Tlen kiijkuilok Mateo
15 Uajka kinechkauijkej Jesús se keskij fariseos* uan escribas* katli ualayayaj tlen Jerusalén uan kiiljuijkej: 2 “¿Kenke motokilijkauaj amo kichiuaj tlen techmachtijkej katli uejkajkia itstoyaj? Inijuantij amo momajtekiaj* kema tlakuaj”.
3 Ya kinnankilik: “¿Uan kenke inmojuantij inkiixpanoj itlanauatiljuaj Dios* san pampa inkinekij inkineltokasej tlen intlamachtiaj?* 4 Dios kiijtok: ‘Xijtlepanita motata uan monana’ uan ‘Katli kitlaijiljuis* itata o inana moneki kimiktisej’. 5 Pero inmojuantij inkiijtouaj: ‘Katli kiiljuis itata o inana “Nochi tlen nijpixtok tlen ika ueliskia nimitspaleuis eli se regalo tlen nijmaktilijtok Dios”, 6 ayokmo moneki kinpaleuis itatauaj’. Kiampa inkichiuaj itlanauatiljuaj Dios ayokmo ma kipia ipati, pampa inkitokiliaj tlen intlamachtiaj. 7 Inkipiaj ome inmoxayak, yeka Isaías kiijtok tlen inmojuantij: 8 ‘Ni maseualmej san ika ininkamak* nechueyichiuaj, pero ininyolo amo eltok nonechka. 9 San tlapik nechueyichiuaj, pampa tlamachtiaj inintlanauatiljuaj maseualmej’ ”. 10 Uajka kiniljuik nopa miakej maseualmej ma monechkauikaj uan kiijtok: “Xijtlakakilikaj uan xijkuamachilikaj tlen nikijtoua: 11 tlen kalaki ipan ikamak se maseuali amo kisokiuia; pero tlen kisa ikamako, ya nopa kisokiuia”.
12 Uajka itokilijkauaj kinechkauijkej uan kiiljuijkej: “¿Tikitak nopa fariseos moyolkokojkej kema kikajkej tlen tikijtok?”. 13 Ya kinnankilik: “Nochi xiuitl tlen noTata katli itstok iluikak amo kitoktok, kineljuayouiuitlasej. 14 Yeka xikinkauakaj. Inijuantij elij tlayakananij katli amo tlachiaj. Uan tlaj se katli amo tlachia kiyakana seyok katli nojkia amo tlachia, nochi omej uetsisej ipan se ostotl”.* 15 Uajka, Pedro kiiljuik: “Xitechixtomili nopa neskayotl”. 16 Jesús kinankilik: “¿Inmojuantij nojkia ayamo kuali inkikuamachilijtokej? 17 ¿Amo inkiitstokej nochi tlen kalaki ipan tokamak asi ipan toijti uan teipa tijkixtiaj tlen totlakayo? 18 Pero tlen kisa ipan tokamak, uala tlen toyolo, uan nopa kena kisokiuia se maseuali. 19 Pampa iyolijtik se akajya kisa tlalnamikilistli tlen amo kuali: temiktia, momekatia,* auilnemi,* tlachteki, tlakajkayaua uan tlaixpano ika tlen kiijtoua. 20 Ni kena kisokiuia se maseuali, pero kema tlakuaj uan amo momajtekiaj,* amo kisokiuia yon se akajya”.
21 Jesús kistejki nopaya uan yajki ipan tlali Tiro uan Sidón. 22 Uan asito se siuatl katli euayaya Fenicia,* katli itstoya ipan nopa tlali, uan kitsajtsilik: “¡Xinechtlasojtla noTeko, tiiKone David! Noichpoka kipia se amo kuali ajakatl* uan tlauel kitlaijiyouiltia”. 23 Pero Jesús amo tleno kinankilik. Yeka itokilijkauaj kinechkauitoj uan pejkej kiiljuiaj: “Xikiljui ma yaui, pampa chikauak kuatsajtsitinemi toika”. 24 Ya tlanankilik: “Dios san nechtitlanki kampa israeleuanij, katli elij kej pilborregojtsitsij katli mokuapolojtokej”. 25 Pero nopa siuatl ualajki, motlankuaketski iixpa uan kitlajtlanik: “¡NoTeko, xinechpaleui!”. 26 Jesús kinankilik: “Amo kinamiki tikinkuilis konemej ininpantsi para tikinmakas pilchichitsitsij”. 27 Nopa siuatl kinankilik: “Nopa nelia noTeko, pero pilchichitsitsij kikuaj panpayaxtli tlen tepeui mesajtantitla* kema tlakuaj inintekouaj”. 28 Uajka Jesús kinankilik: “Aui, ¡tlauel kuali titlaneltoka! Ma mochiua tlen tijneki”. Uan ipan nopa tlalochtli* iichpoka mochikajki.
29 Kema Jesús yajki sejkanok,* asito ipan se altepetl nechka mar tlen Galilea uan tlejkok ipan se tepetl. Kema nopaya moseuijtoya, 30 kinechkauijkej miakej maseualmej uan kiualikiliyayaj katli metskuachotikej, katli amo ueliyayaj momaoliniaj, katli amo ueliyayaj tlachiaj, katli amo ueliyayaj kamanaltij uan katli kipixtoyaj sekinok kokolistli. Kintlaliyayaj iikxitla uan ya kinchikauayaya. 31 Nopa maseualmej mosentlachilijkej kema kiitakej katli amo ueliyayaj kamanaltij, kamanaltiyayaj; katli amo ueliyayaj momaoliniaj, mochikauayayaj; katli metskuachotikej, kuali nejnemiyayaj uan katli amo ueliyayaj tlachiaj, tlachiayayaj, uan kiueyichijkej ininDios israeleuanij.
32 Uajka Jesús kinnotski itokilijkauaj uan kiniljuik: “Tlauel nikinteikneltiita* ni maseualmej, pampa ya kipiaj eyi tonali itstokej nouaya uan amo kipiaj tlen kikuasej. Amo nijneki ma tlakuepilikaj ika mayantli, pampa uelis tlapolotij ipan ojtli”. 33 Itokilijkauaj kiiljuijkej: “Tlauel uejka kampa tiitstokej... ¿Kanke tijkuisej miak pantsi para ma ixuikaj ni tlauel miakej maseualmej?”. 34 Jesús kintlatsintokik: “¿Keski pantsi inkipiaj?”. Inijuantij kinankilijkej: “Chikome, uan se keskij pilmichtsitsij”. 35 Uajka, kema ya kiniljuijtoya nopa maseualmej ma moseuikaj tlalchi, 36 kikuik nopa chikome pantsi uan nopa michimej, kitlaskamatilik Dios, kitlajkoitak uan pejki kinmajmaka itokilijkauaj, uan inijuantij kinmajmakakej nopa miakej maseualmej. 37 Nochi tlakuajkej uan ixuikej. Uan kisentilijkej chikome kuachikiuitl temitok ika tlakualistli tlen mokajki. 38 Tlakuajkej 4 mil tlakamej, uan amo kinpojkej siuamej yon konemej. 39 Teipa, kema kinnauatijtejki* nopa miakej maseualmej, tlejkok ipan barco* uan asito ipan tlali Magadán.