Vintsina via Mukanda ua Viuano ua Muono Uetu Vakua Kilistu na Vipanga Vietu
6-12 YA FEVEREIRO
VUPITE VUA MU LIZI LIA NJAMBI | ISAYA 47-51
“Ku Ononoka Yehova ce ku Neha Vivezikiso”
(Isaya 48:17) Mu a li ku handeka Yehova, Nkuli yove, Mukua Ku Lela ua Isaleli ngueni: Ange nji Yehova Njambi yove, Uze a ku longesa vize vi silivila, Uze a ku tuamena mu njila ize ya ku pande.
ip-2 131 ¶18
Yehova ue ku tu Longesa omo lia Vucili Vuetu Vavene
“Halakana Masiko Ange!”
18 Kapolofeto Isaya omo Yehova ua mu hele sipilitu, ua handekele ngueni: “Mu a li ku handeka Yehova, Nkuli yove, Mukua Ku Lela ua Isaleli ngueni: Ange nji Yehova Njambi yove, Uze a ku longesa vize vi silivila, Uze a ku tuamena mu njila ize ya ku pande.” (Isaya 48:16b, 17) Aa mezi a cilemo ca Yehova a muesele ngecize cifuti ca Isaleli a ka ci patula ku Mbambilone. Muomu ikeye Nkuli yavo. (Isaya 54:5) Yehova omo lia cikeketima ua tondele vaIsaleli va hiluise vusamba vuavo neni na ku halakana ku masiko eni. Ku lemesa ca vusunga cemana ha ku ononoka vilongesa via Njambi. VaIsaleli ka va hasele ku enda mu njila ya ku viuka ku vanga noho va na va longesa ‘njila i va pandele ku endela.’
(Isaya 48:18) Nga ua tavele ku halakana masiko ange! Nga ciyulo cove ca puile ngue ndonga, Na vuviuke vuove ngue mancimpa a kalunga:
ip-2 131 ¶19
Yehova ue ku tu Longesa omo lia Vucili Vuetu Vavene
19 Yehova ua tondele vangamba veni ku lihenga ku tuyando na ku kala na muono ua cili mua handekele ngueni: “Nga ua tavele ku halakana masiko ange! Nga ciyulo cove ca puile ngue ndonga, Na vuviuke vuove ngue mancimpa a kalunga.” (Isaya 48:18) Mua vusunga, Sakatanga mukua ku hiana ngolo ua muesele cikeketima mpundu. (Ndeutelonomi 5:29; Visamo 81:13) Ca ku hona ku ya ku vundzinda, vaIsaleli ve ku hasele ku yoya mu ciyulo cize ce ku puile ngue muta ua mema u sikuluisa ndonga. (Visamo 119:165) Vilinga viavo via vuviuke nga via puile via vingi ngeci mua mancimpa a kalunga. (Amose 5:24) Mu ku linga Yehova ua hakele seho vaIsaleli, ua lisoluele kuli vakevo mu ku va lekesa na cilemo njila i va na pande ku endela. Vunoni mu ku halakana lika!
(Isaya 48:19) Mbuto yove nga ya puile ngue museke, Na vana va lizimo liove ngue tunona tuauo: Nga lizina lieni ka lia vatukile ni ku nonga ku meso ange.
snip-2 132 ¶20-21
Yehova ue ku tu Longesa omo lia Vucili Vuetu Vavene
20 Vivezikiso vika vie kuizile nga Isaleli ya alulukile ku vipi viayo? Yehova ngueni: “Mbuto yove nga ya puile ngue museke, Na vana va lizimo liove ngue tunona tuauo: Nga lizina lieni ka lia vatukile ni ku nonga ku meso ange.” (Isaya 48:19) Yehova ua vuluisile vantu via cikulaheso ceni ngecize mbuto ya Avilahama i ka lana “ngue zintangantanga zia melu, kaha naua ngue museke u li ku mukulo ua mema a kalunga.” (Njenisisi 22:17; 32:12) Vunoni, ava vana va Avilahama va muesele lisino, ngeci ka va hasele ku tambula vivezikiso via ku lipuisamo ca cikulaheso caco. Mua vusunga, mizimbu yavo ya pihile cikuma ku liya na Lisiko lia Yehova, ngeci lizina liavo lia tondekele li pue ngue cifuti ci va na mbila kuti. (Ndeutelonomi 28:45) Vutuhu ngoco, Yehova ka kele na cizango ca ku nongesa vantu veni, kaha ka tondele naua ku va mbila kuti.
21 Vitume via kala mu mizimbu eyi via pua via seho kuli vakua ku lemesa Yehova matangua ano. Yehova ikeye ua pua ndundzi ya muono, kaha a tantekeya vuino ku hiana nkala muntu vati tua pande ku pangesa muono uetu. (Visamo 36:9) Ua tu hana vitume mu ku tu tuamenena, kati ku tu vindika vize vi tu vuisa ndzolela, vunoni mu ku tu kuasa. Ngeci mukemuo, Vakua Kilistu va vusunga ve ku tonda Yehova linga a va longese. (Mika 4:2) Ku tuamenena ceni ce ku niunga lutsilielo luetu na vusamba vuetu neni, kaha ce ku tu ohiela ku ku hungumuna ca Satana. Nga tu hilula vuino ha vitume viemana ha masiko a Njambi, tu ka mona ngecize Yehova ue ku tu longesa omo lia vucili vuetu vavene. Tu ka tantakeya naua ngecize “mezi a lisiko eni kati a akalu.” Kaha ka ka tu mbila kuti.—1 Yoano 2:17; 5:3.
Ku Hinda Vupite vua mu Lutsilielo
(Isaya 49:6) Cili, ikeye ngueni, Cikeco cuma ca cindende linga u pue ngamba yange Mu ku hindula miyati ya Yakomba, Na ku hiluisa vaze va nja niunga ku Isaleli: Nji ka ku hia naua ku pua ceke ca vakua vifuti, Linga u pue vuovole vuange na haze ha lenga mavu.
w07 15/1 9 ¶8
Vimpande via Tsimana mu Livulu lia Isaya—II
49:6—Vati Mesiya ua pua “ceke ca vakua vifuti,” vutuhu ku ambulula ceni ca puile lika ku vaIsaleli? Eci ca puile ngecize omo lia viuma via lingikile mu nima ya ku-tsa ca Yesu. Mbimbiliya ya tumbuila Isaya 49:6 vandongesi veni. (Vilinga 13:46, 47) Matangua ano, Vakua Kilistu va ku vuavesa, ve ku va kuasa ku civunga ca kama ce ku lemesa hamo lika navo, vaze ve ku panga ngue “ceke ca vakua vifuti,” mu ku longesa vantu na “haze ha lenga mavu.”—Mateo 24:14; 28:19, 20.
(Isaya 50:1) Mu a li ku handeka Yehova ngueni, Mukanda ua nokuenu ua ku mu kondola, U nja mu kondola nauo, u lihi? Cipue nji na mu landesa kuli iya mukua ku nji hia makongo? Tenu, omo vipi vienu mua lilandesa, nomo vivulumuna vienu nja konduele nokuenu.
it-1 728 ¶4-5
Ku Kondola
Cimueso ca ku Kondola. Mu Visoneka evi vulo va vu pangesa ku pua cimueso. (Isa. 54:1, 5, 6; 62:1-6) Kaha cimueso caco cemanenene naua ku kondola, ni ku hiluisa mpuevo.—Yele. 3:8.
Vuangana vua Yunda va vu tambuile ngolo kaha Yelusalema va i nongesele mu muaka ua 607 T.K.K.E., kaha vantu va va tualele ku vundzinda ku Mbambilone. Mu miaka ya katete, ku hitila mu vupolofeto Yehova ua hulile vaYundeya vaze ve ku ka kele ku vundzinda ngueni: “Mukanda ua nokuenu ua ku mu kondola, U nja mu kondola nauo, u lihi?” (Isa. 50:1) ‘Naye,’ ni lukungulukilo lua cifuti cavo, va lu mbilile kuti, kati muomu Yehova ua tsihile litavasiano lieni na ku putuka vinjila via ku kondola, vunoni omo lia vipi via naye yavo mu ku luisa litavasiano lia Lisiko. Vunoni visupo via vaIsaleli va alulukile na ku vundila mu ku hiluisa vusamba vuavo na yaliavo Yehova muimbo liavo. Yehova mu ku puisamo lizina lieni, ku ku-hua ca miaka 70 ya vundzinda, mu muaka ua 537 T.K.K.E, ua hiluisile vantu veni kuimbo liavo ngue mua kulahesele.—Visa. 137:1-9; talenu VULO.
Ku Tanda Mbimbiliya
(Isaya 51:12-23) Yange, yange vene nji uze a ku ku lembezieka: Yoveyandzo amba u zuzukile muntu mukua ku tsa, Na muana muntu uze aka himpuka muila; 13 Kaha u na suvu Yehova Sakatanga uove, Uze ua zendzekele melu, kaha ua hindile mavula a mavu; Kaha ukuana ku ivua vuoma litangua liose omo vukalu vua mukua ku yandesa, Omo ikeye a liviukisila mu ku enieka? Kaha vukalu vua mukua ku yandesa vulihi? 14 Cindzinda va ka mu zitula vuasi; Kaha ka li ka tsa na ku suluka mu cipuku, Cipue mbolo yeni ka i ka hua. 15 Muomu yange nji Yehova Njambi yove, Uze a vundunuisa kalunga, ngecize mancimpa eni a lulume: Yehova ua vivunga likelio lizina lieni. 16 Kaha nji na hake mezi ange mu kanua kove, Kaha nji na ku fuika mu cimbembe ca livoko liange, Linga nji tombeke melu, Na ku hinda mavula a mavu, Na ku handeka na Siono nguange, Ove u vantu vange. 17 Hinduka, hinduka, katuka, A Yelusalema, Uze na nu ku livoko lia Yehova ku ngandza ya vutenu vueni; U na nu ku ngandza ya ku peliangelesa, na ku i manesa. 18 Ha kati ka vana veni vose va a na seme ka hesi umo mukua ku mu tuamena, Cipue ha kati ka vana vose va a na lele ka hesi umo a mu kuate ku livoko. 19 Viuma evi vivali vi na ku uila; Iya a ka linienga ove? Ku-pihilila na ku-nonga, na ndzala na mukuale; Nji ka ku lembezieka vati? 20 Vana vove va na lezumuka, Va na kosa ku ntsina ya matapalo ose, Ngue kasitu mu vuanda; Va na sulu na vutenu vua Yehova, Ku-handekela ca Njambi yove. 21 Ngoco vene halakana eci vuovuno, ove mukua kayando, Na mukua ku penda, vunoni kati na viniu: 22 Mu a li ku handeka Sukuluove Yehova, Na Njambi yove uze a hakula lizi lia vantu veni, ngueni, Tala nji na fumisa ku livoko liove ngandza ya ku peliangelesa, Ngandza vene ya vutenu vuange; ka u ka i nua naua: 23 Kaha nji ka i haka mu livoko lia vaze va ku ku yandesa, Vaze va na handeka na muono uove nguavo, Kotama, linga tu piteko; Kaha u na langeka muongo uove ngue livu, Ngue tapalo kuli vaze va pitako.
13-19 YA FEVEREIRO
VUPITE VUA MU LIZI LIA NJAMBI | ISAYA 52-57
“Kilistu ua Yandele Omo Lietu”
(Isaya 53:3-5) Va mu yenguile, na vantu va mu vianene; Yala mukua vusiua, ua muene ku vavala: Kaha va mu yenguile uze i ve ku vandesela cihanga cavo; Ka tua mu hakelele seho. 4 Mua vusunga na ambata mavezi etu, Na ku lituika masiua etu; Kasi tua mu yonguele mukua ku vetua, Ua ku vetua kuli Njambi, mukua kayando. 5 Vunoni va mu tuile mbandu omo vivulumuna vietu, Va mu havuile mu vipi vietu; Va mu hakele kasitiku linga etu tu mone ciyulo Kaha na mikiki yeni tu ku kanguka.
w09 15/1 26 ¶3-5
Ngamba ya Yehova—“Va mu Tuile Mbandu Omo Vivulumuna Vietu”
“Va mu Yenguile” Kaha ka va mu “Hakelele Seho”
3 Tandenu Isaya 53:3. Aci singaniekenu vi ca lombolokele kuli Muana umo lika ua Njambi ku seza ndzolela ya ku pangela ku mukulo ua Ise na ku iza ha mavu mu ku hana muono ueni ku pua cikombelo mu ku patula vantu ku vupi na ku ku-tsa! (Filp. 2:5-8) Cikombelo ceni ce ku puisilemo ku ecela ku vipi ca vusunga, muomu vikombelo via tusitu ku ntsimbu ya Lisiko lia Mosesa via puile lika vimueso via ku lutue. (VaHe. 10:1-4) Mua vusunga, vantu va pandele tele ku mu tambula vuino na ku mu singimika, cikumakuma vaYundeya vaze va kele na ku lavelela Mesiya u va kulahesele. (Yoano 6:14) Vunoni Kilistu va mu “yenguile” ku vaYundeya, kaha ka va mu “hakelele seho,” ngue mua vi polofetelele Isaya. Kapostolo Yoano ua sonekele ngueni: “Uezile ku vieni kaha veni ka va mu tambuile.” (Yoano 1:11) Kapostolo Petulu ua lekele vaYundeya ngueni: “Njambi ya vakukuetu, ikeye na hake Ngamba yeni Yesu ku vukama; uze i mua pandekele, kaha i mua vianene ku meso a Pilato, omo ikeye na mangele ku mu ecela.”—Vilinga 3:13, 14.
4 Isaya ua polofetele naua ngecize Yesu ua “muene ku vavala.” Mu ku ambulula ceni, Yesu vintsimbu vimo ua honene, vunoni na hamo hahi ha tu uana ngecize ua vavalele. (Yoano 4:6) Vutuhu ngoco, ua muene mavezi a vaze va ambuluilile. Ua va vuilile cikeketima na ku kanguisa vantu vavengi. (Mako 1:32-34) Yesu ua puisilemo vupolofeto vua handeka nguavuo: “Mua vusunga na ambata mavezi etu, Na ku lituika masiua etu.”—Isa. 53:4a; Mat. 8:16, 17.
Ua Puile Ngue ua ku “Vetua Kuli Njambi”
5 Tandenu Isaya 53:4b. Cingi ca vantu va ku matangua a Yesu ka vevusisile vusunga vuka ua yandelele na ku-tsa. Va tsilielele ngecize Njambi ua kele na ku mu hana kasitiku, ngue ali na ku mu veta vuvezi vua ku pihia cikuma. (Mat. 27:38-44) VaYundeya va vangeyele Yesu ngecize mukua ku-sahula. (Mako 14:61-64; Yoano 10:33) Mua vusunga, Yesu ka puile mukua vupi, cipue mukua ku-sahula. Vunoni omo lia ku lema cikuma Ise, vutumbe vua ku mu tsiha na ku mu vangeya, citava vua vuezele ku tuyando tueni mu ku pua Ngamba ya Yehova. Vunoni cipue ngoco, ua lihanene mu ku linga cizango ca Yehova.
(Isaya 53:7, 8) Va mu pakesele, Kasi omo va mu yandesele ka asamene kanua keni; Ngue muana mpanga omo va mu tuala mu ku mu tsiha, Na ngue mpanga a holoka kulu ku meso a vakua ku mu teula, Mukemuo ikeye ka asamene kanua keni. 8 Ua nongele ha kayando na cihiso; Nomo vakua lizimo lieni, Iya ha kati kavo ua yonguele ngecize va mu vatuisile ku cifuti ca vakua muono omo civulumuna ca vantu vange, Kuli vakevo kua pandamene mukiki.
w09 15/1 27 ¶10
Ngamba ya Yehova—“Va mu Tuile Mbandu Omo Vivulumuna Vietu”
‘Va mu Nehele Ngue Muana Mpanga Omo va mu Tuala mu ku mu Tsiha’
10 Tandenu Isaya 53:7, 8. Yoano Mukua ku Mbatiza omo ua muene Yesu ali na ku mu suena, ua handekele ngueni: “Talenu Muana Mpanga ua Njambi, mukua ku ambata vupi vua vakua mavu!” (Yoano 1:29) Mu ku handeka via Yesu mu ku pua ngue Muana Mpanga, Yoano halumo ua vulukile mezi a Isaya: ‘Va mu nehele ngue muana mpanga omo va mu tuala mu ku mu tsiha.’ (Isa. 53:7) “Ua muaniene muono ueni mu ku tsa,” ngue mua vi polofetele Isaya. (Isa. 53:12) Vunoni ca seho, ku vutsiki vua sikile Mulalelo ua ku vuluka ku-tsa ceni, ua hele ngandza ya viniu ku vapostolo 11 va lukakatela na ku handeka ngueni: “Muomu eyi maninga ange a litavasiano lia liha, a ku muaniena va vengi, ku vecela ku milonga yavo.”—Mat. 26:28.
(Isaya 53:11, 12) A ka mona via ku kayando ka muono ueni, kaha a ka kuta: Mu ku litantekeya ngamba yange ua ku viuka a ka viukisa va vengi; Kaha a ka ambata vipi viavo. 12 Ngoco vene a ka mu pangela vieni hamo na vakua vukama, Kaha a ka lipangela vize via ku pupa hamo na vakua zindzili; Muomu ikeye ua muaniene muono ueni mu ku tsa, Kaha va mu tandele hamo na vakua ku vulumuna: Hanga ua ambatele vupi vua va vengi, Kaha ua hakuilile vakua ku vulumuna.
w09 15/1 28 ¶13
Ngamba ya Yehova—“Va mu Tuile Mbandu Omo Vivulumuna Vietu”
Ngamba a ka “Viukisa va Vengi”
13 Tandenu Isaya 53:11, 12. Kuli Ngamba yeni ua ku hangula, Yehova ua handekele ngueni: “Ngamba yange ua ku viuka a ka viukisa va vengi.” Mu njila ika? Ku ntsongo ya cinimbu 12 ci tu kuasa ku uana cikumbululo, nguaco: “Kaha ua hakuilile [ikeye Ngamba] vakua ku vulumuna.” Vana vaAndama vose va semuka na vupi, “vakua ku vulumuna,” kaha ve ku tambula “fueto ya vupi,” ikeyo ku-tsa. (Loma 5:12; 6:23) Ngeci ca tondeka ku muntu mukua vupi ku lihamba na Yehova. Kapitulu 53 ka vupolofeto vua Isaya ka lombolola vuino vati Yesu ua ‘kovele’ ha kati, omo lia vantu vakua vupi, mu ku handeka ngecize: “Va mu hakele kasitiku linga etu tu mone ciyulo Kaha na mikiki yeni tu ku kanguka.”—Isa. 53:5.
Ku Hinda Vupite vua mu Lutsilielo
(Isaya 54:1) Imba, A ntsimpi, yove uze ka ua semene; Sangumuka ku imba, na ku tambeka cikuma, Ove ka ua vuile musongo ua muana: Muomu vana vo uze ua payele va na lana mu ku hiana vana Vo uze ua sombokele, ngueni Yehova.
w06 15/3 11 ¶2
“Cisimo” ca Kala na Seho Kuli Etu
Iya uemanene “mpuevo ua muana kacisemua” Sala na muaneni Isake ni? Paulu ua muesele ngecize Sala, mpuevo ua “ntsimpi,” ua puile cimueso ca mpuevo ya Njambi, ni nguetu mutamba ua muilu ua lukungulukilo lueni. Ou mpuevo uaco ua puile ntsimpi tele Yesu kanda eze, kaha ka kele na “vana” va ku vuavesa na sipilitu ha mavu. (Ngalata 4:27; Isaya 54:1-6) Vunoni ha Pentekosta ya muaka ua 33 T.K.N., sipilitu santu ya sulukile ha mbunga ya vamala na vampuevo vaze va semukile naua ngue vana vou mpuevo ua muilu. Vana va semukile mu lukungulukilo olu va va puisile ngue vana va Njambi na ku pua vasuana hamo na Yesu Kilistu mu litavasiano lia liha. (Loma 8:15-17) Umo ua vana vaco, ua puile kapostolo Paulu, uze ua sonekele ngueni: “Vunoni Yelusalema ize i li muilu ikeyo muana kacisemua, ikeyo nana yetu.”—Ngalata 4:26.
(Isaya 57:15) Muomu mu a li ku handeka Uze mukua ku tuntuka na ku zunduka uze a tumama ku miaka yose, Lizina lieni Ua Lela: Nja tumama ku muhela uze ua ku tuntuka ua ku lela, No uze naua a li na cimbembesi ca ku lipokuesa na ku konkama, Mu ku hindula cimbembesi ca mukua ku konkama, Na mu ku hindula mutima ua mukua ku lipokuesa.
w05 15/10 26 ¶3
Muesenu ku Konkama ca Vusunga
Lungano lua ku Hiana mu ku Konkama
3 Yehova ua hiana vukama na ku tuntuka, kaha meso eni “a hita oku noku hose ha mavu, mu ku kuasa na zindzili zieni vaze va li na mutima ua ku tantuluka kuli ikeye.” (2 Mizimbu 16:9) Vika Yehova ue ku linga nga na uana vakua ku mu lemesa va ku lipokuesa va vavala mu cimbembesi omo lia viseko via vingi? Ue ku “tumama” navo ku hitila mu sipilitu santu yeni “mu ku hindula mutima ua mukua ku lipokuesa.” (Isaya 57:15) Ngeci mukemuo, vakua ku mu lemesa ve ku hindula ve ku mu pangelele na ndzolela. Mua vusunga Njambi ua pua ua ku konkama!
Ku Tanda Mbimbiliya
(Isaya 57:1-11) Mukua vuviuke a nonga, Kaha na umo uahi a ci haka ku mutima; Na vantu vakua cikeketima va va fumisa, Kaha na umo uahi a singanieka ngecize va na fumisa mukua vuviuke Omo vipi vi kezako. 2 Ikeye a kovela mu ciyulo; Va huima mu mihela yavo, Uose enda mu vuoloke vueni. 3 Vunoni suenenu kuno, Enu vana va cimbanda, Mbuto ya mukua vupangala na cikoyi. 4 Mu li ku tsopa iya? Iya i mu ku leniena kanua, na ku mu tuhuila lilimi? Kati enu mu vana va civulumuna, Mbuto ya makuli, 5 Enu vakua ku lisuameka ha kati ka mitelevinte, Muintsi lia muti uose ua vuvusu; Mu tsiha vanike mu vimbongo, Muintsi lia miandzi ya mavue? 6 Ha kati ka mavue a ku lamba mu cimbongo ha kala mutamba uove; Akeo, akeo mutamba uove; Ku akeo vene u na tilila cikombelo ca ku nuina, U na kombeleya cikombeleyo. Ange nji ka lihamba nove omo viuma evi ni? 7 Ha muncinda ua ku tuntuka na ku zunduka u na hake muhela uove; Kuze ku ua londelele naua mu ku kombeleya cikombeleyo. 8 Kaha mu nima ya mapito na vivuliko u na hake civuluiso cove: Muomu u na lizulila ueka kati yange, kaha u na londaho; U na kamesa muhela uove, na ku litavasiana litavasiano navo: Ua lemene muhela uavo kuze ku ua u muene. 9 Kaha ua ile kuli muangana na mazi, Na ku lanesa vihemba viove via ku nika vuino, Kaha ua tumine miluua vove ku laako, Kaha ua likehesele na ku Vukalo vua Vatsi. 10 Ua katalele omo vulahe vua njila yove; Hanga ka ua handekele nguove, Ca ngoco: Ua uanene ha ku likolesela ku ngolo yove, Ngoco vene ka ua lezumukile. 11 Kaha iya i u na zuzukila na ku mu vuila vuoma, Amba u handeke makuli, Na ku nji vuluka cahi, Cipue ku ci haka ku mutima uove? Kati ange nji na holoka kulu ntunda ya kama, Nove ku nji zuzukila cahi?
20-26 YA FEVEREIRO
VUPITE VUA MU LIZI LIA NJAMBI | ISAYA 58-62
‘Zimbulenu muaka ua Kavumbi ka Yehova’
(Isaya 61:1, 2) Sipilitu ua Sukulu Yehova ua kala hali ange; Muomu Yehova na nji vuavesa mu ku ambulula zimpande zia cili kuli vakua ku konkama; Na nji tumu mu ku kuta vakua ku vatuka mutima, Ku ambulula ku-ecela ca vindzinda, Na ku-sokoloka ca kamenga kuli vaze va pandeka; 2 Ku zimbula muaka ua kavumbi ka Yehova, Na litangua lia ku linguila lia Njambi yetu; Ku lembezieka vose va linienga na vusiua;
ip-2 322 ¶4
Vuviuke vu ka Tuikilila mu Siono
“Muaka ua Kavumbi”
4 Isaya ua sonekele ngueni: “Sipilitu ua Sukulu Yehova ua kala hali ange; Muomu Yehova na nji vuavesa mu ku ambulula zimpande zia cili kuli vakua ku konkama; Na nji tumu mu ku kuta vakua ku vatuka mutima, Ku ambulula ku-ecela ca vindzinda, Na ku-sokoloka ca kamenga kuli vaze va pandeka.” (Isaya 61:1, 2) Iya umo i va tumine ku ambulula muzimbu ua cili? Ha katete ua puile vene Isaya, uze i va huiminine kuli Njambi ku soneka muzimbu ua cili ku vindzinda va va tualele ku Mbambilone. Vunoni Yesu ua tumbuile ku lipuisamo ca seho mua litumbuilile mezi a Isaya eni ivene. (Luka 4:16-21) Mua vusunga, Yesu ikeye va tumine linga a ku ambulule muziimbu ua cili kuli vakua ku konkama, kaha linga vi lipuisemo va mu vuavesele na sipilitu santu ha ku mu mbatiza.—Mateo 3:16, 17.
(Isaya 61:3, 4) Ku va tumbuila vaze va linienga na vusiua mu Siono, Ku va hia ntsala ku sintsila muto, Mazi a ndzolela ku sintsila ku linienga, Vuzalo vua visangala ku sintsila cimbembesi ca ku lemuua; Linga va va tumbule miti ya vuviuke, Ku-tombeka ca Yehova, mangana va mu zumbangeye. 4 Kaha va ka tungisa zingundu zia laza, Va ka hindila vize via pihililile, Kaha va ka tungulula membo a ku sihuka, Vize via pihilila ku mazimo a engi.
ip-2 326-327 ¶13-15
Vuviuke vu ka Tuikilila mu Siono
13 Tunde ha Pentekosta ya 33 T.K.N. Njambi ua putukile ku tombeka miti ya kama ya vuviuke—Vakua Kilistu va ku vuavesa va ku simpa—mu pua cifuti ceni ca ciha mu lutsilielo, “vaIsaleli va Njambi.” (Ngalata 6:16) Mu ku hita ca visekulu, eyi “miti” ya pua numelu ya 144.000, ili na ku ima mihako ya vuviuke mu ku hana vumpahu kuli Yehova Njambi. (Ku-Solola 14:3) “Miti” ya ku manusuila ya putukile ku tuikilila mu miaka ya yingi tunde mu 1919, omo Yehova ua hinduile vamo va vaIsaleli ya Njambi va lisaleleho vaze va holele kavundende mu lutsilielo. Mu ku linga Yehova ue ku va tukumuinina mema a engi a mu lutsilielo, nemisa musenge ua vuviuke muze mua kala miti ye ku ima mihako ya cili. —Isaya 27:6.
14 Mu ku lekesa vipanga via “miti” eyi, Isaya ua tualeleleho ngueni: “Kaha va ka tungisa zingundu zia laza, Va ka hindula vize via pihililile, Kaha va ka tungulula membo a ku sihuka, Vize via pihilila ku mazimo a engi.” (Isaya 61:4) Ku liya na lisiko lia Silu Muangana ua Pelesiya, vaYundeya va lutsilelo vaze va hilukile ku tunda mu Mbambilone va tunguiluile Yelusalema na tembele, vize via pihile cikuma miaka ya yingi. Vutumbe vua ku vi tungulula, navuo vua puile citantekeyeso ca viuma vie ku solokele mu miaka ya yingi mu nima ya muaka ua 33 T.K.N. na 1919.
15 Mu muaka ua 33 T.K.N., vandongesi va Yesu va vuile vusiua vua kama omo va mu kuatele, ku mu yandesa na ku mu tsiha. (Mateo 26:31) Vunoni vusiua vuavo vua alulukile omo ua lisoluele kuli vakevo mu nima ya ku sanguka ceni. Kaha omo ua va muanienene sipilitu santu, ntsimbu yose va kele mu cipanga ca ku ambulula muzimbu ua cili, “mu Yelusalema, na mu Yundeya yose na Samaliya, na ku mutamba uze ha lenga mavu.” (Vilinga 1:8) Va putukile ku hiluisa ku lemesa ca ku lela. Mu njila eyi vene, tunde mu muaka ua 1919 ku tuala ku lutue, Yesu Kilistu ua lingisa vamuanaye va ku vuavesa va supako linga va tungulule ‘vihela vize via pihile ku mazimo a engi.’ Mu visekulu via vingi vakulantu va malombelo va na honoua ku longesa mana a Yehova, mu ku a hingisa na vilika vi va tenda vantu na vilongesa vize ka via puile via mu visoneka. Vakua Kilistu va ku vuavesa va lelesa vikungulukilo viavo ku vilika via vulombelo vua makuli linga va hiluise ku lemesa ca vusunga ci hasa ku tualelelaho. Kaha va putukile cipanga ce ku hana vukaleho vua kama vuze vakua mavu ka va tantekeyele.—Mako 13:10.
(Isaya 61:5, 6) Na vangendzi va ka mana na ku lisa matanga enu, Na vangendzi va ka pua veni na vakua ku viukisa miti yeni ya viniu. 6 Vunoni enu va ka mi luka vasasendote va Yehova; Va ka mi tumbula vangamba va Njambi yetu: Mu ku lia vupite vua vakua vifuti, Na mu vumpahu vuavo mu ka lipamba.
w12 15/12 25 ¶5-6
“Vangendzi” va Likuata Kumo mu ku Lemesa ca Vusunga
5 Cikuavo naua, vamo halumo va hasa ku singanieka ha kapitulu 61 ka livulu lia Isaya, kaze ka kala na vupolofeto vuli na ku lipuisamo mu cikungulukilo ca Vakua Kilistu. Cinimbu 6 ca kapitulu kaco ca tumbula vaze va ka panga ngue “vasasendote va Yehova.” Kaha cinimbu 5 ca tumbula “vangendzi” va ka pangela hamo na vaze va ka pua “vasasendote.” Vati tu hasa ku ivuisisa vuino ovu vupolofeto?
6 Tu nevuisisa ngecize ava “vasasendote va Yehova” va pua Vakua Kilsitu va ku vuavesa vali mu mutamba ua “cisangukilo ca ku livanga,” vaze va ka pua “vasasendote va Njambi na va Kilistu, kaha va ka sika hamo neni likulukazi lia miaka.” (Ku-So. 20:6) Mu ku vuezako, kua kala Vakua Kilsitu va lukakatela va vengi vaze vali na lulavelelo lua ku yoyela ha mavu. Vutuhu ve ku pangela hamo na vaze va ka ya muilu, mu cifua ca cimueso navo va pua vene vangendzi. Ve ku kuasa na ndzolela na ku panga hamo na “vasasendote va Yehova,” mu ku panga ngue vene “vandimi” na “vakua ku viukisa miti yeni ya viniu.” Ve ku kuasa mu ku hakuila mihako ya mu lutsilielo ku vumpahu vua Njambi, ku niunga na kungulula vantu. Mua vusunga, Vakua Kilistu va ku vuavesa na “vampanga veka” ve ku endela na ku meneka vakua vusunga vaze vali na cizango ca ku pangela Njambi miaka yose.—Yoano 10:16.
Ku Hinda Vupite vua mu Lutsilielo
(Isaya 60:17) Mu ku sintsila nkengelezi nji ka neha olu, Na mu ku sintsila vutale nji ka neha palata, Na mu ku sintsila viti nkengelezi, Na mu ku sintsila mavue vutale. Misipayi vove naua nji ka va puisa ciyulo, Na vakua ku ku pangesa vuviuke.
w15 15/7 9-10 ¶14-17
Pangenu na Ngolo mu ku Vueza Ciyulo ce ku Hana Njambi ku Vantu Veni
14 Mu miaka ya yingi i na hiti, vamuanetu va tusinakazi vali ha kati ketu va na limuena mpundu viuma vi na aluluka mu lukungulukilo vize vi na viukisa cikuma mutamba ua ha mavu ua lukungulukilo lua Yehova. Halumo va hasa ku vuluka ngecize ku ntsimbu ize vikungulukilo via kele lika na ngamba ua cikungulukilo, ca ku hona civunga ca vakuluntu, vifuti via kele na ngamba umo lika ua mbetele, ca ku hona Civunga ca Vakua ku Tuamenena Mbetele, kaha naua ntuamenena ua Watch Tower Society ua puile umo lika mu ku tuamenena, ca ku hona Civunga ca Vantuamena ca Vakaleho va Yehova. Vutuhu ava vamuanetu vose va kele na vakua ku va kuasa va lutsilielo, vunoni muntu umo lika ua kele na ku linga vutumbe mu cikungulukilo, ku mbetele na ku cikota ca kama ca mavu ose. Mu miaka ya 1970, va aluluile viuma mu ku hana citeli ku civunga ca vakuluntu ca ku hona muntu umo lika.
15 Vuno eci ku aluluka ca viuma ca kele na vukuasi ni? Eyo, ca sungamene. Omo lia vika? Muomu ku aluluka ca viuma cemanene ha ku livuezelela ca mana ku liya na Visoneka. Ca ku hona ku uila mu visinganieka via muntu umo lika, Yehova ua hana “vuana kuli vantu” vose vaze kala na vifua via cili mu ku kuasa lukungulukilo.—Efe. 4:8; Visi. 24:6.
16 Aci singaniekenu ha viuma vi na aluluka vuovuno, ngeci mua cifua ca mikanda yetu, mizimbu yaco na vinjila via ku i hanenamo. Mua vusunga ca pua ku vezika ca kama ku hana mikanda na cifua mavulu etu cize ce ku koka cizango ca vantu mu ku ambulula! Kaha nga tu pangesa tekinologia mu ku ambulula vusunga ku hitila mu saiti jw.org, tu ka tambuluisa seho ye ku muesa Yehova ku vantu mu ku va hana vukuasi kuose ku vali, vaze va tondeka ku va tuamenena mu cifua ci va tonda.
17 Tu puenu na ku tala ha ku aluluka ca viuma vize via tu lingisa ku kala na ntsimbu ya ku Lemesa mu Vusoko ni ya ku lilongesa mu vulika. Kaha naua tu santsela ku viuma vi na alukuka mu viprograma via viuano vietu via limbo na via muhato. Nkala muaka vie ku tovala ku hiana laza! Tue ku viukilia cikuma omo lia vilongesa vi tue ku tambula ku hitila mu visikola vietu via teoklasi. Mua vusunga, tua mona mpundu livoko lia Yehova vati lili na ku kuasa mu ku aluluka ca viuma. Ntsimbu yose ali na ku panga mu ku vuahesa lukungulukilo lueni na ku vueza ciyulo ce ku hana ku vantu veni ci tuli naco vuovuno!
(Isaya 61:8, 9) Muomu yange, Yehova, nji lema vuoloke, Nji zinda vuizi hamo na vupi; Kaha nji ka va hia fueto yavo mu vusunga, Kaha nji ka litavasiana litavasiano lia ku miaka yose hamo navo. 9 Na mbuto yavo i ka tsimana ha kati ka vakua vifuti, Na vana vavo ha kati ka vantu: Vose va ku va mona va ka va tava, Nguavo vakevo mbuto ize i a na vezikisa Yehova.
w07 15/1 11 ¶5
Vimpande via Tsimana mu Livulu lia Isaya—II
Vihula via Mbimbiliya vi va Kumbulula:
61:8, 9—Vika via pua “litavasiano lia ku miaka yose,” kaha veya va pua “mbuto”? Litavasiano lia miaka yose lia pua litavasiano lia liha lia lingile Yehova ku Vakua Kilistu va ku vuavesa. “Mbuto” ya pua “vampanga veka”—ni nguetu makulukazi a vantu ve ku tava muzimbu ua Vakua Kilistu va ku vuavesa.—Yoano 10:16.
Ku Tanda Mbimbiliya
(Isaya 62:1-12) Omo Siono ka nji ka holoka, Nomo Yelusalema ka nji ka huima, Ku vanga vuviuke vueni vu tuhukeko ngue ku-viazima, Na vuovoke vueni ngue ndeya ya ku suama. 2 Kaha vifuti vi ka mona vuviuke vuove, Na vamiangana vose vumpahu vuove; Kaha va ka ku luka lizina lia liha, Li ka ku tumbula kanua ka Yehova. 3 Ove naua u ka pua cilongo ca senga mu livoko lia Yehova, Na ntsala ya vuangana mu livoko lia Njambi yove. 4 Ka va ka ku luka naua Ua Ku Seza; Cipue cifuti cove ka va ka nji tumbula naua Ca Ngundu: Vunoni va ka ku luka Hefeziva, Na cifuti cove Mbiula; Muomu Yehova a viukilila muli ove, Na cifuti cove ci ka somboka. 5 Muomu ngue omo mukuendze a ambata muana mpuevo, Mukemuo vana vove va ka ku ambata; Na ngue ivene ntsombolua a viukilila ntsombolua, Mukemuo Njambi yove a ka ku viukilila. 6 Nji na hake vasendinela ha vivumbe viove, A Yelusalema; Ka va ka holoka ku miaka yose cipue mutana cipue vutsiki: Enu vakua ku vuluisa Yehova, kati mu huime, 7 Kaha kati mu mu tave ku huima, Ku vanga a kuatesa, Noho a puisa Yelusalema cisangala ha mavu. 8 Yehova na lisingi na livoko lieni lia cilio, na livoko lia ngolo yeni, ngueni, Mua vusunga ka nji ka ku hia naua mbuto yove mu ku pua via-ku-lia via vitozi vove; Na vangendzi ka va ka nua viniu viove via viha, vi u na va pangela: 9 Vunoni vaze va na i ungulula va ka i lia, na ku sangala Yehova; Na vaze va na i tie va ka i nua mu mapela a ndzivo yange ya ku lela. 10 Tuhukenu, tuhukenu ku zimbelo; Viukisenu njila ya vantu; Vumbenu, vumbenu tapalo; Fumisenu mavue; Zundulenu pandelo ku vantu. 11 Tenu, Yehova na ambulula na haze ha lenga mavu ngueni, Lekenu muana ua mpuevo ua Siono nguenu, Tala, vuovoke vuove vu li ku iza; Tala, cilunguiso ceni ci li hamo neni, Na fueto yeni ku lutue lueni. 12 Kaha va ka va luka, Vantu va ku lela, Vaze va a na kula Yehova: Kaha va ka ku tumbula Ua ku tonda, Limbo ka va li sile ngoco.
27 YA FEVEREIRO–5 YA MARÇO
VUPITE VUA MU LIZI LIA NJAMBI | ISAYA 63-66
“Melu a Aha na Mavu a Aha vi ka Neha Ndzolela ya Kama”
(Isaya 65:17) Muomu, tenu, nji tanga melu a aha na mavu a aha; Na vize via laza ka va ka vi vuluka, Cipue ku heta ku visinganieka.
ip-2 383 ¶23
“Zolelenu na ku Viukilila ku Miaka Yose mu Cize ci Nji ku Tanga”
23 Mukanda ua Ku-Solola ua lombolola vimona via kapostolo Yoano ua muene kuiza ca litangua lia Yehova, mu ku nongesa ano mavu. Mu nima yaco, Satana va ka mu haka mu cina ka cesi na masima. (Ku-Solola 19:11–20:3) Mu nima yevi, Yoano ua hilukilile mezi a vupolofeto vua Isaya, mua sonekele ngueni: “Nja muene lilu lia liha na mavu a aha.” Kaha mu vinimbu via ku hatako via cimona eci ca ku komouesa via handeka via ntsimbu ya ka alulula Yehova Njambi viuma ha mavu ano ku pua a cili. (Ku-Solola 21:1, 3-5) Mua vusunga, cikulaheso ca vupolofeto vua Isaya ca “melu a aha na mavu a aha” ci ka lipuisamo mu cifua ca ku komouesa mu mavu aha a Njambi! Mu ku sika ca nguvulu ya iha ya muilu, mu mavu a aha mu ka kala ciyulo ca mu lutsilielo na ku vantu. Mua vusunga, ci tu lembezieka ku tantekeya ngecize “vize via laza [mavezi, tuyando na visoti via vingi vi ve ku lua navio vantu] ka va ka vi vuluka. Cipue ku heta ku visinganieka.” Viose vi tu ka hasa ku vuluka ku ntsimbu ize ka vi ka tu vavalesa ku mutima, ngeci via ku ntsimbu ino mu vili na ku vavalesa va vengi.
(Isaya 65:18, 19) Vunoni zolelenu na ku viukilila ku miaka yose mu cize ci nji ku tanga; Muomu, tenu, nji tanga Yelusalema ndzolela, Na vantu veni ku-viukilila. 19 Kaha ange nji ka viukilila mu Yelusalema, Na ku zolela muli vantu vange; Kaha muli ikeye ka va kevua naua lizi lia ku lila Na lizi lia ku linienga.
ip-2 384 ¶25
“Zolelenu na ku Viukilila ku Miaka Yose mu Cize ci Nji ku Tanga”
25 Na lelo lino naua, Yehova na lingisa Yelusalema ku pua ya “ndzolela.” Mu njila ika? Ngue mu tu na muene, melu a aha a putukile mu muaka ua 1914 a vuezako 144,000 vaze va ka sika hamo na Yesu mu nguvulu ya muilu. Ovu vupolofeto va vu lombolola ku pua ngue “Yelusalema ya Iha.” (Ku-Solola 21:2) Eyi ya likuata na Yelusalema ya tumbuile Njambi mua handekele ngueni: “Nji tanga Yelusalema ndzolela, Na vantu veni ku-viukilila.” Njambi a ka pangesa Yelusalema ya Iha mu ku muaniena vivezikiso via vingi ku vantu vakua ku ononoka. Na kumo kuahi ku tu kevua vantu va lila, muomu Yehova a ka puisamo “vizango via ku mitima [yetu].”—Visamo 37:3, 4.
(Isaya 65:21-23) Kaha va ka tunga zindzivo, na ku kalamo; kaha va ka tombeka vitungu via viniu na ku lia vusuka vuavio. 22 Ka va ka tunga, na mukuavo ku kalamo; ka va ka tombeka na mukuavo ku liako; muomu ngue matangua a muti mu a ka fua matangua a vantu vange, Na vaze va nji na hangula va ka viukilila vipanga via mavoko avo ntsimbu ya kama. 23 Ka va ka panga ngoco, Cipue ku sulumuina via ku zuzuisa; Muomu vakevo mbuto ya vaze va a na vezikisa Yehova, Na vana vavo hamo navo.
w12 15/9 9 ¶4-5
Ciyulo mu Likulukazi lia Miaka—Na ku ka Tualelelaho!
‘VA KA TUNGA VINDZIVO NA KU TOMBEKA VITUNGU VIA VINIU’
4 Iya ka tondo ku kala na ndzivo yeni vavene, cihela ca hasa ku yoyela mua cili na vusoko vueni ca ku hona vusonde? Mua vusunga, mu mavu ano ku kala na ndzivo ya cili ca pua ca cikalu. Vantu ve ku va lundika mu vimbonge via lana cikuma vantu. Va vengi ve ku yoyela ku vihela via mazilo via ku vimbonge via kama na mu mapapela. Kaha ku kala na ndzivo yavo vavene ca pua cilota ca ngoco kuli vakevo.
5 Mu ku sika ca Vuangana, cizango ca vantu ca ku kala na vindzivo viavo ci ka lipuisamo, muomu va ci polofetele laza ku hitila muli kapolofeto Isaya ngecize: “Va ka tunga zindzivo, na ku kalamo; kaha va ka tombeka vitungu via viniu na ku lia vusuka vuavio.” (Isa. 65:21) Cikulaheso ca ku kala na vindzivo viavo vavene kati cikeco lika ci va lavelela vantu. Muomu lelo lino, vamo vali laza na vindzivo viavo vavene via cili kaha via kama. Vunoni ntsimbu yose ve ku lisosomua ngecize va hasa ku va tambula ndzivo omo lia makongo, ni ku va tambulavio ku ndzili—ni halumo—ku puzuka. Vunoni mu ku sika ca vuangana viuma vi ka fua mueka! Kapolofeto Mika ua sonekele ngueni: “Va ka tumama muntu ku muntu muintsi lia muti ueni ua viniu, na muintsi lia mukuyu ueni; kaha na umo uahi a ka va vuisa vuoma.”—Mika 4:4
Ku Hinda Vupite vua mu Lutsilielo
(Isaya 63:5) Kaha nja talele, kaha kua kele umosi mu ku kuasa; Nange nja komokele omo ka keleko umosi ua ku kuatesa: Ngoco vene livoko liange ivene lia nji nehelele vuovole; Na vutenu vuange vua nji kuatesele.
w07 15/1 11 ¶6
Vimpande via Tsimana mu Livulu lia Isaya—II
63:5—Vati vutenu vua Njambi vue ku mu kuatesa? Njambi ue ku hasa ku pokuesa vutenu vueni—ni nguetu ku niengua ceni ca vuviuke. Kaha vutenu vuaco vue ku mu kuatesa ku muesa vuviuke mu ku sompela ceni.
(Isaya 64:8) Vunoni vuovuno, A Yehova, u Tatetu; Etu tu vuma, nove ntsongi; Netu vose tu cipanga ca livoko liove.
w13 15/6 25 ¶3-5
Tavesenu Yehova a mi Munge
VATI NTSONGI UE KU PANGESA MPOKO YA KALA NAYO?
3 Mu ku lombolola mpoko ya kala nayo Yehova ha vantu na vifuti mu cifua ca cimueso, Isaya 64:8 nguauo: “A Yehova, u Tatetu; Etu tu vuma, nove ntsongi; Netu vose tu cipanga ca livoko liove.” Ntsongi ua kala na mpoko ha vuma mu ku vu panga cifua ca citenga ca tonda. Kaha vuma ka vuesi na mpoko ha vukevuo vavene. Mukemuo vene mu ca fua ku vantu na Njambi. Vantu ka vesi na mpoko ya ku lizunga na Njambi ngeci mua vuma mu mavoko a ntsongi mu ku vu panga cimo cifua.—Tandenu Yelemiya 18:1-6.
4 Ku Isaleli ya ku laza, Yehova ua muesele vunongo vueni mu ku linga cipanga ce ku linga ntsongi ku vuma. Vunoni ha kala ku litepa ca kama cikuma. Ntsongi a hasa ku panga citenga ca cifua cose ca tonda ha vuma. Vuno Yehova ue ku munga vantu mu ku puisa vamo va cili, kaha vakuavo co va ku pihia ni? Mbimbiliya nguayo, houe. Yehova ua hana vantu vuana vua seho ya kama—vuana vua ku lihanguila viuma. Ke ku pangesa mpoko yeni mu njila ize i luisa vuana vueni. Vantu vakevo va na pande ku lihanguila ku va munga kuli Sakatanga, Yehova.—Tandenu Yelemiya 18:7-10.
5 Vatico nga vantu va viana ku cizango ku va munga kuli Ntsongi ua Kama? Vati ue ku pangesa mpoko yeni ya kala nayo? Aci singaniekenu vie ku solokela vuma nga ka vua fuilile ku vu panga cimo ca cifua citenga. Ntsongi a hasa ku vu panga citenga cikuavo naua ni ku vu mbila kuti! Kaha nga vuma ka vuesi na seho, ntsongi kesi na mulonga. Mukemuo vene mu ca fua na kuli Ntsongi uetu.(Ndeut. 32:4) Nga muntu a viana ku mu munga kuli Yehova, mulonga u na pu vene ua muntu uaco. Ngeci mua ntsongi Yehova ue ku pangesa mpoko ya kala nayo ha vantu mu ku va sungamesa ku liya na cifua ci va tavelamo ku munga ceni. Vaze ve ku tava vuino ve ku vezika. Ca ku muenako, Vakua Kilistu va ku vuavesa va pua ‘vindoho via cikeketima’ vize vi va na mungu ku pua ‘vindoho via cili.’ Kaha vaze va ku viana Najmbi ve ku pua ngue “zindoho zia vutenu zia pande ku nonga.”—Loma 9:19-23.
Ku Tanda Mbimbiliya
(Isaya 63:1-10) Iya ou a fuma ku Endome, Ku Mbozela na vizalo via ku pilika, Ou a viuka mu vuzalo vueni, Enda mu vukama vua ngolo yeni? Yange mukua ku handeka mu vuviuke, Mukua ngolo mu ku ohiela. 2 Vizalo viove via tilila vika, Na vikovelo viove ngue uze na liatela vuato vua viniu? 3 Nji na liatela vuato vua viniu lika liange; Kaha ua ku vantu na umo uahi na kala nange: Cili, nja va liatele mu vutenu vuange, Kaha nji na va liatangela mu vuniengue vuange; Na maninga a muono uavo a na sampukiela ha vizalo viange, Kaha nji na zualesa vuzalo vuange vuose. 4 Muomu litangua lia ku linguila lia kele mu mutima uange, Na muaka ua ku kula vange u neza. 5 Kaha nja talele, kaha ka kua kele umosi mu ku kuasa; Nange nja komokele omo ka keleko umosi ua ku kuatesa: Ngoco vene livoko liange ivene lia nji nehelele vuovole; Na vutenu vuange vua nji kuatesele. 6 Kaha nja liatele vantu mu vutenu vuange, Na ku va pendesa mu vuniengue vuange, Kaha nja muaniene maninga a muono uavo ha mavu. 7 Nji ka tumbula zingozi zia Yehova, Na visangala via Yehova, Ngue ku viose via na tu hie Yehova, Na kavumbi ka kama ku ndzivo ya Isaleli, Ka a na va hie ngue ku vikeketima vieni, Na ngue ku ku-lana ca zingozi zieni. 8 Muomu ikeye ngueni, Mua vusunga, vakevo vantu vange, Vana vaze ka va ka linga makuli: Ngoco ua puile Muovole uavo. 9 Mu kayando kavo kose ikeye ua yandele, Na kangelo ua ku ka-kala ceni ua vohielele: Mu cilemo ceni na mu cikeketima ceni ua va kulile; Kaha ua va ambatele, na ku va tuala matangua ose a ntsenkulu. 10 Vunoni va lingile zimpata, Na ku vavalesa Sipilitu ueni ua ku lela: Ngoco ua himpukile citozi cavo, Na ivene ua luile navo.