Nopa achtoui carta tlen kiijkuilok Juan
4 Noikniuaj katli niinmechiknelia, amo xijneltokakaj nochi tlajtoli tlen nesi uala tlen Dios.* Más kuali, xikitakaj tlaj nopa tlajtoli nelnelia uala tlen ya, pampa ipan Tlaltipaktli monextijtokej miakej teokamanalouanij katli san tlakajkayauaj.*
2 Ika ni tlamantli uelis inkimatisej tlaj nopa tlajtoli uala tlen Dios: tlaj kiijtoua Jesucristo ualajki kej se maseuali ipan Tlaltipaktli. 3 Pero yon se tlajtoli uala tlen Dios tlaj kiijtoua Jesús amo ualajki kej se maseuali ipan Tlaltipaktli. Nopa tlajtoli uala tlen katli kiijixnamiki Cristo,* katli inkikajkej ualaskia uan ya itstok ipan Tlaltipaktli.
4 Nopilkoneuaj, inmojuantij inkichiuaj kej Dios uan inkintlantokej teokamanalouanij katli san tlakajkayauaj, pampa Dios katli inmechpaleuia kipia más tetikayotl que Diablo, katli kinpaleuia maseualmej katli itstokej ipan Tlaltipaktli. 5 Nopa teokamanalouanij katli san tlakajkayauaj monejnemiltiaj kej maseualmej katli itstokej ipan Tlaltipaktli. Inijuantij kiijtouaj tlamantli tlen kinpaktia maseualmej, yeka kintlakakiliaj. 6 Tojuantij tijchiuaj kej Dios. Katli kiixmati Dios techtlakakilia; uan katli amo eli iaxka Dios amo techtlakakilia. Kiampa uelis tijmatisej tlake tlajtoli nelnelia melauak uan tlake amo.
7 Noikniuaj katli niinmechiknelia, nojua ma timoiknelijtokaj, pampa Dios achtoui techiknelik uan katli teiknelia eli ikone Dios uan kiixmati Dios. 8 Katli amo teiknelia amo kiixmati Dios, pampa Dios eli tlaiknelijkayotl. 9 Kej ni Dios kinextik techiknelia: kema kiualtitlanki iKone iyojtsi ipan Tlaltipaktli, kiampa ika ya uelis tijpiasej nemilistli. 10 Dios kiualtitlanki iKone kej se ofrenda* tlen temaktilijtokej para timoyoltlalisej iuaya* pampa titlajtlakolejkej. Ya kichijki nopa pampa techiknelik, uan amo pampa tojuantij tikiknelijkej.
11 Noikniuaj katli niinmechiknelia, tlaj Dios kiampa techiknelik, tojuantij nojkia moneki kiampa timoiknelisej. 12 Yon se maseuali amo kema kiitstok Dios. Tlaj nojua timoikneliaj, Dios itstos touaya uan senkistok kinextis techiknelia. 13 Ika ni tlamantli tijmatij tiitstokej iuaya uan ya itstok touaya, pampa techmakatok ichikaualis.* 14 Nojkia, tojuantij tikitstokej toTata kiualtitlanki iKone para ma kinmakixtiki* maseualmej, uan tojuantij ya nopa titematiltiaj. 15 Tlaj se akajya kineltoka Jesús eli iKone Dios, Dios itstok iuaya uan nopa maseuali itstok iuaya Dios. 16 Uan tojuantij tikitstokej kenijkatsa Dios tlauel techiknelia uan timotemachiaj para nelia kiampa kichiua.
Dios eli tlaiknelijkayotl, uan katli nochipa teiknelia itstok iuaya Dios, uan Dios itstok iuaya. 17 Kiampa nopa tlaiknelili mochijtok senkistok kuali ipan tojuantij, para amo timajmauisej tikamanaltisej iuaya ipan nopa tonali kema techtlajtolsenkauasej, pampa sanse kej ya* kichijki, tojuantij nojkia kiampa tijchiuaj ipan ni Tlaltipaktli. 18 Katli kiiknelia Dios amo majmaui. Nopa tlaiknelili tlen eli senkistok kuali, kichiua amo ma timajmauikaj pampa kema se akajya majmaui kitsakuilia para amo ma kichiua miak tlamantli. Tlaj se akajya majmaui, amo senkistok teiknelia. 19 Tojuantij titeikneliaj pampa ya achtoui techiknelik.
20 Tlaj se akajya kiijtoua “Na nikiknelia Dios” pero kikualankaita iikni, san istlakati. Pampa katli amo kiiknelia iikni katli kena kiita, amo uelis kiiknelis Dios katli amo kiita. 21 Ya techmakak ni tlanauatili: katli kiiknelia Dios nojkia moneki kiiknelis iikni.