Nopa carta tlen kititlanilijkej Tito

1 Na Pablo, itekipanojka Dios* uan iapóstol Jesucristo. Na nitlaneltoka sanse kej tlaneltokaj katli Dios kintlapejpenijtok uan nojkia kuali nikixmati nopa tlamachtili tlen melauak, tlen kinextia kenijkatsa tijtekipanosej Dios ika nochi toyolo, 2 uan motlatskilia ipan nopa nemilistli tlen amo kema tlami tlen tijchiaj tijselisej, tlen Dios, katli amo ueli istlakati, kitenkajki uejkajkia 3 (maske kema asik nopa tonali tlen kinamikiyaya, ya tematiltik itlajtol ika nopa tlajtolmoyaualistli tlen nechnauatijkej ma nijchiua, pampa kiampa tlanauatik toTlamakixtijka,* Dios). 4 Nimitstlajkuiljuilia ta, Tito, katli nelnelia tieli kej nokone pampa sanse titlaneltokaj:

ToTata Dios uan toTlamakixtijka Cristo Jesús ma kinextikaj ueyi ininyolo ika ta* uan ma mitsmakakaj tlaseuilistli.

5 Nimitskajtejki ipan Creta para xijsenkaua tlen kinamiki moxitlauas uan para xikintekitlali ueuejtlakamej ipan sejse altepetl, kej kiijtoua nopa tlanauatili tlen nimitsmakak: 6 se ueuejtlakatl moneki elis se tlakatl* katli amo uelis kitlateljuisej ika yon se tlamantli, katli kipia san setsi isiua uan kinpia ikoneuaj katli nojkia tlaneltokaj uan amo aka uelis kintlateljuis pampa san tlemach tlachiuaj uan tlaijixnamikij. 7 Pampa, kej se itlayakankatlatekipanojka Dios, se tlayakanketl* moneki elis se katli amo aka uelis kitlateljuis ika yon se tlamantli, uan amo kinamiki elis tochontik yon nima kualanis, moneki amo moiuintis yon mosisinis,* yon san kinejnektos kitlanis tomij uan kitemos san tlen yaya kipaleuia. 8 Más kuali, moneki kuali teselis, kiiknelis tlen kuali, kinextis kuali tlalnamiki, kichiuas tlen xitlauak, amo tetlauelkauas uan kuali monauatis.* 9 Moneki motlatskilis ipan nopa tlajtoli tlen melauak* kema tlamachtis, uan kiampa uelis kinyolchikauas* sekinok ika nopa tlamachtili tlen tlauel tepaleuia uan kintlakaualtis katli kiijixnamikij.

10 Pampa itstokej miakej tlakamej, achi más katli tlauel kimanauiaj nopa circuncisión,* katli tlaijixnamikij, kiijtouaj tlen amo tepaleuia uan kinkajkayauaj sekinok. 11 Ni tlakamej moneki ma kinkamatsakuakaj, pampa inijuantij kinkuapolojtokej miakej ika nochi ininchampoyouaj* pampa tlamachtiaj tlamantli tlen amo kinamiki para kitlanisej tomij uan kitemosej san tlen inijuantij kinpaleuia. 12 Hasta se tlen inijuantij, se ininteokamanalojka,* kiijtok: “Katli euaj Creta nochipa istlakatij, elij kej tekuanimej tlen mosisiniaj, sentlakuajtokej uan tlatsiuij”.

13 Ni tlamantli tlen nikijtoua eli melauak. Yeka nojua chikauak xikintlalnamiktijto para kuali ma elto inintlaneltokilis 14 uan amo ma kichiuilikaj cuenta nopa tlatenpoualistli* tlen kipouaj judíos yon inintlanauatil tlakamej katli mouejkatlaliaj tlen melauak. 15 Katli itstokej tlapajpaktikej, kiitaj nochi tlamantli eltok tlapajpaktik. Pero katli amo tlapajpaktikej uan amo tlaneltokaj, amo kiitaj yon se tlamantli tlapajpaktik, pampa kipiaj sokiyo inintlanejneuil uan inintlalnamikilis. 16 Ininixpa maseualmej kiijtouaj kiixmatij Dios, pero ika tlen kichiuaj kinextiaj amo kiseliaj, pampa inijuantij kichiuaj tlen tlauel fiero,* amo kichiuaj tlen kiniljuiaj uan amo uelij kichiuaj yon se tlamantli tlen kuali.