Apocalipsis

21 Uajka, nikitak se yankuik iluikaktli uan se yankuik Tlaltipaktli; pampa nopa achtoui iluikaktli uan nopa achtoui Tlaltipaktli ya ixpolijtoyaj, uan mar nojkia ayokmo eltok. 2 Nojkia nikitak nopa altepetl tlen tlatsejtseloltik, Nopa Yankuik Jerusalén, temoyaya desde iluikak, kampa Dios* itstok. Uan kiyejyekchijtoyaj kej se ichpokatl katli mokualchijchijtoya para nopa tlakatl katli iuaya mosenkauas. 3 Teipa nijkajki itoskak se akajya tlen kakistiyaya kampa nopa ueyi silla, uan kiijtouayaya: “¡Xikita! Dios mochantijtok kampa maseualmej. Ya itstos ininuaya uan inijuantij elisej ialtepe. Dios nelnelia itstos ininuaya. 4 Uan kiuatsas ininixayo, uan ayokmo aka mikis, yon mokuesos, yon chokas, yon kipias tlakuajkualoli. Nochi tlamantli tlen achtouia techtlaijiyouiltiyaya, ya tlanki”.

5 Katli moseuijtoya ipan nopa ueyi silla kiijtok: “¡Xikita! Nijyankuilia nochi tlamantli”. Nojkia kiijtok: “Xikijkuilo ni tlajtoli pampa eli temachtli uan melauak”. 6 Uan ya nechiljuik: “¡Ya mochijki! Na nieli Ipejya Uan Itlamia.* Nochi katli amikisej nikinmakas ma kiikaj nopa atl tlen temaka nemilistli tlen uala kampa meya* miak atl uan amo nikininamas. 7 Nochi katli tlatlanisej, moaxkatisej ni tlamantli, uan na nielis ininDios uan inijuantij elisej nokoneuaj. 8 Pero katli majmauij, katli amo tlaneltokaj, katli sokiyojkej uan katli kichiuaj tlamantli tlen kiijiaj,* katli temiktiaj, katli auilnemij,* katli tetlajchiuiaj,* katli kinueyichiuaj teteyomej* uan katli istlakatij, kintlauisosej* ipan tlitl tlen eli kej se ueyi akomoli tlen tlatla ika azufre, tlen kiixnextia nopa ompa mikilistli”.

9 Uan nechnojnotski se tlen nopa chikomej ángeles katli kipixtoyaj nopa chikome pilplatojtsitsij tlen komoltik. Nopa pilplatojtsitsij temitoya ika nopa chikome tlaijiyouilistli tlen fiero tlen ika tlami nochi nopa tlaijiyouilistli. Uan ya nechiljuik: “Xiuala uan nimitsnextilis nopa ichpokatl katli monamiktis, katli elis isiua nopa Pilborregojtsi”. 10 Uajka, ika ichikaualis Dios,* nechuikak ipan se tepetl tlen eliyaya ueyi uan uejkapantik, uan nechnextilik nopa altepetl Jerusalén tlen tlatsejtseloltik, tlen temoyaya desde iluikak kampa Dios itstok, 11 uan kipixtoya itlatlanex Dios. Kauaniyaya kej nopa piltetsi tlen tlauel yejyektsi tlen kiiljuiaj jaspe uan pepetlakayaya kej se vidrio tlen tsalantik. 12 Kipixtoya se tepamitl tlen eliyaya ueyi uan uejkapantik, uan kipixtoya 12 puertas uan ipan sejse puerta itstoya se ángel, uan inintoka nopa 12 uejueyi familias* tlen ikoneuaj Israel ijkuilijtoya ipan nopa puertas. 13 Kampa kisa Tonati eltoya eyi puertas, ika norte eyi puertas, ika sur eyi puertas uan kampa kalaki Tonati eyi puertas. 14 Nojkia, nopa tepamitl tlen nopa altepetl kipixtoya 12 tetl tlen ika kitsinpeualtijtoyaj, uan nopaya ijkuilijtoya inintoka nopa 12 iapóstoles tlen nopa Pilborregojtsi.

15 Katli kamanaltiyaya nouaya kipixtoya se akatl tlachijchiuali ika oro para kitamachiuas nopa altepetl, ipuertas uan nopa tepamitl. 16 Uan nopa altepetl kipia naui esquinas, ipatlajka uan iueueyaka eliyaya sanse iuexka. Ya kitamachijki nopa altepetl ika akatl: eliyaya se dos mil doscientos veinte kilómetros;* iueueyaka, ipatlajka uan iuejkapanka eliyaya sanse. 17 Nojkia kitamachijki nopa tepamitl: eliyaya se 64 metros,* kej tlatamachiua se maseuali, nojkia kiampa tlatamachijki nopa ángel. 18 Nopa tepamitl eliyaya kej nopa piltetsi tlen kiiljuiaj jaspe uan nopa altepetl kichijchijtoyaj ika senkistok oro, tsalantik kej vidrio. 19 Itsinpeualtil nopa tepamitl tlen nopa altepetl, kiyejyekchijtoyaj ika miak tlamantli piltetsitsij tlen yejyektsitsij: achtoui kitsinpeualtijkej ika jaspe, ompa ika zafiro, expa ika calcedonia, najpa ika esmeralda, 20 makuilpa ika sardónica, chikuasempa ika sardio, chikompa ika crisólito, chikuexpa ika berilo, chiknajpa ika topacio, majtlakpa ika crisoprasa, 11 ika jacinto uan 12 ika amatista. 21 Nojkia, nopa 12 puertas eliyaya 12 perlas; sejse tlen nopa puerta eliyaya se perla. Uan nopa ueyi ojtli tlen nopa altepetl eliyaya senkistok oro, tsalantik kej vidrio.

22 Nopaya amo nikitak yon se teokali pampa Jehová* Dios, Katli Kipia Nochi Chikaualistli, uan nopa Pilborregojtsi elij nopa teokali tlen nopa altepetl. 23 Nopa altepetl amo moneki kitlauilis Tonati uan metstli, pampa itlatlanex Dios kitlauilia, uan itlauil eli nopa Pilborregojtsi. 24 Altepemej uelis nejnemisej pampa kintlauilis nopa altepetl, uan tlanauatianij katli itstokej ipan Tlaltipaktli kiuejkapantlalisej nopa altepetl. 25 Nochipa kaltlapojtos pampa nopaya amo kema onkas youali. 26 Maseualmej tlen nopa altepemej kitlepanitasej uan kiuejkapantlalisej nopa altepetl. 27 Pero yon se tlamantli tlen sokiyo yon se akajya tlen kichiua se tlamantli tlen kiijiaj uan tlakajkayaua, amo kema kalakis nopaya. San kalakisej katli ijkuilijtok inintoka ipan nopa amamimili kampa kiijtoua ajkia inijuantij kiselisej nemilistli. Ni amamimili iaxka nopa Pilborregojtsi.