Cipupu ca ku Manusuila

Mosesa ua kulahesele Falao ngueni kaka mu mono naua. Vunoni ua sikile Falao ngueni: ‘Lelo, mu kati ka vutsiki, uose muana ua ku livanga mu Ingito a ka tsa, ku putukila kuli muana ua Falao na ku heta ku vana va vangamba veni.’

Ngeci Yehova ua lekele vaIsaleli ku linga cilika ca ku lifuila. Ua va lekele ngueni: ‘Tsihenu cizamba ca mpanga ni mpembe ua muaka umo, kaha kuitenu amo maninga eni ha vimbelo vienu. Ocenu ntsitu yaco na ku i lia na mbolo ka yesi na cimbaluila. Zalenu vinkaku vienu na ku liviukisila vungendzi. Muomu vutsiki vua lelo nji mi patula.’ Aci singanieke ndzolela i va vuile vaIsaleli mu ku ivua ngoco!

Kaha mu kati ka vutsiki, kangelo ua Yehova ua ile na ku hita mu nkala ndzivo mu Ingito. Mu vindzivo ka via kele na maninga ha mbelo, muana ua ku livanga ua tsile. Vunoni kangelo ua sezele vindzivo via kele na citantekeyeso ca maninga. Nkala vusoko mu Ingito, vampite na vihutu vua tsisile muana. Vunoni ku vana va vaIsaleli na umo uahi ua tsile.

Muana ua Falao neni ua tsile. Falao ka hasele naua ku linga vimpata. Haze vene ua lekele Mosesa na Alone ngueni: ‘Katukenu. Tundenu muno. Yenu mu ka lemese Njambi yenu. Ambatenu na vimuna vienu, yenu!’

Kua kele miezi omo vaIsaleli va tuhukile mu Ingito, kaha vendele mu vusoko na mu miyati. VaIsaleli vose, vamala na vampuevo hamo lika na vanike, va puile 600.000. Kaha naua, kua kele vantu veka vavengi va ile hamo lika navo, linga navo va ka lemese Yehova. VaIsaleli va patukile mpundu!

Mu ku vuluka vati Yehova ua vovuele, vaIsaleli va kele na ku linga cilika ca ku lifuila nkala muaka. Lizina liaco Pasovala.