Cilemo ca Njambi ca Ya-ye

1, 2. Vika mua lemena Yehova Njambi?

MUA LEMA Njambi ni? Halumo mua mu lema cikuma kaha cilemo caco ca mi lingisa ku lihana kuli ikeye. Mua mu puisa Kavusamba kenu ua kama. Vunoni tele kanda mu leme Yehova, ikeye ua livangele ku mi lema. Muomu Mbimbiliya nguayo: “Ikeye ua livangele ku tu lema.”​—1 Yoano 4:19.

² Singaniekenu ha ku lana ca vinjila via tu mueselamo Yehova cilemo. Ua tu hana mavu ku pua limbo lietu lia cili na vikuavo viose vi tua tondeka linga tu yoye mu ndzolela. (Mateo 5:43-48; Ku-Solola 4:11) Ua tonda tu likuate vusamba vua cili neni, kaha ua tavesa tu lilongese mizimbu yeni. Mu tue ku tanda Mbimbiliya, tue ku halakana kuli Yehova. Kaha mu tue ku vundila kuli ikeye, neni ue ku tu hakalana. (Visamo 65:2) Ue ku tu tuamenena na ku tu kaniamesa na sipilitu santu yeni. (Luka 11:13) Cikuavo naua ka tetelele Muaneni ua seho vunoni ua mu tumine hano ha mavu mu ku tu patula ku vupi na ku ku-tsa.​—Tandenu Yoano 3:16; Loma 5:8.

3. Vati tu hasa ku kala na vusamba vua cili na Yehova?

³ Aci singaniekenu ha kavusamba kenu i mua lema cikuma, uze ue ku kala nenu cipue mu vintsimbu via ndzolela ni via vusiua. Ku tualelelaho ku kala na vusamba vua cifua eci, kati ca casi ni vati? Mukemuo mu vua fua na vusamba vuetu na Yehova, uze ua pua Kavusamba ua kama cikuma i mu hasa ku kala neni. Vusamba vuetu neni vu hasa ku tualelelaho ku miaka ya ya-ye. Ngeci mukemuo Mbimbiliya nguayo: “Kalenu mu cilemo ca Njambi.” (Yunda 21) Vati tu hasa ku lingamo? Mbimbiliya ya kumbulula nguayo: “Eci cikeco cilemo ca Njambi ngecize tu niunge mezi a lisiko eni: na mezi a lisiko eni kati a akalu.”​—1 Yoano 5:3.

“ECI CIKECO CILEMO CA NJAMBI”

4, 5. (a) Vika ca lomboloka “cilemo ca Njambi”? (b) Vika via mi lingisile ku putuka ku lema Yehova?

⁴ Vika a lomboloka mezi “cilemo ca Njambi” a ya tumbula Mbimbiliya? Ka a lombolokele cilemo ce ku tu muesa Njambi, vunoni cilemo ci tue ku mu muesa yetu. Mu vuluka mu mua putukile ku lema Yehova?

⁵ Vulukenu vati mua vuile omo mua tantekeyele ngecize Yehova a tonda mu ka yoyele mu mavu eni a aha. Mua lilongesele viose via linga mangana cikulaheso caco ci ka lipuisemo, kaha mua muene vukama vua vuana vua tu hana Yehova mu ku tuma Muaneni ha mavu. (Mateo 20:28; Yoano 8:29; Loma 5:12, 18) Ku lilongesa vukama vua cilemo ca mi muesa Yehova ca mi kuatele ku mutima, ngeci nenu mua putukile ku mu lema.​—Tandenu 1 Yoano 4:9, 10.

6. Ku lema muntu ca ambatesela kumo na vika? Ku lema Njambi ca mi sindiya ku linga vika?

⁶ Vunoni cilemo ci mua vuile ca pua lika vuputukilo vua ku lema Njambi. Ca ku muenako, ku lema muntu ka ca lombolokele lika ku mu leka nguetu “Nja ku lema” houe. Vunoni cilemo ce ku tu sindiya ku linga viuma vi ka vuisa ndzolela muntu uaco. Na vuno vene, ku lema Yehova ca mi sindiya ku yoya mu cifua ce ku mu ya ku mutima. Kaha omo ca kolele cilemo cenu, mua lihanene na ku mi mbatiza. Mu ku lingamo, mua kulahesele ku pangela Yehova ku miaka yose. (Tandenu Loma 14:7, 8.) Vati mu hasa ku niunga eci cikulaheso cenu?

“TU NIUNGE MEZI A LISIKO ENI”

7. Nga tua lema Yehova, vika tu ka tonda ku linga? Tumbulenu vimo via vindika Yehova.

⁷ Mu ku linga tua lema Yehova, ‘tue ku niunga mezi a lisiko eni.’ Vati tue ku lingamo? Mu ku mu ononoka. Tue ku lilongesa mu Mbimbiliya cifua ca ku yoyelamo ca tonda Yehova. Ca ku muenako, ikeye ua tu leka ngueni ca pua ca cipi ku penda, ku punda, ku handeka visaki, ku linga vupangala, ku lemesa muntu ni cuma, ku vanga ikeye lika.​—1 Kolintu 5:11; 6:18; 10:14; Efeso 4:28; Kolose 3:9.

8, 9. Vati tu hasa ku tantekeya via tonda Yehova kuli yetu nga mu Mbimbiliya ka muesi lisiko lia muesa mpundu vi tua pande ku linga? Hanenu cimueso.

⁸ Vunoni ku ya Yehova ku mutima ka ca lengelele lika ha ku ononoka masiko eni houe. Muomu ka tu hanene mukana ua masiko a viose vi tua pande na vize ka tua pandele ku linga mu muono. Ngeci mukemuo, vintsimbu vimo ka tu ka uana masiko mu Mbimbiliya a ka tu muesa mpundu vi tua pande ku linga. Kaha vati honi tu ka hasa ku linga vihangula via cili? (Efeso 5:17) Yehova ua tu hakela vukuasi vukuavo mu Mbimbiliya, vitume vieni. Vitume via pua vusunga vua seho ya kama vue ku tu longesa vati Yehova ue ku muenamo viuma. Omo tu tanda Mbimbiliya, tu ka tantekeya Yehova ku pua Njambi ua muono. Tu ka lilongesa ngecize neni ua kala na cifua ce ku singaniekelamo, kaha kua kala viuma via lema nevi via zinda.​—Tandenu Visamo 97:10; Visimo 6:16-19; talenu ha Litota 1 ku ntsongo ya livulu.

⁹ Ca ku muenako, vati tue ku hangula vi tu tala ha televizau ni mu internete? Yehova ka tu lekele vi tua pande mpundu ku linga. Vunoni ua tu hana vitume vie ku tu kuasa ku linga vihangula via cili. Lelo lino, cingi ca viprograma via ku linona navio vuli, via sula na luozi na vupangala. Ku hitila mu Mbimbiliya, Yehova ua tu leka ngueni “mukua vupi no uze a lema luozi mutima ueni u mu zinda” kaha naua ‘a ka hisa vakua vupangala.’ (Visamo 11:5; VaHevelu 13:4) Vati evi vitume vi hasa ku tu kuasa ku linga vihangula via cili? Mu nima ya ku lilongesa vimo via zinda Yehova ni vimo vie ku mona ku pua via mazilo, tua pande ku vi viana.

10, 11. Vika tue ku ononokela Yehova?

¹⁰ Vika tue ku ononokela Yehova? Ka tue ku lingamo omo lia ku tina kasitiku ni visoti vie ku iza mu ku linga vihangula via ku vihia. (Ngalata 6:7) Tue ku ononoka Yehova muomu tua mu lema. Ngeci mua vanike va tonda ku vuisa visemi ndzolela, netu tua tonda ku vuisa ndzolela Tatetu ua muilu. Ka kuesi vieka vi hasa ku tu vuisa ndzolela via hiana ku tantekeya ngecize tuli na kuya Yehova Njambi ku mutima!​—Visamo 5:12; Visimo 12:2; talenu Litota 2 ku ntsongo ya livulu.

¹¹ Ka tue ku ononoka lika Yehova nga ca casi ku lingamo ni nga muahi mua ku linga. Kaha ka tue ku hangula amo masiko na vitume vi tu tava, kaha vikuavo tu vi viana. (Ndeutelonomi 12:32) Vunoni tue ku mu ononoka mu vutuntu, ngeci mua mukua visamo ua handekele ngueni: “Nji ka viukilila mu vizilika viove, Vikevio vi nji na leme.” (Visamo 119:47; Loma 6:17) Kaha tu tonda ku tambuluisa Noa, muomu ua muesele cilemo ceni kuli Yehova mu ku ononoka ku viose via mu tumine. Mbimbiliya nguayo Noa ua lingile “ngue muze muose mua mu sikile Njambi.” (Njenisisi 6:22) Nenu mu tonda Yehova a mi sangale na mezi ngeci mua aa ni?

12. Vati tu hasa ku vuisa Yehova Ndzolela?

¹² Vati Yehova ue ku ivua ku mutima nga tu mu ononoka? Tue ku “zolesa mutima” ueni. (Visimo 11:20; 27:11) Mua vusunga ku vuisa Sakatanga ua melu na mavu ndzolela ca pua civezikiso ca kama! Vunoni ke ku tu kakateya ku mu ononoka. Muomu ua tu hana vuana vua ku lihanguila viuma. Eci ca lomboloka ngecize tua zituka mu ku lihanguila via cili ni via vipi. Yehova a tonda cilemo ci tue ku mu vuila ci tu sindiye ku linga vihangula via cili linga tu yoye mu ndzolela.​—Ndeutelonomi 30:15, 16, 19, 20; talenu Litota 3 ku ntsongo ya livulu.

“MEZI A LISIKO ENI KATI A AKALU”

13, 14. Vati tua tantekeya nguetu masiko a Njambi kati a akalu? Hanenu cimueso.

¹³ Vati co nga tu mona nguetu masiko a Yehova a akalu cikuma ni ngecize ku ononoka ci tu lingisa ku livua ngue tuli mu kamenga? Mbimbiliya ya handeka ha toma nguayo: “Mezi a lisiko eni kati a akalu.” (1 Yoano 5:3) Lizi lia ciNgelengu li va langulula nguavo “a akalu?” lia lomboloka “vulemu.” Mu vinimbu vikuavo, lizi liaco va lipangesa naua mu ku imanena vizilika via vikalu ni vantu ve ku pakesa vakuavo. (Mateo 23:4; Vilinga 20:29, 30) Imo Mbimbiliya nguayo, “masiko eni ka a puile a ku lema.” (João Ferreira de Almeida.) Masiko a Yehova ka puile a ku lema ni nguetu kati a akalu cikuma ku a ononoka. Ntsimbu yose ue ku tu tuma vize vi tu hasa ku linga.

¹⁴ Ca ku muenako, a ci singaniekenu nga muli na ku kuasa kavusamba kenu ku aluka. Kaha na longekeya laza vitenga viose mu vikasa. Vimo via vilelu kaha via viasi ku vi ambata vunoni vikuavo vi lema ku vi zundula noho vantu vavali. Vuno kavusamba kenu a hasa ku mi leka mu ambate cikasa ca ku lema lika lienu ni? Houe ka lingimo. Omo lia vika? Muomu ka tondo ku mi vulumuna. Yehova ua pua ngeci muou kavusamba, ke ku tu vundila vize ka tu hasa. (Ndeutelonomi 30:11-14) Yehova a tu tantekeya vuino. “Muomu a tantekeya muvila uetu; A vuluka ngecize etu tu mpumputa.”​—Visamo 103:14.

15. Omo lia vika tu hasa ku kela na vusunga ngecize masiko a Yehova e ku tu kuasa?

¹⁵ Mosesa ua lekele vaIsaleli ngueni Yehova ua va hanene masiko “linga va kale vuino” kaha ku a ononoka ce ku va kuasele ‘ku lanesa matangua’ a miono yavo. (Ndeutelonomi 5:28-33; 6:24) Mukemuo mu a fua masiko aco na lelo lino. Viose vie ku tu tuma Yehova vie ku vezikisa muono uetu. (Tandenu Isaya 48:17.) Tatetu Yehova a tantekeya vuino-vuino vika via tu pande. (Loma 11:33) Mbimbiliya nguayo: “Njambi ikeye cilemo.” (1 Yoano 4:8) Eci ca lomboloka ngecize viose vie ku handeka Yehova na ku linga viemana ha cilemo.

16. Vati tua tantekeya ngecize tu hasa ku ononoka Yehova vutuhu ka tua tantulukile kaha tua kala mu mavu a ku vihia?

¹⁶ Ku ononoka masiko a Njambi ntsimbu yose kati ca casi. Muomu tua kala mu mavu a api kaha ali mu mavoko a Satana. Ue ku kokueya vantu ku linga vupi. (1 Yoano 5:19) Cikuavo naua tue ku pinda na ku hona ku tantuluka na visinganieka via ku henga, muomu vie ku tonda ku tu lingisa ku muesa lisino kuli Njambi. (Loma 7:21-25) Vunoni ku lema Yehova ce ku tu hana ngolo ya ku linga vize via cili. Ue ku mona kapandi ka tue ku lihakela mu ku mu ononoka, kaha ue ku tu hana sipilitu santu yeni. (1 Samuele 15:22, 23; Vilinga 5:32) Sipilitu santu ye ku tu kuasa ku kala na vifua via cili, vize vie ku tu asiuisa ku mu ononoka.​—Ngalata 5:22, 23.

17, 18. (a) Vika tu lilongesa mu livulu lino? (b) Vika tu ka simutuila mu kapitulu ka na hatako?

¹⁷ Mu livulu lino tu ka lilongesa, vati tu hasa ku yoya mu njila ya ya Yehova ku mutima. Tu ka lilongesa mua ku pangesela vitume vieni mu miono yetu. Vulukenu ngecize Yehova ke ku tu kakateya ku mu ononoka. Vunoni nga tu mu ononoka, tu ka vezika mu muono kaha tu ka kala na lulavelelo lua cili ku lutue. Kaha ca hiana viose, ku ononoka cetu kuli Njambi ci ka muesa vukama vua cilemo ci tua kala naco kuli ikeye.​—Talenu Litota 4 ku ntsongo ya livulu.

¹⁸ Yehova ua tu hana mitima linga i tu kuase ku tepesa via cili ku via vipi. Kaha nga tu longesa mitima yetu i ka tu kuasa ku niunga “mezi a lisiko eni.” Vuno mutima uka tuli na ku tumbula, kaha vati tu hasa ku u longesa? Tu talenu mu kapitulu ka na hatako.