Apocalipsis

11 Uan kema nechmakakej se akatl tlen nesiyaya kej se kuauitl tlen ika tlatamachiuaj,* ya nechiljuik: “Ximoketsa uan xijtlamachiua nopa teokali,* nopa tlaixpamitl uan katli nopaya tlaueyichiuaj. 2 Pero amo xijtlamachiua kalixpa tlen nopa teokali, san xijpano pampa nopa ininaxka katli itstokej ipan altepemej uan inijuantij kintlaijiyouiltisej katli itstokej ipan nopa altepetl tlen tlatsejtseloltik eyi xiuitl uan tlajko.* 3 Nijchiuas nopa omej testigos ma tematiltikaj tlen Dios* kiijtoua mil doscientos sesenta tonali ika ininyoyo tlen uapaktik”.* 4 Ni testigos kiixnextiaj nopa ome olivokuauitl uan nopa ome tlauilketsali, uan ijkatokej iixpa Katli Iaxka Tlaltipaktli.

5 Tlaj se akajya kinekis kinchiuilis tlen amo kuali, ininkamako kisas tlitl tlen kintsontlamiltis ininkualankaitakauaj. Kiampa kinamiki mikis katli kinekis kinchiuilis tlen amo kuali. 6 Inijuantij kipiaj tlanauatili para kitsakuasej iluikaktli uan kichiuasej amo ma uetsi atl kema tematiltisej tlen Dios kiijtoua. Nojkia, kipiaj tlanauatili para kichiuasej atl ma mokuepa estli uan para kichiuasej ipan Tlaltipaktli ma pano tlen ueli tlamantli tlen amo kuali, nochi ueltas kema inijuantij kinekisej.

7 Kema ya tematiltijtosej tlen Dios kiijtoua, nopa fiero tlapiali tlen kiski ipan nopa ostotl tlen tlauel uejkatla,* kinteuis nopa testigos, kintlanis uan kinmiktis. 8 Inintlakayo tepejtos ipan ueyi ojtli ipan nopa ueyi altepetl, kampa nojkia kimiktijkej ininTeko Jesús ipan se kuauitl, uan Sodoma uan Egipto kiixnextiaj nopa altepetl. 9 Maseualmej katli itstokej ipan pilaltepetsitsij, uejueyi familias,* katli kamanaltij sekinok tlajtoli uan altepemej, kitlachilijtosej inintlakayo eyi tonali uan tlajko uan amo kikauasej ma kintlalpachokaj. 10 Uan katli itstokej ipan Tlaltipaktli, pakisej pampa kinmiktijkej uan momajmakasej regalos, pampa ni omej teokamanalouanij* san kintlaijiyouiltijtoyaj katli itstokej ipan Tlaltipaktli.

11 Kema panok eyi tonali uan tlajko, Dios kinyolkuik* uan inijuantij moketskej. Katli kinitakej tlauel momajmatijkej. 12 Uajka, desde iluikak inijuantij kikajkej se akajya chikauak kiniljuik: “Xitlejkokaj”. Uan nopa omej testigos tlejkokej iluikak ipan se mixtli, uan ininkualankaitakauaj kintlachilijtoyaj. 13 Ipan nopa tlalochtli,* chikauak mojmolinik tlali. Uan Tlaltipaktli moxelok ipan matlaktli partes, uan se tlen nopa parte uetski, uan 7 mil maseualmej mijkej pampa mojmolinik tlali. Uan nopa sekinok momajmatijkej uan kiueyichijkej Dios katli itstok iluikak.

14 Nopa ompa tlaijiyouilistli ya panok. ¡Xitlakakikaj! Nopa expa nechka panos.

15 Nopa chikompa ángel kipitski itrompeta. Uajka ipan iluikak pejkej chikauak kiijtouaj: “ToDios uan katli kitlapejpenijtok para ma eli Cristo, nama ya pejkej kinnauatiaj nochi maseualmej, uan Dios tlanauatis para nochipa uan amo kema tlamis”.

16 Nopa 24 ueuejtlakamej katli moseuijtoyaj ipan ininueyi sillas iixpa Dios, motlankuaketskej uan kiueyichijkej Dios. 17 Kiijtojkej: “Timitstlaskamatiliaj Jehová* Dios, Katli Tijpia Nochi Chikaualistli, katli tieli uan katli tieliyaya, pampa tijtekiuijtok moueyichikaualis uan pejtok titlanauatia. 18 Pero nochi katli itstokej ipan altepemej tlauel kualankej, uajka tijnextik mokualankayo uan asik nopa tonali tlen tikixtlalijtok para tikintlajtolsenkauas katli miktokej uan para tikinteochiuas moteokamanalojkauaj katli mitstekipanouaj, nojkia katli elij tlatsejtseloltikej* uan katli kimakasij motoka, katli pilsiltsitsij* uan katli ya uejueyij. Uan para tikintsontlamiltis katli kinempolouaj Tlaltipaktli”.

19 Uajka, ipan iluikak motlapok nopa teokali* uan neski nopa kuakajo kampa eltoya tlajtolsenkaualistli* ipan nopa teokali. Uan pejki tlapetlani, kakistiyaya miakej inintoskak, tlatomoniyaya, mojmoliniyaya tlali uan tlauel uetski tesiuitl.