Vuno mua “Lilongesa Lihungu” lia Kuviukilila na Viuma Vimuli Navio Ni?

1. Vika ca lomboloka kuviukilila na viuma vituakala navio? Kaha vika kaca lombolokele?

VUNO mue kuviukilila na viuma vimuakala navio ni? Vaze ve kulingamo, vekuivua ndzolela na ciyulo mu kutuala mana ku vivezikiso vivali na kutambula. Kaha ka vekuniengua ni kuuila mu vusiua omolia viuma kavesi navio. Vunoni kuviukilila na viuma vi tuakala navio kaca lombolokele ngecize ka citondeka kutuala mana ku cifua citue kuyoyelamo Caku muenako, kati vupi kuli Makua Kilistu kutonda kulinga viavingi mu cipanga ca Yehova. (Loma 12:1; 1 Tim. 3:1) Kaha Mukua Kilistu uaco, keku zimbalesa ndzolela yendi ambenga katambuile citeli ca nazange ha ntsimbu ya lavelela.

2. Vika vihasa kusoloka ngakatu viukilila na viuma vituakala navio?

² Muekuiza kuvindama cakama ngakatu viukilila na viuma vituakala navio. Caku muenako, tuhasa kupanga viola viavingi linga tukale na viuma katutondeka mpundu. Ca vusiua, kuhandeka nguetu vakua Kilistu vamo vapundaho laza vimbongo na viuma vikuavo omo liaco. Kaha halumo va singaniekele nguavo: ‘Vianji pande muane. Ka citava nji vandamene ntunda yakama.’ Ni vene nguavo: ‘Amba njika vifueta lika ntsimbu yeka.’ Vunoni vuizi ni vuizi vene, ambe vuavundende, vue kuneha kasahuntu kuli Yehova. (Visi. 30:9) Kaha vakuavo co, vekuuila mu vusiua vuakama na kulikela vene kupangela Yehova, omolia kuhona kutambula vimo viteli mu lukungulukilo. (Ngal. 6:9) Omolia vika ngamba ya Yehova nendi ahasa ku singanieka kulingamo? Halumo omolia kuputuka kuhona kuviukilila na viuma viakala navio.

3. Vika tulilongesa ku Filipu 4:​11, 12?

³ Tu vose tuhasa kuviukilila na viuma vi tuakala navio. Kapostolo Paulu ua sonekele nguendi: ‘Nja lilongesa kuviukilila na viuma vinjili navio ambe vifue vati.’ (Tandenu Filipu 4:​11, 12.) Vutuhu mua sonekele mezi aco tele alimu kamenga, vunoni ka zimbalesele ndzolela yendi. Ua ‘lilongesele lihungu’ lia kuviukilila na viuma viakele navio. Kaha nga tuhilula ha mezi a Paulu na muzimbu uendi vihasa kutu kuasa kuviukilila na viuma vituakala navio. Kati cacasi kukala na cifua caco, vunoni ngatu lingako mumo tuhasa ku lilongesaco. Vati tuhasa kulingamo? Tu simutuilenu ha vifua vitu kuasa ku lilongesa lihungu lia kuviukilila na viuma vituakala navio.

PUENU VAKUA KUSANTSELA

4. Vati kupua vakua kusantsela ceku tukuasa kuviukilila na viuma vituakala navio? (1 Tesalonika 5:18)

⁴ Mukua kusantsela uekuhasa kuviukilila na viuma viakala navio. (Tandenu 1 Tesalonika 5:18.) Caku muenako, nga tuviukilila na viuma vituakala navio, katu ka lisosomua cikuma na viuma vi tutonda vunoni ka tuakele navio. Kaha mu tuekuviukilila na viteli vituli navio mu ntsimbu ino, tue kulinga cose mu kupuisamo viteli viaco, mu cihela caku lisosomua na citeli caciha citutonda. Yehova a tantekeya ngecize capua caseho kulingamo. Ngeci ueku tumamuna tupue na kusantsela mu vivundilo vietu! Kupua vakua kusantsela ceku tukuasa kuivua “ciyulo ca Njambi cize ca hiana mana ose.”—Filp. 4:​6, 7.

5. Vusunga vuka vuapandele kulingisa vaIsaleli kupua vakua kusantsela? (Talenu naua cipulo.)

⁵ Tu hilulenu viva lingile vaIsaleli. Vintsimbu viavingi va tatuokelele Yehova nguavo ka vakele na viakulia vivakele navio ku Ingitu. (Num. 11:​4-6) Mua vusunga, kuyoyela mu vindinda capuile ca cikalu. Vuno vika vieku vakuasele kuviukilila na viuma vivakele navio? Va pandele kuhilula ha viuma viava lingilile Yehova. Muomu Ingitu, vakele naku vayandesa ngue vandungo, kaha Yehova uavetele vakua Ingitu na vipupu 10. VaIsaleli muva patukile ku vundungo ‘va pupile’ palata, nkengelezi na vizalo viavingi kuli vakua Ingitu. (Ezu. 12:​35, 36) Cikuavo naua, muvaka hetele ku Cisali caku Tila, Yehova ualingile cikomoueso ca kutepa mema hakati. Kaha mu zindinda uakele na kuvalela na manna. Vika honi vamo vaIsaleli va tatuokelele? Mua vusunga, kati muomu kuhona kukala na viakulia, vunoni omolia kuhona kuviukilila na viuma vivakele navio.

6. Vati tuhasa kupua vakua kusantsela?

⁶ Vati muhasa kupua vakua kusantsela? Hakatete, hilulenu ha viuma vie kumivuisa ndzolela tangua na tangua. Kaha muhasa vene kusoneka ha viuma vivali ni vitatu vimua leme cikuma. (Vinie. 3:​22, 23) Camu civali, puenu vakua kusantsela. Nga vakuenu va na milingila viuma va santselenu. Kaha cikuma-kuma, santselenu Yehova ntsimbu yose. (Visa. 75:1) Camu citatu, hangulenu vavusamba veku muesa kusantsela. Muomu ngecimua cifua ca kumuesa kusantsela, kuhona ku viukilila naviuma naco ceku sambukila. (Ndeu. 1:​26-28; 2 Tim. 3:​1, 2, 5) Ngeci mukemuo, nga tutonda vukovelelo vua kumuesa kusantsela, kulisosomua kacika uana cihela mu mitima yetu.

7. Vika via kuasele ndumbuetu Aci, kuviukilila na viuma viakele navio? Kaha vika viezilemo?

⁷ Tu hilulenu via solokele kuli Ndumbuetu Aci, ua yoyela ku Indonésia. Ua litavelele nguendi: “Mu ntsimbu ya musongo ua COVID-19, nja putukile ku lisetekesa na vamuanetu na vandumbuetu. Ku lingamo, canji lingisile kuhona kuviukilila na viuma vinja kele navio.” (Ngal. 6:4) Vika viamu kuasele kualulula visinganieka viendi? Ndumbuetu Aci nguendi: “Nja putukile kutanda vivezikiso vinjakele na kutambula tangua na tangua. Kaha na kuhilula ha viuma viacili vinja tambula mukukala mu lukungulukilo lua Njambi. Mu nima yaco, nja santselele Yehova ku vivezikiso viaco. Kulingamo, njaputukile kuviukilila na viuma vinjakele navio.” Nga muli na visinganieka vili nakumi lemuisa, setekenu kulinga vialingile ndumbuetu Aci, linga mukale na mutima ua kusantsela.

TUALELENUHO KUPUA VA KULIKEHESA

8. Mu ngandzo ika ua uililile Mbaluke?

⁸ Mbaluke, uapuile mukua kukuasa kapolofeto Yelemiya kusoneka mizimbu. Ntsimbu imo ua uililile mu ngandzo ya kuhona kuviukilila na viuma viakele navio. Kaha uakele na cipanga ca cikalu, ca kukuasa Yelemiya kuhetesa muzimbu ku vaIsaleli vakuhona kusantsela. Vunoni mu cihela cakutuala mana ku viuma viatondele Yehova alinge, Mbaluke uatualele mana ku viuma viatondele ikeye. Omo liaco ua hilukilile mu nima. Ngeci kuhitila muli Yelemiya, Yehova ualekele Mbaluke nguendi: “U lilengeyela viuma via kama, ni? Kati u vi lengeye.” (Yele. 45:​3-5) Mu mezi akuavo uakele na kuhandeka nguendi: “Viukilila na vize vi uli navio mu ntsimbu ino.” Mbaluke uatavele cimamuna caco kaha Yehova uatualeleho kumu pangesa.

9. Kuliya na 1 Kolintu 4:​6, 7, kulikehesa cika tukuasa ku nongonona vika? (Talenu naua vikupulo.)

⁹ Vintsimbu vimo Mukua Kilistu halumo ahasa kulivua nguendi uafuila kutambula vimo viteli. Muomu uakala na vutongue, ueku fuitangana ni ue kupangela Yehova miaka yayingi. Vunoni viteli viaco na vakuavo vahasa ku vitambula. Vika vimu kuasa kuhona kuuila mu vusiua? Ahasa kuhilula via sonekele kapostolo Paulu ku 1 Kolintu 4:​6, 7. (Tandenu.) Kulikehesa cika tukuasa ku nongonona nguetu, viteli viose-ovio vitue kutambula na vutongue vutuakala navuo, viatunda kuli Yehova. Ngeci mukemuo, Yehova uatuhana viuma viaco kati muomu tuapua va kulifuila kuhiana vakuetu. Vunoni ue kulingamo omolia cilemo na ngozi yendi.—Loma 12:​3, 6; Efe. 2:​8, 9.

10. Vati tuhasa kupua va kulikehesa?

¹⁰ Tuhasa kupua va kulikehesa mu kuhilula lungano lua Yesu. Tu hilulenu viuma via solokele ku vutsiki, omo Yesu ua tanesele viliato via vapostolo vendi. Kapostolo Yoano ua sonekele nguendi: ‘Yesu ua tantekeyele nguendi [1] Ise na kundika viuma viose mu mavoko endi kaha [2] ua tundile kuli Njambi, [3] uakele na kuya kuli Njambi, . . . kaha ua putukile kutanesa viliato via vandongesi vendi.’ (Yoa. 13:​3-5) Yesu nga ikeye uafuililile kumu tanesa ku viliato. Vunoni Yesu mu muono uendi uose, nalimo litangua liahi ualivuile nguendi uafuililile muono uacili. (Luka 9:58) Yesu uapuile mukua ku likehesa na kuviukilila na viuma viakele navio. Cili vene, uatusila lungano lua kutantuluka.—Yoa. 13:15.

11. Vati kulikehesa ca kuasele muanetu Dennis kuviukilila na viteli viakala navio?

¹¹ Dennis, umo muanetu uayoyela ku Holanda, uekulinga cose ahase kukava lungano lua Yesu mukumuesa kulikehesa. Ivene nguendi: “Vintsimbu vimo, ngaumo muanetu ni ndumbuetu atambula cimo citeli ci njitonda, njekuzeya na kusinganieka nguange citeli caco cafuila yange. Kaha munje kukala na visinganieka viaco, nje kuhilula ha vimpande via handeka ha kulikehesa. Mu JW Library, imo mikanda yahandeka ha kulikehesa, njahakaho citantekeyeso linga nji iuane vuasi naku itanda lueka. Cikuavo naua, njahaka mu telefone vimo vimpande via handeka ha kulikehesa nakuvi halakana-halakana.a Njeku lilongesa ngecize viose tueku vilingila na vutumbe vua kuhana Yehova vumpahu, kati yetu. Kaha tue kulinga lika mutamba ua undende mu viuma vie kupuisamo Yehova.” Ngamu putuka kulivua nguenu kamuesi na ndzolela muomu kamua tambuile cimo citeli cimu tonda, lingenuko mumo mupue va kulikehesa. Kulingamo, muka kaniamesa vusamba vuenu na Yehova kaha na kuviukilila na viteli vimuli navio.—Tia. 4:​6, 8.

TUALELENUHO KUHILULA HA LULAVELELO LUENU

12. Vikulaheso vika vie kutukuasa kuviukilila na viuma vituakala navio? (Isaya 65:​21-25)

¹² Tue kuhasa kuviukilila na viuma vituakala navio, nga tuhilula ha vikulaheso via Yehova. Kuhitila mu livulu lia Isaya, Yehova ua muesa ngecize tuakala na visoti viavingi. Vunoni uatu kulahesa naua kukavi fumisako. (Tandenu Isaya 65:​21-25.) Kaha tukakala mu vindzivo viacili nakuyoya mu ciyulo. Cikuavo naua, tukalinga vipanga vika tuvuisa ndzolela na kulia viakulia via kutovala vie kuneha cihindu. Kaha katuka lisosomua naua nguetu viuma via kuvihia vihasa kutu solokela ni ku solokela vana vetu. (Isaya 32:​17, 18; Ezek. 34:25) Tuli na vusunga nguetu viose viatu kulahesa Yehova kutuala ha muono uacili, vika lipuisamo mpundu.

13. Ha ntsimbu ika tuapande kutuala mana ku lulavelelo luetu?

¹³ Omolia vika tuatondeka muakama kutuala mana ku lulavelelo luetu? Muomu tuli ‘ku matangua aku kotokela’ kaha tuvose tue kupinda na vitanga via “ku kaluua.” (2 Tim. 3:1) Vunoni Yehova ueku tukuasa kukolesa tangua na tangua muku tuhana vimamuna, ndzili na vukuasi vukuavo vutondeka. (Visa. 145:14) Cikuavo naua, lulavelelo luhasa kutukuasa cikuma-kuma mu vintsimbu viavikalu. Halumo muli na kufuitangana mu kushuka vushoko. Vuno ca lomboloka ngecize ntsimbu yose muapande kulinga cose mu uane via kulishuka navio ni? Mua vusunga houe! Muomu Yehova uami kulahesa mu ntsimbu ino, kumihana viuma vitondeka kaha na vikuavo viavingi mu mavu a aha. (Visa. 9:18; 72:​12-14) Halumo muekuivua kuvavala tangua na tangua, mue kupinda na litima ni vene vitanga vikuavo via cihindu. Vuno muono uaco uka tualelaho muze vene ni? Mua vusunga houe, mu mavu a aha kuvavala na kutsa kacika kalako naua. (Kuso. 21:​3, 4) Mua vusunga, lulavelelo lue kutukuasa kuviukilila na viuma vi tuakala navio, kuhona kuuila mu vusiua ni kuniengua. Tuhasa kuivua ndzolela na kuyoya mu ciyulo, ambenga tutsisa muntu utua lema, kuhita mu vuhenge, ni kupinda mu vitanga viose-ovio. Omolia vika? Muomu tua tantekeya nguetu ‘lamba yetu ya kantsimbu lika’ kaha mu mavu a aha katuka yanda naua.—2 Koli. 4:​17, 18.

14. Vati tuhasa kukaniamesa lulavelelo luetu?

¹⁴ Vati tuhasa kukaniamesa lulavelelo luetu? Ngeci mua muntu ue kutondeka kupangesa viokulu linga amone vuino viuma vili kulahako, navuno vene, ce kutondeka tulingeko mumo muku kaniamesa lulavelelo luetu luaku kayoyela mu Citungu. Caku muenako, ngatuli na kulisosomua kutuala ha kuuana vimbongo viakuyoya navio, tuhasa kuhilula ha muono ua kulutue. Muomu naumo uahi akapua cihutu kaha katu katondeka naua vimbongo mukuyoya. Nga tulisosomua na viteli, tuhilulenu nguetu kaviesi naseho yakama, ngatuvi setekesa na muono ua kutantuluka omotuka pangela Yehova ku miaka yose. (1 Tim. 6:19) Mutue kulisosomua cikuma na viuma via ntsimbu ino, hakatete cekutu kaluuila kutuala mana ha muono ua kulutue. Vunoni mutue kuhilula ha muono uatu kulahesa Yehova, cekupua cacasi kulikela kutuala mana ku visoti vietu.

15. Vika mua lilongesa ku mezi a ndumbuetu Christa?

¹⁵ Tu hilulenu vati lulavalelo lueku kuasa ndumbuetu Christa, mpuevo ua muanetu Dennis, itua tumbulula helu. Ndumbuetu nguendi: “Nje kuvavala vumo vuvezi vue kulingisa matsipa kuhona kukala na ndzili. Omo liaco kanje kuhasa kuenda, ngeci nje kutondeka lika cituamo caku sindumuna. Cikuavo naua, vintsimbu viavingi nje kukala lika ha muhela. Kaha njekuivua kuvavala tangua na tangua. Vuovuno lika ndotolo naka njilekele nguendi kunji kanguka ku vuvezi vuaco. Vunoni ohovene nja singaniekele nguange: ‘Ndotolo ka tantekeya vati muono ukafua kulutue.’ Nje kutuala mana ku lulavelelo luange, lue kunjikuasa kukala na ciyulo camu visinganieka. Lelo lino, vianji salelako lika kutualelaho kukolesa, kaha mu mavu a aha njikayoya muono uacili!”

‘KA VE KU ZELA NAKAMO KAHI VAZE VA MU VUILA VUOMA’

16. Vika Muangana Ndaviti ua sonekelele nguendi vaze veku vuila Yehova vuoma ‘ka ve ku zela nakamo kahi’?

¹⁶ Kasi tuhasa kupinda na vitanga, vutuhu tueku viukilila na viuma vituakala navio. Caku muenako, Muangana Ndaviti ua tsisile vana vatatu, vamu vangeyele na kumuenda vungungu. Kaha mu miaka yayingi uayoyele muono uaku tina-tina, muomu vatondele kumu tsiha. Vutuhu uapindile na vitanga viaco, Ndaviti uahandekele nguendi: ‘Ka ve ku zela nakamo kahi vaze va mu vuila vuoma.’ (Visa. 34:​9, 10) Vika viamu lingisile ku handekamo? Vutuhu Yehova kohielele Ndaviti mu vitanga via lihitile navio, vunoni uamuhele viuma via tondekele. (Visa. 145:16) Ngecimua Ndaviti, tuhasa kukala na vusunga nguetu Yehova aka tukuasa kukolesa mu vitanga vietu viose. Kaha tukevua ndzolela na ciyulo mu viuma viose vikatu solokela.

17. Omolia vika mutonda kulinga cose mu viukilile na viuma vi muakala navio?

¹⁷ Yehova atonda mu viukilile na viuma vi muakala navio. (Visa. 131:​1, 2) Ngeci mukemuo, lingenu cose mu lilongese lihungu lia kuviukilila na viuma vi muakala navio. Kaha ngamu lihakela kapandi kakupua vakua kusantsela, kulikehesa naku kaniamesa lulavelelo luenu, muhasa kuhandeka nguenu: ‘Mukemuo, njina viukilila na viuma vinjili navio.’—Visa. 16:​5, 6.