Nopa carta tlen kintitlanilijkej Cristo itokilijkauaj tlen Colosas

4 Intekojmej, amo xikinchikoiknelikaj inmotlatekipanojkauaj uan xikinchiuilikaj tlen xitlauak, pampa xikilnamikikaj inmojuantij nojkia inkipiaj se inmoTeko ne iluikak.

2 Nochipa ximomaijtojtokaj,* uan kema kiampa inkichiuaj, kuali xitlachixtokaj uan xijtlaskamatilikaj Dios.* 3 Nojkia, ximomaijtokaj por tojuantij uan xijtlajtlanikaj Dios kejuak ma kitlapo se puerta para uelis titepouilisej itlajtol uan kiampa uelis tijmoyauasej tlen Dios ayamo tematiltia* tlen Cristo, katli nijtekipanoua uan yeka nechtsaktokej uan nechilpitokej ika cadenas. 4 Nojkia xitlajtlanikaj ma nitlajtolmoyaua uan ma nitepouili tlen ya, kej kinamiki nijchiuas.

5 Ximonejnemiltikaj kej katli tlalnamikij ininixpa katli amo tlaneltokaj uan amo san ximotonalpolokaj.* 6 Nochipa kualtsi xitenojnotsakaj,* kejuak inkiajuiyakmakaskiaj inmotlajtol ika istatl, kiampa inkimatisej kenijkatsa kinamiki inkinankilisej sejse maseuali.

7 Tíquico, se toikni katli nikiknelia, se tlatekipanojketl katli temachtli uan katli sansejko tijtekipanouaj toTeko, inmechiljuis kenijkatsa niitstok. 8 Nijtitlani kampa inmojuantij para xijmatikaj kenijkatsa tiitstokej uan para ma inmechyolchikaua. 9 Yas iuaya Onésimo, se toikni katli nikiknelia, eli temachtli uan eli se tlen inmojuantij. Inijuantij inmechpouilisej nochi tlen nikaj panotok.

10 Inmechontlajpaloua Aristarco, katli nouaya tsaktok, uan nojkia Marcos, imachikni* Bernabé (katli kinamiki inkiselisej ika pakilistli tlaj yas inmechitati, kej inmechnauatijkej xijchiuakaj), 11 uan nojkia Jesús, katli kiiljuiaj Justo. Inijuantij nojkia mochiuilijtokej circuncisión.* San inijuantij tekitij nouaya para tijmoyauasej iTlanauatijkayo Dios uan tlauel nechpaleuijtokej uan nechyolchikajtokej. 12 Inmechontlajpaloua Epafras, katli eli se tlen inmojuantij uan se itekipanojka Cristo Jesús. Ya chikauak momaijtoua por inmojuantij, para uelis initstosej intemachmej kej maseualmej katli kuali tlaneltokaj uan para nelnelia inmotemachisej ipan nochi tlen Dios kichiuas. 13 Uelis nikijtos yaya chikauak tekiti para inmechpaleuis inmojuantij uan nojkia katli itstokej ipan Laodicea uan Hierápolis.

14 Lucas, nopa tepajtijketl katli tlauel tikikneliaj, inmechontlajpaloua, uan nojkia Demas. 15 Xikintlajpalokaj toikniuaj katli itstokej Laodicea, uan nojkia Ninfa uan katli mosentiliaj ichaj. 16 Kema ya inkipojtosej ni carta, teipa nojkia ma mopoua ipan tlanechikoli tlen eltok ipan Laodicea, uan inmojuantij xijpouakaj nopa carta tlen inijuantij nikintitlanilik. 17 Nojkia xikiljuikaj Arquipo: “Kuali xijtlachili nopa tekitl tlen toTeko mitsmakak para uelis kuali tijchiuas”.

18 Na, Pablo, nikijkuiloua ika nomax ni tlajtoli tlen ika niinmechtlajpaloua. Xikilnamikikaj nitsaktok uan niilpitok ika cadenas. Dios ma kinexti ueyi iyolo ika inmojuantij.*