Nopa achtoui carta tlen kiijkuilok Pedro
2 Uajka ayokmo xijchiuakaj yon se tlamantli tlen amo kuali, amo xitlakajkayauakaj, amo xijpiakaj ome inmoxayak, amo xitekokolikaj* uan yon kentsi xiteistlakauikaj. 2 Sanse kej se pilkonetsi tlen namanok tlakatki tlauel kineki leche, inmojuantij nojkia tlauel xijnekikaj inkitemosej itlajtol Dios tlen melauak, tlen eli kej leche tlen senkistok kuali uan uelis inmechpaleuis ximoskaltikaj para uelis inmomakixtisej,* 3 pero kiampa xijchiuakaj kema ya inkiitstosej kenijkatsa toTeko kipia kuali iyolo.
4 Kema inmonechkauiaj kampa ya, katli eli kej se tetl tlen yoltok tlen maseualmej amo kiselijkej, pero Dios* kitlapejpenik uan kipatiita, 5 inmojuantij katli inelij kej tetl tlen yoltok, inelij kej se kali tlen mochijchiua ika ichikaualis Dios,* para inelisej sacerdotes katli tlatsejtseloltikej* uan kiampa intemaktilisej ofrendas* tlen Dios kiselis ika Jesucristo pampa inmechyakana ichikaualis Dios. 6 Pampa ipan iTlajkuilol Dios kiijtoua: “¡Xikitakaj! Ipan Sion nijtlalia se tetl tlen nijtlapejpenik, se ueyi tetl tlen tlauel ipati kampa nochi motsintetonia, uan katli tlaneltokas ipan ya, amo kema mopinaualtis”.*
7 Yeka, inmojuantij inkiitaj tlauel ipati pampa inelij intlaneltokanij. Pero katli amo elij tlaneltokanij, kiitaj “nopa tetl tlen kalchiuanij amo kinejkej kitekiuisej, ya nopa mochijtok nopa ueyi tetl kampa motetonia ome tepamitl”,* 8 uan “se tetl tlen kichiua maseualmej ma motepotlamikaj uan se ueyi tetl tlen kinojtsakua”. Inijuantij motepotlamiaj pampa amo kineltokaj itlajtol Dios. Ya nopa moixtlalijtoya para kinpanoskia. 9 Pero inmojuantij inelij “se ueyi familia* tlen kitlapejpenijtokej, sacerdotes katli tlatekipanouaj kej tlanauatianij, se altepetl tlatsejtseloltik, ialtepe Dios tlen ya kitlapejpenijtok para elis iaxka, para ejeliuis* intematiltisej nopa yejyektsitsij tlamantli tlen kinextia” katli inmechkixtik kampa tsintlayouilotl para inmechuikas kampa itlauil tlen tlauel yejyektsi. 10 Pampa achtouia inmojuantij amo ineliyayaj se altepetl, pero nama inelij ialtepe Dios; achtouia inmojuantij amo inmechtlasojtlatoyaj, pero nama kena inmechtlasojtlatokej.
11 Noikniuaj katli niinmechiknelia, katli inelij kej sejkanok* euanij uan katli amo nochipa mokauaj ipan se tlali, niinmechtlajtlania nojua xijchiuakaj kampeka para amo inkichiuasej tlen inmotlakayo kineki, tlen nojua kejuak inmechteuijtok. 12 Kuali ximonejnemiltikaj ininixpa maseualmej, kiampa kema inmechtlateljuisej para inkichijkej tlen amo kuali, inijuantij kiitasej nopa kuali tlamantli tlen inkichiuaj, uan kiampa kiueyichiuasej Dios ipan nopa tonali kema nochi kitlachiliki.
13 Pampa inkichiuaj tlen toTeko kineki, xijkauakaj ma inmechyakanakaj nochi tekichiuanij tlen maseualmej kintlalijtokej, tlaj eli se tlanauatijketl katli kipia más tlanauatili, 14 o nopa gobernadores, katli nopa tlanauatijketl kintitlantok para ma kintlatsakuiltikaj katli kichiuaj tlen amo kuali uan ma kinuejkapantlalikaj katli kichiuaj tlen kuali. 15 Pampa Dios kineki, inmojuantij kuali ximonejnemiltikaj, uan kiampa inkinkamatsakuasej* katli uiuitikej uan amo kimatij tlake kiijtouaj. 16 Xiitstokaj kej maseualmej katli majkajtokej,* pero amo xijtekiuikaj nopa para inmotechtisej uan kiampa inkichiuasej tlen amo kuali, más kuali xijtekiuikaj para inelisej itlatekipanojkauaj Dios. 17 Xikintlepanitakaj nochi maseualmej, xikiniknelikaj nochi toikniuaj, xijmakasikaj Dios, xijtlepanitakaj nopa tlanauatijketl.
18 Tlatekipanouanij ma kikauakaj ma kinyakanakaj inintekouaj uan ma kintlepanitakaj kej kinamiki, amo san nopa tekojmej katli kuali ininyolo uan katli amo san kitemoliaj ma mochiua tlen inijuantij kinekij, nojkia katli amo tleno kinpaktia. 19 Pampa Dios kuali kiita katli kichiua kampeka kipias kuali itlalnamikilis iixpa kema kiijiyouia tlaouijkayotl uan tlaijiyouia maske amo kichijtok tlen amo kuali. 20 Pampa tlaj inmechmakiliaj pampa intlajtlakolchiuaj, ¿kenijkatsa inmechpaleuia tlaj inkiijiyouiaj nopa? Pero tlaj inkiijiyouiaj tlaouijkayotl pampa inkichiuaj tlen kuali, nopa kichiua Dios tlauel ma yolpaki.
21 Kena, yeka inmojuantij inmechnotskej, pampa Cristo tlaijiyouik por inmojuantij uan kiampa inmechnextilik kenijkatsa inkichiuasej kej ya para uelis senkistok inkitokilisej tlen kichijki. 22 Ya amo kichijki yon se tlajtlakoli uan amo kema tlakajkayajki. 23 Kema san tlemach kitlaijiljuiyayaj, ya amo kintlaijiljuik. Kema tlaijiyouiyaya, amo kintemajmatik. Ya kikauilik nochi nopa tlamantli ipan imako katli xitlauak tetlajtolsenkaua. 24 Ya kiuikak totlajtlakoljuaj ipan itlakayo kema kikuapilojkej ipan kuauitl, para ma techmakixti tlen totlajtlakoljuaj uan ma tiitstokaj para tijchiuasej tlen xitlauak. Uan “pampa kikokojkej, inmojuantij inmochikajkej”. 25 Pampa inmojuantij ineliyayaj kej pilborregojtsitsij tlen mokuapolojtoyaj, pero nama intlakuepilijtokej kampa inmotlamokuitlauijka uan katli kiyakana inmonemilis.*