Nopa carta tlen kintitlanilijkej Cristo itokilijkauaj tlen Éfeso
4 Uajka na, katli nitsaktok pampa nieli itokilijka toTeko, niinmechtlajtlania ximonejnemiltikaj kej kinamiki monejnemiltisej katli Dios* kinnotstok: 2 yon kentsi ximoueyimatikaj, xielikaj inyolyamanikej* uan xijpiakaj inmoyolo; ximoijiyouikaj se ika seyok ika tlaiknelili; 3 xijchiuakaj kampeka para initstosej sansejko kej ichikaualis Dios* kichijtok xiitstokaj uan xijpiakaj tlaseuilistli se ika seyok. 4 Onka san setsi tlanechikoli* uan eli san setsi ichikaualis Dios, sanse kej nojkia inmechnotskej para inkichiasej inkiselisej san setsi tlamantli. 5 Itstok san setsi toTeko, onka san setsi tlaneltokili uan san setsi atsonpoliuilistli. 6 Itstok san setsi Dios katli eli nochi ininTata, katli kinauatia nochi, ya techtekiuia tinochi para kichiuas tlamantli uan itetikayo tekiti ipan nochi tlamantli.
7 Dios kinextijtok ueyi iyolo ika sejse tlen tojuantij* uan elki Cristo katli techxexeljuilik ni regalo. 8 Pampa iTlajkuilol Dios kiijtoua: “Kema yaya tlejkok uejkapa, kinuikak ilpitokej katli kintlanki; temakatejki tlakamej kej regalos”. 9 Pero, ¿tlake kiijtosneki “yaya tlejkok”? Kiijtosneki achtoui temok tlatsintla, nikaj ipan Tlaltipaktli. 10 Katli temok, yaya eli katli nojkia tlejkok kampa más uejkapa tlen iluikak para uelis kichiuas ma moaxiti nochi tlamantli.
11 Uan sekij kintekimakak kej apóstoles, sekij kej teokamanalouanij,* sekij kej katli tematiltiaj nopa kuali tlamachtili, sekij kej tlamokuitlauianij uan tlamachtianij. 12 Kintekimakak para kintlalnamiktis* katli Dios kiniyokatlalijtok,* para kintekipanosej sekinok uan para kichiuasej ma moskalti itlakayo Cristo 13 hasta kema nochi tiitstosej sansejko ipan tlen titlaneltokaj uan kuali tikixmatisej iKone Dios, hasta kema ya timoskaltijtosej kej se tlakatl katli ya ueyi uan tielisej kej Cristo ipan nochi tlamantli. 14 Uajka ayokmo ma tielikaj kej konemej; pampa katli kitokilia nopa tlamachtili tlen amo melauak tlen kimoyauaj katli kinkajkayauaj sekinok, elis kej se barco tlen eltok ipan mar uan ajakatl uan atl kampa ueli* kiuikatinemi. 15 Pero tojuantij, ma tikijtokaj tlen melauak uan ma tijnextikaj titeikneliaj uan kiampa timoskaltisej ipan nochi tlamantli para timonejnemiltisej sanse kej Cristo, katli techyakana.* 16 Ika ya, nochi partes tlen kipia itlakayo kuali mosalojtok* uan mopaleuiaj pampa isasalijya kichiua tlen moneki. Kema sejse parte tlen itlakayo kuali kichiua iteki, tlapaleuia para nochi itlakayo kejuak kuali ma moskalti uan nochi ma moiknelikaj.
17 Yeka niinmechiljuia uan niinmechtlajtlania ipan itoka toTeko para ayokmo ximonejnemiltikaj kej maseualmej katli amo tlaneltokaj, katli moyakanaj ika inintlalnamikilis tlen amo tlapaleuia. 18 Inintlalnamikilis eltok kejuak ipan tsintlayouilotl uan mouejkatlalijtokej tlen nopa nemilistli tlen Dios temaka pampa amo kinekij kiixmatisej uan mochijtokej tochontikej.* 19 Kema kichiuaj tlen amo kuali ayokmo moyolkokouaj, yeka amo pinauaj tlajtlakolchiuasej* uan amo kema ixuij* para kichijtinemisej tlamantli tlen tlauel sokiyo.
20 Pero inmojuantij inkiyekojkej para Cristo amo kiampa tlachiuayaya, 21 pampa inkikajkej uan inmechmachtijkej nopa tlamachtili tlen melauak tlen Jesús tlamachtik. 22 Inmojuantij inkiyekojkej moneki inkitlauelkauasej inmonemilis tlen achtouia inkipiayayaj uan ayokmo inmonejnemiltisej kej achtouia inkichiuayayaj, pampa nopa nemilistli tlen achtouia inkipiayayaj nempolijtia* pampa inmechkajkayauayaya nopa amo kuali tlamantli tlen inmechyoltilanayaya. 23 Moneki nojua inkipatlatiasej kej inmoiljuiaj* 24 uan moneki inkipiasej se inmonemilis tlen yankuik sanse kej Dios kineki, uan kiampa inkichiuasej tlen xitlauak uan nelnelia inkineltokasej Dios ika nochi inmoyolo.
25 Uajka, pampa nama ayokmo intlakajkayauaj yon se kentsi, sejse tlen inmojuantij ma kiniljui sekinok tlen melauak, pampa nochi tojuantij kejuak timosalojtokej se ika seyok. 26 Kema inkualanisej, amo xitlajtlakolchiuakaj; amo xikualantokaj se tonal.* 27 Amo xijkauilikaj yon kentsi ma kalaki Diablo. 28 Katli tlachteki, ayokmo ma tlachteki, nama ma tekiti chikauak uan ma kichiua se kuali tekitl ika imax, uan kiampa kipias se tlenijki para kinmakas katli amo tleno kipiaj. 29 Amo xikijtokaj tlajtoli tlen sokiyo.* Más kuali xikijtokaj tlen kinyolchikauas sekinok kema monekis uan xikijtokaj tlen kinpaleuis katli inmechtlakakiliaj. 30 Nojkia, amo xijkuesolmakakaj* ichikaualis Dios tlen tlatsejtseloltik, tlen ika Dios inmechtlalilijtok se sello para nopa tonali kema inmechmajkauas* pampa yaya tlaxtlajki para inmechmakixtis.*
31 Ayokmo ximokualankamakakaj ika tlen inmechchiuilijkej, ayokmo ximosisinikaj, ayokmo xikualanikaj, ayokmo xitekuatsajtsilikaj yon xijtekiuikaj tlajtoli tlen teyolkokoua, uan nojkia ayokmo xijchiuakaj yon kentsi tlen amo kuali. 32 Más kuali xijpiakaj kuali inmoyolo se ika seyok, ximoiknelikaj uan ximotlasojtlakaj, uan ximotlapojpoljuikaj ika nochi inmoyolo sanse kej Dios inmechtlapojpoljuik ika nochi iyolo ika Cristo.