Tlen kiijkuilok Lucas
15 Uan nochi katli tlainamayayaj impuestos uan tlajtlakolchiuanij monechkauiyayaj kampa ya para kitlakakilisej. 2 Uan nopa fariseos* uan escribas* kitlaijiljuiyayaj uan kiijtouayayaj: “Ni tlakatl kuali kinselia tlajtlakolchiuanij uan tlakua ininuaya”. 3 Uajka Jesús kiniljuik ni neskayotl: 4 “Tlaj se tlen inmojuantij kinpixtok 100 borregojmej uan kipoloua se, ¿amo kinkaua nopa 99 kampa onka sakatl uan yaui kitemoua katli mokuapolok hasta kipantis? 5 Kema kipantia, kikechpanoua uan tlauel yolpaki. 6 Uan kema asi ichaj, kinnotsa iuampoyouaj* uan ikalnechkauaj uan kiniljuia: ‘¡Xiyolpakikaj nouaya, pampa nijpantik noborrego tlen mokuapolojtoya!’. 7 Niinmechiljuia, nojkia onkas más pakilistli ipan iluikak ika se tlajtlakolchijketl katli moyolkuepa que ika nopa 99 katli kichiuaj tlen kuali uan amo moneki moyolkuepasej.
8 ”O tlaj se siuatl kipia matlaktli platatomij* uan kipoloua se, ¿amo kitlatia* se tlauili, tlachpana kalijtik uan kuali kitemoua hasta kipantis? 9 Uan kema kipantia, kinnotsa iuampoyouaj uan ikalnechkauaj uan kiniljuia: ‘¡Xiyolpakikaj nouaya, pampa nijpantik noplatatomij tlen nijpolojtoya!’. 10 Niinmechiljuia, nojkia iángeles Dios* tlauel yolpakij kema se tlajtlakolchijketl moyolkuepa”.
11 Uajka kiijtok: “Se tlakatl kinpixtoya omej ikoneuaj. 12 Uan katli teipaejketl kiiljuik itata: ‘Papá, xinechmaka tlen nechmelaua nijselis’. Uajka nopa tetaj kinxexeljuilik ikoneuaj tlen kipixtoya. 13 Kema panok se keski tonali, katli teipaejketl kisentilik nochi tlen kipixtoya uan yajki ipan seyok altepetl tlen uejka mokauayaya, kampa san kinempolok tlen kimakatoyaj pampa amo kuali monejnemiltiyaya. 14 Kema ya kitlamiltijtoya nochi itomij, onkak se ueyi mayantli ipan nopa altepetl, uan ayokmo kipixki tlen kikuas. 15 Hasta pejki kitekipanoua se katli nopaya euayaya, uan ya kititlanki imilaj ma kinmokuitlauiti pitsomej. 16 Uan tlauel mayanayaya, yeka kinekiyaya kikuas tlen pitsomej kikuayayaj, pero amo aka kimakayaya tlen kikuas.
17 ”Kema motlalnamiktik, kiijtok: ‘¡Itlatekipanojkauaj notata kipiaj miak tlakualistli* uan na nikaj nimayankamiktinemi!* 18 Nias uan nitlakuepilis ichaj notata uan nikiljuis: “Papá, nitlajtlakolchijtok iixpa Dios* uan moixpa. 19 Ayokmo kinamiki xinechita kej mokone. Xinechita kej se motlatekipanojka” ’. 20 Uajka yajki uan tlakuepilik ichaj itata. Kema nojua uejka ualayaya, itata kiuejkaitak uan tlauel kiteikneltiitak.* Motlalojtejki uan kinamikito, kinajnauajki uan kitsoponik ika miak tlaiknelili. 21 Uajka ikone kiiljuik: ‘Papá, nitlajtlakolchijtok iixpa Dios uan moixpa. Ayokmo kinamiki xinechita kej mokone’. 22 Pero nopa tetaj kinnauatik itlatekipanojkauaj: ‘¡Ximoisiuiltikaj! Xijkixtikaj se yoyomitl tlen ueueyak,* tlen más kuali, uan xijyoyontikaj. Xijtlalilikaj se anillo ipan imakpil uan ihuaraches. 23 Nojkia, xijualikakaj nopa piluakaxtsi katli tomauak uan xijmiktikaj para titlakuasej uan tiiljuichiuasej pampa tlakuepilik, 24 pampa ni nokone miktoya uan moyolkuik, mokuapolojtoya uan tijpantijtokej’. Uan pejkej iljuichiuaj.
25 ”Iachtouikone itstoya milaj. Kema tlakuepilik uan asitiauiyaya ichaj, kikajki uikachiuayayaj uan mijtotiyayaj. 26 Yeka kinotski se tlatekipanojketl uan kitlatsintokik tlake panoyaya. 27 Ya kinankilik: ‘Moikni tlakuepilik, uan motata kimiktik nopa piluakaxtsi katli tomauak pampa ikone tlakuepilijtok ika kuali uan amo tleno kipanok’. 28 Pero iachtouikone kualanki uan amo kinejki kalakis. Uajka itata kiski uan pejki kitlajtlania ma kalaki. 29 Ya kinankilik itata: ‘Xikita, nochi ni xiuitl nimitspaleuijtok kej se tlatekipanojketl uan nochipa nimitsneltokatok; pero ta amo kema tinechmakak se pilchivojtsi para ma niiljuichiua ininuaya nouampoyouaj. 30 Pero san onasiko ne mokone katli kinempolok motomij ika siuamej katli monamakaj,* ta tijmiktilik nopa piluakaxtsi katli tomauak’. 31 Uajka itata kiiljuik: ‘Nokone, ta nochipa tiitstok nouaya uan nochi tlen nijpixtok eli moaxka. 32 Pero monekiyaya tiiljuichiuasej uan tiyolpakisej, pampa moikni miktoya uan moyolkuik; mokuapolojtoya uan tijpantijtokej’ ”.