Tlen kiijkuilok Mateo
20 ”Pampa nopa Tlanauatijkayotl tlen eltok iluikak eli kej se tlakatl katli iaxka se tlali, katli kiski tlauel kualka uan kintemoto katli tekitiskiaj kampa kitoktoya uvas. 2 Kema mokajkej* ininuaya katli kipaleuiskiaj kintlaxtlauiskia se denario* ipan se tonal, kintitlanki kampa kitoktoya uvas. 3 Nechka las nueve ika ijnalok,* sampa kiski uan kinitak sekinok katli san ijkatoyaj kampa mochiua tianguis* pampa amo kipiayayaj tekitl. 4 Uajka kiniljuik: ‘Inmojuantij nojkia xitekititij kampa nijtoktok uvas, uan niinmechtlaxtlauis tlen kinamiki’. 5 Uan inijuantij yajkej. Nopa tlakatl sampa kiski nechka tlajkotona* uan nojkia nechka las tres ika tiotlak* uan sampa kintekimakak sekinok. 6 Teipa, sampa kiski nechka las cinco ika tiotlak* uan kinpantik sekinok katli nopaya ijkatoyaj uan kintlatsintokik: ‘¿Kenke ya insetonaltikej* uan amo inkipiaj tekitl?’. 7 Kinankilijkej: ‘Pampa amo aka techtlanejtok ma titekititij’. Ya kiniljuik: ‘Inmojuantij nojkia xitekititij kampa nijtoktok uvas’.
8 ”Kema tlayouixki, katli iaxka kampa toktoya uvas kiiljuik inintlayakanka katli tekitiyayaj: ‘Xikinnotsa katli tekitij uan xikintlaxtlaui. Achtoui xikintlaxtlaui katli teipa ualajkej, uan hasta teipa katli kualka kalajkej’. 9 Kema ualajkej katli pejkej tekitij las cinco ika tiotlak, sejse kimakakej se denario. 10 Yeka, katli kualkaj kalajkej, moiljuijkej kintlaxtlauaskiaj más, pero inijuantij nojkia kintlaxtlauijkej se denario. 11 Kema kiselijkej inintomij, pejkej kualanij iuaya katli iaxka nopa milaj 12 uan kiiljuijkej: ‘¡Ni tlakamej katli teipa ualajkej tekitikej san se hora, uan ta tikintlaxtlauik sanse kej tojuantij, katli se tonal* chikauak titekititokej maske tlauel tlatotonia!’. 13 Pero ya kinankilik se tlen inijuantij: ‘Nouampox,* na amo nimitschiuilijtok tlen amo kuali. Timokajkej nimitstlaxtlauiskia se denario, ¿axke? 14 Xijkui motomij uan xia. Nijneki nijtlaxtlauis katli teipa asiko sanse kej ta. 15 ¿Timoiljuia amo uelis nijchiuas tlen nijneki ika tlen na noaxka? ¿O tikualani pampa kuali noyolo ika inijuantij?’. 16 Kiampa, katli yauij tlatepotsko,* tlayakanasej, uan katli tlayakanaj, mokauasej hasta tlatepotsko”.
17 Kema ixtlejkotiauiyayaj para Jerusalén, Jesús kinuikak iyoka nopa 12 itokilijkauaj uan kiniljuijtiajki ipan ojtli: 18 “Xikitakaj, tiixtlejkotiauij para Jerusalén, uan nopaya Katli Eli iKone Se Maseuali* kitemaktilisej ininmako sacerdotes katli kipiaj tlanauatili uan escribas.* Tlanauatisej ma kimiktikaj 19 uan kimaktilisej ininmako katli euaj ipan seyok altepetl, inijuantij kipinajtisej, kiuitekisej uan kimiktisej ipan se kuauitl; uan ipan eyi tonali moyolkuis”.
20 Uajka, isiua Zebedeo kinechkauik Jesús ininuaya omej ikoneuaj uan motlankuaketski iixpa pampa kinekiyaya kitlajtlanis se tlamantli. 21 Jesús kitlatsintokik: “¿Tlake tijneki?”. Ya kinankilik: “Xitlanauati para ni omej nokoneuaj ma moseuikaj mouaya ipan moTlanauatijkayo, se ika momanejmak uan se ika momaarraves”.* 22 Jesús kiijtok: “Inmojuantij amo inkimatij tlake intlajtlanij. ¿Uelis inkiisej nopa copa tlen nechka nikis?”. Inijuantij kinankilijkej: “Kena tiuelij”. 23 Jesús kiniljuik: “Kena, inmojuantij inkiisej nocopa, pero na amo uelis nikijtos ajkia inijuantij moseuisej ika nomanejmak uan ika nomaarraves, pampa san noTata kintlapejpenis ajkia moseuisej nopaya”.
24 Kema nopa sekinok matlaktli kimatkej, kualankej ininuaya nopa omej iknimej. 25 Pero Jesús kinsentilik nochi uan kiniljuik: “Inkimatij tekichiuanij tlanauatiaj ipan altepemej kej inijuantij kinekij, uan katli kipiaj tlanauatili kinchiualtiaj maseualmej ma kinneltokakaj. 26 Inmojuantij amo kinamiki kiampa inkichiuasej. Más kuali, tlaj se akajya kineki kipias tlanauatili, moneki kintekipanos sekinok 27 uan katli kineki tlayakanas, moneki elis inintlatekipanojka sekinok. 28 Ya nopa kichijki Katli Eli iKone Se Maseuali. Ya amo ualajki para ma kitekipanokaj, ya ualajki para kintekipanos sekinok uan temakas inemilis* uan kiampa tlaxtlauas para kinmakixtis miakej maseualmej”.
29 Kema kistiauiyayaj Jericó, tlauel miakej maseualmej kitokilijkej. 30 Uan omej katli amo tlachiayayaj moseuijtoyaj ojteno, kikajkej panotiauiyaya Jesús uan kitsajtsilijkej: “¡ToTeko, tiiKone David, xitechtlasojtla!”. 31 Uajka nopa maseualmej kintlakaualtijkej uan kiniljuijkej ayokmo ma tlauejchiuakaj, pero inijuantij más chikauak kuatsajtsiyayaj: “¡ToTeko, tiiKone David! ¡Xitechtlasojtla!”. 32 Uajka Jesús moketski, kinnotski uan kintlajtlanik: “¿Tlake inkinekij ma niinmechchiuili?”. 33 Inijuantij kinankilijkej: “ToTeko, tijnekij titlachiasej”. 34 Uan Jesús tlauel kinteikneltiitak* uan kinitskilik ininixteyol. Inijuantij nimantsi tlachixkej, uan kitokilijkej.