Nopa carta tlen kintitlanilijkej Cristo itokilijkauaj tlen Éfeso
6 Konemej, xikinneltokakaj inmotatauaj kej toTeko kineki, pampa ya nopa kinamiki inkichiuasej. 2 “Xijtlepanita motata uan monana”. Ni eli nopa achtoui tlanauatili tlen ika nojkia techtenkauiliaj ni tlamantli: 3 “Para kuali tiitstos uan tiuejkauas miak tonali ipan Tlaltipaktli”. 4 Tetajmej,* amo xikinkualankamakakaj inmokoneuaj, más kuali kema inkiniskaltiaj xikintlalnamiktikaj uan xikinmachtikaj* kej Jehová* kineki.
5 Intlatekipanouanij, xikinneltokakaj inmotekouaj ika nochi inmoyolo uan tlauel xikintlepanitakaj, kejuak inkineltokaskiaj Cristo. 6 Amo san xijchiuakaj kema sekinok inmechtlachiliaj, san para inkinyolpakiltisej maseualmej, xijchiuakaj kej itekipanojkauaj Cristo katli kichiuaj tlen Dios* kineki ika nochi ininnemilis.* 7 Xitlatekipanokaj ika miak pakilistli, kejuak inkitekipanoskiaj Jehová* uan amo maseualmej, 8 pampa inkimatij Jehová* inmechkuepilis sejse tlen inmojuantij nochi kuali tlamantli tlen inkichiuasej, maske inelij intlatekipanouanij o amo. 9 Uan inmojuantij, intekojmej, nojkia kej nopa xikinchiuilikaj inmotlatekipanojkauaj, amo xikintemajmatikaj, pampa inkimatij para inijuantij uan inmojuantij inkipiaj san setsi inmoTeko ipan iluikak, uan ya amo techikoita.
10 Para nitlamis, nijneki niinmechiljuis toTeko nojua ma inmechmakato tetikayotl ika iueyichikaualis. 11 Ximotlalilikaj nochi nopa tepostli tlen ika titlateuiaj* tlen Dios temaka, uan kiampa uelis initstosej intemachmej kema Diablo kitemolis kenijkatsa inmechmasiltis; 12 pampa amo timoteuiaj ika maseualmej katli kipiaj ininnakayo uan inineso, timoteuiaj ika nopa amo kuali ajakamej* tlen itstokej ipan iluikak katli elij tekichiuanij, kipiaj tlanauatili uan tlanauatiaj ipan ni Tlaltipaktli kampa onka tsintlayouilotl. 13 Yeka, ximotlalilikaj nochi nopa tepostli tlen ika titlateuiaj tlen Dios temaka, kiampa kema asis nopa tonali tlen amo kuali, uelis inkiijiyouisej, uan kema ya inkichijtosej nochi tlen moneki, initstosej intemachmej.
14 Yeka, xiitstokaj intemachmej uan nochipa ximotlalilijtokaj inmotsinkechilpika tlen kiixnextia tlen melauak, ximotlalilikaj nopa tepostli tlen kitsakua nochi inmoyolix* tlen kiixnextia inkichiuasej tlen xitlauak 15 uan ximotlalilijtokaj inmohuaraches, kiampa inmokualchijchijtosej para intematiltisej nopa kuali tlamachtili tlen kichiua xijpiakaj tlaseuilistli. 16 Uan amo san nopa xijpixtokaj, nojkia xikitskikaj nopa ueyi inmotepostsajka* tlen kiixnextia intlaneltokaj ipan Dios, tlen ika uelis inkiseuisej nochi flechas* tlen lementok katli Axkualtlakatl inmechmajkauilia. 17 Nojkia xijuikakaj inmotepostsontsajka* tlen kiixnextia kenijkatsa inmechmakixtisej,* uan nopa espada* tlen ichikaualis Dios* tlen kiixnextia itlajtol Dios. 18 Uan nojkia nojua ximomaijtojtokaj* uan xijkauakaj ma inmechyakana ichikaualis Dios, xijchiuakaj nochi tlamantli tlamaijtoli uan chikauak xitlajtlanikaj. Para inkichiuasej nopa, kuali xitlachixtokaj uan ajachika xitlajtlanikaj por nochi katli Dios kiniyokatlalijtok.* 19 Nojkia ximomaijtokaj por na, para kema nikamanaltis nijmatis tlake nikijtos uan kiampa amo nimajmauis nitematiltis tlen Dios ayamo tematiltia* tlen nopa kuali tlamachtili. 20 Dios nechtitlantok ma nitematilti nopa kuali tlamachtili, yeka niilpitok ika cadenas. Uajka nojkia ximomaijtokaj para amo ma nimajmaui nitematiltis nopa kuali tlamachtili, kej kinamiki nijchiuas.
21 Tíquico, se toikni katli nikiknelia uan eli se toTeko itekipanojka katli temachtli, inmechiljuis nochi tlen nijchijtok uan kiampa inkimatisej kenijkatsa niitstok. 22 Nijtitlani kampa inmojuantij para inkimatisej kenijkatsa tiitstokej uan para ma inmechyolchikaua.
23 ToTata Dios uan toTeko Jesucristo ma kinpaleuikaj toikniuaj para ma kipiakaj tlaseuilistli, ma teiknelikaj uan ma tlaneltokakaj. 24 Dios ma kinexti ueyi iyolo ika nochi* katli kiikneliaj toTeko Jesucristo ika se tlaiknelili tlen amo kema tlami.