Apocalipsis

12 Uajka ipan iluikak neski se ueyi tlaneskayotl:* se siuatl kipixtoya iyoyo tlen kauaniyaya kej Tonati, iikxitla eltoya metstli uan ipan itsonteko kipixtoya se corona ika 12 sitlalimej. 2 Tlanemiltiyaya,* uan kuatsajtsiyaya pampa tlauel kuajkualoyaya uan tlaijiyouiyaya pampa nechka konepiaskia.

3 Uan ipan iluikak neski seyok tlaneskayotl: neski se ueyi dragón* chichiltik kej tlitl, kipixtoya chikome itsonteko uan matlaktli ikuakua, uan ipan sejse itsonteko kipixtoya se corona; 4 uan nopa sitlalimej moxelojkej ika eyi partes uan ika ikuitlapil kiuauatatski se parte tlen nopa sitlalimej, uan kintlauisok* ipan Tlaltipaktli. Uan nopa dragón moketsato iixpa nopa siuatl katli konepiaskia, kiampa kema tlakatiskia ikone, nima kitoloskia.

5 Nopa siuatl kipixki se okichpil, uan ya kinyakanas nochi altepemej ika teposkuatopili. Uajka nopa okichpil nimantsi kikuitejkej uan kiuikakej kampa Dios,* katli itstoya ipan iueyi silla. 6 Uan nopa siuatl cholok uan yajki ipan uaktok tlali, kampa Dios ya kikualchijchiuilijtok kampa mokauas uan kampa kitlamakasej mil doscientos sesenta tonali.

7 Uan ipan iluikak mochijki se guerra. Miguel* uan iángeles moteuijkej iuaya nopa dragón. Uan nopa dragón uan iángeles nojkia tlateuijkej, 8 pero amo tlatlankej,* uan ayokmo kinkajkej ma itstokaj iluikak. 9 Uajka, nopa ueyi dragón kitlauisojkej* para tlatsintla, ya eli nopa kouatl tlen uejkajkia katli nojkia kiiljuiaj Diablo uan Satanás, uan katli kinkajkayaua nochi katli itstokej ipan Tlaltipaktli. Ya uan iángeles kintlauisojkej ipan Tlaltipaktli. 10 Uan ipan iluikak nijkajki se akajya chikauak kiijtouayaya:

“¡ToDios kinmanauijtok* maseualmej uan kinextijtok itetikayo. ITlanauatijkayo pejtok tlanauatia uan iCristo pejtok kitekiuia itlanauatil, pampa inijuantij kitlauisojkej tlatsintla katli yaui iixpa Dios para kintlateljuis toikniuaj tonaya uan tlayoua! 11 Inijuantij tlatlankej ika ieso nopa Pilborregojtsi uan ika nopa tlajtoli tlen tematiltijkej, uan mosemakakej temaktilisej ininnemilis* para ma kinmiktikaj. 12 Yeka, ¡ma pakikaj katli itstokej ipan iluikaktli! Pero ¡teikneltikej katli itstokej ipan Tlaltipaktli uan ipan mar! Pampa Diablo temotok kampa inmojuantij uan tlauel kualantok, pampa kimati amo uejkauas itstos”.

13 Uajka, kema nopa dragón kiitak ya kitlauisojtoyaj ipan Tlaltipaktli, pejki kitokilia nopa siuatl katli kitlakatiltijtoya nopa okichpil. 14 Pero nopa siuatl kimakakej ome ieltlapal, kej kipia se ueyi kuajtli* para ma patlani hasta uaktok tlali, kampa kikualchijchiuilijtoyaj kampa mokauas, kampa moneki kitlamakasej uan itstos uejka tlen nopa kouatl ipan eyi xiuitl uan tlajko.*

15 Uan nopa kouatl kikixtik atl ikamako kej se ueyatl uan kimajkauilik ika iika nopa siuatl para ma misaui. 16 Pero tlali kipaleuik nopa siuatl. Motlapok nopa tlali uan kitolok nopa ueyatl tlen nopa dragón kikixtijtoya ipan ikamak. 17 Uajka, nopa dragón tlauel kualanki ika nopa siuatl uan pejki kinteuia iteipaixuiuaj katli nojua mokajtoyaj. Ni elij katli kichiuaj itlanauatiljuaj Dios uan katli kinmakatokej nopa tekitl para tematiltisej tlen Jesús.