Nopa carta tlen kintitlanilijkej Cristo itokilijkauaj tlen Roma
4 Uajka, ¿tlake tikijtosej kiselik Abrahán, totata katli uejkajkia itstoya? 2 Tlaj Dios* kiijtojtoskia Abrahán eliyaya xitlauak ika tlen kichijtoya, Abrahán ueltoskia moueyimatis, maske amo iixpa Dios. 3 Pampa, ¿tlake kiijtoua iTlajkuilol Dios? “Abrahán tlaneltokak ipan Jehová* uan ya kiitak eliyaya xitlauak”. 4 Pampa tlen kitlaxtlauiaj se katli tekiti amo eli se regalo, kitlaxtlauiaj pampa kitlantok.* 5 Pero kema se tlakatl tlaneltoka ipan Dios, ya kiita xitlauak pampa tlaneltoka uan amo pampa kichiua miak tlamantli. Uan eli Dios katli ueli kinita maseualmej xitlauakej maske tlajtlakolejkej. 6 David nojkia kiijtok kenke yolpaki se tlakatl katli Dios kiita xitlauak pero amo ika tlen kichiua: 7 “Yolpakij katli kintlapojpoljuijtokej tlen amo kuali tlen kichijkej* uan katli kiixpolojtokej inintlajtlakoljuaj; 8 yolpaki nopa tlakatl katli Jehová* ayokmo kiilnamikis itlajtlakol”.
9 Uajka, ¿yolpakij san katli mochiuilijtokej circuncisión* o nojkia katli amo mochiuilijtokej?* Pampa tikijtouaj: “Dios kiitak Abrahán eliyaya xitlauak pampa tlaneltokak”. 10 Uan, ¿kema kiitak Dios para eliyaya xitlauak? ¿Kema ya mochiuilijtoya circuncisión o kema ayamo? Kema ayamo mochiuilijtoya circuncisión. 11 Uan Dios kiiljuik ma mochiuili circuncisión para ma nesi nelnelia eliyaya xitlauak, pampa tlaneltokak maske ayamo mochiuilijtoya circuncisión. Kiampa panok para ma eli inintata nochi katli tlaneltokaj, maske amo mochiuilijtokej circuncisión, para Dios ma kinita xitlauakej, 12 uan para ma eli inintata miakej katli mochiuilijtokej nopa circuncisión, amo san katli kena kiampa kichiuaj, nojkia katli ipan ininnemilis kinextiaj tlaneltokaj sanse kej totata Abrahán kema ayamo mochiuilijtoya circuncisión.
13 Pampa Dios amo kintenkauilik Abrahán o iteipaixuiuaj para kiseliskiaj nochi Tlaltipaktli pampa kineltokayayaj nopa Tlanauatili, Dios kitenkauilik nopa pampa tlaneltokak uan yeka kiitak xitlauak. 14 Pampa tlaj kiselisej tlen Dios kitenkajki san katli kichiuaj tlen kiijtoua nopa Tlanauatili, uajka san tlapik eliskia tlaj se akajya tlaneltoka, uan tlen Dios kitenkajki amo nelia mochiuaskia. 15 Kena, kampa onka Tlanauatili, kichiua ma kikualankamakakaj Dios, pero kampa amo onka tlanauatili amo aka ueli kiixpano.
16 Yeka, tlen Dios kitenkajki tijseliaj pampa titlaneltokaj, para ma nesi ueyi iyolo ika nochi,* kiampa tlen kitenkajki temachtli kiselisej nochi iteipaixuiuaj, amo san katli kichiuaj tlen kiijtoua nopa Tlanauatili, nojkia katli tlaneltokaj kej totata Abrahán. 17 (Kiampa kej ijkuilijtok: “Nijchijtok xieli inintata miakej altepemej”). Abrahán kinextik tlaneltokayaya ipan Dios, katli kichiua ma moyolkuikaj katli miktokej uan kiijtoua tlamantli tlen ayamo mochiua kejuak ya mochijtoskia.* 18 Ya motemachik eliskia inintata miakej altepemej maske nopa nesiyaya amo ueliskia panos, uan tlaneltokak ipan tlen kiiljuijkej: “Kej ni ininmiaka elisej mokoneuaj”. 19 Uan maske amo kaxanki itlaneltokilis, kena moiljuiyaya ayokmo kinpiaskia ikoneuaj, pampa ya kipixtoya se 100 xiuitl, uan Sara ya eliyaya nanatsi uan amo ueliyaya kinpia ikoneuaj. 20 Pero Abrahán amo moiljuik tlaj kena o amo moaxitiskia tlen Dios kitenkauilijtoya yon kaxanki itlaneltokilis; ya más tlaneltokak uan yeka kipixki chikaualistli, uan kiampa kiueyichijki Dios 21 uan nelnelia motemachiyaya Dios ueliskia kichiuas tlen kitenkauilijtoya. 22 Yeka, “Dios kiitak eliyaya xitlauak”.
23 Pero nopa tlajtoli “Dios kiitak” amo moijkuilok san para ya, 24 nojkia moijkuilok para tojuantij, katli techitasej tixitlauakej pampa titlaneltokaj ipan Dios katli kiyolkuik toTeko Jesús. 25 Ya kitemaktilijkej para ma miki pampa titlajtlakolejkej uan moyolkuik* para Dios ma techita tixitlauakej.