Nopa achtoui carta tlen kintitlanilijkej Cristo itokilijkauaj tlen Tesalónica

3 Yeka, kema ayokmo uelki timoijiyouiaj para tijmatisej tlen inmojuantij, timoiljuijkej más kuali timokauasej toselti ipan Atenas, 2 uan tijtitlankej kampa inmojuantij Timoteo, toikni uan itekipanojka* Dios* katli tematiltia nopa kuali tlamachtili tlen Cristo. Tijtitlankej para ma inmechyoltetili uan ma inmechyolchikaua para kuali intlaneltokatosej, 3 uan kiampa amo aka kaxanis itlaneltokilis pampa kiixnamiki ni tlaouijkayotl. Pampa inmojuantij inkimatij amo uelis tijtsakuilisej ni tlaijiyouilistli para amo ma techpano. 4 Kena, kema tiitstoyaj inmouaya nochipa tiinmechiljuiyayaj tikixnamikiskiaj tlaouijkayotl, uan kej ya inkimatij, kiampa panotok. 5 Yeka, kema ayokmo uelki nikijiyouia para nijmatis tlen inmojuantij, nijtitlanki Timoteo para nijmatis tlaj nojua intlaneltokayayaj, pampa nijmakasiyaya Diablo ueltoskia inmechyoltilanas para intlajtlakolchiuasej uan toteki eliskia san tlapik.

6 Pero Timoteo namanok asiko uan techpouiliko kuali tlamantli tlen inmojuantij pampa kiijtoua amo inkitlauelkajtokej Dios uan inteikneliaj. Nojkia kiijtoua para nochipa intechilnamikij ika tlaiknelili uan tlauel inkinekij intechitasej sanse kej tojuantij tijnekij tiinmechitasej. 7 Yeka noikniuaj, kema tijkakij tlen inmojuantij uan kenijkatsa amo inkitlauelkauaj Dios, tlauel intechyolchikauaj ipan nochi tlaijiyouilistli uan tlaouijkayotl tlen tikixnamikij. 8 Pampa tojuantij timoyoltlananaj kema tijmatij initstokej intemachmej ipan toTeko. 9 ¿Uan kenijkatsa tijtlaskamatilisej Dios por inmojuantij uan pampa inkichiuaj tlauel ma tiyolpakikaj iixpa? 10 Tonaya uan tlayoua tijtlajtlaniaj Dios ika nochi tofuerzas para uelis tiasej tiinmechitatij uan tiinmechpaleuisej ika tlen moneki para más kuali xitlaneltokakaj.

11 ToTata Dios uan toTeko Jesús ma kitlapokaj toojui para uelis tiasej tiinmechpaxalotij. 12 Uan toTeko ma kichiua ma momiakili,* kena, tlauel ma momiakili nopa tlaiknelili tlen inkinextiaj se ika seyok uan nojkia ika sekinok, sanse kej tojuantij tlauel tiinmechikneliaj, 13 para ma inmechchiua intemachmej ipan inmoyolo uan para amo inkipiasej yon se tlamantli tlen amo kuali uan inelisej intlapajpaktikej iixpa toTata Dios kema toTeko Jesús tlakuepilis* ininuaya nochi katli Dios kiniyokatlalijtok.*