Ma tijpatlakaj tlen timoiljuiaj kema kinamiki. Ximotlajtlani: “¿Nijpia noyolo uan amo nikinchiualtia ma mochiua san tlen na nijneki? ¿O amo nijneki nijpatlas tlen nimoiljuia, san nijneki ma mochiua tlen nitlanauatia uan nitochontik? ¿Nechpaktia nikintlakakilis sekinok uan nikinkauas ma kichiuakaj tlen inijuantij kiijtouaj?”. Tlaj tijchiuaj kampeka tijpatlasej tlen timoiljuiaj kema kinamiki, tijnextisej tielij kej Jehová uan Jesús. Kema mopatla kej tiitstokej, nojkia moneki tijpatlasej tlen timoiljuiaj. Uelis mopatlatiuetsis kej tiitstokej pampa tijpiasej se kokolistli, amo tijpiasej tomij o pampa políticos mokualanisej. Ni tlamantli uelis kichiuas ma titlaijiyouikaj (Ecl. 9:11). Kema ayokmo tijtekipanouaj Jehová kej timomajtoyaj, nojkia uelis tijmatisej ouij tijpatlasej se keski tlamantli. Tlauel mitspaleuis tlaj tijchiuas ni naui tlamantli: 1) nima ximomati, 2) ximosentlali ipan tlen nojua uelis tijchiuas, 3) ximosentlali ipan tlen mitspaleuis, uan 4) xikinpaleui sekinok. w23.07 21, 22 párrs. 7, 8

Kema Daniel eliyaya telpokatl, babiloniaeuanij kiuikakej uejka uan kiitakej amo eliyaya sanse kej nopa sekinok telpokamej. Ya kuali nesiyaya uan kipiayaya chikaualistli pampa ichampoyouaj tlauel pankisayayaj (1 Sam. 16:7). Yeka, babiloniaeuanij kinejkej kimachtisej uan kiampa eliskia kej nopa babiloniaeuanij katli tlauel pankisayayaj (Dan. 1:3, 4, 6). Jehová kiikneliyaya Daniel pampa kuali monejnemiltiyaya. Kiampa tijmatij pampa kema Daniel kipiayaya se 20 xiuitl, Jehová kiijtok eliyaya kej Noé uan Job, katli amo kema kitlauelkajkej uan nochipa kitekipanojkej (Gén. 5:32; 6:9, 10; Job 42:16, 17; Ezeq. 14:14). Maske Daniel itstoya miak xiuitl uan kipanok miak tlamantli, Jehová nochipa kiiknelik (Dan. 10:11, 19). w23.08 2 párrs. 1, 2

Kema timoiljuia tijkouas se kali, tijnekis kuali tikitas ika tajaya kenijkatsa eltok nochi nopa kali. Nojkia moneki kiampa tijchiuasej kema tijpouaj uan timomachtiaj Biblia. Tlaj isijkapa o san kej ueli tijpouaj tijmatisej san “tlen axmás ouij” (Heb. 5:12). Tlauel techpaleuis tlaj “kuali tijtlachiliaj” tlen eltok ipan Biblia, sanse kej tijchiuaskiaj kema tijkouaskiaj se kali. Kema timomachtiaj Biblia, moneki tikitasej kenijkatsa mouika ika nopa sekinok tlapoualistli tlen eltok. Amo moneki san tijneltokasej se tlamantli, moneki timoiljuisej kenke tijneltokaj. Tlaj tijnekij kuali tijkuamachilisej tlen Biblia kiijtoua, moneki timomachtisej tlamachtili tlen ouij. Apóstol Pablo kiniljuik Cristo itokilijkauaj monekiyaya kichiuasej kampeka kuali momachtisej, pampa toTeotsij iTlajtol eltok kejuak “kampa más uejkapa uan kampa más tlatsintla uan asi tlen kampa kisa tonati hasta kampa kalaki”. Tlaj kuali momachtiskiaj, kinpaleuiskia kuali ma tlaneltokakaj sanse kej “se [xiui]tsontli kiselia chikaualistli tlen ineljuayo” (Efes. 3:14-19). Tojuantij nojkia moneki kiampa tijchiuasej. w23.10 18 párrs. 1-3