Yehova uze Atantekeya Vuino Ntsimbu, ua lihanguila laza ntsimbu ya kusoloka ca viuma “ku ndzili yendi.” (Vili. 1:​6, 7) Kaha Yehova uatumbika laza ntsimbu yaka nongesa ano mavu, vunoni katuesi na vuhasi vuaku tantekeya ntsimbu ika mpundu viuma viaco vika soloka.

5. Visoti vika vihasa kuizamo omolia kuhona kutantekeya litangua lia kukotoka ca mavu?

⁵ Katu tantekeya ntsimbu ingahi tuapande ku vandamena kukotoka ca ano mavu. Omo liaco, tuhasa kuuila mu vusiua, kuhona lukakatela, cikuma-kuma nga laza tuasua ku vandamena litangua lia Yehova. Ni halumo ceku tupuila cacikalu ku vandamena litangua lia Yehova, omolia kutu luisa ku vavusoko ni vantu veka. (2 Pet. 3:​3, 4) Halumo tuhasa kulivua nguetu, ngatua tantekeyele litangua lia kukotoka ca mavu halumo nga cekutu puilile cacasi kukala na ntsintsa naku kolesa munkala visoti.

6. Seho ika yakala hakuhona kutantekeya kukotoka ca mavu?

⁶ Mua vusunga, omolia kuhona kutantekeya kukotoka ca mavu, Yehova uatuhana vukovelelo vuaku muesa omolia vika tuamu lemena naku mutsiliela. Ngeci tuatonda kupangela Yehova ku miaka yose kaha katueku hitukila ha ntsimbu yaku kotoka ca mavu. Mu cihela cakutuala mana ‘ku litangua lia Yehova,’ ca seho yakama kutuala mana ku viuma viaka puisamo Yehova. Kulingamo, cekutu kuasa ku tualelaho ku kaniamesa cilemo cetu kuli Yehova kaha nakulinga viose vituhasa muku muvuisa ndzolela.—2 Pet. 3:​11, 12.

7. Vika tu tantekeya?

⁷ Tuka linga muacili nga tutuala mana ku viuma vitu tantekeya. Caku muenako, matangua aku kotokela a putukile mu 1914. Kuhitila mu Mbimbiliya, Yehova uatu hana vupolofeto vuaviuma vieku solokele kuputukila mu muaka uaco na vati vieku lipuisamo. Kaha kulipuisamo ca vupolofeto camuesa ngecize “litangua lia kama lia Yehova li li ha hiehi.” (Zef. 1:14) Cikuavo naua, tua tantekeya nguetu Yehova uatu kundika cipanga caseho caku kuasa cingi ca vantu vatantekeye “muzimbu ua cili ua Vuangana.” (Mat. 24:14) Kaha muzimbu uaco vali na kuambuluila mu vifuti kampe 240 namu malimi atuvakana 1.000. Ngeci mukemuo, ka citondeka tu tantekeye litangua na ola linga tumuese ntuima yetu mu kuambulula.

KATU TANTEKEYA VATI YEHOVA AKA LINGA

8. Vika mezi “vipanga via Njambi” ua vusunga a lomboloka? (Ekelesiaste 11:5)

⁸ Kati ntsimbu yose tueku tantekeya “vipanga via Njambi.” (Tandenu Ekelesiaste 11:5.) Mezi aco lomboloka viuma vieku linga Yehova ni vieku tavesa, muku puisamo cizango cendi. Katu tantekeya omolia vika Yehova ueku tavesa vimo viuma visoloke ni vati akalinga muku tukuasa. (Visa. 37:5) Mbimbiliya ya setekesa kuhona kutantekeya vipanga via Njambi ngecimua kakeke ueku kola muzimo lia naye. Vutuhu vakua siensia veku seteka kuivuisa lihungu liakala haku kola ca kakeke, vunoni kaveku hasa kuivuisisa viose. Navuno vene, netu katuhasa kuivuisisa muvutuntu viuma viakalinga Yehova.

9. Muku linga katu tantekeya mpundu vika aka linga Yehova, vika tuhasa kuputuka ku singanieka?

⁹ Omolia kuhona ku tantekeya mpundu viaka linga Yehova, tuhasa kuputuka kulikanoela kulinga vimo vihangula. Caku muenako, tuhasa kuputuka kulikanoela naku singanieka ngacapua caseho kuvueza ku ntuima yetu mu kuambulula, kuasiuisa muono ni ku nungulukila kuze kutondeka vukuasi vua vakua kuambulula. Cikuavo naua, tuhasa ku singanieka nguetu katuesi nakuya Yehova ku mutima omolia kuhona kupuisamo vizango vietu viamu lutsilielo ni omolia kuhona kumona viuma viacili vili nakuiza mu kuambulula cetu.

10. Vifua vika viaseho tuhasa kukala navio omolia kuhona ku tantekeya mpundu vika Yehova akalinga?

¹⁰ Omolia kuhona ku tantekeya mpundu vika Yehova aka linga, ceku tukuasa kukala na vifua viacili ngecimua kukonkama na kulikehesa. Omo liaco, tuekuhasa kunongonona nguetu visinganieka via Yehova viahiana vietu. (Isaya 55:​8, 9) Cikuavo naua, tueku lilongesa kutsiliela muli Yehova na mutima uose na kuhitukila hali ikeye linga tuyoye mu ndzolela. Kaha mutue kulinga viuma viacili mu cipanga ca kuambulula ni vipanga vikuavo viamu lukungulukilo, tueku sangaziala Yehova. (Visa. 127:1; 1 Kol. 3:7) Kaha ngaviuma kaviesi nakuenda mucifua citua lavelelele, tu vulukenu nguetu Yehova ali nakumona viose. (Isaya 26:12) Cakama lika kulingako mutamba uetu, kaha na kutsiliela nguetu Yehova aka lingako mutamba uendi. Tukalenu na vusunga nguetu Yehova akatu tuamenena ambenga kati mu cifua caku komouesa, ngue mualingile ku nima.—Vili. 16:​6-10.

11. Viuma vika tu tantekeya vihasa kutu kuasa?

¹¹ Tu tantenkeya nguetu Yehova uapua Njambi ua cilemo, vusunga na mana. Cikuano naua, tu tantekeya nguetu Yehova uahaka seho kuviuma vitueku mulingila na viuma vitue kulingila vamuanetu. Kaha ntsimbu yose ueku lunguisa vaze veku kakatela kuli ikeye.—VaHe. 11:6.

KATU TANTEKEYA VIKA SOLOKA MENE

12. Kuliya na Tiango 4:​13, 14, vusunga vuka katuesi navuo?

¹² Tandenu Tiango 4:​13, 14. Vusunga vuaseho vutua pande kukala navuo ovu, katu tantekeya vikatu solokela mene. Kaha mu mavu ano viose vihasa kutu solokela muomu ‘ntsimbu na luvinda vieku solokela vose.’ (Ekel. 9:11) Omo liaco, katuhasa ku tantekeya ngatuka puisamo vizango vietu ni tukakala na muono linga tuka vipuisemo.

13. Vintsimbu vimo kuhona ku tantekeya viose vika soloka kulutue, vieku tulingisa kulivua vati?

¹³ Kuhona kutantekeya mpundu vika tusolokela kulutue, cihasa kutupuila cacikalu kukolesa. Cikuavo naua, kulisosomua na viuma vikatu solokela mene ngecimua visoti viaku tungumuna na luvinda, vihasa kutupunda ndzolela. Kaha ngaviuma vitua lavelela kavi lipuisamo, tuhasa kuuila mu vusiua na kuputuka kulisosomua.—Visi. 13:12.

14. Ndzolela ya vusunga yemanena haka? (Talenu naua vikupulo.)

¹⁴ Mutue kutualelaho kupangela Yehova na mutima uose vutuhu tuli nakuhita muvisoti, tueku muesa nguetu tuamu lema. Kaha mizimbu yamu Mbimbiliya yamuesa nguayo, katua pandele kulavelela nguetu Yehova aka tuniunga mu visoti viose. Cikuavo naua, Yehova kekutu sonekela viuma vika tusolokela mu muono. Kaha Yehova a tantekeya ngecize ndzolela yetu kaya hitukile haviuma vikatu solokela kulutue. Muomu ndzolela ya vusunga ya hitukila ha kuononoka naku kava vimamuna viendi. (Yele. 10:23) Mutue kutava naku hitukila hali Yehova mu vihangula vietu, tuli na kuhandeka nguetu: “Nga Yehova azanga tuka yoya kaha tuka linga eci cipue oco.”—Tia. 4:15.

15. Vika tu tantekeya kutuala ha muono uaku lutue?

¹⁵ Vutuhu ka tutantekeya vikatu solokela mene, vunoni tu tantekeya nguetu Yehova uatu kulahesa muono kaue kuhua, muilu ni hano ha mavu. Cikuavo naua, Yehova kati mukua makuli kaha navimo viahi vihasa kumu vindika kupuisamo vikulaheso viendi. (Titu 1:2) Muomu Ikeye lika ‘ue kuambulula viaku sulumuina fume ku vusangumukilo naku ntsekuluila vize kanda visoloke.’ Ngeci mukemuo, tukalenu na vusunga nguetu nguemua puisilemo vikulaheso viendi ku nima, mukemuo naua aka puisamo vikulaheso viendi kulutue. (Isaya 46:10) Kaha naumo uahi ahasa kuvindika cilemo ca Yehova kuli yetu. (Loma 8:​35-39) Yehova akatu hana mana, ndzili naku lembezieka citua tondeka linga tukolese muvisoti viose-ovio, vikatu solokela mu muono. Ngeci mukemuo, tukalenu na vusunga nguetu Yehova akatu kuasa nakutu vezikisa.—Yele. 17:​7, 8.

KATUHASA KUIVUISISA MUAKU LOVA CIFUA CEKUTU IVUISISILAMO YEHOVA

16. Kuliya na Visamo 139:​1-6, vika Yehova ue kuivuisisa kutuala haliyetu, vize katuhasa kuivuisisa?

¹⁶ Tandenu Visamo 139:​1-6. Sakatanga Uetu atantekeya viose kutuala hali yetu. Atantekeya vitueku singanieka, vati tueku livua, vitue kuhandeka naviuma viakala ku mutima uetu. Cikuavo naua, a tantekeya viose vitue kulinga na omolia vika tueku vilingila. Ngue mua handekele Muangana Ndaviti nguendi Yehova ua liviukisila kutu kuasa kaha uakala na vuhasi vuaco. Vati mue kulivua ku tantekeya nguenu Njambi Mukua Ngolo Yose, uze ua Hiana Viose naku tanga viuma viose, uami haka seho yakama! Mua vusunga, Ndaviti nguendi: “Mana a ngecize a na nji komouesa cikuma; A na kama, ka nji hasa ku a heta.”—Visa. 139:6.

17. Omolia vika ceku tupuila cacikalu kuivuisisa nguetu Yehova atu tantekeya vuino?

¹⁷ Halumo cifua civatu lelelamo, cisemua cetu ni viuma vitua tsiliela, vihasa kutu kaluuila kumona nguetu Yehova Tatetu ua Cilemo, uatuhaka seho. Ni halumo omolia visevuka vitua lingile, tuhasa kulivua nguetu Yehova natumbila kuti kaha ali kulahako netu. Ambe vene Muangana Ndaviti vintsimbu vimo uakele nakulivua ngoco. (Visa. 38:​18, 21) Ni muntu ue kulihakela kapandi linga ayoye muaya vitume via Njambi, ahasa kulihula nguendi ‘nga Njambi ueku njivuisisa omolia vika atonda njiviane viuma vieku njikaluuila?’

18. Kuvezika cika tuhasa kuuanaho muku tava nguetu Yehova atu tantekeya vuino? (Talenu naua vikupulo.)

¹⁸ Tuhasa kulilongesa kutava nguetu Yehova atu tantekeya vuino, kuhiana namuze mutuli tantekeya etu vaveniya. Yehova uekumona viacili mulietu vize katuhasa kumona. Vutuhu uekumona visevuka vietu, vunoni atantekeya kapandi katue kulihakela kakulinga viacili kaha uatulema. (Loma 7:15) Muavusunga, mutue kuivuisisa nguetu Yehova uekutu mona munjila yacili, viekutu hana vusunga vuakumu pangela na mutima uose kaha mu ndzolela.

19. Vika tu tantekeya mpundu kutuala hali Yehova?

¹⁹ Katuesi na vimpata nguetu Yehova ikeye cilemo. Kaha vimamuna viendi viamuesa ngecize uatulema kaha atonda tuyoye mu ndzolela. (1 Yoa. 4:8) Tutantekeya naua nguetu Yehova atonda tuka yoye muono uayaye. Ngeci uatuhana nkombelo linga vika lipuisemo. Omo liaco, tuhasa kukala na vusunga nguetu vutuhu katua tantulukile tuhasa kupangela Yehova mu cifua cekumuya ku mutima. (Loma 7:​24, 25) Cikuavo naua, tua tantekeya nguetu “Njambi uakama kuhiana mitima yetu kaha atantekeya viuma viose.” (1 Yoa. 3:​19, 20) Yehova uekumona viose kutuala haliyetu kaha uatu tsiliela nguendi, tuhasa kulinga cizango cendi.

20. Vika vitukuasa kuhona kuma mutima?

²⁰ Yehova katu vindikile mizimbu naimo yahi ituapande kutantekeya. Mutue kutava vusunga vuaco na kulikehesa cose, tueku hasa kulitenga ku viuma vize kaviesi ku ndzili yetu naku tuala mana ku viuma viaseho. Kaha mutue kulingamo, tue kumuesa nguetu tua tsiliela Yehova na mutima uose uze “ua kutantuluka ku mana.” (Yombi 36:4) Vutuhu kuivuisisa cetu cakala na nginga kutuala ha mizimbu imo, vunoni tua lavelela kuka lilongesa viuma viaviha kuli Njambi yetu ku miaka yose.—Ekel. 3:11.