Tlen kiijkuilok Mateo

26 Kema Jesús ya kiijtojtoya nochi ni tlamantli, kiniljuik itokilijkauaj: 2 “Inmojuantij inkimatij ipan ome tonali peuas Pascua, uan Katli Eli iKone Se Maseuali* kitemaktilisej uan kimiktisej ipan se kuauitl”.

3 Uajka, nopa sacerdotes katli kipiayayaj tlanauatili uan katli kinyakanayayaj judíos mosentilijkej ikalteno* sumo sacerdote, katli motokaxtiyaya Caifás, 4 uan sansejko moiljuijkej kenijkatsa kikajkayauaskiaj Jesús para kiitskisej uan kimiktisej. 5 Pero kiijtouayayaj: “Amo ma tikitskikaj ipan iljuitl, pampa maseualmej uelis moajkomanasej”.

6 Kema Jesús itstoya Betania, ichaj Simón katli kipixtoya lepra,* 7 kinechkauik se siuatl katli kiualikayaya se piltekontsi* temitok ika aceite tlen ajuiyak mijyotiyaya uan tlauel patiyo. Kema Jesús tlakuayaya, nopa siuatl pejki kitekilia ipan itsonteko. 8 Kema itokilijkauaj kiitakej nopa, amo kinpaktik uan kiijtojkej: “¿Kenke san kinempolok nopa aceite? 9 Ueltoskia patiyo monamakas uan kiampa nopa tomij tikinmakatoskiaj katli amo tleno kipiaj”. 10 Jesús kimatki tlen kiijtojtoyaj uan kiniljuik: “¿Kenke inkikuatotoniaj ni siuatl? Ya nechchiuilijtok se tlamantli tlen tlauel kuali. 11 Pampa katli amo tleno kipiaj nochipa itstokej inmouaya, pero na amo nochipa niitstos inmouaya. 12 Kema ni siuatl nechtlalilik ipan notlakayo ni aceite tlen ajuiyak mijyotia, nechkualchijchijki para kema nechtlalpachosej.* 13 Temachtli niinmechiljuia, ipan nochi Tlaltipaktli kampa momoyauas ni kuali tlamachtili, nojkia teiljuisej tlen kichijki ni siuatl, uan kiampa kiilnamikisej”.

14 Uajka se tlen nopa 12 apóstoles, katli motokaxtiyaya Judas Iscariote, yajki kinitato sacerdotes katli kipiayayaj tlanauatili 15 uan kiniljuik: “¿Tlake innechmakasej tlaj niinmechmaktilis Jesús?”. Kiiljuijkej kimakaskiaj 30 platatomij. 16 Uajka, desde nopa tlalochtli,* Judas pejki kitemolia kenijkatsa kitemaktiliskia Jesús.

17 Ipan nopa achtoui tonali tlen Nopa Iljuitl Tlen Pantsi Tlen Amo Kipia Levadura,* Jesús itokilijkauaj ualajkej uan kitlatsintokijkej: “¿Kanke tijneki ma titlakualtlalikaj para tijkuas nopa tlakualistli tlen kikuaj ipan Pascua?”. 18 Ya kinnankilik: “Xiakaj Jerusalén, xijtemokaj se tlakatl uan xikiljuikaj: ‘ToTlamachtijka kiijtoua: “Monechkauia nohora.* Mochaj nijchiuas Pascua ininuaya notokilijkauaj” ’ ”. 19 Itokilijkauaj kichijkej tlen Jesús kinnauatik uan kisenkajkej* nochi tlen monekiyaya para Pascua.

20 Kema tlayouixki, ya moseuijtoya kampa mesa ininuaya nopa 12 itokilijkauaj. 21 Uan kema tlakuayayaj, kiniljuik: “Temachtli niinmechiljuia, se tlen inmojuantij nechtemaktilis”. 22 Kema itokilijkauaj kikajkej nopa, tlauel mokuesojkej, uan nochi pejkej kiiljuiaj: “NoTeko, amo nielis na, ¿axke?”. 23 Ya kinnankilik: “Katli kiakechia* ipantsi nouaya ipan plato, ya nopa katli nechtemaktilis. 24 Temachtli Katli Eli iKone Se Maseuali mikis, kej ijkuilijtok kipanos. Pero, ¡teikneltik katli kitemaktilis Katli Eli iKone Se Maseuali! Más kuali amo tlakajtoskia”. 25 Judas, katli nechka kitemaktiliskia, kitlatsintokik: “Tlamachtijketl,* amo nielis na, ¿axke?”. Jesús kinankilik: “Kena, ta tikijtojtok”.

26 Kema nojua tlakuayayaj, Jesús kikuik se pantsi, uan kema ya kichijtoya se tlamaijtoli,* kitlajkoitak, kinmakak itokilijkauaj uan kiniljuik: “Xijkuikaj uan xijkuakaj. Ni kiixnextia notlakayo”. 27 Uan kikuik se copa, kitlaskamatilik Dios,* kinmakak itokilijkauaj uan kiniljuik: “Xikikaj, nochi inmojuantij, 28 pampa ni kiixnextia noeso, ‘estli tlen ika mochiuas se tlajtolsenkauali’,* tlen toyauis para kinpaleuis miakej maseualmej, uan kiampa kintlapojpoljuisej inintlajtlakoljuaj. 29 Pero niinmechiljuia, ayokmo nikis ni vino, hasta nopa tonali kema nikis vino tlen yankuik inmouaya ipan iTlanauatijkayo noTata”. 30 Teipa, kema tlankej uikaj tlen ika kiueyichiuaj Dios, yajkej ipan tepetl tlen Olivos.

31 Uajka Jesús kiniljuik: “Ni youali, kema inkiitasej tlen nechpanos, nochi inmojuantij innechtlauelkauasej,* pampa ijkuilijtok: ‘Nijkokos tlapialmokuitlauijketl uan ipilborregojuaj mosemanasej’.* 32 Uan kema ya nimoyolkuitos,* nitlayakanas Galilea uan nepa timoitasej”. 33 Pedro kinankilik: “¡Maske nochi mitstlauelkauasej,* na amo kema nimitstlauelkauas!”. 34 Jesús kiiljuik: “Temachtli nimitsiljuia, ni youali kema se kuapele* ayamo tsajtsitos, ta expa tikijtos amo tinechixmati”. 35 Pedro kiiljuik: “Maske monekis nimikis mouaya, na amo kema nikijtos amo nimitsixmati”. Uan nochi sekinok itokilijkauaj nojkia kiampa kiijtojkej.

36 Teipa, Jesús yajki ininuaya kampa kitokaxtiaj Getsemaní uan kiniljuik: “Nikaj ximoseuijtokaj, uan na nias achi neka nimomaijtoti”. 37 Uajka kinuikak Pedro uan nopa omej ikoneuaj Zebedeo, uan pejki tlauel mokuesoua uan tlauel motekipachoua. 38 Kiniljuik: “Nijmati ya nimiki* pampa tlauel nimotekipachoua. Ximokauakaj nikaj uan xitlachixtokaj nouaya”. 39 Teipa yajki achi neka, motlankuaketski uan moixtlapachok uan kej ni momaijtok: “NoTata, tlaj uelis, xinechkixtili ni copa.* Pero amo ma mochiua tlen na nijneki, ma mochiua tlen ta tijneki”.

40 Teipa tlakuepilik kampa itstoyaj itokilijkauaj uan kinpantito kochtokej. Uan kitlatsintokik Pedro: “¿Amo uelki inisatosej* nouaya maske san se hora? 41 Xitlachixtokaj uan ajachika* ximomaijtokaj, kiampa amo inuetsisej ipan tlajtlakoli. Kena, inmojuantij tlauel inkinekij inkichiuasej tlen kuali, pero inmotlakayo amo kiijiyouia”.* 42 Ika ompa yajki uan kej ni momaijtok: “NoTata, tlaj amo uelis tinechkixtilis ni copa para amo nikis, ma mochiua tlen ta tijneki”. 43 Sampa tlakuepilik uan kinpantito kochtokej, pampa tlauel kochisnekiyayaj. 44 Uajka sampa kinkajtejki uan ika expa momaijtoto. Uan sampa kiijtok tlen achtouia kiijtojtoya. 45 Uajka tlakuepilik kampa itstoyaj itokilijkauaj uan kiniljuik: “¿Kenke inkochtokej uan inmosiajketstokej ipan se hora kej ni? ¡Xikitakaj! Monechkauijtok hora kema Katli Eli iKone Se Maseuali kitemaktilisej ininmako katli tlajtlakolejkej. 46 Ximoketsakaj, ma tiakaj. Xikitakaj, ya asitiuala katli nechtemaktilis”. 47 Ipan nopa tlalochtli,* kema nojua kamanaltitoya, asiko Judas, se tlen nopa 12 apóstoles, uan iuaya ualayayaj miakej maseualmej ika espadas* uan ika kuauitl. Sacerdotes katli kipiayayaj tlanauatili uan katli kinyakanayayaj judíos, kintitlantoyaj nopa maseualmej.

48 Judas, katli kitemaktiliskia, kiniljuijtoya kenijkatsa kimatiskiaj ajkia eliyaya: “Katli nijtsoponis, yaya eli; xikitskikaj”. 49 Uajka xitlauak yajki kampa itstoya Jesús, uan kiiljuik “¡Yaui,* Tlamachtijketl!”* uan kitsoponik. 50 Jesús kitlatsintokik: “Nouampox,* ¿kenke tiualajtok?”. Uajka kinechkauijkej, kiitskijkej uan kiuikakej. 51 Se katli itstoya iuaya Jesús, kiitskik se espada uan kikopinki, kiteuik itlatekipanojka sumo sacerdote uan kinakastsontejki. 52 Uajka Jesús kiiljuik: “Xikajokui moespada, pampa nochi katli kitekiuiaj espada, nojkia kinmiktisej ika espada. 53 ¿O timoiljuia amo uelis nijtlajtlanis noTata ma kinualtitlani namantsi tlauel miakej* ángeles? 54 Pero tlaj nijchiuaskia nopa, ¿kenijkatsa moaxitiskia iTlajkuilol Dios, tlen kiijtoua kiampa moneki panos?”. 55 Uajka Jesús kiniljuik nopa miakej maseualmej: “¿Inualajtokej ika espadas uan ika kuauitl para innechitskisej kejuak nieliskia se tlachtejketl? Mojmostla nimoseuiyaya kampa teokali uan nitlamachtiyaya uan inmojuantij amo innechitskijkej. 56 Pero nochi ni panotok para ma moaxiti tlen kiijkuilojkej teokamanalouanij”.* Uajka nochi itokilijkauaj kitlauelkajkej* uan cholojkej.

57 Katli kiitskijkej Jesús kiuikakej ichaj sumo sacerdote Caifás, katli mosentilijtoya nopaya ininuaya escribas* uan katli kinyakanayayaj judíos. 58 Pedro kiuejkatokilijtiajki hasta ikalteno sumo sacerdote, uan kema kalajki, moseuik ininuaya katli nopaya tlatekipanouayayaj para kiitas tlake panoskia.

59 Nopa sacerdotes katli kipiayayaj tlanauatili uan Tekichiuanij Katli Kipiayayaj Más Tlanauatili,* kintemouayayaj katli ueliskiaj kiistlakauisej Jesús uan kiampa kimiktiskiaj. 60 Pero amo uelkej kipantiaj yon se, maske yajkej miakej testigos katli san tlakajkayauayayaj. Teipa monextitoj omej 61 katli kiijtojkej: “Ni tlakatl kiijtok: ‘Uelis nijuelonis ichaj Dios uan sampa nijketsas ipan eyi tonali’ ”. 62 Uajka nopa sumo sacerdote moketski uan kitlatsintokik: “¿Amo tleno titlanankilia? ¿Amo tijkaki tlen ika mitstlateljuijtokej?”. 63 Pero Jesús amo tleno kiijtok. Yeka nopa sumo sacerdote kiiljuik: “¡Nimitsnauatia xitlatestigojketsa iixpa Dios katli yoltok uan xitechiljui tlaj ta tieli nopa Cristo, iKone Dios!”. 64 Jesús kinankilik: “Kena, ta tikijtojtok. Pero na niinmechiljuia, desde nama uan teipa, inkiitasej Katli Eli iKone Se Maseuali moseuijtok ika imanejmak Dios katli kipia chikaualistli,* uan ualtemotiuala ipan mixtli tlen iluikak”. 65 Uajka nopa sumo sacerdote kitsayanki iyoyo uan kiijtok: “¡Kiixpanotok Dios ika tlen kiijtoua! ¿Kenke tijnekij más testigos? ¡Xikitakaj, inmojuantij inkikaktokej kitlaijiljuik Dios! 66 ¿Tlake inmoiljuiaj?”. Uan inijuantij kinankilijkej: “¡Moneki mikis!”. 67 Uajka kiixchajchakej uan kimakilijkej ika maitl.* Sekinok kiixtlatsiniyayaj 68 uan kiiljuiyayaj: “Cristo, tlaj tieli teokamanalojketl, xikijto ajkia mitsmakilik”.

69 Pedro moseuijtoya kalixpa, uan se ichpokatl katli nopaya tlatekipanouayaya kinechkauik uan kiiljuik: “¡Ta nojkia tinemiyaya iuaya Jesús katli eua Galilea!”. 70 Pero ya kiijtok ininixpa nochi katli nopaya itstoyaj para amo kiixmatiyaya. Uan kiijtok: “Amo nijmati tlake tikijtoua”. 71 Kema kistiauiyaya kalteno, seyok ichpokatl kiitak uan kiniljuik katli nopaya itstoyaj: “Ni tlakatl nemiyaya iuaya Jesús, katli eua Nazaret”. 72 Uan ya sampa kiijtok amo. Kiijtok: “Dios kiitstok,* ¡na amo nikixmati nopa tlakatl!”. 73 Teipa, katli itstoyaj nopaya kinechkauijkej Pedro uan kiiljuijkej: “Temachtli ta nojkia tinemiyaya ininuaya, pampa kiampa kinextia kej tikamanalti”. 74 Uajka pejki tlatelchiua uan kiijtoua: “¡Dios kiitstok, na amo nikixmati nopa tlakatl!”. Uan nimantsi tsajtsik se kuapele. 75 Pedro kiilnamijki tlen Jesús kiiljuijtoya: “Kema se kuapele ayamo tsajtsitos, ta expa tikijtos amo tinechixmati”. Uan kiski kalixpa uan tlauel chokak pampa tlauel moyolkokok.