Hechos (Tlen apóstoles kichijkej)
8 Uan Saulo kuali kiitak ma kimiktikaj Esteban.
Ipan nopa tonali pejkej tlauel kintlaijiyouiltiaj tlaneltokanij katli itstoyaj ipan tlanechikoli tlen Jerusalén. Nochi mosemankej* ipan tlali Judea uan Samaria, san apóstoles mokajkej. 2 Se keskij tlakamej katli kuali tlaneltokayayaj kiuikakej itlakayo Esteban, kitlalpachojkej uan nelia tlauel kichokilijkej. 3 Uan Saulo pejki chikauak kintlaijiyouiltia nopa tlaneltokanij tlen tlanechikoli. Kalaktiauiyaya ipan sejse kali uan kinuauatatsayaya kalixpa tlakamej uan siuamej para ma kintsakuakaj.
4 Uan nopa tlaneltokanij katli mosemantoyaj yauiyayaj ipan nochi nopa tlali uan tematiltiyayaj nopa kuali tlamachtili tlen itlajtol Dios. 5 Felipe temok altepetl* Samaria uan pejki kinkamanaljuia maseualmej tlen Cristo. 6 Nochi maseualmej kuali kikakiyayaj tlen Felipe kiijtouayaya, kitlakakiliyayaj uan kiitayayaj nopa milagros* tlen kichiuayaya. 7 Miakej kinpixtoyaj amo kuali ajakamej,* uan kema kisayayaj nopa ajakamej chikauak kuatsajtsiyayaj. Nojkia, miakej katli amo ueliyayaj kioliniaj inintlakayo uan katli metskuachotikej, mochikauayayaj. 8 Yeka katli itstoyaj ipan nopa altepetl tlauel yolpajkej.
9 Ipan nopa altepetl itstoya se tlakatl katli motokaxtiyaya Simón. Kema ayamo panoyaya nopa tlamantli, tetlajchiuiyaya uan nochi katli itstoyaj ipan tlali Samaria mosentlachiliyayaj ika tlen kichiuayaya, uan kiijtouayaya san ya eliyaya tlauel ipati.* 10 Nochi nopa maseualmej, desde pilsiltsitsij* hasta katli ya uejueyij, kuali kitlakakiliyayaj uan kiijtouayayaj: “Iueyichikaualis Dios eltok ipan ni tlakatl”. 11 Yeka kuali kitlakakiliyayaj pampa miak xiuitl tetlajchiuijtoya uan kichijtoya ma mosentlachilikaj. 12 Pero kema Felipe kinmatiltik nopa kuali tlamachtili tlen iTlanauatijkayo Dios uan tlen Jesucristo itoka, kineltokakej uan tlakamej uan siuamej moatsonpoliuiltijkej. 13 Hasta Simón nojkia mochijki se tlaneltokaketl, uan kema moatsonpoliuiltik, nochipa itstoya iuaya Felipe. Tlauel mosentlachiliyaya kema kiitayaya milagros* uan uejueyi tlamantli tlen mochiuayaya.
14 Kema apóstoles katli itstoyaj Jerusalén kikajkej katli euaj Samaria kiselijtoyaj itlajtol Dios, kintitlankej Pedro uan Juan ma yakaj nopaya. 15 Uajka inijuantij temokej uan momaijtojkej* para samariaeuanij ma kiselikaj ichikaualis Dios,* 16 pampa san moatsonpoliuiltijtoyaj ipan itoka toTeko Jesús uan yon se tlen inijuantij ayamo kiselijtoya ichikaualis Dios. 17 Uajka kitlalijkej ininmax ininpani uan inijuantij pejkej kiseliaj ichikaualis Dios.
18 Kema Simón kiitak maseualmej kiseliyayaj ichikaualis Dios kema apóstoles kitlaliyayaj ininmax ininpani, kintenkauilik tomij 19 uan kiniljuik: “Nojkia xinechmakakaj ni chikaualistli, kiampa kema nijtlalis nomax ipani se akajya, kiselis ichikaualis Dios”. 20 Uan Pedro kiiljuik: “Ximiki iuaya moplatatomij, pampa timoiljuik ueliskia tijkouas ika motomij nopa regalo tlen Dios temaka. 21 Ta amo kinamiki timokalakis ipan ni tlamantli, pampa amo tijpia kuali moyolo iixpa Dios.* 22 Yeka ximoyolkuepa pampa tijchijki ni tlamantli tlen amo kuali uan xijtlajtlani Jehová,* tlaj uelis, ma mitstlapojpoljui ika tlen amo kuali tlen timoiljuik ipan moyolo; 23 pampa nikita tieli kej se veneno tlen chichik uan nochipa tijneki tijchiuas tlen amo kuali”.* 24 Uan Simón kinnankilik: “Xijtlajtlanikaj Jehová* ma nechtlapojpoljui, kiampa amo nechpanos tlen inkiijtojkej”.
25 Kema senkistok tematiltijkej uan kimoyajkej itlajtol Jehová,* tlakuepilijkej Jerusalén uan kimoyajtiajkej nopa kuali tlamachtili ipan miak pilaltepetsitsij kampa itstoyaj samariaeuanij.
26 Pero teipa, iángel Jehová* kinojnotski Felipe uan kiiljuik: “Ximokualchijchiua uan xia ika sur,* ipan nopa ojtli tlen temo tlen Jerusalén hasta Gaza”. (Eli se ojtli tlen pano ipan uaktok tlali). 27 Uajka mokualchijchijki uan yajki. Uan kipantito se tekichijketl* katli euayaya Etiopía. Ni tlakatl kipiayaya tlanauatili uan kitekipanouayaya Candace, nopa siuatlanauatijketl tlen Etiopía, uan kimokuitlauiyaya nochi itomij tlen kipixtoya. Nopa tlakatl yajtoya Jerusalén para kiueyichiuas Dios, 28 pero ya tlakuepiliyaya ialtepe. Yauiyaya ipan ikuacarro uan chikauak kipojtiauiyaya tlen kiijkuilok teokamanalojketl* Isaías. 29 Uajka, Dios ika ichikaualis kiiljuik Felipe: “Xia uan xijnechkaui nopa kuacarro”. 30 Felipe motlalok uan kiasito nopa kuacarro, uan kikajki nopa tlakatl chikauak kipouayaya tlen kiijkuilok teokamanalojketl Isaías. Uajka kitlatsintokik: “¿Nelnelia tijkuamachilia tlen tijpoua?”. 31 Nopa tlakatl kinankilik: “¿Kenijkatsa nijkuamachilis tlaj amo aka nechmachtia?”. Uajka kitlajtlanik Felipe ma tlejko ipan ikuacarro uan ma moseui iuaya. 32 Ya ni tlen kipouayaya ipan iTlajkuilol Dios: “Kiuikakej kej se borrego kampa tlamiktiaj; uan kej se pilborregojtsi katli amo tsajtsi kema kiximaj, ya amo tleno kiijtoua. 33 Kema kipinajtiyayaj, kitlatsakuiltijkej maske amo kinamikiyaya. ¿Ajkia tepouilis ajkia inijuantij elkej ichampoyouaj?* Pampa kikixtilijkej inemilis ipan Tlaltipaktli”.
34 Uajka nopa tlakatl kiiljuik Felipe: “Xinechiljui, ¿tlen ajkia kamanalti nopa teokamanalojketl? ¿Tlen ya o tlen seyok tlakatl?”. 35 Felipe pejki kikamanaljuia uan pejki kiixtomilia nopa tlakatl kampa kipojtiauiyaya iTlajkuilol Dios uan kimatiltik nopa kuali tlamachtili tlen Jesús. 36 Kema yauiyayaj ipan ojtli, asitoj kampa onkayaya atl, uan nopa tlakatl kiiljuik Felipe: “¡Xikita! Nikaj onka atl. ¿Tlake nechtsakuilia para nimoatsonpoliuiltis?”. 37 * 38 Uajka tlanauatik ma kiketsakaj nopa kuacarro, uan Felipe uan nopa tlakatl kalajkej ipan atl, uan Felipe kiatsonpoliuiltik. 39 Kema kiskej ipan atl, ichikaualis* Jehová* kiyakanki Felipe ma yaui sejkanok,* uan nopa tlakatl ayokmo kema sampa kiitak. Nopa tlakatl yajki ika pakilistli. 40 Uan Felipe asito altepetl Asdod, uan kema panotiajki ipan nopa tlali nojua kimoyajtiajki nopa kuali tlamachtili ipan nochi altepemej hasta kema asito altepetl Cesarea.