Tsilielenu Nguenu Yehova Uami Lema

1. Omolia vika mua lihanene kuli Yehova? (Talenu naua cikupulo.)

VUNO muvuluka mumua lihanene kuli Yehova, nakumu leka nguenu mutonda kumu pangela muono uenu uose ni? Mua vusunga, mua lingile cihangula caco muomu mua tantekeyele Yehova nakumu lema. Kaha muamu kulahesele nguenu muka tuameka cizango Cendi, na kutualelaho kumu lema na mutima uenu uose, na muono uenu uose, mana enu ose, kaha na ndzili yenu yose. (Mako 12:30) Kaha tunde oho, cilemo cenu muli Yehova cili nakukola. Ngeci nga vamihula ngecize: “Muli na vusunga nguenu mualema Yehova ni?” Na vimpata viahi muhasa ku kumbulula nguenu: “Eyo njamu lema kuhiana muntu ni viuma viose ovio!”

2-3. Yehova uatonda tutave vika, kaha vika tuhilula mu cilongesa cino? (Yelemiya 31:3)

² Vati muneku kumbuluile ngava mihula nguavo: “Muli na vusunga nguenu Yehova uami lema ni?” Vuno muka likanoela ku kumbulula cihula caco na kusinganieka nguenu, kamua fuilile cilemo ca Yehova ni? Umo ndumbuetu vamu lele mu cifua cacikalu uahandekele nguendi: “Kanjesi na vimpata nguange njalema Yehova. Vunoni vintsimbu vimo, njeku kala na vimpata nga Yehova uanji lema.” Vika vihasa kumi kuasa kutantekeya vati Yehova uekumi muenamo?

³ Yehova atonda mukale na vusunga nguenu uamilema. (Tandenu Yelemiya 31:3.) Mua vusunga, Yehova ikeye uami koka muize kuli ikeye. Kaha tunde ha litangua limua lihanene kuli ikeye nakumi mbatiza mua tambuile vuana vuaseho yakama: Cilemo Cendi kace kuhua. Cilemo caco capua vusamba vua kukola kaha ca ntsimbu yose. Omo liaco, Yehova ue kumona vangamba vendi, hamolika nenu kupua “vupite” vuaseho. (Mal. 3:17) Kaha Yehova atonda linga mulivue ngue mua livuile kapostolo Paulu nguendi: “Muomu yange nji na tantekeya cili-cili ngecize cipue ku-tsa, cipue muono, cipue tungelo, cipue via vuangana, cipue evi via vuovuno, cipue evi vi keza, cipue via vukama, cipue cuma ca muilu, cipue ca muintsi, cipue cuma ceka ca ku tanga, ka ci hasa ku tu hangununa ku cilemo ca Njambi.” (Loma 8:​38, 39) Mu cilongesa cino, tuhilula vati tuhasa kukolesa lutsilielo luetu muli Yehova nguetu uatulema, na vika vitu kuasa kulingamo.

SEHO IKA YAKALA HA KUTSILIELA NGUENU YEHOVA UAMI LEMA?

4. Vati tuhasa kuluisa Satana?

⁴ Mutue kutsiliela nguetu Yehova uatulema, tue kuhasa kuviana “kukokola” ca Satana. (Efe. 6:11) Satana aka linga cose mukutu vindika kupangela Yehova. Kaha muheto uakama ue kupangesa Satana, uapua kukuisa vantu vatsiliele nguavo Yehova kava lemene. Cikuavo naua, kati musuve nguenu Satana mukua lizangamena. Vintsimbu viavingi uekutu luisa nga amona ngecize tunazeye omolia viuma vitua lihitile navio, ngatuli mu visoti ni nga katuesi na vusunga kutuala ha viuma vikatu solokela kulutue. (Visi. 24:10) Ngeci mua ndumba ue kuyomba kasitu natanguka na viuma vieka, Satana uekutonda kutuzeyesa linga tulikele kupangela Yehova. Vunoni tulingenu viose vituhasa ‘muku viana Satana’ na kuluisa cendi, linga tukale na vusunga nguetu Yehova uatulema.—1 Pet. 5:​8, 9; Tia. 4:7.

5. Omolia vika capua caseho kulivua nguetu Yehova uatulema?

⁵ Kutava nguetu Yehova uatulema, cika tu kuasa kusuena muhiehi nendi. Omolia vika tuhandekela ngoco? Muomu Yehova uatutanga na vuhasi vuakulema vakuetu na kulivua nguetu navo vatulema. Kaha mukemuo muviafua, nga muntu a tumuesa cilemo netu tue kuivua cizango cakulema muntu uaco. Navuno vene, mutue kulivua nguetu Yehova uatulema netu tuekuivua cizango cakumu lema. (1 Yoa. 4:19) Omo cilemo cetu muli Ikeye ciya na kukola, cilemo Cendi kuli yetu cika livuezelela. Muomu Mbimbiliya ya handeka ha toma nguayo: “Suenenu kuli Njambi, kaha ikeye a ka suena kuli enu.” (Tia. 4:8) Vika tuhasa kulinga tukale na vusunga nguetu Yehova uatulema?

VIKA VITU KUASA KUKALA NA VUSUNGA NGUETU YEHOVA UATULEMA?

6. Vika tuhasa kuvundila linga tutsiliele mu cilemo ca Yehova?

⁶ Tualelenuho kuvundila kuli Yehova linga muivuisise ngecize uamilema. (Luka 18:1; Loma 12:12) Halumo cika tondeka kuvundila kuhilukila na kuhilukila, linga Yehova amikuase kulimona ngue muekumi muenamo ikeye. Mua vusunga vintsimbu vimo, omolia kulivua vungoco, ce kutupuila cacikalu kutsiliela nguetu Yehova uatulema. Vunoni vulukenu nguenu Yehova ua hiana mitima yenu. (1 Yoa. 3:​19, 20) Kaha ami tantekeya vuino kuhiana yenu vavene, na kumona vifua vienu viacili vize halumo kamue kuhasa kumona. (1 Sam. 16:7; 2 Miz. 6:30) Ngeci mukemuo, kati mu likanuuele kumu ‘muaniena’ ni nguetu kumuleka cifua cimue kulivuilamo na kuvundila ami kuase ku tsiliela mu cilemo Cendi. (Visa. 62:8) Mu nima yaco, esekenu kuyoya muaya vivundilo vienu na kulinga viuma vina hatako.

7-8. Vati mukanda ua Visamo ueku tukuasa kukala na vusunga nguetu Yehova uatulema?

⁷ Tsilielenu viekumi leka Yehova kuhitila mu Lizi liendi. Yehova ua huiminine vakua kusoneka Mbimbiliya va lumbunune muafua mpundu. Mu imo samo ya sonekele Ndaviti ua muesele vati Yehova uatuhaka seho. Ua sonekele nguendi: “Yehova a li ha hiehi na vaze va li na mutima ua ku tsa, kaha ohiela vaze va li na cimbembesi ca ku vavala.” (Visa. 34:18) Nga muli muvusiua, muhasa kulivua nguenu naumo uahi alina kumivuisisa nakumi kuasa. Vunoni Yehova ue kukala nenu mu kumikuasa muomu ue kumona ngecize mua tondeka vukuasi vuendi. Kaha mu imo samo yendi, Ndaviti ua sonekele nguendi: “Longela masozi ange mu ngalafua yove.” (Visa. 56:8) Mua vusunga ngamuli mu visoti, Yehova uekumi mona. Kaha ngeci mua muntu alimu zindinda uekuhaka seho ku mema a nambata mu ngalafua, na Yehova nendi uahaka seho ku masozi enu kaha kekusuva kulila na kuvavala cenu. Mu Visamo 139:​3, tue kutandamo nguavo: “Kaha [Yehova] u tantekeya zinjila ziange ziose.” Vutuhu Yehova uekumona vinjila vienu viose, vunoni uekutuala mana ku viuma viacili vimue kulinga. (VaHe. 6:10) Omolia vika? Muomu uahaka seho kukapandi kamue kulihakela muku muya ku mutima.a

⁸ Kuhitila mu vinimbu ngeci muevi viamu Lizi liendi, Yehova ue kutuleka nguendi: “Nji tonda mu tantekeye nguange njami lema cikuma kaha njami haka seho.” Vunoni ngue mutua mono, Satana atonda tutsiliele nguendi Yehova katu lemene. Ngeci mukemuo, nga muli na kutakanya kutuala ha cilemo ca Yehova kuli yenu, lihulenu nguenu: ‘Iya nji tsiliela, “ise ya makuli” ni “Njambi ua vusunga”?’—Yoa. 8:44; Visa. 31:5.

9. Yehova uahana cikulaheso cika ku vangamba vendi? (Ezundu 20:​5, 6)

⁹ Hilulenu vati Yehova uekulivua mu kumona nguendi muamu lema. Hilulenu via handekele Yehova kuli Mosesa na vaIsaleli. (Tandenu Ezundu 20:​5, 6.) Yehova ua kulahesa nguendi aka tualelaho kumuesa cilemo kace kuhua kuli vaze vamulema. Kaha lukakatela lua Yehova luekutu hana vusunga nguetu, nalimo litangua aka likela kulema vangamba vendi. (Neh. 1:5) Nga vintsimbu vimo, muka livua nguenu kamua fuilile cilemo ca Yehova, lihulenu nguenu: ‘Vuno njalema Yehova ni?’ Aci singaniekenu halievi: Nga mua lema Yehova kaha mulina kulihakela kapandi ka kumuya ku mutima, kalenu na vusunga nguenu nendi uamilema muakama. (Ndan. 9:4; 1 Kol. 8:3) Mu mezi akuavo, nga kamuesi nakutanya cilemo cenu kuli Yehova, omolia vika muvianena cilemo Cendi kuli yenu? Ngeci mukemuo, kalenu na vusunga nguenu Yehova aka tualelaho kumilema kaha nalimo litangua liahi akami seza.

10-11. Vati Yehova uatonda tumone nkombelo? (Ngalata 2:20)

¹⁰ Hilulenu ha nkombelo. Nkombelo ya Yesu Kilistu yapua vuana vuaseho vuatu hana Yehova. (Yoa. 3:16) Vuno vuana vuaco vuapua vua muntu ku muntu ni? Eyo! Talenu via lihitile navio kapostolo Paulu. Ualingile visevuka viakama ntsimbu kanda apue Mukua Kilistu, kaha ua tualeleho kulua na kuhona kutantuluka. (Loma 7:​24, 25; 1 Tim. 1:​12-14) Vutuhu ngoco, uamuene nkombelo kupua vuana vuamu hanene Yehova. (Tandenu Ngalata 2:20.) Ngeci vulukenu nguenu Yehova ikeye ua huiminine Paulu kusoneka mezi aco. Kaha viose viva soneka mu Mbimbiliya vavi sonekela kutu longesa. (Loma 15:4) Cikuavo naua, mezi a Paulu amuesa ngecize Yehova atonda mumone nkombelo, kupua vuana vuami hana. Ngeci mukemuo kumona nkombelo mu njila eyi, cimihana vusunga nguenu Yehova uamilema.

¹¹ Tue kusantsela Yehova mu kutuma Yesu linga atutsile. Vunoni vusunga vukuavo vuamu lingisile kuiza ha mavu, vuapuile kulongesa vantu vusunga kutuala hali Njambi. (Yoa. 18:37) Kaha vusunga vuaco, vuambatesela kumo na vati Yehova uekulivua kutuala ha vangamba vendi.

YESU UE KUTUKUASA KUTSILIELA MU CILEMO CA YEHOVA

12. Omolia vika tuapande kutsiliela ha viuma via handekele Yesu kutuala hali Yehova?

¹² Yesu muakele ha mavu, ualemene kuhandeka via vifua via Yehova ku vantu. (Luka 10:22) Tuli na vusunga vua kutsiliela via handekele Yesu kutuala ha vifua via Yehova. Omolia vika? Muomu Yesu uayoyele na Yehova muilu, tele kanda eze ha mavu. (Kolo. 1:15) Kaha Yesu a tantekeya vukama vua cilemo ca Yehova kuli ikeye. Cikuavo naua, uamuene vati Yehova uamuesele cilemo ku tungelo va kuononoka naku vangamba vendi ha mavu. Vati Yesu uekutu kuasa kutsiliela mu cilemo ca Yehova?

13. Vati Yesu uatonda tumuenemo Yehova?

¹³ Yesu uatonda tumone Yehova ngeci muekumu muenamo ikeye. Mu Mavulu a Muzimbu Uacili, Yesu uatumbuile Yehova kupua “Tata” vintsimbu vituvakana 160. Kaha mua handekele na vandongesi vendi ua pangesele mezi ngecimua “Isuenu” ni “Isuenu ua muilu.” (Mat. 5:16; 6:26) Cikuavo naua, kulaza vangamba va Yehova vakele na kupangesa vinkumbu ngeci mua ‘Mukua Ngolo Yose,’ ‘Mukua Kuhiana Viose,’ ‘Sakatanga’ na vinkumbu vikuavo. Vunoni vintsimbu viavingi, Yesu uasanene Yehova nguendi ‘Tatetu.’ Mezi aco, amuesa ngecize Yehova uatonda linga vangamba vendi valivue kuzituka ngue muana uekulivua kuzituka kuli cisemi ua cilemo. Tuhilulenu vimueso vivali tumone vati Yesu ua pangesele lizi “Tata.”

14. Vati Yesu uamuesele nguendi, nkala muntu uakala na seho kumeso a Tatetu ua muilu? (Mateu 10:​29-31) (Talenu naua cikupulo.)

¹⁴ Hakatete tuhilulenu ha mezi a handekele Yesu ku Mateu 10:​29-31. (Tandenu.) Tundzilili vapua tuzila vavandende cikuma, kaha nalimo litangua liahi vakalema na kulemesa Yehova. Vutuhu ngoco, Tatetu uavahaka seho. Mua vusunga, Yehova uahaka seho yakama ku vangamba vendi veku muononoka naku mulemesa omolia cilemo. Yesu ua handekele naua nguendi, Tatetu a tantekeya vinkambu viose viaku mutue ua nkala muntu. Mu kulinga Yehova a tantekeya ambe tuviuma tuatundende kutuala hali yetu, tuhasa kukala na vusunga vua kusula ngandza nguetu uatuhaka seho yakama. Ngeci mukemuo, Yesu uatonda tukale na vusunga nguetu, nkala muntu uakala naseho ku meso a Tatetu ua muilu.

15. Vika mua lilongesa ku mezi a Yesu aku Yoano 6:​44, kutuala hali Isuenu ua muilu?

¹⁵ Camu civali, tuhilulenu mezi a handekele Yesu nguendi, “Tata.” (Tandenu Yoano 6:44.) Isuenu ua muilu uami kuasele linga mumu tantekeye na kumulema. Omolia vika ua lingilemo? Muomu uamuene vifua viacili mu mutima uenu. (Vili. 13:48) Kaha via handekele Yesu ku Yoano 6:​44, halumo ua setekesele na mezi a Yehova aku Yelemiya 31:3. Mu cinimbu caco, Yehova nguendi: “Njina kuleme na cilemo ka ce ku hua ca ya-ye.” (Yele. 31:3; setekesenu na Hoziya 11:4.) Evi via lomboloka ngecize, Tatetu ua cilemo ntsimbu yose uekumona vifua viacili vi muakala navio, kaha halumo enu vavene kamue kuvimona.

16. (a) Vika uekutu leka Yesu, kaha omolia vika tuapande kumu tsiliela? (b) Vati muhasa kukala na vusunga nguenu, Yehova uapua Cisemi ua kuhiana? (Talenu naua cikasa “Cisemi Utua Tondeka Tuvose.”)

¹⁶ Muku tumbula Yehova kupua Tata, Yesu alina kutuleka mpundu nguendi: “Yehova kapuile lika Cisemi cange, vunoni uapua naua Cisemi cenu. Kaha kalenu na vusunga nguenu uamilema na kumihaka seho muntu ku muntu.” Ngeci mukemuo, nga vintsimbu vimo mulivua nguenu Yehova kami lemene, lihulenu nguenu: ‘Vuno kucitava njitsiliele via handekele Yesu mukupua Muana, uze tantekeya vuino Tatetu, kaha ntsimbu yose ue kuhandeka vusunga ni?’—1 Pet. 2:22.

TUALELENUHO KUTSILIELA NGUENU YEHOVA UAMILEMA

17. Omolia vika tua tondeka kutualelaho kukala na vusunga nguetu Yehova uatulema?

¹⁷ Tua tondeka kutualelaho kukala na vusunga nguetu Yehova uatulema. Muomu ngue mutua lilongesa, citozi cetu Satana akalinga cose linga tulikele kupangela Yehova. Kaha atonda naua, kutu tuva vusungu vuendi nguendi, Yehova katu lemene. Ngeci mukemuo, katua pandele kutsiliela mu makuli a Satana!—Yombi 27:5.

18. Vati muhasa kutualelaho kukala na vusunga nguenu Yehova uami lema?

¹⁸ Tualelenuho kukala na vusunga nguenu Yehova uamilema, kaha vundilenu amikuase kulimona ngue muekumi muenamo Ikeye. Hilulenu vati vakua kusoneka Mbimbiliya va lombolola cilemo ca Yehova. Cikuavo naua, vulukenu nguenu Yehova aka tualelaho kulema vaze vamu lema. Ngeci mukemuo, monenu nkombelo kupua vuana kuliyenu na kutsiliela ku mezi a Yesu nguendi, Yehova uapua Isuenu ua muilu. Kaha nga umo amihula nguendi: “Muli na vusunga nguenu Yehova uami lema ni?” Cili vene, kamuka likanuuela ku kumbulula nguenu: “Eyo uanji lema! Kaha nje kulinga cose nkala litangua linga njimuese cilemo cange kuli Ikeye!”